蓮莖巷

唯有強硬執法（下）

2011-12-30T01:17:00.002+08:00

「老記」先行一步，十分令人惋惜。以「老記」多年經驗，面對過咁多大場面（包括身陷火警爆炸現場而受傷等），都能一一安然度過。可惜最後竟然被一宗十分無謂的交通意外，結束佢豪邁嘅一生。有人質疑點解咁多人唔守交通規則，就連斑馬線都唔停車讓行人先通過。其實小城今日唔讓斑馬線行人已經成為社會問題。各種車輛只要有機會可以稍為加速，就會喺城內亂竄，最嚴重莫過於叫「綿羊仔」嘅鐵馬，呢種「綿羊仔」其實一啲都唔溫純，平日不時喺大小道路上穿插，害得唔少其他道路使用者擔驚受怕，而衝燈、逆駛、穿插於斑馬線上的行人等，根本去到無法無天嘅地步。甚至連個別衙差交警亦都知法犯法，趁深宵時分無乜途人，直接貪方便將公家鐵馬逆駛至簽得簿地點簽到，呢種唔趕時間但係貪方便嘅行為模式，經已植根於一眾選用鐵馬出行的一群人中，而小城每年十多宗的死亡交通意外，絕大部分都跟鐵馬扯上關係，亦都成為小城最危險的交通工具之一。
　另外，剛完成的高士德重整工程中，當局為咗擴大主幹道的交通流量，將附近橫街道路上的泊車位取消，本身原意不錯，可提高流量紓緩擠塞情況。不過可惜嘅係流量提高嘅同時，間接令到該帶車速提升，雖然當局增設大量紅綠燈作調節，但亦未能改善驚險場面繼續經常出現。反正唔理當局點樣點樣用行為模式去協助改善交通問題，貪方便唔守法嘅人都會繼續搵位偷雞，要阻止問題繼續蔓延落去，當局唯有強硬執法以收警誡之用，方可制止情況繼續惡化。

仲有乜嘢令老記早走？（上）

2011-12-30T01:17:00.001+08:00

資深記者竟然在斑馬線上被撞低，最後成為小城另一交通意外的亡魂。原本冬至佳節個個都等收工返屋企食飯，結果於最受保護之行人安全道「斑馬線」上被撞傷，至送院後不久不幸離世，全世界都大感意外之餘，相信死者本人最估唔到會有呢種意外。熟悉「老記」嘅朋友都知道，「老記」乃土生土長地道老澳門，亦都係事發地點附近「由細玩到大」，親眼目睹出事地點由海傍處處浮木的船廠，變做今日出事的馬路。加上長年接受前線記者的「在職培訓」，對小城街道及環境可謂瞭如指掌，早就練得一身好武功識得自我保護。可惜嘅係隨著小城百業興旺人手不足，大部分人嘅生活節奏都變得急促好多，趕返工趕收貨送貨，甚至趕住去送禮送殯都有。而「老記」近年亦被不斷日益增加嘅突發性工作搞到疲累不堪，加上年紀上揚身手反應難免有所減退。事實上，「老記」的報道生涯亦是十分硬啃，一直站喺報道最前線嘅突發記者崗位，差唔多等於戰地記者，有乜大遊行甚至暴動級數嘅場面，行家必定見到佢出現，而一眾庶民亦都能夠喺電視熒光幕上親眼目睹，「老記」曾被縱火狂徒燒著爆炸的電單車所炸傷。多年工作上嘅付出，身體其實經已五癆七傷，要避上一輛趕住送貨趕到暈嘅貨車真係談何容易。今次嘅不幸事件，令到好多人都驚覺，點解一個咁有經驗同埋咁識得自我保護嘅人，都可以喺一宗簡單交通意外中身亡。除咗係交通意外之外，仲有乜嘢係令到「老記」生命就此結束？

只想草草了事

2011-12-30T01:16:00.001+08:00

嘈咗成年嘅「墓地門」事件，官方最後報告出咗，話發現唔到有人涉嫌濫權，亦無人違法，力圖推翻老廉指有人涉嫌濫權嘅指控。但係自從事件爆咗出嚟之後，相關證據陸續浮面。以管家婆由舊政權「過渡」到今日嘅官府，唯有佢有能力趁兩邊官府都未管到小城最大最複雜嘅部門，就算前朝早有立例明令只有重大貢獻嘅人，至可以安葬舊墳。而新舊官府過渡期只係短短年多，就被人鑽到空子，以不法手段進行利益輸送，就算當年唔係管家婆直接批出，涉嫌私相授受就肯定有分，就算以小城今日嘅法律治佢唔到，都唔等於佢可以洗脫責任。老廉今次查到有嫌疑，只可惜未有執法嘅權力。但係知縣命令民署交出點樣去完善墓地管理嘅報告，就好明顯咁偏幫管家婆，尤其係似幫佢解釋多過似份報告。報告內容主要指新法舊法嘅衝突亦唔存在矛盾，又以經分析「法律承認既得權利」，所以話無人濫權。而老廉指摘嘅原文件遺失更被報告指「純屬誤會」，最後就係加強管理同教育大家無事啦，佢哋擺明當全城庶民死嘅。
　任何一宗事件有太多嘅誤會、巧合、一時遺漏等，加埋一齊就等於係陰謀。呢趟民署交出嚟報告，除咗係想淡化事件扮無嘢之外，更重要係想帶出一種政治壓力，事關檢察院仲係進行調查中，而家交份報告出嚟，列明佢哋嘅法律觀點，都想話俾檢察部門聽，佢哋可以用咁嘅理據去進行抗辯，有實質證據至好出手，明顯係「大」緊調查當局，而事實上民署貴為小城管理同混亂嘅官府部門，就連佢哋自己內部都未搞得清楚啲問題點樣發生又點樣解決咗，局外人要查出蛛絲馬跡又談何容易，所以報告只想大家草草了事就算。

禁煙搵老闆嚟搞

2011-12-30T01:15:00.001+08:00

明年開始，小城正式禁煙。呢個對於小城嚟講，自林則徐以嚟最大型嘅禁「煙」運動，終於去到落實執行層面。但喺之前通過咗嘅控煙法，官府好大程度上，將就咗字花檔嘅經營，准許佢哋喺室內設禁煙區，而唔係好似其他公眾地方咁，一律列為禁煙。因為咁樣，淨係條例都有爭議，要大家落實執行都幾有難度。官府雖然話早就請咗幾十人做控煙督察，不過齋睇鄰埠搞咗幾年，都仲係經常發生煙民同店東、督察衝突事件，就知道執法並唔容易。講真，小城一般庶民其實都好識做，只要商家店舖話店內禁煙，大部分人都了解而識趣配合，話晒都係河蟹社會，唔會搞乜嘢，最多係飲大兩杯，先至會嘈兩句。相反，依家小城每日有成十萬八萬旅客進出，其中六七成又係「煙民大國」嘅人民，雖然話唔係個個都粗魯野蠻，但若果遇到雞同鴨講，發生衝突根本就預咗。再加上其餘三四成旅客中又夾雜唔少非洲、南美洲等地旅客，就算官府宣傳上有幾足夠，相信都無可避免地會發生不愉快事件，到時旅遊局、衙差，甚至危機辦都可能有好多嘢做，唔知官府有無計埋呢條數落去呢？唔少茶餐廳老闆都話，官府做啲唔做啲，遇到蠻不講理嘅，佢哋根本就唔識得點招架，只可以見步行步，因為自己都唔能夠、亦都無時間同對方解釋點解字花檔可以食煙而茶餐廳就唔得。不過最離奇嘅係，店東或者負責人，若發現有客人喺店內食煙而唔作出制止或舉報，店東或負責人則會被罰款，咁就分明係搵佢哋嚟搞。◇

財爺魔術穿崩

2011-12-30T01:14:00.003+08:00

呃咗官府塊地多年嘅星麗門，到而家都仲係唔清唔楚。而財爺則由早兩年嘅鐵定唔會再加賭檯，到今日嘅垃圾會上公開話：若果項目無博彩元素，發展商好難喺市場融資。好明顯財爺係同緊發展商講好說話，而且口風仲係慢慢咁轉。
　財爺被追訪時表示，放唔放星麗門俾佢哋開賭檯，要視乎當時嘅環境而定，到目前為止都仲未收到對方嘅申請，而財爺嘅同事起樓司就確認項目裡面無賭檯。
　財爺係出爾反爾，與及跟同事嘅口供唔夾，好肯定講句係維護緊商界利益。塊地咁多年都仲係爛地，發展商本身就責無旁貸，無錢無本事就唔好向官府充大頭鬼。但偏偏官府又易呃，咁俾塊地任由荒廢又唔追又唔理，明明係閒置用地早就要收返，結果被上手公司搵到人落疊，將成間公司賣盤一鋪就賺咗幾十億，好過你起完一輪之後仲要守番三五七年嘅字花檔，相比外資公司就真係做足晒功課，話起就起資金亦到位。呢個最強騙局轉到落富二代接火棒，財爺等世叔伯梗係要射住，結果好巧妙咁慢慢由無賭檯，變成唔一定有、佢哋未申請，跟住批唔批賭檯視乎當時情況，又加番少少無賭檯間嘢籌唔到錢起，相信到最後財爺只會話視乎情況俾佢哋放幾張檯，又或者係整體賭檯數目唔變，要佢哋嘅其他字花檔轉賭檯過嚟等等藉口，開幕時可能得十張八張貴賓檯，過多兩年就變成百幾張中場檯咁嘅招數過骨。財爺啲戲屎就唔係而家至知，早年由三個字花牌變六個字花牌，簡直係變魔術咁變，不過係穿崩魔術，到而家又重施故技，咪當庶民係流嘅。

最豪新聞局

2011-12-30T01:14:00.001+08:00

話咁快唔夠兩個禮拜，官府一輪衝鋒就搞完個「商議式」民調，去查下民間對官府準備修訂嘅《出版法》同《視聽廣播法》有乜意見。不過唔搞猶自可，搞咗好唔妥。民調問卷一出，業界率先發難，指民調方式極之導向性，根本就唔係民調，仲被業界發現就議式小組討論時，竟然出現一圍十多人中竟有大部分係官媒同一機構嘅同事，正一痴痴呆呆坐埋一枱，唔止係導向性，直頭係種票。咁樣嘅民調調嚟做乜鬼？索性場戲都慳番，直接俾三百幾萬個機構交份預先砌好嘅民調，然後叫佢哋啃掂佢就算數，反正場戲都咁屎不如唔做好過做。最離譜嘅係阿局長竟然話大家可以討論好多嘢，官府無既定立場。如果係咁點解官府要推呢個修法建議？只係因為太舊唔適合現代環境？咁點唔合適又唔講清楚，更重要嘅係官府修法嘅方向究竟係點，到而家阿局長都仲係支支吾吾神神秘秘，想令公眾同埋新聞從業員協會接受都幾難。
　鄰埠家陣玩緊知縣選舉，有候選人批評被某媒體抹黑，媒體老闆突然開記招發難，大大聲聲話做過嘅嘢怕乜認！呢啲就係新聞自由，大家可以隔空互炳話之你，只要唔好涉及人身攻擊或誹謗，反正真相只會越辯越明。新聞局點解要咁偷摸搞民調，背後原因我哋都唔想推測，事關而家官府想搞乜都無用，就算個民調報告係點都無人會信，只會被人話場戲做得唔好睇即請立刻回水。官府提出嘅修法建議裏面寫明，建議設立出版委員會同新聞評議會，而家局長又話官府只係問業界會唔會設立呢兩個會，亦都唔會指定乜嘢人去做呢個會嘅委員，咁即係點？若果業界要設立自己內部嘅專業委員，早就自己搞咗唔使佢操心，玩咁多花臣使幾百萬最終講句咁嘅嘢，豪完三千幾萬而家再豪三百幾，果然係最豪新聞局

借屍還魂（下）

2011-12-30T01:10:00.002+08:00

傳媒工作者協會強硬反對修訂《出版法》同《視聽廣播法》，明顯因為新法肯定會收緊新聞自由，若果唔係又邊度需要修訂呢？當然，大家習慣咗個遊戲規則，現在話要改所以要反對，呢種心態都好正常。但係協會今次反對嘅其中幾個理由就十分清楚。首先小城嘅傳媒一早就有官方介入，早就天下皆知。而且本地嘅自我審查機制十分成熟，官府無必要再用法例去規管同扼殺僅有嘅新聞自由。況且小城仲未出現英國環球新聞報嘅竊聽同埋修改短訊等嚴重嘅新聞事件，亦都未出現好似鄰埠般狗仔風盛行嘅傳媒文化，而且一直都好規矩，甚至連內地傳媒流行嘅感性報道，喺小城都係少之又少，無端端又加強規範嚟做乜呢？
　另外《出版法》中設立嘅出版委員會，喺西洋鬼時代都曾經推出過，就係因為新聞界強烈反對下，舊官府先至撤回方案。而家自己人當家作主，竟然呢個官方設立嘅委員會想借屍還魂，用嚟控制番自己人，呢個究竟係乜嘢官府？況且官府本身經已有官媒同管理機關「新聞局」，多份大報同電子媒體都受緊官府資助，比鄰埠甚至其他外地主要傳媒，官府嘅介入經已大到不能接受，而家仲要整多個委員會嚟規管，好明顯係官府有人別有用心，唔想傳媒再爆料怕保唔住官府形象。本來小城愛國傳媒早就遍地開花，過往一直同官府都相安無事，點解今次官府係都要搞壇咁嘅嘢？係都要同傳媒對立至開心？若果最終連同視聽廣播法一齊，將互聯網都納入規管範圍，然後強行立法的話，相信官府最好訓練定多啲保安隊。

新聞自由有幾重要？（上）

2011-12-30T01:10:00.001+08:00

官府推出新嘅《出版法》同《視聽廣播法》，下個月就會進行民調睇反應。由於下月之民調方式與一般民調唔同，叫做商議式民調，係集合咗一班隨機抽樣嘅庶民經多次問卷調查之後，再一齊討論，期間可以進行發問，之後就制訂調查結果。所以局長早幾日就同一班前輩大佬，及媒介嘅一眾專業人員，進行咗交流活動，順帶推介同埋重申官府立場。佢就梗係話新法係以保障言論自由做出發點，所以唔係針對新聞界，只不過係防止新聞自由被濫用咁話。
　不過傳媒工作者協會就唔賣佢賬，即時向外界發表公開聲明，駁斥現在業界同社會未有共識，亦未有逼切性需要進行立法，而且庶民更加對新法一頭霧水嘅情況底下，官府就咁進行民調根本就係不負責任。更重要嘅係反對個出版委員會同新聞評議會嘅官府背景，亦都關注官府會否將網絡媒體都納入新法嘅監管範圍。
　我哋班庶民真係唔係好識得法律，亦都唔太清楚新聞自由有幾咁重要，不過淨係知道如果無咁多庶民及衙差一齊幫綠巴推車嘅相喺媒體上面曝光，大家可能都唔知間新巴士公司有咁多問題，又或者如果唔係有媒界報道新聞局以三千幾萬批咗俾一間公司搞小城嘅十年成就展，而鄰埠先至用幾百萬，使大人哋咁多，局長都未必會做到咁乞人憎。若果無傳媒揭發，我哋又點會知道，管家婆趁住回歸前後，豪咗小城十幅矜貴墓地俾自己友，老廉同埋檢察當局都係因為收到投訴，至會開立卷宗進行深入調查。雖然最終都有可能不了了之，但亦係咁樣，我哋至有機會睇清楚阿立法主席，點樣打壓代議士追問呢個問題。所以話新聞自由係幾咁重要呢！

政制諮詢無準備（下）

2011-12-30T01:09:00.001+08:00

施政報告首次提及政制發展，知縣話明年會著手進行諮詢同埋向中央了解手續點做。中聯辦即刻反應好快咁發表聲明，話俾大家聽嘅嘢係中央話事，示意大家唔好有不必要嘅幻想。
　當然過去咁多年，小城庶民都係活喺一個有統治者嘅地方，只不過今天由西洋人改為北大人咁解者。所以今次知縣突然間拋個波出嚟話會對政制改革進行諮詢，唔少庶民都無準備。事關過去就算庶民有得選代議士，大家都見到我哋嘅垃圾會有做過啲乜嘢，選嚟又有乜大作為呢？所以庶民都習慣咗你有你官府管治，我有我喺大牌檔茶餐廳爆粗發洩，從來都溝唔埋。去到壓力爆煲就上街抗議表達訴求，中間嘅協調機制根本唔見得有發揮過作用，枉官府每年仲派咁多錢俾班社團都唔知為乜。大家淨係睇我哋民選票后表明，覺得有需要保留官委代議士，就知道佢有幾認真咁代表庶民發聲。話到明官委就梗係代表官府發聲同埋幫手起草法例，不過條例係官府拋出嚟，條例係好係醜都係俾庶民批而唔係叫庶民受，根本就唔使多幾個人去幫口。若果係咁就唔使拋出法例等批，直接出行政命令就搞掂，係都要做場大龍鳳出嚟有乜意思呢？莫非咁就表現到官府治理得宜？官府咁多年出咗咁多施政報告出嚟，都係俾大家監察官府做事唔好空口講白話。結果咁多年嘅施政報告執行率低到咁，庶民嘅不滿除咗係對官府之外，垃圾會呢班所謂嘅代議士究竟有做過啲乜大家都好清楚，負責監察而交唔到功課，民選嘅就話可以用選票去罰佢哋，官委又唔使負責之餘，仲要累埋你哋呢班民選議員一齊被大家鬧垃圾會無做嘢，究竟閣下有幾大民意支持呢？唔怪之得知縣突然拋出嘅政制發展諮詢，大家都呆晒！

轉移視線(上)

2011-12-30T01:08:00.001+08:00

知縣來年計劃再派七千，實行咗多年嘅派糖政策一直都唔敢變。相對於過去嘅幾份施政報告，今年全世界都話無點變過。不過今年叫做肯明確咁表示嘅卻有幾樣嘢，就係直截了當咁講：「喺我任內，莊荷職位係唔會開放輸入外勞」。另外，首次涉及小城政制發展，會進行公開諮詢。
　派七千係人都預咗，之前有人放風話會派成萬添！所以今年退場唔成反而要加碼，明年續派根本就係指定動作。至於莊荷職位話唔會開放俾外勞，呢樣嘢尚算明智。事實上呢幾年小城經濟全賴字花檔嘅經營，至會將生產總值增長推到百分之廿幾嘅新高，相對西洋多個國家就面對緊債務違約嘅風險，每年只有百分之一、二嘅增長，你都咪話唔嚇人。但係全城庶民嘅收入中位數，一直維持喺萬元左右無點變過。雖然官府出口術話，接近萬元收入者增多所以中位數唔變，但唔等於庶民收入無改善。玩數字遊戲班官點夠荷官嚟吖！所以知縣明言在任期間唔會開放呢個職位俾外勞，佢都好明白呢條底線，係會直接影響一大班希望增加收入改善生活嘅中低層庶民，所以直頭連考慮都唔會。而影響庶民生活另一個最大嘅就係住屋問題。今次知縣話會落實萬九之餘，亦會開展六千三公屋規劃作儲備。就咁聽就真係好似做到嘢咁，不過大家唔好誤會，佢講緊嘅係萬九全部動工，並唔係萬九起好晒。過去我哋都講過唔好話交樓，萬九呢個數官府根本就連落成都做唔到。齋講未做到，轉咗口風之餘，又拋多個六千三出嚟試圖轉移視線，實質過去幾年嘅報告執行率有幾高，大家都知道。

死亡條件（下）

2011-12-30T01:07:00.001+08:00

早兩日大橋又發生奪命交通意外，係繼上月尾鐵馬司機被大巴追撞輾斃之後第二單，前後相距時間只不過係半個月多啲，點解咁短時間又整一單大鑊嘢？上次鐵馬司機漁翁街上斜被交警截停後，竟然被後面巴士追撞輾斃。至於早兩日呢單，則係鐵馬乘客被司機失平衡下拋咗落路面，然後被旁邊駛經嘅發財大巴輾過而出事。新公交模式下巴士固定班次多咗，路面壓力相應大增，而鐵騎士則一直好享受自駕點對點嘅便捷出行，好耐都無使用過公交服務，兩樣加埋一齊就造成第一單慘劇嘅發生。而第二單意外則係車速問題引致意外發生，不過大巴司機竟然以為車到雜物，去到引橋至識打電話報警。事件反映大巴司機除咗唔留意路面情況之外，更顯示因為新公交模式下公共巴士班次時間有壓力，以及巴士夠大部無有怕等複雜嘅駕駛問題。小城而家嘅生活節奏越嚟越快，要出門都要用最快嘅時間抵達目的地。新公交模式諗住解決問題但係又唔成氣候，近排路面又經常周圍掘洞製造陷阱，完全係以上兩單慘劇發生嘅必要條件。然而呢兩個必要嘅死亡條件都係官府一手一腳搞出嚟，官府叫人盡量使用公交避免路面壓力增大，其實咁塞車嘅情況底下庶民根本都唔係好想才查車出街，佢哋搞出嚟嘅新公交模式運作唔暢順，達唔到預期目標叫庶民點信你？而原本可以好容易控制同埋解決嘅大巴數量問題，官府就一直唔出手。官府只要增加發牌條件要大巴有車位至可以購置，早就可以限制大巴數量增長而唔會有咁多大巴日日喺小城路面走動，而且大巴泊位不足，造成隧道口油站一帶不時出現驚險場面，遲早會再發生嚴重交通意外。

黑處未算黑（上）

2011-12-30T01:05:00.003+08:00

交通黑暗期，官府一早事先張揚，不過最黑暗嘅係黑處未算黑。早前高士德重整工程加快咗，俾庶民有個錯覺，以為可以早日「脫苦海」。點知原來無咁好彩不特止，淨係睇吓呢排處處掘路，你就知道黑暗期仍然未過。官府安排高士德重整，刻意喺暑假期間加快工程，將對學校嘅影響減到最低，呢樣十分抵讚。不過既然識得咁處理，同樣道理點解唔將南灣嘅重整道路工程，同樣都安排喺暑假進行呢？若果官府認為暑假旅客多影響大，所以安排喺十月同十一月至進行修整，咁莫非呢兩個月又唔係小城嘅旅遊旺季咩？每年藝術節美食節等乜節物節，官府同主辦單位都係安排呢兩個月進行，唔好講話大家都力爭祖國黃金週旅客，傳統上任何旅遊城市都知道乜嘢係金秋旅遊旺季。而且小城仲有一年一度嘅重頭戲「格蘭披」，淨係舉行前都要成個月去準備重鋪路面，五十幾年嘅經驗乜嘢都預計到。咁點解係都要安排喺呢啲咁重要嘅日字嚟做咁多整路工程，唔少地方嘅修整根本就完全同大賽車無關，係唔係做開有癮？定係覺得反正一早事先張揚咗，大家唔捱都捱咗咁耐，庶民同車主都應該可以接受到呢？唔好唔記得官府剛剛至搞咗壇新公交模式出嚟，到而家只不過係兩個多月，新巴士公司都未算做運作良好，現在再搞到周圍掘路設置陷阱，其實係咪想累死間新巴公司呢，仲賴塞車係因為小城車輛經已增至廿萬，老實講究竟係邊個唔限制發財巴旅遊巴嘅數量不斷發牌呢？除咗搞亂檔之外，根本用意就係唔想大家才查車出街，咁不如安排小城無車月，全城庶民都要行路返工返學就算啦。

車檻過高？(下)

2011-12-30T01:05:00.002+08:00

官府近日首次批出路環兩幅細地，為解決前朝留落嘅紗紙契問題，以小試水溫嘅方式，批出廿五年租賃期，而承租人只需付出萬零蚊作為溢價金，就可以起一幢三層高單一業權嘅樓宇。今次官府嚴格規範，去試圖為解決問題搵出路都係一個辦法，亦可以講官府作出首次讓步。首先承批條件喺三年內要完成土地開發使用無得延期，五年之內又唔可以改變土地用途，亦都唔可以將土地部分或全部轉讓，死咗就另計。就算承批人要向錢莊借錢起樓，都要官府批准至得。至於建成後嘅物業五年內亦只可以做局部分租，唔可以全幢租出，租約都要交官府存底。就算唔使錢都唔可以全幢俾晒外人用。今次官府嘅嚴謹規範批地，主要係路環舊城區內，其他地區暫時唔處理。
　過往唔少村民都一直宣稱擁有土地，而無視回歸時兩個政府所簽訂嘅土地協議，唔知道呢種土地問題其實早已解決，咁多年嚟一直進行間歇性抗爭。今次官府拋出呢個方案，有村代表都表示歡迎。但係就指門檻太高，應該簡化審批程序降低門檻，以減低社會矛盾。老實講就算點唔妥官府，都無理由咁多代人都唔張塊地喺官府進行登記，理據其實唔係咁足夠。而今次官府用咁嚴格嘅規管嚟俾大家做案例，就係唔想俾某啲人以為可以有機可乘混水摸魚。若果官府降低門檻，草草批出土地俾大家亂咁起樓搵水，到時候只會加大社會矛盾不利穩定發展，喺今時今日大家注重保護環境同集體回憶嘅大勢之下，官府更加要嚴密把關，好讓固有嘅風光唔會一次過被所謂嘅發展所破壞。

車檻過高？(上)

2011-12-30T01:03:00.001+08:00

近日有商會喺報紙刊登公開信，質疑官府輕軌招標門檻過高，要求投標公司要有曾經承辦五億元外海工程嘅經驗，根本就將本地業界拒諸門外。而商會嘅負責人兼代議士表明，發公開信係要官府制訂專業認證制度，以創造空間予小城嘅中小企。
　講真，今次業界嘅行動大家都明白，因為輕軌建設乃一大項目，涉及唔少主幹以外嘅工程，都好似可以分一部分俾小城嘅公司參與。不過問題係鐵路系統小城從來都未做過，可以話無一間公司有經驗，咁你叫官府點樣批俾大家呢？況且輕軌涉及大眾安全嘅重大公眾利益，萬一日後出咗事，小城嘅中小企又負唔負擔得起責任嘅問題呢？我哋唔敢講外國大公司一定安全，只係經驗比各位豐富，起碼有安全比率嘅數字大家睇。再加上小城連進行驗收嘅一方，作為把關嘅官府都無呢種經驗，就更加只會向有經驗嘅公司招手，所以就算今次唔批俾大家都好正常。反而我會覺得，今次官府應該將工程判俾國際公司，但係要求佢哋搵本地公司合作進行技術轉移，教識大家點樣起鐵路同埋安全指標如何。咁樣，大家就可以喺第二期工程裏面進行投標，以示公平。當然，好多城市都唔會一次過起晒所有鐵路就算數，總會有第二期第三期，若果有心想喺輕軌工程上分一杯羹，好應該投放技術人員同埋時間去學習，之後至可以有道理同官府講點解唔批小城嘅公司做，而唔係一開始就話官府將個門檻定得太高，拒絕小城公司參與。不過坦白講外地唔少集體運輸系統，最終都交由外國公司做管理甚至營運，都係同本地公司有無好好學習有關，如果唔係全世界可以起現代鐵路嘅公司點解來來去去都得嗰幾間呢！

「內傭」豬仔（下）

2011-12-30T01:02:00.000+08:00

喺小城人力咁缺嘅情況之下，輸入外地工人好多人都會贊同，但佢哋嘅出發點，只係想維持平價人力支出，而收取不斷提高嘅服務費用。但唔夠人做嘢，一齊開工嘅本地同事都只能贊成搵多幾個人幫手，結果呢樣嘢其實係一個死局。小城今日全城都係服務業單一結構，最多只有少量嘅無煙生產，根本就係產業結構出咗問題。只係大家仍然覺得服務業搵到錢，就忽略生產嘅重要性。小城過去都只有輕工業而無重工，所謂重工都只不過係漁業造船，所以官府準備打造甚麼中醫藥科技園都係無辦法之下諗出嚟，希望最後唔好學鄰埠嘅數碼港咁最終變咗做地產項目明益地產佬。但官府有幾信得過大家都心照，淨係睇今次準備輸入「內傭」，就知道呢啲一切都只不過煙幕，大家心照。有資格引入內地勞工就只有幾家公司，佢哋眼見本地勞務市場興旺準備染指，事關佢哋至係勞務專業，販賣人口專家，幾多內地勞工去中東油國幫手起樓、去巴基斯坦築鐵路，甚至早前喺泰國被殺咗眾多國內船夫，都係經佢哋手將國民輸出至世界各地當勞工，當中利潤之大根本無人知。只不過係幾百年嚟經小城賣到海外嘅豬仔勞務，到今日其實都未停止過。先進發達如鄰埠咁，到而家都未考慮引入「內傭」，其實就係一早睇到問題所在，市場應該唔易接受，相反小城官府咁進取，實情係早就另有打算。君不見而家所有發財車、旅遊巴同特種接待嘅運輸服務，都係判俾幾間「國內企業」，只要官府肯實際執行有關法例，過界司機根本就唔會存在。但大家淨睇幾個官府部門互相推波，就知道官府根本就唔會執法，涉及利益實在太大啦！所以引入「內傭」其實都只係提供多個渠道俾大企引入更多唔同種類嘅「外勞」咁解啫。

輸入「內傭」要三思（上）

2011-12-30T01:00:00.001+08:00

「內傭」輸入有突破性發展，財爺透露口風話小城草擬中嘅家傭法接近完成，等同內地部門落實批覆後，就可以到小城打工。當年小城輸入外傭主要服務官府部門，結果造成阿公阿婆去官府都要識番文，至有門口入。經過多年嘅習慣同適應，依家梗有一位外傭喺你左近，甚至你嘅樓上樓下都可能係外傭鄰居。由於文化同生活習慣各異，有適應唔到或者溝通唔到嘅庶民就經常同外傭發生爭執。搵番同聲同氣嘅「內傭」幫手，同鄰舍街坊，甚至家中長者嘅照顧都更方便。雖然有人擔心「內傭」會玩博炒而避開過冷河制度，但若果對方真係要玩嘢，僱主想避都避唔到。因為唔理「內傭」或者外傭，法律有漏洞就一定會有人想偷雞，唔係就唔使立法啦。反而大家要關心嘅係有意聘請「內傭」嘅人要注意，財爺話先行試驗省內人及福建同鄉，同埋年紀要較大。即小城最多人口嘅兩大鄉里，簡單講句就係好容易融入社會，同埋年紀大啲比較識得照顧老幼。不過問題就嚟嘞。容易融入社會即係佢哋好快就可以建立個人網絡，年紀較大就代表佢哋待人處事有足夠成熟度，兩樣加埋等於好快就可以搵到更好出路，要好「內傭」能夠穩定安心咁幫你照顧屋企，你出嘅條件需要有足夠嘅付出，至可以防止佢哋玩嘢博炒，因為佢玩嘢僱主最慘嘅唔係自己受影響，而係屋企人會受影響，所以風險唔細。另外一個風險係佢哋好容易融入社會，亦都好容易喺小城搵男友（點計小城都唔會有人請內地男家傭啩），所以佢哋唔單止可以好容易同你嘅鄰舍混熟，亦都會同樓下個看更好快就熟，唔擔保佢咁好彩喺度搵到個好歸宿，你又要重新搵過個人幫你手睇住，況且而家內地其實比小城更缺乏人才，好嘅都唔想離鄉別井出外打工，有興趣者真係要諗清楚至好

請極都唔夠（下）

2011-12-30T00:51:00.000+08:00

負責行政同法務嘅主要官員，咁多年都唔使對司法人員數量、同埋司法機關設施不足負上責任，依然可以安坐其位。除無民望之外，多年來都有官府嘅行政程序同方式，都招致承辦公共服務嘅商業機構進行訴訟。好明顯一人執掌行政同埋法務根本就係權力過大，再加上兩個範疇經常互想抵觸，唔小心處理就會出現官府被告嘅場面，既然出現過幾次行政當局被提訴訟，即係話負責人根本未能勝任職務。
　而法院院長更指出，好多時行政當局嘅決定只係因為程序疏漏或者對法律認識不足，以致法院唔認同當局嘅決定。作為統領小城兩大範疇嘅主事人難辭其咎，小城近年發展一日千里，唔少外商同埋新興行業都希望進駐小城參與發展，問題係小城嘅行政同法律效率都遠遠滯後於國際，法律一日唔完善，叫外資同商人點敢投資喺本地市場呢？主理經濟部分嘅同袍就捱餐死佢就咁他條，點解官府仲可以這樣呢？再者佢又繼「走資司長」事件之後，爆出小城官府最高級官員醜聞嘅「墓地門」事件。司法年度日檢察長被問到「墓地門」事件嘅時候表明，事件仲未完，會爭取年底完成調查工作，而主要係調查方向，係睇吓有無人涉嫌妨礙司法公正。事發咁多年至被人爆出嚟，佢都坦言唔容易搜證。咁難怪到今時今日司法人員都請唔夠人，若果請到足夠人手，可能呢份專登為佢而開立嘅卷宗會很快就完成調查工作，到時法院有足夠效率審理案件，佢想拖到自己完官之後都幾難。

從來都唔使負責（上）

2011-12-30T00:50:00.000+08:00

一年一度司法年度又開始，知縣照例話優化司法機關設施，同埋培訓人才提升素質。問題係終審法官年年都問緊官府何時至有新大樓正式辦公室，同埋培訓到足夠嘅法官同檢察官幫手做嘢。事實上法院每年積壓嘅個案有增無減，唔係法官或檢控官唔做嘢。只係近年小城經濟活動大幅增加，而且開放賣賭亦增加咗唔少不同類型罪案，再加上近年庶民對提出訴訟維護權益嘅意識增加，令到法院就算幾努力，都唔能夠將案件積壓數字減低。雖然早前先至任命咗幾位年輕法官，以補充人力資源不足，不過只係杯水車薪幫唔到幾多。自從回歸後小城每年講緊司法改革、培訓人才、改善法院嘅運作效率。到今日講咗成十幾年，睇嚟睇去都唔見有乜嘢重力改善，反而每年又產生唔少新案件，垃圾會每年又審理同通過新法案，令到法院工作量大增，至於新法院大樓到而家都只係劃塊地出嚟，石仔都仲未有一舊。睇番咁多年以嚟除終審法院同垃圾會有獨立辦公建築物之外，其他法院都只能夠屈喺一間商業大廈嘅某一層，除對控辯雙方當時人十分唔方便之外，保安工作亦係一大難題。當年就算走資司長一案，亦都被唔少媒體嚟大廈走廊對到正咁影相，十分唔人道，亦都對案件審訊造成影響。過咗咁多年，情況依然無變。而律師公會理事長更開炮，以而家每年積壓案件嘅增長速度，唔明點解官府唔向外聘請足夠司法官嚟填補人力不足。可惜主要負責嘅官員，到而家都依然在位，懶理得大家每年開幕禮上都鬧一次，佢從來都唔使負責，問佢亦都唔會同你交代做成點。

上車睇定啲（下）

2011-12-30T00:49:00.000+08:00

同樣係官樓，鄰埠知縣剛推出最新施政報告，揭示重建官樓助民置業，仲開埋價單最平大約百五至二百萬一間。報告一出即刻被鄰埠庶民鬧爆，直指官府開出條件太優厚，俾個樓會大家抽六合彩隨時中獎咁話。鄰埠嘅嘢我哋唔評論，但何謂貴平真係有唔同角度。小城官樓唔使過百都有人話貴，但鄰埠唔夠二百就被人鬧送錢俾人，可想而知兩地民情之不同。鄰埠官府收入絕大部分都靠一般庶民辛勞打工後交稅而嚟，鬧你派錢益人梗係聲大大。但小城官府嘅收入則大部分靠字花企業交出稅收，大部分庶民都唔使俾稅，點解又要鬧官樓賣得貴呢？其實就小城官府搞開放字花業之後，除經濟發達咗之外，出現人手唔夠，官府唯有如同經營者一樣，要安撫幫字花公司打工嘅庶民，維持字花業正常運作同興旺，所以要起官樓俾一班低下階層，令佢哋實現置業夢。不過今次竟然有人會質疑官府起樓有錢賺，請問呢班人憑乜嘢唔准官府起樓有錢賺呢？就係因為庫房水浸所以唔應該賺錢？咁係唔係官府起埋層樓出嚟，俾大家即刻拎去二手市場轉讓賺番筆，然之後至叫做官府還富於民有所擔帶？咁其他大部分唔合資格但辛辛苦苦儲錢自置物業嘅人，官府又係唔係應該做番啲嘢表揚佢哋辛勞工作呢？係咁不如唔使起樓直接派錢更加實際啦，反正官府經已年年派，不如一次過豪啲每人派幾十萬，大家鍾意買乜就買乜。再者官樓仲有種只租唔賣，覺得買官樓唔抵可以直接租官樓，不過官樓租盤唔夠貨，反正大家排隊都排咗咁多年，唔差在等多一兩年。況且未來幾年外圍經濟唔好勢必影響小城甚或加息，上唔上車真係要認真三思。

上車睇定啲（上）

2011-12-30T00:48:00.001+08:00

大家望穿秋水，終於等到公屋有得揀樓，而官府嘅承諾亦都開始進入倒數期。公佈訂價一出，各界眾說紛紜。有謂價格太高唔合理，當然亦有意見指可以接受。事實上以平均呎價售千二多，五百呎兩房單位隨時要七八十萬，今時今日唔好講新樓，就算二手市場都唔可以話貴。有政界人士指，今次官樓採用嘅禁售期後轉讓補差價嘅方式去限制買家換樓或出售，將私人市場同官樓掛鉤，令到上車人士要承擔多重風險。不過司長回應時指出，由於法律明確規範合資格嘅買者，所以官府起樓根本就無諗過賺錢問題，完全以購買者嘅承受能力出發，去釐定價格，合資格者應該小心考慮自身情況至好上車。只不過問題係各位輪候緊嘅家庭，除咗考慮自己嘅能力同層樓抵唔抵買之外，未來經濟會變成點無人知，就算係官樓，都要搞按揭，而且講吓都十幾年，若果唔清楚未來想點就唔好輕易上車以免日後後悔。況且今日睇可能好筍，但今次開售嘅永寧咁遲至出到台，除咗為條法律之外，更重要者係收樓期都拖咗咁耐，可以想像到本身建築上做得唔係幾好，至會有官府驗收要咁耐時間。當然，官樓若果收樓後發現有問題，都可以搵官府維修，但當你裝修好晒搬晒入去，至叫你再搬開兩三個禮拜等維修，條搬屋同裝修費都喺番度。所以側聞唔少合資格戶，對於今次開售都抱觀望態度，若非十分有需要，反而會選擇等氹仔經屋，甚至乎石排灣經屋落成推售至考慮。事關上述兩者至真正係為一個經屋打造出嚟嘅社區，而唔同永寧咁搵塊地就起幢樓俾大家住，相對上社區設施較齊備同完善。

教主同凡人嘅分別

2011-12-30T00:47:00.001+08:00

喬布斯升仙世界震動，但係亦都預咗。幾次同死神擦身而過，最後都榮歸上帝。當教主遇上上帝，真係唔知有乜對白。不過睇見近日各方人馬都不約而同咁，用自己有限嘅認知，去嘗試搵出教主最重要嘅核心價值，可惜嘅係連「黑人總管」都唔明，莫講話佢嘅對手「唔硬」，大部分人都唔明白教主嘅真主意義，唯一係「輸底唔輸面」教主嘅悼詞比較貼近現實。以「黑人總管」嘅講法，其實喬布斯唔係一個發明家，熟悉教主嘅朋友應該知道，教主充其量只係同人合作整咗個蘋果出嚟，之後嘅嘢大部分都係靠收購發展再利用而生，從來都唔係個人嘅發明。教主最重要嘅價值，應該算係推出一個科技界最禁忌嘅概念，就係WYSWYG，What you see what you get=睇到乜就得到乜。可能好多人都會認為I字頭至係教主嘅代表作，但係要I字頭成為一代領導產品，無咗WYSWYG根本就唔成事。唔少人都話佢喺電腦動畫有極大貢獻，呢樣唔使講啦，不過都係建基於WYSWYG呢個重要嘅概念裏面。教主最重要嘅概念就係要將科技同平民連接喺一齊，而唔係乜嘢電腦專家話俾大家聽你最終有幾萬分之一機會可以中到六合彩。從電腦普及到改變生活，最終都係靠一個強烈嘅理念去支撐，由始至終都係理念實踐嘅過程，唔同愛迪生從零開始搞個燈膽出嚟。而睇到乜就得到乜更加係透明製作嘅典範，其他扮高深chock有腦嘅所謂電腦專才，最終都淪為電腦維修技工，就係無從人嘅角度出發，去幫助大家使用電腦，從而改變世界，呢啲至係教主同凡人嘅分別。

仲可以講乜？（上）

2011-12-30T00:45:00.000+08:00

禮拜有幸參加局長親民會，見到真身現場表演真人騷，總好過睇容祖兒日光日白曬餐死咁去唱。天雨關係諗住好大機會取消，點知唔記得局長揀咗自己地頭做「騷」，結果去番自己地方嘅室內繼續搞。不過最估唔到就係咁大雨都有成過百人出席，好彩早到，遲啲都要罰企。不過一坐低，轉頭就有十幾位師奶同時入場，局長未到前經已不停咁商量點問點講，好有組織。但當局長一開始表演，就使出印象派絕技大海無量，去解釋佢哋政策同理念，有人話似變型蟲不過局長話係戰艦，但係點睇都係似白飯上嘅黑芝蔴多啲。席間果然不出所料師奶兵團以怪獸家長演繹半幕港式控訴，只可惜招式未熟有頭無尾，因為無叫口號同埋被人請離場事件發生，局長有幸甩身。但到就被食奶粉大嘅九十後問點解官府唔夠奶粉，無救助佢哋呢班「文化人」。亦有學界初哥想官府俾多啲錢協助吓影畫戲，等小城都可以拍多啲影畫咁話。聰明嘅局長早就知大家想點有備而戰，答番大家今年局方早就乾塘明年請早，總之鬧就繼續鬧，做唔做到就睇天啦，基本上呢個所謂插問大會，局長根本無點回答過大家問題。只不過小潭山一役局長演技了得，喺文化人同庶民中攞到唔少分，而且仲有大把時間讓局長夫子自道，講吓自己心路歷程。講真，若果要做作品解說，唔該請留番喺個人展覽時寫番喺作品旁邊就夠，唔好嘥大家時間。至於現場有大炮話唔知點解小城咁細地方，圖書館都要分開兩個部門去管，亦都無清晰嘅文化政策同埋統籌，只係一盤散沙點會做得好？局長竟然出一招叫做詐死，話自己張凳都未坐得熱你想我點？去到咁煽情大家仲可以問乜嘢？

校巴公交

2011-12-30T00:39:00.001+08:00

新巴載客入油，庶民笑到反肚。管理層解釋事件屬人為錯誤，正在積極尋找解決辦法。當然單嘢創咗小城開埠先河，過往從未發生過。話就話人為錯誤，但係司機其實都為咗乘客好，唔通大家都希望部車行行吓無油，又要落車搵站然後再等多一次巴士咩！但係咁就犯咗規。不過事件係反映咗綠巴到而家為止，都未設有獨立專屬油缸配合運營，暫時只能夠每日早晚一次入油補給。但係成架巴士走足一日，加少少塞車就經已唔夠油行，遲早都會出現行到無晒油然後跪低阻塞交通，司機嘅做法雖然違規但情有可原。巴士唔夠油其實證明咗一樣嘢，就係巴士公司喺運營上根本就未有安排好，點解以往從未發生過咁嘅事，會發生喺新巴上？除咗係唔夠經驗之外，更重要嘅好可能係新巴買錯咗一隻唔啱小城行走嘅車。大家都知道呢隻綠巴大部分車型其實係用嚟做學童巴士，只係改裝咗部分設備以適應小城用作巴士之用，但係就算點改都係校巴，要用呢部車嚟走足小城全日接載乘客，辛苦咗部車之餘亦辛苦咗司機。事前發牌當局點解會無視新公司用校巴做巴士，順利咁發個牌俾佢呢？再者試運作咗咁耐，大家都唔發覺校巴條樓級咁高，唔方便上落咩？但係新巴剛剛至入咗咁多部校巴嚟做巴士，要佢換車根本就唔可能。造成今日既成事實嘅局面，發牌當局無得推卸責任。但係而家唯一嘅解決辦法，就只好責成新巴買多幾部車入定油作替換，如果唔係大家可能有排都仲要幫手推車都未定。

無常識

2011-12-30T00:38:00.002+08:00

交警話唔俾人影佢哋相，但係知道係記者之後，就話記者至得，然後仲恐嚇記者唔准放張相上網，否則告到佢褲甩。第二日就已經有唔少人插交警無法律常識，再過兩日，直頭連私隱辦都開口，話市民就算喺公眾地方拍攝公務員執勤嘅情況，然後放上網都唔係侵犯私隱。最後老頂都走出嚟講番兩句，話咁多衙差有部分水平參差都好正常，然後發言人例必回應番句「個別事件」。然而由五‧一至今眾多嘅「個別事件」，加加埋埋都仲可以叫做「個別事件」，搵鬼信你！衙差係執法者而唔清楚法律，除咗係水平低下之外，更重要嘅係佢哋造成咗一個錯覺，就係佢哋認為係咁做至啱，從而影響到大眾都以為小城嘅法律係咁寫，所以佢哋會咁樣執法。尤其係交警經常接觸交通意外同狀況，兩車相撞唔理大細都會叫交警到場備案，但係佢哋好多時都會講到兩方都有責任，叫大家如果鍾意上庭過法院，佢哋唔會阻你，不過就會話你等得到上庭咁煩得閒就會call你錄下口供，所以最好就唔好相互追究。反正佢哋都係唔想增加工作量，只要無人受傷不如就咁算，呢Ｄ就係典型河蟹執法，多做多錯少做少錯，多一事不如少一事，反正最好唔洗做。但係就同衙差嘅職責「維護法紀，伸張正義」背道而馳。大家若要旨意佢哋出嚟主持公道，你都唔好意思要阿蛇做咁多嘢啦！反正佢哋都唔清楚法律係點，你要佢做判斷棧搞。呢類小城衙差嘅特色庶民一啲都唔意外，但係最意外者就係佢竟然話放上網都唔俾，真係好搞笑。呢位交警連最起碼嘅新聞運作都唔知，記者就算影晒相，出唔出街都唔係由記者決定，更何況擺唔擺上網，記者影咗相而唔公開，咁影嚟做乜呢？

巨龍之死

2011-12-30T00:38:00.001+08:00

巨龍終於執笠，小城有幾多人真係搭過可能都要問吓。其實新船公司一開始就麻煩多多，由水司部唔批新公司申請新航線開始，巨龍一直都嘈話被歧視唔公平，話水司部無理由批俾一間而唔批俾佢哋做鄰埠同小城之間嘅航線。最後水司部終於都批咗幾間新公司經營兩航線。但係巨龍選擇咗一隻運力龐大嘅船隻作經營，每次可載成千幾人，水司部有見小城嘅碼頭規模有限，只能限制佢哋每班船只可以運載一定數量而唔可以坐滿。結果唔夠兩個月就意外多多，由於新公司唔熟航線水司部都原諒咗佢哋，結果做做吓都尚算可以，所以不了了之。不過佢哋執笠嘅時候話因為水司唔應承放寬運載上限所以要執笠，咁就認真講唔通。首先佢哋嘅運營模式好有問題，咁大隻船出入小城嘅航道就已經好危險，所以佢哋運營初期咁多意外根本就係攞嚟。再者離島嘅碼頭到而家都仲係「臨時」，根本就解決唔到咁大班人一齊使用，就算鄰埠碼頭較先進嘅都一樣頂唔順一班船咁多人出入，結果自己要夾硬嚟最後要執笠，其實邊個都幫佢唔到。不過自己輸唔起就賴人唔批佢加大運力就講唔通啦！不過就算水司部批佢哋加大運力，乘客都唔敢搭咁大隻船。事關一來過關時肯定有排等，而且人多到滿瀉有大有細，一有意外隨時傷亡慘重，若果試過一次下次都唔會制，結果都係一樣。今次巨龍事件，證實咗小城嘅字花相關業界，經已進入成熟期，開始淘汰開放初期一批混水摸魚嘅公司，令佢哋自然死亡，而業界亦都可以較為健康咁發展，小城亦都有休息嘅機會。

早日享受

2011-12-30T00:37:00.001+08:00

墓地門擾攘一年，老廉終於搞咗個報告出嚟。大家睇完份百幾頁嘅「報告」，不得不佩服老廉仝人嘅寫作能力。事關成份報告裡面有詳細交代事嘅來龍去脈，亦有清晰交代投訴人嘅陳述。不過就好厲害咁隱藏應該調查嘅重點同技術問題，但係又能顧及自身政治安全嘅考量，刻意指出係有人違反規定涉嫌濫權，最後又好巧妙咁話睇唔到最高負責人有利益輸送問題，加上過晒「追數期」，結果得出嚟嘅結果，好明顯咁話俾大家知佢哋都做唔到乜嘢，一腳將個波踢返俾「老頂」，表明佢哋已經做咗嘢，你如果想追落去我哋都會幫你追，不過就後果自負咁解。講真單嘢老廉查唔查落去，大家都知道位高層一定有問題，但係又知道位高層一定唔會有問題。事關「高層」背後嘅「高人」實力唔小，所以老廉就算要做嘢，都無能力去到咁高。但係知縣面對投訴唔做嘢又唔得，結果要搵老廉出嚟做醜人，巡例查吓俾大家睇。當然老廉都唔係傻嘅，嘢自然要做但係做到咁上下自然唔會同你頂，呢招認真高。另外就算老廉真係查到實質證據，都要交返俾「老頂」去選擇究竟將份報告公唔公開好。因為「老頂」選擇公開講要老廉查明真相，咁老廉想唔將份報告公開都唔得。不過佢哋選擇係避重就輕俾返個位你考慮，將份調查做到好明白之餘，但係又唔會有實質結果同埋法理判斷，所以如果知縣唔識得好好處理，分分鐘又搞到虎頭蛇尾，搞到老廉同知縣都失晒分。不過就算今次老廉或者知縣都未能還投訴人一個公道，「高層」乘機博亂博得咁肉酸，係人都睇得到。反正佢應該都預留咗一塊靚地俾自己，大家唯有祝佢能夠早日享受自己辛苦搵返嚟嘅福利啦。

官職嘅吸引力（下）

2011-12-30T00:36:00.001+08:00

小城官府嘅福利政策，除吸引到鄰埠中女買假證博矇之外，亦吸引咗一班小城嘅高學歷人士排隊走去做公僕。早輪官方公佈統計數字，話有成三萬幾人登記搵官職，而有超過六成人擁有高等學歷。點解咁多人爭住入官府打工？其實一啲都唔難明。首先近年雖然話小城人力市場緊張，勞動市場嘅工作環境亦都改善咗唔少，但畢竟喺小城傳統上，一般公共機構、銀行同埋官職，都係搵工首選，事關呢類職場都係被視為鐵飯碗，無乜機會被炒魷。無乜機會被炒魷喺打工仔角度嚟講，即代表就算唔係做得咁好或者做錯咗，都唔會被老闆炒。另一個角度，則代表呢類機構或者官府，都有一定數量嘅冗員，對於部分胸無大志嘅人嚟講自然最吸引。但點解又會吸引到咁多高學歷人士走去報名排隊呢？乜大家讀到高級學府，唔係想一展抱負實現理想咩？咁講，當中真係唔少專業都只係官府至有呢類型職位，最簡單嘅就係天文氣象專業。另外，就梗係機構對員工嘅福利，外面一般公司都做唔到佢哋嘅出手，對於一班努力讀書，希望將來能夠有穩定嘅工作同保障嘅人嚟講，好自然都會走去排呢條隊。而近年小城高等學府越開越多，搞到無學位差唔多好似讀書唔成咁，當中有啲直頭好似中學延伸課程咁，一日上課上到黑，同外國或者內地嘅教學模式完全唔同，根本就無自主學習機會，畢業出嚟嘅學生亦都無乜主見同個人思考能力。結果官職同機構呢類工作反而最吸引呢批人，只要你無諗住升官發財，能力上嘅差異喺呢啲地方根本就唔需要。

貪字得個貧（上）

2011-12-30T00:34:00.000+08:00

早幾日衙差揭發有鄰埠失業中年婦，企圖用幾萬銀買回來嘅假證，走去官府度換張堅嘢，結果當然係人贓並獲即場斷正。就連報道媒體都話：「究竟做鹹蝦埠人有幾大吸引力？」即場羅列小城呢幾年嘅經濟成就同派錢政策，仲列舉當年鄰埠人爭取小城身分證，搞到破晒紀錄咁話。無可否認小城近年嘅福利政策確令唔少鄰埠人眼都紅埋，年年派錢都唔止，今年當鄰埠都開始派錢之後，減派咗嘅錢都要派多一次，加埋要多過鄰埠官府為止。不過大家都知道高福利社會真係唔好開心得咁早，官府派錢政策只表明佢哋無長遠嘅規劃同政策，去為未來嘅車城發展同建設。可惜因為直接派錢真係太容易打動人心，令到庶民鬧官府都無咁落力。不過好衰唔衰，唔知係唔係鄰埠官府近年真係被人鬧得太應棍，竟然學小城官府咁走去派錢，但就學啲唔學啲，規定要有永久證至有得攞，結果又被人鬧一餐。今次呢位無業師奶竟然想用個假證博朦，除無知之外，其實仲有個貪字。今次呢位中年婦竟然出到六萬幾銀買個假證，證明佢本身唔係窮，分分鐘比小城嘅綜援戶更富裕，出手出到咁重就係為得到更多回報。但呢幾年官府派嘅錢加埋都未夠佢買證條數，唯一預計嘅係呢位無業中女準備利用個真證申請綜援，然後加埋鄰埠福利，咁就真係唔使做啦。另外佢仲報稱喺網上識到個人買到張假證，亦可證明位中女並唔係唔識字之人。但竟然夠膽死拎張假證走去官府度換張真嘅，除話佢腦殘之外，仲證實佢當小城嘅公僕係傻嘅，咁都夠膽死亂嚟，呢次仲唔係貪字得個貧？

可以點算呢？（下）

2011-09-01T02:45:00.001+08:00

意外發生之後受影響人士去知縣遞信希望官府出手，個人就反對官府用公帑協助重建，雖話佢哋係受害者，但係都係大廈嘅業主，自己嘅物業出事都唔理要官府打救似乎講唔通。況且只不過係百多萬，一個單位嘅價值都唔只呢條數啦。若果只係因為唔知幾時至可以追討到賠償，而唔願意夾錢去處理問題，反而要官府幫手埋尾，對於小城其他庶民嚟講係十分之唔公平。就正如早排嘅一幢危樓，工務局經已通知咗要修繕，但係好快就變咗做危樓，結果官府要安排安置住客容身同埋拆卸。呢次官府出於人道去協助居民本來無可厚非。不過私人物業自己都唔打理，反而要求官府出資幫手搞掂就於理不合。事實上官府近年因為糧餉充足，亦都推出咗好多舊樓維修資助計劃，幫助咗唔少舊樓業主改善公共設施，同埋減少物業老化，使大家可以有更佳嘅居住環境，但係都唔應該要官府出埋錢俾大家裝修屋企。官府若果係想協助呢班受影響嘅居民，可以幫佢哋向銀行做借貸，官府做擔保首先處理咗維生嘅問題。若果日後有小業主唔還錢，官府可以實行釘契唔准買賣。好等大家可以喺呢段時間回吓氣，同時睇吓點樣可以追討到賠償，甚至待法院作出判決，將單位變賣作為賠償，呢啲都係官府可以做得到嘅嘢。問題係而家受影響嘅居民求助無援，而官府各部門就各自推卻，無人肯出手。而小城又唔似鄰埠咁有個社會福利處可以求助，不過大家到而家都未搵議員同機構協助，亦都好奇怪。可能大家都仲未識得點樣處理呢個情況，咁又叫大家點算好呢？

官府責任不可卸（上）

2011-09-01T02:44:00.000+08:00

國際中心大爆炸事件至今一個多月，上址仍然只維持「有限度公共服務」，由於事發單位負責人玩失蹤，附近受影響商戶求助無門，最後要走去衙門申冤希望知縣出手協助。上址建成超過廿年，原本地理位置優越，鄰近外港碼頭及小城唯一大型商場，亦有老牌字花檔於附近經營。除咗本地庶民之外，更吸引到唔少鄰近地區有閒錢一族入貨，作投資度假之用。而地舖及地庫商場則有財團斥資發展，本來前景美好長扌查長有。不過自從經歷幾次經濟不景同金融風暴，唔少業主割讓離場商號結業，而原本嘅商場亦都數度易手，搞到管理混亂，最後仲成為唔少非法滯留人士嘅藏身之所，搞到衛生環境惡劣。同時亦成為道友吸食毒品嘅溫床，以至不時發生小火，嚴重影響居民嘅生命安全。由一個美麗嘅小區變成龍蛇混集嘅地帶，除咗係經濟變遷嘅影響之外，亦係因為扌查貨人只不過係外來投資者，長期唔出現小城只顧收租，更加唔理租客係乜嘢人，只要有錢俾就可以，所以造成出入嘅人品流複雜，情況同怡字頭嘅大廈一樣。同一個原因，出入嘅人流出現變化之下，亦令到商號同商場嘅經營業務，改變成遷就夜遊人嘅舖頭，令到管理更加難上加難。今次爆炸引發出嘅問題，除咗係商號安全意識之外，更重要嘅係小城到而家都仲未有一個公眾責任嘅法例或者係基金，去保障受影響嘅人士。負責人失蹤或者係無能力賠償嘅情況下，個爛攤子邊個去負責處理呢？除咗權責唔清之外，咁多年官府對上址缺乏管理嘅情況一直視若無睹，官府有不可推卸嘅責任。

早有預謀（下）

2011-09-01T02:43:00.000+08:00

大潭山要挖隧道，基本上係可以避免，只要無咗個起緊嘅豪宅就可以唔使花咁多同社會成本都可以搞掂。但有咗間豪宅之後，要改善交通問題就要喺個山挖隧道、又要整條立體交通通道，對於出入附近地點嘅人嚟講，並唔見得方便好多，而且庶民要忍受開挖隧道咁長嘅建築期，相對於得出嘅效益根本唔划算。再者，呢一帶主要集中新建成嘅字花酒店，新隧道目的都係為方便內地同胞前往搏殺而唔係為方便小城庶民。若果要計真係配合小城發展，同石排灣公屋落成後嘅交通配套，點解唔可以喺路環電廠附近，直接起多一條路接駁氹仔新碼頭，然後進入友誼橋呢？起路幾時都平過挖隧道，工程驗測同日後維修都容易得多，點解官府今次偏偏挑戰高難度動作？當然就係為咗方便字花業發展嘅同時，又可以幫到位處區內兩間重要豪宅增加價值，如果唔係起緊間豪宅邊有咁順攤，叫預留空間就可以預留空間俾你？如果無番咁上下著數根本就睬你都傻。事關淨睇數字都知，該區幾間字花酒店全靠內地同海外旅客支撐，要維持就要喺政策及規劃上扶持同傾斜。只要主要口岸同酒店群嘅交通能夠方便直達，至少都可以避免因為交通不便而影響客留消費嘅時間，起碼賭多三手。而且官府亦開宗明義話俾大家聽，希望減少車輛進入氹仔市中心。同之前講緊嘅活化舊區，增加人氣成強烈對比。今時今日車唔到人又點會到呢，唔通部青蛙巴會為旅客停住等大家買完手信，至出發往下一站？就算以後輕軌通車，都係全程走外圍，所謂活化舊區根本就只係大隻講。

早有預謀（上）

2011-09-01T02:42:00.000+08:00

官府終於公開承認，原來會喺大潭山開條隧道。本來無端端喺路氹連接點搞個乜嘢立交通道，全世界都唔知佢想點。塞車日日都發生緊，根本一啲都唔新鮮。但今次竟然會早過庶民反應即刻做咗都唔止，仲要喺未有太大反應前做咗好多「前瞻性」工作，慌死被人話規劃唔完善咁。不過早有咁嘅計劃，但對外界就一直都守口如瓶，直到有代議士質詢時候，先至放風話俾大家聽會喺個山挖條隧道出嚟，仲講到明要配合將來填海嘅交通，同埋新碼頭、機場擴建後嘅交通流量，所以幾個主要迴旋處同交通幹道，都會有大作為，連大潭山都要開條隧道協助改善將來要面對嘅問題。本來官府對新區有所規劃都係一件好事，至少唔係唔做唔錯呢隻。不過就係點解次次都將消息封鎖，令到大家都覺得官府嘅黑箱作業無處不在呢？首先最重要嘅係官府計劃咗起隧道之後，早就通知咗正在起樓嘅發展商，叫佢哋預留空間等日後條隧道可以穿過其私人物業區域。官府經過上次小潭山一役仲未有定案之前，就急不及待再將大潭山挖過大洞，明顯唔將庶民意見放在眼內之餘，更加先斬後奏，美其名以改善交通為由製造既成事實，將涉及重大公眾利益嘅事件要公開諮詢規定放埋一邊，以為氹仔新碼頭同機場一帶仲未有乜人住，就可以做好晒至同大家講官府嘅規劃發展係點。大家見到石排灣而家山不成山被人炸到一嚿嚿，除咗悲哀都唔知可以點反應，依家仲要挖條隧道直達新大橋，官府想點其實大家都知，根本就早有預謀。

太陽底下無新事（下）

2011-09-01T02:41:00.000+08:00

新巴嘅混亂經已持續咗兩個禮拜，依然一啲起色都無。照計都成兩個禮拜，內部有乜唔順都應該處理好至啱，可惜到今日負責嘅局長都仲話緊唔滿意新巴表現，雖然局長開到口叫大家俾個機會佢「修正」，但到而家都未能成功修正，所以局長至咁唔滿意，仲警告話會執行處分添。呢幾日，日日都有新巴要衙差幫手推車、又或者係新巴炒埋一邊相片，就算新巴點樣賴司機唔夠經驗易出事都好。新巴都運行咗成兩個禮拜，點都唔應該再出現交通意外。除非因為司機唔夠時間休息，加上工作壓力太大至會有咁嘅問題。好明顯新巴嘅各種意外同機械故障，都因為新巴人手不足，至會令到各方面都出現咁大問題。不過可惜嘅係，官府日日都只派員進行監察，根本都無正視個問題，就係唔應該令到專營巴士有三間公司一齊營運，同時令路面增加負荷，加速塞車形成，搞到唔單止新巴司機壓力大，連同所有路面使用者都壓力大增，間接造成交通意外多發原因之一。從一開始官府諗住改善小城交通，就諗咗去搞多幾間巴士公司，以為巴士多就方便咗庶民出行，就可以解決小城交通問題。但問題係多咗巴士令路面更加擠塞，所有駕駛者同乘客都一齊塞喺條路上面浪費時間，除改善唔到交通之外，更令一眾搭開巴士人仲加驚搭巴士。本來要改善交通，最首要係條件梗係控制車輛增長，我哋都相信局長都有諗過呢樣嘢。可惜嘅係要控制車輛增長當中影響唔少既得利益者，要實行相當唔容易，結果局長只能將計劃進行修改，只增加巴士數量希望去解決問題。結果點大家有眼睇。所以話「太陽底下無新事」，一切都係騙局。

太陽底下無新事（上）

2011-09-01T02:40:00.000+08:00

週中花旗國痛失「三條煙」，仲要係自己製造出嚟嘅系統評番自己國家，就算財金官員同總統點樣鬧評級機構都好，即時無得抵賴，立刻觸發環球股災。日日喺茶餐廳睇住個好似牙齒印咁嘅圖表，餐廳內由老闆以至掃地阿嬸都咬牙切齒肉緊非常。反而我哋呢班草根食客就好似睇戲咁睇，反正無聊就諗住潤吓老闆「今日又唔見幾多呀？」但最奇係答嘴嘅竟然係掃地阿嬸：「佢哋又準備第三輪量化寬鬆，QE3呀！唔使驚喎，跌完又升番口架啦！」大家望住一臉欲哭無淚表情嘅茶餐廳老闆，斷估佢都交咗唔少學費，希望佢無去到咁盡，以後仲有得嚟呢間茶餐廳同班街坊吹吓水。不過睇到阿嬸講到咁似層層，似乎佢係有做功課之人。事關今時今日最關心小城同環球經濟嘅人，並唔係乜嘢財經高官金融才俊，而係一眾諗住抵禦通脹嘅家庭主婦。佢哋日日睇住家庭必須品嘅開支每日俱增，份人工同屋企零用又無加過，除慳得就慳之外，就梗係開源最緊要。同鄰埠唔同嘅係，小城師奶唔會拎幾十萬去炒孖展股票同外匯期貨，始終小城庶民都比較膽怯，加上要「豪賭」就不如去字花檔一鋪定輸贏，根本就唔使日日睇住佢上上落落乜都做唔到。不過投資同投機都只不過係一線之差，好多唔清唔楚嘅主婦識啲唔識啲就走去學人投資，結果被個市搞到個個變做「苦主」。早兩年間兄弟錢莊爆煲事件仲未完全解決，小城金庫就經已上演緊太陽國震災引發嘅自動斬倉追訴潮。大家以為主婦們會經一事長一智，點知原來都係好似所羅門咁講「太陽底下無新事」，大家好快就忘記上一次嘅慘痛教訓。

公交一嚿雲（下）

2011-09-01T02:39:00.002+08:00

今次嘅新巴士服務安排，本來就係比較顛覆以往庶民搭車嘅概念。引入咗新嘅官府購買服務模式之後，本來就係無可厚非，不過對於庶民嚟講，新服務模式同增加咗嘅巴士數量，都對小城交通引起重大變化。除巴士多咗，對於搭巴士嘅乘客嚟講聽落好似好好咁，以為多咗車就可以更容易搭到車。無錯，乘客可能會比較容易上到車，但因為車多咗令塞車更嚴重，結果可能大家更容易落車。因為等到傻晒都未去到自己準備落車嘅站，趕時間唯有提早落車，希望能夠行去目的地趕得及唔遲到。另外今次由新公司投到最多巴士路線，反而兩間舊公司嘅路線就比以前少，新公司咁進取呢樣好正常，但負責監管同批給嘅官府部門，究竟有無考慮過新公司嘅運力同經驗，能唔能夠勝任咁多街路線嘅服務呢？好明顯官方太過高估新公司能力，因為新服務首日新公司就已經要其餘兩間舊公司出手相助，協助出車解決未能提供足夠服務班次。第二日負責嘅局長就同庶民講，大家唔好學以前咁根據巴士公司揀路線上車，因為會有唔同公司走同一條號路線。雖然咁樣比較有彈性，但新巴士公司唔能夠履行合約提供足夠服務，對於其他兩間舊公司十分唔公平。再者一嚿雲局長最初神神秘秘咁話，官府有辦法解決新公司司機不足問題，最後原來係叫三間巴士公司嘅司機一齊加班，去幫佢解決問題，但咁樣又可以頂得幾耐呢？要滿足新公交服務所增加嘅巴士數量，車就可以買番嚟啫，但人就唔容易買，唔夠就係唔夠，當初設計同規劃呢個新服務早就可以計到數，所以話呢個公交服務依然係一嚿雲。

公交一嚿雲（上）

2011-09-01T02:38:00.001+08:00

舊年年尾，官府發出警世預言，未來四年將會係小城交通嘅黑暗期，首先會出現大塞車嘅情況會係高士德為期五百日嘅下水道重整工程。喺官府嘅危言聳聽之下，結果工程對小城交通嘅影響相對唔大，以為官府嘅「狼來了」只不過想嚇吓大家。點知原來官府嘅危機預言竟然係官府一手策劃、準備改善小城庶民出行情況嘅新巴士服務。新巴士服務推行首日嘅慘痛狀態到今日庶民依然鬧到七彩。除塞車塞到格蘭披咁嘅狀態之外，巴士誤點遲到亦都唔係人咁品。局長出嚟致謙就梗係指定動作，但係新公交服務嘅概念規劃上就肯定有問題。首先新巴嘅司機唔熟情況就係人都預計到，但係就唔知點解新公司試過咁耐，都唔搵返一兩部車進行公開免費試搭一段，好令司機們真真正正學吓埋站時庶民上車落車嘅情況，總好過每人不停才查部「吉車」通街走，浪費資源外亦加大路面嘅交通負荷，亦都平白浪費咗實習同測試嘅機會。再者新服務一開始就竟然要由二間原專營公司幫新公司手，接載自己搞唔掂嘅乘客，事關根本就未夠司機開足所有班次，呢度早輪就講過唔夠司機嘅情況下局長終於都要改口，唔排除最終需要引入外僱。另外就係竟然轉乘費用都會扣錯錢，呢啲咁低級嘅錯誤根本就唔應該發生。任何收費系統根本只要有足夠測試就可以，事件反映咗今次新公交服務嘅設計同規劃，係阿一嚿雲局長主理下同樣係一嚿雲，況且由於新公交服務係增加路面上行走嘅巴士，導致路面負荷大增塞車更嚴重，但係局長就只係話希望咁樣可以令到庶民增加使用公交出行，咁用緊公交嘅庶民咪同樣要受塞車影響返工返學都要遲到？

人為意外（下）

2011-09-01T02:37:00.002+08:00

另一單人為意外更慘烈，溫州高鐵意外到執筆日止經已造成三十九人罹難，而且仲有唔少人喺救治當中。但係意外發生後鐵路當局嘅「善後」同「救援」嘅工作，除咗令人睇到眼火都爆埋之外，更加令人震驚嘅係國內官員草菅人命嘅手法直頭去到無法無天咁滯。首先由「意外」發生後，試圖以「被雷電擊中」嘅解釋去掩飾真正嘅起因，跟住「粗暴搜救」務求令列車盡快重開。由於事發後差唔多成日，仲可以喺車廂殘骸中救出一個小女孩，令到搜救行動被猛烈批評只管恢復班次唔理仲有無傷者被困。更奇怪嘅係大家從新聞片段中，睇住「搜救人員」用重型機械將吊住嘅車廂就咁翻落田之後，然後三部大型吊機同時將幾截車廂殘骸埋落田裡面，大家都從來未見過咁樣嘅「搜救」方式，而鐵路部嘅發言人仲加離譜交代報告話：「唔知大家信唔信，反正我就信了！」即係唔理個理由係唔係理由，反正佢經已判定咗呢個理由成立，佢唔會再搵第二個解釋，亦都唔理你哋接唔接受咁解。呢種咁嘅態度完全無理過群眾同死傷者家屬嘅感受。亦更加令家屬懷疑當局為咗掩飾背後嘅真相，草草將出事車廂掩埋，以破壞日後追查「意外」嘅證據。搞到京城派完國家副總理去指揮仲唔夠，仲要派埋總理到事發現場進行安撫民心嘅工作。呢班「發展就是硬道理」嘅鐵路官員，從一開始強徵強拆起鐵路，到盲目追求列車車速無視安全，一直只顧好大喜功，根本就無理過庶民嘅生死，直接或間接造成呢單「人為嘅意外」。早前唔少小城庶民專登去試坐國內嘅高鐵，回來直指仲快過新幹線，今次就係證明咗人家成熟嘅技術並唔係一朝一夕，唔係一味夠快就得。

人為意外（上）

2011-09-01T02:37:00.001+08:00

國際中心大爆炸事件，引發坊間關注小城燃料安全規管。出事食肆懷疑儲存過量石油氣引致大爆炸，幸好未至於搞出人命，但係一眾附近住戶、商舖酒店，甚至連外港碼頭嘅通訊都受到不同程度影響，其損失數字真係唔知點計。因為今次大爆炸現場嘅建築物間隔差唔多全部損毀，唔聽新聞淨係睇條片直頭以為係九‧一一重演。意外一發生，什麼代議士、團體及學者、甚至知縣都即刻話要檢討燃氣安全。馬後炮就果然個個都識，但係真正把關嘅官府就次次都係唔嗲唔吊，到出事嘅時候就話加強巡查，結果幾個月之後就同無事發生過一樣。講真，每次意外基本上都唔會係第一次，規模再大嘅氣體燃料爆炸意外，成個青洲中途倉炸到放煙花咁款，大家都仲記憶猶新，都唔係隔咗好耐啫。但係就足夠時間令官府同負責處理嘅人忘記意外嘅發生，繼續草率處理危險品，令意外再一次發生。危險品之所以叫做危險品，就梗係有存在嘅風險，處理得唔好就會發生意外，呢樣係細路仔都知。除咗使用者嘅安全意識之外，就係靠官府嘅監管工作以確保能安全使用。可惜大家都咁懶，無將安全守則放喺第一位。再者而家小城人手短缺，食肆等商舖叫石油氣送貨，往往要等成日都未送到，若果生意好隨時唔夠頂到夜晚，大家為免「唔夠氣」，自然挑戰極限入多兩罐，結果釀成事故其實係人為而唔係意外，因為呢啲意外係可以避免發生。而巡查違規店舖嘅執法當局除咗作出檢控，亦都無執行更強硬嘅罰則例如停牌等以保障安全，「意外」自然只會不斷發生。

官府數字(下)

2011-09-01T02:36:00.001+08:00

另一數字遊戲反映喺工程建築費用上面，之前輕軌經已講過就唔講，但喺氹仔話起個碼頭，都起咗成六七年，到而家都係得個臨時碼頭你用，而且仲係唔知幾時先至會埋到尾。不過最誇張係到咗最近，成個碼頭建築成本由七億幾去到成廿六億，淨睇數字就差唔多超資四倍，雖然官府只承認建築費係十八億，不過係唔係成個碼頭總建造費就仲有商榷餘地。其實喺年頭就有代議士質疑過，官府所謂預算根本就無意思，求其俾個數字出嚟叫做預算，最後埋尾就不斷追加加到夠找數為止，填海費用預算可以廿萬去到四千幾萬至埋到尾都算一絕。之前官府解釋過，將責任賴喺兩代政府交接關係上面，所以接唔上實際。但全城庶民都知，小城所謂官府只不過係換過一位知縣咁大把，另外換屆時就搵咗兩個人去接替升職咗人嘅位置，基本成個官府都無換過乜嘢人，咁點解會一換屆就條數可以唔同晒呢？係唔係代表咗知縣換屆前，大部分官員都只不過係做看守政府乜都唔做？因為唔知新老闆會唔會仲用番自己，所以情願做少啲，都好過做得好將來益咗新上台接自己個位嘅人呢？雖然傳統國人都明白乜嘢叫做一朝天子一朝臣，但今時今日小城做官，除非你學走資司長咁出位，否則都唔會搞到無得撈咁慘。講番碼頭超資咁多，究其原因都係一開始就無計劃，起起下就要改做擴建，最差竟然係有未用過嘅設施最終要拆卸，咁浪費嘅事發生喺小城呢個資源咁有限地方，除咗要鬧班垃圾官之外，都唔知可以做乜嘢好

官府數字(上)

2011-09-01T02:35:00.002+08:00

小潭山全民意見截止，唔少持反對意見者喺簽名運動同問卷調查下表態反對，令到數字公佈上反對意見呈壓倒性。不過到官府公佈時候，就大玩數字遊戲，聲言今次係全民徵集意見，並唔係選舉投票，呢類無建議同說明嘅投票唔適用，所以只會統一計入一份意見之內。好明顯官府呢次玩數玩得太粗暴，將只有問卷表格全部歸納成只得「反對」兩個字，並且將「意見」列為唔係意見，一下字將「民意」改寫，咁究竟官府搞個徵集意見嚟做乜嘢？當然官府玩蠱惑將贊成同反對視作「投票」睇落好似好合理，不過實情係庶民喺揀贊成同反對之前，都有個前設嘅「小潭山起超高樓會唔會破壞環境，你贊成定反對？」，咁呢個算唔算係意見？係唔係好似其他贊成發展嘅意見咁詳列項目會令到小城喺生產總值會增加幾多，跟住加入美化文學術語，令到份「意見」仲好睇過金庸小說至算做係意見呢？官員稱收到八百幾份「意見」並唔等於只有八百幾項意見，若果千七份表格式意見佢只當係一份計數，咁其實呢千七份意見都唔止有千七個建議，但最終嘅意向都要官府叫停項目，唔係同你將個項目逐呎逐吋咁去修改，又或者將個豪宅私人泳池放喺山頂變做蓄水池。再者若果八百幾份意見都有唔止八百幾個建議，咁即係做埋你哋官府嗰份，完全唔使你做，到時得出個結果就可以批核，最後起咗出嚟有乜唔妥，仲可以俾你大大聲聲講我哋都係按照大家嘅意願去處理。你就梗係嘆啦，不過咁仲使乜你呢個專業部門做呢？有晒建議同方法仲使乜你評估得唔得，係人都識批啦，反正強姦民意都係你哋嘅強項。

開放賣賭的副作用

2011-09-01T02:34:00.001+08:00

前幾日有太陽國旅客懷疑準備偷運毒品回太陽國，事件剛剛發生喺衙門公佈咗會加強佈防嚴打跨境販毒嘅第二日。衙門負責人亦都承認，單喺今年上半年，就已經有十幾宗涉及機場嘅跨境運毒案，毒販睇準小城近年國際航班不斷增加，相對於國內運毒若果被捕判刑，有機會被處決，小城就無需擔心出事會打靶，加上簾價航空公司進駐小城，更加令運毒成本下降，吸引唔少死士試圖闖關挑戰小城海關嘅執法能力，負責官員直認小城成為國際販毒中轉站，跨境販毒有時更涉及幾個國家，令到追查有一定難度。事實上除咗販毒外，近年小城涉及國際犯罪嘅數字不斷上升，雖然衙門打擊販毒亦都不遺餘力，但喺亦有其他跨境罪犯一直活躍於小城，就如早前人參國換錢人被殺案，亦都喺海外犯罪份子所為。由於小城經已超越拉城，成為世界上收入最高嘅博彩城市，開放賣賭除咗吸引唔少海外旅客到小城觀光旅遊之外，亦吸引犯罪集團進駐小城以圖分一杯羹，尤其牽涉賭場周邊利益嘅罪案更有增無減。衙差除咗不斷加強國際合作外，亦要提升本地衙差嘅偵緝水平，正所謂道高一尺魔高一丈，犯罪分子近年嘅犯案手法亦都層出不窮，除咗體內藏毒之外，更有毒販明目張膽偷運五公斤毒品進入小城，市值破紀錄。罪犯毒犯甘願以身試法，都喺因為有龐大嘅利益所驅使，呢樣亦都喺小城開放賣賭後所得出的副作用。今後除咗不斷加強衙差刑偵能力同國際犯罪情報交流之外，經已別無他法。因為市場開放發展喺一條不歸路，唯有加強堵截防止罪案發生。

安全守則迫在眉睫

2011-09-01T02:33:00.001+08:00

京城扶手電梯發生機械故障，導致一死多傷。由於京城之扶手電梯喺由鄰埠之地鐵公司負責管理嘅地方，鄰埠媒體就質疑本地鐵內有冇同類型產品有安全問題，間接亦令到小城開始關注公共扶手電梯同升降機嘅安全隱患。不竟小城扶手電梯同升降機出現嘅歷史唔長，一般都唔會太舊，鮮有好似鄰埠嘅升降機咁急降十幾層呢類型意外。但喺亦都喺因為咁樣，本地工程師同技師嘅經驗及工藝，亦都唔及鄰埠咁專業。小城有使用率極高嘅公共扶手電梯，一年到晚都喺度維修中。除咗使用率極高喺原因之一外，相信同最初興建時嘅設計製造亦有莫大關連。其實小城早就有專業嘅團體，倡議官府設立升降機同扶手梯嘅安全守則以保障公眾安全。但喺官府就一直只講會進行研究，結果咁多年都冇聲冇影。不過唔知喺官府定喺庶民好彩，小城到而家唯止，都仲未發生過同類型嚴重嘅意外。但喺唔可以就因為咁樣而忽略呢d機械安全嘅重要性，尤其喺近年小城嘅樓越起越高，新式嘅升降機又越走越快，若果發生意外將會比而家較舊式嘅升降機同扶手梯更加嚴重。雖然話新式嘅扶手電梯同升降機，安全系數都會較舊式嘅有所提高。但喺任何機械設備都會有發生意外嘅機會，單單睇下小城嘅供電設備就知道，早排嘅大停電，專營公司嘅工程師都話件產品一般都有三四十年嘅壽命，但喺都唔知點解今次用咗十幾年就出事，足以證明任何機電設施都要有完善安全檢驗守則，況且小城亦都即將興建輕軌系統，將會有更多嘅公眾扶手電梯同升降機出現，相關嘅安全守則出台更加喺迫在眉睫。

有違倫理

2011-09-01T02:32:00.001+08:00

呢班最熱議嘅新聞，估都估唔倒竟然喺個訃聞出唔出街。照理訃聞就喺訃聞，如果唔喺仙遊咗嘅人特別黑人僧，一般有錢登就出街，冇錢就唔登咁簡單嘅啫。雖然大家都知呢段訃聞可能牽涉好多深層次嘅問題，不過簡單d嚟講喺正常嘅情況下，只會喺由直系親屬去決定登唔登段訃聞，由外人去登你屋企人嘅訃聞，你都會唔開心啦喺唔喺！鄰埠就有媒體不顧一切去幫人哋屋企去登訃聞，雖然大家都知道佢哋好想話比大家聽佢哋得到獨家消息，不過迫到要代言人出嚟話佢講大話闢謠，結果成個機構要向公眾道歉。老實講，每當有人仙遊，大家得倒消息後首先會做嘅嘢就梗喺去關心同安慰其親屬，睇下佢哋有乜需要，而唔喺幫佢哋登訃聞。大家若有機會咁唔好彩出席過小城同外地、尤其喺鄰埠嘅喪禮，就有機會比對一下。小城因為喺小城人口都少過人，所以若果有親屬仙遊，一般都可以幾日內就能夠進行喪葬禮儀然後出殯。但喺相對於鄰埠人口眾多加上親朋戚友都唔少，要安排一固喪禮一d都唔容易，即使不幸身故亦唔可能咁快就出訃聞。事關就算去預約禮堂都要排隊排唔少日子，每日都有咁多人身顧點都要兩三個禮拜，再加埋要通知本土同海外嘅親朋戚友，起碼都要成個月至可以辦喪禮。如果一身故就登段訃聞出街，但喺要等個幾月至可以出席喪禮，對今時今日嘅城市人嚟講肯定喺好大嘅考驗。就算喺結婚擺酒都喺兩個禮拜前至通知啦，成個月之後至擺酒除非你唔想有人出席酒會啫。所以就算唔用陰謀論嚟睇呢單訃聞，話你亂登訃聞一定唔會有錯，有違倫理也！

保障長者要監管

2011-09-01T02:29:00.001+08:00

小城同全世界其他地方一樣，開始進入高齡化社會時代，為避免日後出現管治問題，官府急推「長者權益保障綱要法」，以維持小城長者能夠有尊嚴咁生活落去。事實上由過去洋人管治至今，官府唔少政策都對長者作出優惠，目的都係想令到老有所依，增加社會和諧同埋減少長者對醫療住屋等社會資源嘅龐大壓力。唔單止係咁，政策對於維持小城傳統華人社會嘅倫理關係亦都有好大幫助，所以官府好樂意推出更多對長者嘅優惠政策，知縣亦都可以煩少一瓣。問題係所有政策都有利有弊，呢趟官府對新法推出講解諮詢會，唔少長者都出席熱烈發表意見，當中有長者反映有不孝子孫因為要申請經屋，加咗高堂個名上去增加分數，到申請成功之後就一腳踢走高堂，若果唔係有個長者加分制度，反而仲可能唔會搞到親子關係咁差。雖然話呢種風氣喺小城並唔普遍，不過都反映到小城部分人趨向涼薄。事關有更普遍嘅風氣就為咗請個外傭幫手喺屋企煮飯洗衫，就係利用父母高齡需要照顧為理由，向官府申請外傭額。但當成功申請外傭到小城之後，高齡父母唔好話完全無被照料或者幫忙之外，直頭連個外傭係點樣都未知，又或者係請個講雞腸嘅返嚟，令到只識鄉下話嘅雙親根本唔可以同佢溝通，呢啲都係十分普遍現象，因為而家成年子女同雙親分開住，喺小城開始普及，亦造成不肖子孫利用完長者後過橋抽板嘅原因之一，而官府嘅優惠政策因為缺乏適當監管亦都係罪魁禍首，若果今次新法通過之後，仍然維持現今咁寬鬆嘅監管，結果條例都係形同虛設。

孭唔孭得起？

2011-09-01T02:25:00.001+08:00

踏入七月暑假，唔少學子開始面對悠長假期，但係對於新營運巴士公司嚟講，就面對緊得番唔夠一個月時間倒數，但仲未請到足夠預定人手。當記者問到負責嘅局長排唔排除輸入外勞時候，局長竟然答唔到呢個問題。記得年頭局長就好清晰咁講過政策無調整到，唔會考慮巴士服務聘用外勞司機，當被問到咗果真唔夠司機時點算，佢就話佢哋有辦法令到新巴士服務能夠如期實行。加上上個禮拜仲講緊佢睇唔到新巴士公司有輸入外勞需要，而家一句「答你唔到」就閃咗去，再次令人覺得官員講嘢誓神劈願嘅承諾，最後都係吹水唔抹嘴。巴士服務引入新競爭者，無非都係為咗提升行業嘅服務質素，同時改善司機們嘅工作條件。要知道巴士服務除咗部車之外，最重要就係扌查部車嘅司機，就算部車有幾靚有幾舒適，但將部靚車同乘客交俾一個唔識路無經驗，以及駕駛習慣完全同本地司機唔同嘅外來司機，除咗對部靚車及一班乘客構成危險之外，更加係其他道路共同使用者嘅計時炸彈。當初局長堅持巴士服務唔輸入外勞，都係因為以上種種原因，亦係新巴士服務嘅底線。但而家新服務面對臨門一腳時候，局長就即時轉軚答你唔到，除咗係當初推行服務改革時候無周詳計劃之外，更加罔顧庶民安全強行實施新政策。原本巴士服務唔好，最多只會影響小城塞車同延誤班次，搞到趕返工返學嘅人。而家喺咁急咁短時間內如果輸入外地司機，有機會連一班自駕上班及其他公共交通服務都受佢影響，出爾反爾造成嘅嚴重後果唔知局長又孭唔孭得起？

錯過最佳時機

2011-09-01T02:24:00.002+08:00

再有衙差懷疑自盡，從酒店高層墮下，結束短短三十多年嘅人生。唔少報紙都數番，由年頭至今日，紀律部隊人員經已接二連三出現輕生事件，唔少人都關注近排衙差點解有咁多問題，但過往每當有衙差出事，當局都會話係個別事件，亦都表示會跟進但從來都無向大家交代結果，總之都係加強心理培訓，然後就係加強再加強。衙差原本喺社會功能上，負責保護庶民嘅生命財產、維持秩序。不過過去西洋鬼年代，唔少衙差都通上瞞下，貪腐泛濫以權謀私，甚至以身試法亦不乏人，社會形象早就破產。不過自從回歸自家人管理之後，為確立官府管治形象，衙差犯事經已收歛唔少，開始做番正常衙差要做嘅嘢。只不過上代衙差部分其身不正，從未試過做一個正常衙差嘅工作，要佢哋帶好新人根本就係唔可能嘅事。況且自從自己人當家之後，庶民以為可以同官府好好溝通，唔會再出現以往雞同鴨講情況，點知原來根本無改善過，結果搞到年年幾次大遊行，衙差直接面對同群眾發生衝突，有後生衙差未能適應份工要面對嘅壓力一啲都唔出奇。再者小城近年經濟環境改善，唔少人都升職加薪，但衙差嘅條件就無乜改變只有加「辛」，面對原本較優越嘅職業，而家淪為大眾實Q，接受唔到地位嘅轉變做傻事亦有可能。雖然話差館內有三名心理輔導專家長駐，隨時為衙差提供服務，但今次懷疑輕生嘅衙差年紀唔大，但佢同早兩個月吞槍嘅首席海關關員一樣，同樣正值盛年且當咗差都有十多年，照理都有豐富當差經驗並唔係新入職嘅初哥，大家都唔會覺得呢類人會出事，往往就係咁樣被忽視，錯過咗協助佢哋走出困局嘅最佳時機，當局應該檢討心理輔導機制有無切實咁幫到有需要嘅衙差。

偷換概念（下）

2011-09-01T02:23:00.001+08:00

另一個偷換概念係官府早前就被踢爆，曾經被期待嘅東亞影城咁多年影都無，竟然被官府喺三年前就再批出更改計劃，加入酒店同字花檔。本來官府批出塊地，係俾間公司建個影城，打造一個影視娛樂中心，再加些少旅遊元素吸引客人，個計劃本身都唔錯，當初批准呢個計劃其實都批得啱。可惜呢間公司咁耐都無發展過塊地，唔好話影城，直頭係影都無。卒之三年前改造酒店賭場再加部分影視區，即係唔知係乜，但因為早前負責批地嘅官府開晒口，話要取締閒置土地之後，間公司老闆直頭唔理，將成間公司以三億美金賣出獲利。但官府對於間公司取得土地使用權之後以成間公司賣出獲利做法不聞不問，亦都唔理代議士點樣插，一於唔公佈三年前間公司提交嘅新發展規劃。呢單嘢官府同商家做法實際熟口熟面，小潭山、工業村都係同一例子。不過今次商家首先提出嘅項目規劃，其實正正切合小城而家鼓吹嘅文化產業政策，但大家期待過嘅岳少唔單止唔發展，仲成間公司都賣埋，好彩林伯早就仙遊，如果唔係實被個二世祖激死。林伯本身係殷實商家，真正白手興家，可惜就唔識或者係唔教仔，搞到下一代個個淨係識得行蠱惑。呃官府批塊地俾佢之後，可能無錢可能無能力實踐個計劃，一聽到官府要收回閒置土地就成間公司都賣埋，除咗呃晒全城庶民之外，仲呃埋兩代知縣同官府，但竟然知縣同官府都無出聲，仲要包庇對方話仲有影視項目不過唔公佈計劃內容，真擔心替代者會唔會行番「走資司長」舊路，到時小城一定無運行。

偷換概念（上）

2011-09-01T02:20:00.003+08:00

王主任剛走無幾耐，豬肉入口商即刻宣佈七月再加價。豬肉半年之內加價四次，庶民叫苦連天。近年小城同鄰埠、以至內地都受到巨大嘅通脹影響。連王主任今次出巡小城，都專登視察通脹對小城庶民生活嘅影響有幾大。今年確實係小城嘅加價年，除豬肉入口價半年內加四次之外，噴射船、的士等公共交通工具都話加價，更加唔好講每日海鮮價嘅石油產品。記得月頭管經濟嘅阿頭喺垃圾會上接受質詢時，竟然答代議士小城油商係減快加慢就真。不過唔理條數堅定流，今年之內小城油品價格經已加咗七次咁多，最厲害嘅時候甚至試過一個禮拜加兩次，雖然話通脹厲害，各行各業都加得就加，但並唔係每樣商品都有合理嘅加價理由。進口豬肉半年加四次，生豬係由大陸入口，當大陸解釋嘅理由係依家養豬嘅人少咗，所以就連內地嘅生豬都貴晒，咁小城靠內地入口生豬，有乜法子唔加價呢！所以食物上主要依賴內地進口，小城喺呢方面就受輸入性通脹影響。但石油產品就唔同，小城同鄰埠都同樣從新加坡進口大部分嘅油品，只有少數嘅油品從內地進口。雖然油品亦受原油價格變動影響，但原油對成品油嘅價格影響並唔係太大，所以兩地嘅一般對於油品價格都以新加坡離岸價格作為價格指標，實質波幅其實有限。但四個月都唔夠就加咗七次，而且同鄰埠一樣，幾家品牌油品商售價劃一，即去邊間買都係同價，若果以汽車油品計算，就算去到路環唯一間油站入油，價錢都係同同區最貴地段嘅油站同一售價，唔好話外地人乜都唔識，就算本地人到油站入油，唔專登搵都唔知而家每升實際係幾錢，根本係偷換概念刻意令大家忘記每升幾錢，只係叫大家習慣入幾多錢而唔理入咗幾多油。

點樣保護自己（下）

2011-09-01T02:20:00.001+08:00

另一恐怖風化事件，竟然係官府社工涉嫌雞姦男生。作為專業社工兼受聘官府，身分上經已受到一般庶民信賴，何況係一個十多歲嘅男仔。況且大家仲係同性，個男仔更加諗都諗唔到呢位大哥哥會做出啲咁嘅事。我哋都唔係心理學家，唔識得評論呢個「魔鬼社工」精神狀態。但值得關注嘅係呢類受害者於醉酒後被人侵犯，而犯案者多數係熟人甚至係最可信賴嘅人。而呢個「魔鬼社工」被衙差拘捕時，屋內發現不同類型嘅性用品，嫌犯更將施暴過程用相機拍低以便日後「欣賞」。好明顯呢個「魔鬼社工」係有預謀犯案，刻意灌醉受害者後再進行施暴。雖然據報未有跡象顯示同職務有關，但對於「官府社工」呢個身分，喺外界經已有一定程度上嘅象徵意義，就算同職務無關，都對整個行業帶嚟極大影響。上一單小學生付費非禮係由駐校社工揭發，呢一單就係官府社工親身犯案，令到大家對呢個職業身分有種「天使魔鬼共同體」感覺。當然「魔鬼社工」係個別事件，相信大部分嘅社工都係有愛心嘅專業社工，問題係大家點樣識別同埋如何保護自己。飲醉酒相信唔少人都試過，事件中嘅男生只係做錯咗單獨上嫌犯屋企飲酒，就經已鑄成大錯。事件反映今時今日到處都可以係陷阱，而且不分性別、身分同年齡，就算係最親密同可信嘅人，都可以係施暴者，要小心保護自己，就只能盡量小心應約，唔好單獨喺私人地方會面，減少出事機會。至於對方是否信得過，根本就無樣睇。

受害者(上)

2011-09-01T02:17:00.003+08:00

一細路俾錢九歲口靚妹，一元五塊讓佢摸胸，駐校社工揭發上報衙門，經衙差調查下至知唔止咁簡單，原來細路摸胸摸咗成年兼另加兩位「受害者」。新聞一出「性教育」又再成為熱門話題，教育界又呼籲家長正視問題，家長就話事件發生喺校內，學生唔返學就無事，至於官府負責部門就梗係話要輔導學生。對於呢類型嘅風化案，衙差一般都唔會詳細將案情公開，以免「受害者」受到更大傷害。不過今次事件值得大人反思嘅係，細路仔就學緊大人做嘅嘢，仲唔係好嘢添！不過呢單嘢當事人雙方年紀只要加多十年，官府同衙差都唔會理，仲邊會走個駐校社工出嚟吖。教育界婦女界到時到候就代表下一代發聲，叫家長大人都要關注小朋友嘅性教育，講咗咁多年小城性觀念同風氣都無改善過，仲越嚟越「前衛」添，所以至會跑出「同是細路俾錢非禮九歲」呢單新聞。各位不妨諗吓，今時今日唔少「上一代」頭腦嘅衛道人士，依然用緊佢哋上一代講啲唔講啲嘅性教育去處理問題。每逢風化案一出大家都認定女性「受害」所以家長要報警處理，問題係今次男生提出咗一個雙方都接受嘅銀碼而進行「交易」，而且仲有幾個同班女仔都落疊，完完全全係成人墮落世界，「受害者」根本就係整個下一代，因為男生被教育到用錢就可以解決問題，而「加害者」自然就只有整個上一代，家長、學校、官府同埋社會統統都走唔甩。

大港燦(下)

2011-09-01T02:17:00.001+08:00

小城同鄰埠最唔同嘅地方，就係鄰埠乜都大過小城，港口大機場大，連球場都大過人，所以小城庶民一直都唔會同鄰埠去比較邊個大細，但係當鄰埠嘅人將其價值同概念直接運用喺小城，就會有好多反彈。今次小潭山計劃起樓嘅地產佬，就係唔清楚呢樣嘢，至會講得出「呢個係唔係山？」，佢連山嘅概念係乜都未知，難怪被代議士大家姐直插埋嚟。大家記住雖然鄰埠有唔少半山豪宅都成五六十層高，但係佢哋都唔算山頂，起好咗遠望都只不過係山中有一幢建築物，而唔係山頂標一枝避雷塔出嚟，而今次小潭山嘅做法，就係好似太陽國武士嘅腰封咁突晒出嚟遮住塊面，遠望過去就係個山無端端突咗塊嘢出嚟。地產佬做慣鄰埠樓乜都大過人，諗住喺呢度起一定無問題，事關安全尺度同指標都一定過關，但係就從來都無諗過喺山腰起座屏風樓會有咁大嘅環境問題，所以佢哋到今日都唔肯公開個環評報告，反而想借風水部無評論嚟借尿遁。其實唔化局長喺公聽會有備而嚟，地產佬早就應該聞到陣「除」，如果拆唔掂唔化局長，好應該有兩手準備，提供另一個妥協方案供庶民參考俾意見，至可以平復庶民對地產佬嘅仇恨情緒，而唔係笨到自己搞多個記招以為可以用大港燦嘅理據去壓制庶民嘅情緒。無錯小城嘅記者可能未夠經驗去提出更技術性嘅問題，但係就唔等於小城無人識問，當事件被公佈被關注，就自然會有人出嚟問點解，唔理你係知縣定係地產霸權，至於代走資司長都代咗咁多年，到而家都未見到有乜嘢建樹，唔係好應該做番啲嘢，俾庶民一個交代，好等知縣仲有能力參選下一屆？儘管佢唔係你嘅提名者……

何謂實力雄厚(上)

2011-09-01T02:16:00.001+08:00

小潭山地產佬眼見近日民意同輿論都一面倒係咁鏟佢哋嗰建樓大計，竟然頂唔順自己出嚟開個記招，想平抑一下輿論嘅壓力。可惜嘅係呢位商人到今時今日，都仲未知自己發生乜嘢事，點解淨係佢哋至要出席呢個聽證會。其實今次呢個地產佬只不過係官府用嚟試水溫嘅白老鼠，地產佬早就得到批准利用塊地嚟起樓，只不過差在起多起少咁解。不過自己唔爭氣搞咗單官司，一拖就拖咗廿幾年到批地期滿前至俾佢哋計到期，咁先至開始重新規劃睇下可以做幾多嘢賺返之前唔見咗嘅錢。呢個地產佬過去一直只係做低密度住宅嘅細盤居多，並唔係乜嘢大財團亦唔係實力雄厚嗰隻，小潭山塊地可以荒廢咗咁多年，無非係當年麵粉價平，小城又唔興買樓花，所以佢哋可以批咗塊地之後自己起樓再賣出去。不過今次地產佬實在太大貪，一出手就想將十層八層改做三十幾層，仲要係屏風樓，傻嘅都知你博大霧啦！佢哋搞個記招以為可以正視聽，只不過係攞苦嚟辛。淨係睇個代表講嘅嘢就知佢係上一代暴發港燦教育出嚟嘅富二代，佢對山嘅概念同庶民根本就差天共地傾唔埋欄，被人插係應該，至於用唔用到二百公斤炸藥就算用咗大家都唔知啦。不過大家唔使理條友講嘅嘢，佢好明顯係用嚟被祭旗嘅單位，事關小城唔係只得一塊地更改用途，只不過係資料唔公開大家就唔清楚，所以小潭山要上到公聽會其實係因為目標太大，就咁批咗出嚟一定被人插，所以官府至出手擺上檯。而最近我哋嘅閩籍代議士就再爆機場對面塊山地官府批得唔清唔楚，但係就被人挖到體無完膚，點解佢哋就唔使上公聽會呢？睇返個「發展」商係大劉就知啦，呢種至叫做實力雄厚，唔係點解老婆都可以多你幾個。

下世災難

2011-09-01T02:15:00.001+08:00

寶島黑心食品危機，搞咗成個禮拜仲越搞越大鑊。事件首先被發現有塑化劑，竟然係寶島十分暢銷嘅運動用飲料，全個寶島當然十分震驚。但經過一個禮拜落嚟查證，除咗運動飲品之外、果汁飲料、嬰兒食品，甚至連胃藥都被驗出有毒塑化劑。以上講緊嘅好似都係廠商承包食品同飲料，不過最近期發現竟然係寶島流行之夜市街邊檔，當中嘅沙冰、寶島特產珍珠奶茶同埋所謂鮮果汁都含有呢種有毒添加劑，就連大陸嘅即食麵都話因為被包裝袋污染而驗出有塑化劑。不過自從太陽國漏核引發國人盲搶鹽之後，祖國同胞早就習慣黑心食品包圍住生活。由早期嘅甲醇假酒，蘇丹紅、孔雀石綠、三聚氰胺、地溝油等，大家都戲謔每日都將成分化學元素週期表放落個肚裡面。今時今日城市發展同農業工業化之下，任何可以將成本降低增加利潤嘅前提之下，只要可以提升股價，乜嘢手段都唔會計較。大家原本以為寶島對食物監控十分嚴謹，可惜嘅係大家喺「現代管理學」上面學學埋埋嘅有效控制成本，就係引發黑心食物嘅最大誘因。全球一體化之下，食物添加劑早就無孔不入，西歐早就有病死火雞肉扮鮮肉賣，太陽國就發展咗利用肉類酵素將碎肉造成牛扒，再加上基因改造食物大量充斥市場，都係短短十幾年間出現喺超市同埋街市，最後連農場同牧場都被化學肥料所取代，令到一眾想健康長命嘅國人都豁出去，一句：「唔通唔食咩，死咗至算」去被迫接受呢個人工食物嘅世界，我哋唯有祝人類嘅下一代唔好咁快絕種，否則今日貪婪必定成為下世嘅災難。

混帳辦

2011-09-01T02:14:00.000+08:00

最近查數部公開踢爆，小城未來之公交主力「輕軌」，報數一路係咁加，質疑當初負責嘅官府部門，根本由一開始就亂咁嚟完全無財務管理概念。記住到今時今日小城仲未有任何關於輕軌建設做過，但乜都未做就使咗幾億唔知去邊，而且仲係無計入條大數裡面。另外早幾年輕軌開始做研究時候，就一次過申請咗成十二億嚟用，不過三年嚟竟然只係用咗幾百萬。唔好以為咁樣叫做慳錢，只係代表咗佢哋唔做嘢，或者根本就無財政概念。試問吓申請十幾億只用咗幾百萬，當初點樣出到呢條十幾億嘅數嘅申請，而現在又用都無乜點用又係因乜原因呢？另外查數部直指負責嘅「混帳辦」喺輕軌第一期嘅九成判給，都係用豁免條款唔使諮詢，直接與一間供應商洽商同埋直接批給，諗都無諗過搵埋其他供應商一齊報價搵多個選擇，報告唔講明，庶民就直插根本就係官商勾結利益輸送。記得當初官府話起輕軌都係話緊要使四十幾個億，但係最近報告經已加碼去到要七十幾億，有評論員直情講到第一期起好運作時候，如果使費唔夠百五億都叫做好彩。無錯，因為份報告講「混帳辦」呢條混帳數直頭唔清唔楚，邊條數至算係輕軌嘅數，邊條數算係城市建設嘅一部分都唔識分，所以明明四十幾億可以買單，原來係乜都唔計落去，當設計要求不斷規範後，條數就越加越大，因為都係要佢哋買單。雖然話庶民大都熱切等待輕軌建成，但更加唔想再見到小城出現多一隻「漏水蛋」同埋走資司長，不過淨喺睇「混帳辦」而家搞個標誌同吉祥物設計比賽，同埋每日喺公仔箱播廣告宣傳片呢類咁嘅形象工程，都唔夠一鋪被踢爆亂咁使錢咁大鑊，不如正正經經做好本份仲好啦！

百無風水局（下）

2011-09-01T02:13:00.000+08:00

山腰起屏風樓，風水局再次被人兜巴聲咗幾吓大嘅，當日坐喺唔化局長隔籬嘅風水局長全程擔天望地只顧飲水，點解佢自己風水局唔做環評報告要地產佬做，反而民署就有做環評報告交俾唔化局？咁地產佬嘅報告係唔係真佢哋又知唔知呢？阿局長你今時今日經已唔係劃地圖口架啦，坐得呢個位除咗要做之外更加要識得回應社會。講真地產佬早就交晒資料同報告等你班官做嘢，隔籬位嘅同袍做咗工夫，你都要做吓嘢至得口架，當日喺公聽會你肯定有機會講嘢，大家期待嘅唔係由你哋同袍代你出聲，咁樣只會令人對呢個新成立嘅局更加無信心，咁樣更加不利小城嘅保育。我哋相信小城好多人好似唔化局局長咁，都喺小城大愛小城，如果唔係佢都唔會忍唔住見你唔講嘢佢至講，搞到俾人哋話佢過界。有乜法子呢？你都唔講但總要有人講，就算你話佢博攞分都好，佢都代表咗好多庶民講出佢哋嘅心聲。風水局都成立咗年幾，再唔可以用經驗淺嚟推卸責任。呢個專欄都唔只一次提你個局嘅「威水」史，每次你都鑊鑊新鮮鑊鑊金。過去嘅委員會都成立咗超過十年，升格為局就係表明庶民大家都對小城嘅環境保育越嚟越重視，希望有規劃有準則咁對小城嘅環境進行保護。答問題嘅時候你賴你哋無權限無法例唔批佢哋起幢樓，風水局咪就係要做推動小城嘅環保嘅立法同完善法例，就算係空降做風水局局長，都要交功課出嚟俾人睇吓，而唔係人哋交報告你就睇吓O唔OK，你話你唔應該又做球員又做球證，但係而家小城根本就無專業嘅獨立環評公司做報告，而風水局又無設指引，即係百無，無權無法無料。

唔通佢唔喺小城大？（上）

2011-09-01T02:11:00.000+08:00

喺上個禮拜官府嘅批地公聽會上，建築商人向大家介紹佢哋十幾年前租落嘅一幅地，將會由原來準備起嘅酒店，改做起幾廿層嘅住宅大廈。呢單新聞唔睇唔知咁大鑊，事關幅地係位於山腰位置（話就話喺山腰只不過差少少至到山頂），佢哋竟然諗住起幾十層嘅樓，佢哋就梗係無敵啦，不過個山就無命。阿建築商（唔想用發展商呢個名，根本就唔係發展而係破壞商）仲同大家講，佢哋做過環評報告，而家個地盤雜草叢生樹木唔多經已風化咗，將呢個丟空嘅地盤重新整理，起好之後再同官府合作重建樹木，仲好過而家咁任佢丟空產生危險。聽落好似好有道理咁，不過會上就有代表質疑地產佬嘅講法。今次出席呢個會有唔同嘅代表，既有官府代表嘅寮仔部、風水局、唔化局，又有業界嘅垃圾議員、大狀同埋兩位工程師同建築師。身為利益專業代表就梗係話：作為官府同個人都無理由唔批呢個「棵蓆」。不過座上嘅有位官員，竟然第一次同地產佬對著幹，佢話佢收到民署做嘅環評報告，話個「棵蓆」會影響山體，同時起嘅樓太高會影響山上植物所受嘅日照，附近又有環山步行徑，況且山體本身土壤咁貧乏就更加應該要去保護，而唔係再大力破壞。估唔到以上呢番說話，竟然係由唔化局嘅局長講出嚟，大家仲以為係坐喺佢隔籬嘅風水局局長講，再者山上亦都無乜嘢文物喺度，「阿蛇」點解咁激動呢？佢就話佢生於小城愛小城，唔想小城嘅自然生態受到破壞。咁大家就想問吓坐喺佢旁邊嘅風水局局長唔通又唔喺小城長大？

叫人點信？（下）

2011-05-25T19:39:00.000+08:00

話說傳媒喺電訊酒會上訪問公司高層時，梗係會順勢向負責通訊部嘅官扑埋咪啦。通訊官被訪問時就話，出年專營權就會結束，到時小城嘅通訊就會進入一個全新嘅時代。「阿蛇」莫非我哋唔知阿媽係女人乎？只係庶民嘅眼睛係雪亮嘅，淨係睇「阿蛇」你管轄範疇之公天問題，到而家攤蘇州屎都仲係未解決，雖然唔係話你搞出嚟嘅，但係官府設個局請你返嚟，都係叫你負責解決啫，咁到而家都搞唔掂算唔算做辦事不力？況且電訊市場局部開放咗咁耐以嚟，除咗淨係得減價之外，一直都未見得有其他新嘅服務推出去惠及庶民。問你點解龜速電話線上網，你又識得賴海外網站多人上唔夠分頻寬，上本地網站就唔會有咁嘅問題，咁蠱惑識得講啲唔講啲。人哋講緊嘅係國際知名入門網，大大話話全世界起碼有幾十台高速伺服器，加埋高速專線分佈世界各地，唔應該出現窒吓窒吓嘅情況。另外若果出現海外網慢本地網快，最大原因係本地對海外嘅網線出口唔夠頻寬，呢啲都係因為專營發生嘅問題，定係小城上緊嘅網都係經過一個巨大嘅過濾器，好似我哋偉大祖國咁，所有網上訊息經官府過濾咗之後再去到庶民部腦度，應該係邊樣至啱呢？再者上上吓網會斷線嘅又點會係海外網站嘅問題呢！但凡以上種種庶民對於「阿蛇」你嘅言論始終都有所保留，因為咁多年嚟閣下都無點做好過市場監察呢樣嘢，至於話推動新服務，海外經已試緊4G網絡，小城到而家連3.5G都未達標，就連國內都經已開始緊網上租電影睇嘅服務，就算小城有人想開展呢種服務，都被小城嘅專營收費嚇死咗，叫人點信你呢！

貴到無朋友（上）

2011-05-23T23:58:00.000+08:00

網友為咗慶祝「世界電訊日」，專登組織咗幾十人，去到噴水池嘅小城最大電訊公司門口，以「行為藝術」向呢間獨裁三十年嘅公司「賀壽」，個個人都以現今最流行嘅「筆直身軀」五體投地咁「祝賀」呢間公司出年專營結束獨裁摺埋，佩服佢哋可以用水翼船價錢提供三輪車速度嘅服務，搞到大家「膠到無朋友」。趁住公司高層同相關高官一同出席慶祝酒會，老記們自然唔會放過機會，請高層發表吓佢嘅「得獎感受」啦！高層就答話我幾時都喺公司聽電話，大家要「祝賀」佢其實可以打電話直接同佢「祝賀」，唔使玩行為藝術咁大陣仗。高層果然用心良苦，要知道該公司要將個網速「調校」到三輪車咁嘅轉數一啲都唔容易，事關今時今日都經已搵唔返呢種技術，全部都入晒博物館。佢哋要為電訊界保留呢種技術，如果唔係第二日就會失傳。所以佢哋真係投入咗唔少人力物力去「保存」呢啲古董，要用古董梗係要比貴啲啦，你唔見喺媽閣間古堡酒店貴到無朋友咩？況且近年唔少家長同教育界、學者都話，而家啲小朋友每日上網時間太長，容易造成上癮，呢間公司就係為咗小城嘅小朋友唔好咁容易上癮，專登整到大家上網唔好上得咁開心要佢窒住窒住，咁就可以令大家對上網嘅興趣下降，唔怕造成上癮嘅習慣。就係呢種咁「捨己為人」嘅精神，就算出年佢哋嘅專營獨裁玩完都好，但係佢哋仍然擁有小城硬件嘅管理權五年咁長嘅合約。只要你夠長命大家請放心，佢哋一定會繼續一貫嘅作風，保持三輪車嘅速度好讓大家唔會沉淪網海，繼續以火星旅行收費以減少小城宅男宅女嘅數字。

加大比重（下）

2011-05-23T23:57:00.000+08:00

官府嘅社保即將見紅，唔改變就會喺二零二零破產摺埋。呢樣嘢原來唔係新嘢，太陽國同花旗國原來都經已破咗產，只不過係當地官府將佢哋改頭換面，搞到佢哋唔使以破產收場，即變相收歸國有由官府包底，咁至可以逃過破產命運。咁講，如果官府將基金投資改成更加進取，好似又唔係好適合小城作風，事關大家都係穩陣最重要，唔好蝕晒所有老本就得，所以追唔到通脹都唔係好覺，反正人生總有賺蝕。不過我哋喺呢度就建議官府，可以利用市場原則，將投資部分改做買祖國國債，以官方評級加上一國兩制嘅保證，包保唔會蝕錢。如果唔夠規模，仲可以用官府發債形式，再喺鄰埠上市，單係呢幾年小城賺嚟嘅名聲，包保有賺。最重要係小城庶民有優先同優惠價認購，咁就會成庶民都有錢賺，仲唔使年年都派六千同七千，因為淨股息都夠派呢份錢。點解官府到而家都唔推出呢種咁惠民政策呢？歸根究底都係因為官僚到而家都係驚死過人，唔肯將自己睇到嘅出路向公眾披露，因為少做少錯唔做唔錯，佢哋反正都已經有幾好嘅福利保障，使乜幫你班低下層諗咁多先？若果鄰埠係看守政府，咁我哋就覺得小城咁多年都係看守政府，從來都無諗住發展囉，唔係點叫做知縣呢？就算唔搞公債上市，都好應該將供款價錢適當調整一下啦！十五蚊而家只夠叫杯奶茶咋！至少都應該用一餐飯嘅價錢去保障我哋第二日夠氣執樹皮充飢丫。再唔係就調整字花檔對全民保護嘅比例，反正佢哋除因為小城至可以開賭，更重要嘅係佢哋用小城嘅地、小城嘅人力資源同埋官府嘅資源，咁至可以有幾百個億嘅收入同埋可以咁大聲，抽多啲稅同比例去保障吓小城嘅工友同埋佢哋嘅下一代，一啲都唔過份。

破產社保（上）

2011-05-23T23:52:00.000+08:00

官府預告，社保出年開始蝕錢，去到二零二零就會破產。好多人都R晒頭，我哋小城每年嘅字花稅收唔係年年都創新高口架咩？點解用嚟保障我哋將來嘅保障金，會喺我哋都未有資格攞保障嘅時候，就已經蝕緊錢，到有機會攞嘅時候佢就經已破產。由開放賣賭之初，小城經濟一直向上，唔少打工仔明明係稅網之外，都變做納稅一族。但打得工嘅都要供款俾社保口架啦，雖然話每個月都係十零蚊唔多覺，但每個月明明老闆話你嘅人工係一萬，偏偏收親份糧單都只係九千九百八十五蚊呢個哽住哽住，硬係要俾大家記住你有供呢十五蚊俾官府幫你儲起佢，咁自然一定會問我哋供咗嘅會銀去咗邊同用緊邊度。官府嘅報告話雖然每年基金收入有四五個巴仙嘅增長，但都追唔到今日長者申領養老金嘅增長，因為就係官府嘅福利政策完全無計數，唔理個基金夠唔夠錢去平衡，養老金話加就加。再者呢個基金都唔止一次蝕錢，佢都曾經蝕咗八千萬咁多。當然，入不敷支係因為收入基數太低而支出太廣，無理由唔蝕錢收場。不過大家留意吓官府報告就好清楚，連佢哋自己都話小城嘅保障基金都係以保本為主而且相對保守，而今年嘅收入預計大概有百分之四嘅增長，淨係睇呢條數，都追唔到退休長者回鄉休養嘅通脹。想追到通脹，最快捷嘅方法梗係將投資方式改為更加進取，齋睇小城樓價升到天價咁濟，基金入市都應該好正常。但官府如果唔好意思直接咁推高樓價，可以將基金投資喺部分較進取嘅基金上面，令到回報更加能夠追近通脹，就唔會搞到要預先話俾大家聽將會破產呢！

Plan B「喪屍」

2011-05-12T01:35:00.001+08:00

今次衙門做咗搞屎棍，主動喺官府總部拉人封車，又向採訪人士規限，表面上係彰顯警權威信。但有陰謀論者就認為，衙差今次嘅行動，基本上應該係官府對付今年遊行嘅Plan B。即係咁，每年遊行有唔同嘅團體同唔同嘅訴求，官府根本無能力或者係唔想處理呢啲問題，過往每到遊行日子前夕，官府都會準備唔少「特備節目」俾庶民參加，希望佢哋大部分都受氹，入場睇呢啲官府準備啲「特備節目」，以減少大家記住對官府不滿嘅同時，亦可以減低遊行人士嘅數量同聲威，呢個就係官府預防性嘅Plan A。不過當Plan A唔係好成功，即遊行人數有番咁上下嘅時候，官府自然要作出第二手準備，就係製造另一種聲音，將庶民嘅聲音喺媒體上面壓落去。不過佢自己都知無乜民望，媒體係唔會睇佢台戲。今次見上街嘅人都唔算少，但又個個都咁乖唔多搞事，不如就自己搵啲嘢嚟搞吓，至少可以令媒體將報道火力集中喺同官府嘅對弈上面，反正小城衙差「乞人憎」都慣晒，唔差再憎多兩成。同時令到班記者佬同遊行者都有個警覺，下次遊行時唔敢咁大膽，官府呢個Plan B直頭係一舉三得乾手淨腳，而衙差就做咗箭靶一力受晒，大家睇番片段班衙差嘅態度同對白就知：「我哋只不過收到上頭嘅order要咁做」，部分直頭答都費時答你木無表情，除咗用「喪屍」之外都唔知用乜嘢嚟形容佢哋好。

究竟驚乜？（上）

2011-05-12T01:34:00.000+08:00

一年一度五一庶民「蘇哥利」時間，今年有八個團體合共成兩千幾人，秩序尚算井然。只係今年衙差唔知做乜發咗神經，學人哋設立臨時採訪區同示威區，美其名保障採訪人士安全，實質係阻止記者拍攝衙差點樣拉示威者走嘅過程。其實今次衙差絕對係有備而嚟，而且全部有的放矢。首先今年有成八個團體組織上街，相對警力嘅要求同封路範圍較過去幾年要更大，雖說參加遊行嘅人數並唔係歷年之冠，但係組織多自然就要分開唔同時段出行，而且終點唔同所以要另派人手去另一個點睇住。而舊年出事嘅地點衙門早就嚴密佈防，所以就算今年同樣有團體唔滿意衙門安排嘅路線，結果大家都乖乖地按照衙差指示照指嚟行。其實今年一直行都無乜事發生，不過唔知衙差係唔係覺得無大鑊嘢好悶，係都要做啲嘢出嚟俾人鬧吓至安樂，喺官府總部前面無端端扌查走一個團體停喺度部車，話到明係示威，佢又無扌查部車嚟撞人你咪由得佢囉，搞到又要拉人又要封車，除咗無聊之外真係諗唔到衙門點解要搞啲咁嘅嘢。另外今次成個遊行過程裡面，衙門派出唔少大內密探，手執微型攝錄機，一路監察遊行期間所有人嘅一舉一動，而且佢哋一直以一種兇悍嘅眼神環顧四周，任何附近路過嘅生物包括人同寵物，都會被佢哋怒睥一番，呢班友仲要見到有人被採訪嘅時候專登將部機哄到被訪者面前，唔知以為佢哋至係採訪人員。不過佢哋咁樣衰點睇都係似黑社會多啲，有學者就話基本上佢哋拍埋呢啲片無乜用，都係用嚟嚇鬼嘅多啲，咁究竟衙門班友驚乜嘢呢？

水客真相

2011-05-12T01:30:00.003+08:00

文章見報日，關口經已正式實施新嘅「走私」法，將多次違法攜帶超出規定商品之水客，予以刑責嘅懲罰。相信剛過去嘅五一，經已少咗好多平日出入搵食嘅本地及內地水客過關，應該暢通咗唔少。有坊會負責人指小城大部分嘅水客，都係低技術低學歷、高齡難再就業者為主，今次內地嘅強硬姿態，將會打擊呢部分人嘅生計。不過今次內地出「辣椒」，看似打擊平日搵開食嘅人，其實真正原因係越嚟越多人入行參與其中。淨係睇下近年水客熱門帶嘅貨品名單，似如「挨乜」同埋一大堆電子產品，都已經將呢類高齡低學歷人士逼出水客嘅範圍。事關呢類商品最受歡迎同最值錢，若果將貨品交俾一個連電視遙控都唔識用嘅人嚟帶，分分鐘被關員關入黑房照肺繼而被徵收關稅，貨主就連炒價水位都無埋。所以基本上小城嘅水客經已分開咗兩三批人，識得帶「高科技電子零件」嘅水客，其實大部分都係學生或者係部分兩地工作生活嘅人，政策對佢哋幾乎無乜影響。但係班低學歷嘅高齡水客，平日真係走兩轉買平嘢，順便帶兩罐奶粉等協調一下平衡貿易，有報道話學者建議官府加強職業培訓，協助呢批人重新投入勞動市場。講就梗係好理想啦，試諗下水客嘅工作就係無固定上落班時間，帶嘅貨品又要視乎行情而改變，就連水客自己都話佢哋只不過賺取係蠅頭小利，即係貪小便宜但係咁就經已足夠，其實佢哋大部分都係退咗休無乜世藝，每年有官府幫補六七千，帶貨只不過志在搵少少錢叫做幫補吓，買吓平價餸感覺叫做賺咗，佢哋又唔係咁方便打一份固定嘅工，因為仲要返屋企睇孫或者幫手接送放學，試問有邊個行業可以適合佢哋做呢？唔通叫佢哋兼職賣保險咩，佢哋都唔想咁辛苦用腦賣嘢啦。

神乎奇技（下）

2011-05-12T01:30:00.001+08:00

知縣今次宣佈再派三千之餘，亦都對外公佈咗對小城樓市降火措施，新樓樓花若果兩年內轉手，官府將抽取最高百分之二十印花稅。而相關法例將會年底推出。即係話俾大家聽，要出貨就趁手，而買得起貨嘅，亦即水頭充足者，兩年之後就可以甩身。至於按揭成數本地人就最高只可向銀號借七成，外地人就只可借五成，官府話有助打擊炒風火候。但明眼人一睇就知，成個措施只會打擊真正嘅用家，令佢哋更加難上樓。事關今時今日普遍樓價都去到百幾二百萬，新樓樓花就更加唔使講，見都未見過低過三百萬，按一般有能力買呢類樓宇嘅小城中產嚟計，佢哋至少都要拎成百萬現兜兜出嚟，至有望入住享受一手樓但仲未計裝修費。至於條法例要到年尾至出到嚟，即表示未來呢半年都仲有得升，到時最低入場費可能唔止一百萬，到時官府又有乜招數，去幫助呢班有心但唔夠力嘅庶民上樓呢？要記住小城除通脹嘅輸入性之外，高樓價都係輸入性質，外來資金大炒小城樓，所需要動用資金對呢類國際炒家嚟講根本都只係零頭碎銀，唔使向銀行借貸。而且過去鄰埠經已有人試過用新招，設立一間公司用炒樓，要轉手就將間公司成間賣俾另一個人，咁就可以避過物業轉手時嘅稅收。但對於等上車人士要佢哋帶夠成百萬現金上身，就算你能夠每個月可以儲兩萬做首期，最快都要五年之後至有機會儲得夠，計埋通脹至少七八年。再者，喺呢套所謂「辣招」推出之後，將會有更多人上唔到車，租金自然有升無跌，要儲得成百萬首期根本就神乎奇技。

只此一招（上）

2011-05-12T01:28:00.002+08:00

官府終極派錢加碼三千，餐廳茶客一貫起哄，馬房驃叔當然高興，又可以玩多兩種組合試吓自己眼光。但問番個孫仔，佢話上次買「埃瘋」都要補錢，今次連「埃屁」都買唔到，越派越少有無搞錯呀！係呀，呢次官府都估唔到，一年內第二次派錢，竟然得出個咁樣嘅反應。睇番吓今次官府又以「紓解民困」做理由，向庶民再派三千，雖然個名同往年嘅「現金分享」唔一樣，但庶民只會記住「官府又派錢」，總之唔理係乜嘢名都好啦。今次雖然話同一年派兩次，一次四千一次三千，合共夾埋仲多過往年一次派六千，不過就有好多人感覺都係一次過派六千會正啲，當然一次過派七千就梗係最好添啦。但一次四千一次三千，情況就等如老闆將閣下雙糧同花紅，分開十二個月放番喺你嘅人工裡面一齊出，總唔似突然之間跌舊錢落嚟咁有橫財感。淨睇阿驃叔個孫嘅「崎史」就知道，官府如果一次過派七千比大家，佢已經可以考慮買「埃瘋」或「埃屁」，然後再計劃將多出咗嘅錢點樣使。今次斷截禾蟲咁派完一半再派一半，之前被人鬧咗一次之後，今次再派庶民又唔會特別多謝官府，主要因為鄰埠都要學小城咁派錢救面，一樣係派番小城過去嘅六千大圓，官府加碼再派，自然要出手更重，所以搞出個多隔籬一千蚊合共七千。只不過得出效果唔高之餘，大家都仲記得官府年頭至話過少派過舊年，都喺希望為官府派錢嘅規矩設立退場機制，希望大家唔好諗住官府一定年年有錢派。依家出爾反爾派完再派，除自打嘴巴之外，更只能令人聯想到官府到最後都只有派錢一招，希望減低五一上街嘅人數，咁算點呢？

有幾嚴重無人知（下）

2011-05-12T01:28:00.001+08:00

早兩日媒體報道，有十六歲口靚仔喺字花檔輸咗錢之後，向貴利王借咗十萬都輸埋，搞到被禁錮喺客棧，最後搵機會報官至救得番。事件震驚社會各界，學者代議士紛紛批評字花檔同埋貴利王，連十六歲口靚仔都唔放過，容許唔夠秤者都入到字花檔，唔夠秤都借貴利俾佢繼續賭，仲借成十皮咁多。不過話時話，大家都估計呢位小朋友應該打扮成熟，至有機會蒙混過關入到字花檔同呃倒貴利王借咁多錢俾佢賭。有前線人員就話近年唔少後生仔都成為病態賭徒，本地人嘅賭風開始越嚟越厲害，官府同家長到而家都仲未感覺到有問題發生，呢件事正好向大家發出警號令當局關注問題。雖然大家都將責任指向字花檔同埋貴利王，但其實家長同官府都要負好大責任。青年人若果誤入歧途，最終父母同家庭都要付出一定代價，若果平日放多少少時間俾自己仔女同家人，就可以及早發現潛在問題，亦可有機會將問題化解。可惜今日出問題嘅家庭，父母大都話自己太忙要搵食無時間睇仔，咁出事就唔好怨人啦。有學者指事件大多出至低下層家庭嘅青年人身上，但我想講若果現代父母都唔得閒睇仔，就算中產同富裕家庭嘅子女一樣有機會成為病態賭徒。而官府每年咁樣派錢俾大家，幾個月到幾十歲都照派六千或四千，唔理係老闆、打工仔同埋學生哥，就算飲緊奶都有，對於一班對理財無概念嘅人嚟講，錢係一樣好易獲得嘅嘢，根本唔係乜嘢，反正有人會俾我唔使自己搵，輸晒又何妨呢，贏咗仲可以同班朋友仔一齊去威，有乜所謂！所以官府呢幾次派錢，就等同太陽國漏輻射事件一樣，最後結果會有幾嚴重根本無人知，因為事件經已蔓延至鄰埠啦！

搵人陪葬（上）

2011-05-12T01:26:00.000+08:00

太陽國漏輻射事件搞咗成個月，到依家都唔知幾時收到科，太陽國官府每隔兩三日就話會準備用乜嘢新方法去處理事件，但喺所有騎呢方法未有實效出現之前，唔聲唔聲就向大海傾倒受污染嘅輻射水，搞到鄰近國家如北極熊國、太極國同埋我哋祖國即刻乍晒形，指責太陽國要放水都唔通知聲，反而就問無離啦更喺度行行企企嘅花旗國，佢哋就梗係話無問題啦，又唔係倒喺佢哋屋企門口，仲要係「九里」咁遠嘅對面海。講真我唔敢否認佢哋都係有心想補鑊搞番好單嘢，但問題係呢班友對災害狀況掌握唔到，唔清唔楚嘅情況下藥石亂投，對輻射洩漏程度一直都係估估吓。出事頭一兩日就將事故設定為四級事故，以圖顯示事故比花旗國單嘢仲輕微，但被外界質疑太輕視事件之後，一個禮拜就將事故升級到第五級。到早幾日，就算唔想認都終於要將事故級別升到最高級嘅第七級，不過都係唔聲唔聲話升級就升級。但就更加引發民眾震怒，即之前成個月大家都被官府蒙在鼓裡，而期間有唔少人都可能係咁枉死咗，因為災難級別越大，官府可動員嘅救災資源就更多。佢哋今次要隔成個月至肯將災難級別提升至最高級，除終於肯認清問題嚴重情之外，佢哋班所謂專家同負責人要用成個月至肯承認自己無法子搞得掂單嘢，結果累死自己國民之外，仲搵埋鄰近國家嘅一班漁民陪葬，事關倒咁多受污染嘅輻射水落海，肯定對附近一帶海域魚類有所污染，就算佢哋講到點樣問題唔大都好，至少外國嘅平民百姓都唔會買該地區附近捕獲嘅海鮮食，咁唔係搵大家一齊陪葬係乜呢？

係時候撥亂反正

2011-05-12T01:25:00.000+08:00

廣場建築物漏水，局方諗住外判俾人去維修，諗住暑假開檔嘅計劃可能要出年至可以實行。就咁睇以上嘅描述，一開始就發現件嘢有問題，但問題唔係今日至發生，而家同大家數下單嘢有幾多問題。一開始個廣場設計就九唔搭八，無端端將條路改咗地底行，從來都唔理路面行走車輛有幾快同彎度有幾多，到今時今日仲未有老人家喺公車上面因為呢條路而受傷，經已係神蹟。再者廣場上嘅建築物建咗之後，被附近居民強烈投訴，最後要拆走隻鬼爪安撫民心。另外下潛道路嘅入口太窄，要改闊面。跟住廣場嘅設計係完全無遮無掩，樹都唔多一棵，結果又要另加林蔭通道同周邊樹木，改善環境設施。早排先至加強咗廣場嘅照明系統，因為一開波個場就唔夠光。呢個場由零五年開始動工至今，一直都問題多多，年年都有新嘅問題發現，即係話個場一開始就設計有問題，根本就唔合理，若果唔係又點會俾人投訴咁多次呢！設計有問題又未必關晒間設計公司事，有經驗嘅設計人士，就好肯定當中有好多唔合理嘅官方要求加咗入去。但官方唔合理嘅要求加咗上去，設計公司有一定責任無解釋好俾官方聽。到咗今日間玻璃屋漏水，肯定係承辦商用料同施工都唔合規格，至會造成今日想用至發現漏水而唔用得嘅狀況。又一個巨大嘅爛攤子，當時就使咗一億六千萬，結果係俾庶民鬧到九彩嘅重整計劃，庶民硬啃咗咁多年，仲差過福島核事故鑊鑊新鮮鑊鑊甘。工程就做咗但無了期嘅修修補補，都改變唔倒設計上嘅先天缺陷，官府不如考慮吓撥亂反正，終止呢場無了期嘅修補，反而有機會成為一項好嘅政績都未定。

唔負責任嘅垃圾議員

2011-05-12T01:24:00.001+08:00

剛剛過咗一年一度春祭，拜祭先人嘅孝子賢孫迫滿各大山頭及墳場，而各口岸回鄉掃墓人潮亦同往年一樣人山人海。同往年一樣，公眾墓地經已滿額，而且公眾墓地嘅土葬位早已安排六年後要「起骨」，將葬地退回官府以便安排其他要求土葬嘅人士使用。當然大家都知道小城土地有限，唔好講死人，就算係在世嘅人都唔係好夠地方住，早前國內地產界就流行日頭炒住宅夜晚炒陰宅嘅瘋狂現象。而家流行高齡社會，每年死嘅人會越嚟越多，墓地肯定早就唔夠，所以先至會有人疑似以權謀私，批咗十個永久墓地俾自己友嘅事件。既然唔夠地，加上唔係好多人接受到起骨一刻要面對先人得番棚骨嘅場面，火葬就成為近年好多人嘅選擇。有媒體就報道，早幾年有關當局就表示會研究小城設立火葬場一事，但研究咗幾年，到今日都仲未有下文。而喺同一段報道中採訪另一代議士，竟然搬出小城係以休閒旅遊定位，叫大家去鄰近地區嘅火葬場，小城可以唔使專登建一座設施咁話。一個現代化嘅城市，竟然唔需要火化爐，呢位代議士究竟有無腦嘅呢？難得近年小城經濟日益繁盛，仲唔趁現在有能力完善社會設施仲等幾時？一個完善同有責任嘅社會係好應該自己負擔自己嘅責任，呢位垃圾議員只顧自己休閒旅遊，將其他一切必須而又厭惡嘅功能推去其他地區，咁唔負責任嘅垃圾議員，同太陽國將輻射水流入大海有乜分別？一樣咁無人性！佢所代表嘅就係一班以炒賣地產唯利是圖既得利益者，叫大家唔好建老人院同埋戒毒中心，我一定唔係佢哋街坊！好期望佢哋下屆全軍覆沒，咁至對得住全體幾十萬選擇火化嘅小城庶民。

公開土地資訊

2011-05-12T01:23:00.001+08:00

官府最近又高調回收一塊非法填海霸地，面積之大全城嘩然，從媒體照片描述整體面積大過足球場，對比多年前嘅舊照及近照，大家第一次發現原來不法分子竟公然非法填湖，將官府原本留俾候鳥棲息嘅自然地區違法傾倒建築廢料，久而久之形成土地，加上破壞山體非法平整，土地利用作私人倉庫及放置建築材料，呢次係小城第一次發現有非法填海霸地事件。至於早兩日官府取締小城歷來最大面積嘅非法霸地時，被多名大漢恐嚇同掟雞蛋，對方仲手持木棍等武器，結果要報警調解，最後更有三名人士被控恐嚇而惹官非。按照這單非法填海一案，地點其實毫不隱蔽，旁邊就係路氹主要交通幹道，而且唔少喜愛觀鳥人士都會經常出沒該地帶，若然官府有定期巡查或者對公眾環境有一定規範，早就應該發現上址係一個非法填海地皮，而且填海唔可能一朝一夕，能夠填到咁大塊肯定好耐都無人理過，先至縱容到佢哋霸到今時今日。而歷來最大面積嘅非法霸地，更加離譜，從媒體提供照片中清晰可見，經歷十幾年嘅非法「開發」，喺小城僅有綠化帶中，一大片山林被人伐去。兩宗非法霸地事件，都係小城人煙稀疏之地，亦係小城唯一市肺，就算將來橫琴成個送晒俾小城，都唔能夠取代陪伴小城多代人嘅綠化回憶，大家喺中小學遠足燒烤，露營野外定向冒險等。官府喺近期積極取締非法霸地開墾嘅同時，可唔可以將事情防患未然？除加緊巡視官地同自然地帶之外，一個公開同透明嘅地界圖都可以令大家清楚邊度係私人地同官地，可以俾大家及早發現有無人非法霸地同開墾，至可保護小城唯一嘅綠洲。

造就黃牛

2011-05-12T01:21:00.000+08:00

世博國家館最重要展品，「動態版清明上河圖」正式於小城展出，由於展期只有三個禮拜，官府今次預先安排出售門券。「動態版清明上河圖」同大熊貓唔同，大熊貓會落戶小城一直都有得睇，但「動態版清明上河圖」就只在有限時間在小城展出，引致出現撲飛潮。今次官府安排所有門券只賣十蚊唔使一陣間就賣晒，除因為抵睇之外，更重要係小城本身就唔係好多節目適合一家大細參與，結果門券被人網上瘋狂炒賣，價格由原本十蚊一張暴升至五六十蚊一張，有部分熱門假期時段門票仲去到成百蚊一張，而官府被追問有人炒賣門票時，負責官員竟然話只要張飛係合法買入而又唔係假飛，官府管唔到咁話。呢位官員似乎真係唔知到，喺經濟活動裡面有一個名詞叫做「黃牛」。無錯，呢位官員唔係負責監管小城經濟部分，唔清楚都唔出奇。但一張門券由十蚊轉手賣五六十蚊叫做「炒黃牛」嘅行為唔係乜嘢重大複雜嘅商業犯罪，炒船飛炒演唱會飛都係叫做「炒黃牛」係犯罪行為，佢唔知係唔係近排睇得小城樓市過多，睇住啲價格係咁升上去麻木晒，所以竟然衝口而出話自己管唔到。呢種炒作小城係有法例監管嘅，又唔係炒樓炒股票。話時話造就「炒黃牛」呢樣嘢佢自己先至要負主要責任。鄰埠都有版你睇啦，同樣開售無耐門票就賣晒，但對方就有安排加時加場等招數，以免被部分人炒起晒所有飛，令黃牛黨無利可圖，再者有鄰埠前車可鑒，可以好似熊貓館咁安排部分即日門票就可以杜絕黃牛炒作，不過既然佢連「黃牛」係犯法都未分得清，都唔使旨意佢會識防犯囉。

食物安全（下）

2011-05-12T01:20:00.002+08:00

今次太陽國核危機，確實又真係唔講得笑。由出事至今雖然當地官府話無危險，唔會對身體有影響，但係事態又的確向壞嘅一方進展。喺呢幾日幾個受影響爆炸嘅反應爐開始轉趨平穩之際，當地竟然開始叫首都嘅居民唔好飲用水喉水（當地係可以將水喉水直接飲而唔使煲）。點解？咪就係多得爆咗幾個爐所洩漏嘅輻射性物質，經已由受災地區飄到幾百公里外嘅首都，而且仲污染咗食水添。消息一經確認，周邊地區政府即時加強對輻射嘅監測，又測空氣又測水，因為輻射塵係可以經風力向外擴散，唔夠膽擔保一定唔會吹到嚟小城，雖然好多專家都講小城同出事地區相距幾千公里，但係為保庶民安心，專家們同官府負責人，依然不厭其煩咁向大家解釋洩漏劑量不足以影響小城。近日除咗空氣同水之外，負責食物進口把關嘅衛生當局亦好唔得閒，因為事發地區附近嘅農作物同牛奶等，都確實驗出輻射含量超標，經已被禁止出口。鄰埠同小城，以至亞洲其他地區，太陽國嘅食物一向甚受歡迎，主要原因係太陽國對食物安全十分重視，品質一向有保證。但係經過今次輻射污染事件，立刻令以生食聞名嘅太陽國食品信譽嚴重受挫，唔少小城嘅「料理店」都受到事件影響生意下滑，鄰埠仲有商會警告再落去應該有唔少舖頭要執笠。但係話時話，魚生料理風行咗咁多年，又靚又抵食嘅食材嘅，都經已被人類食得八八九九，而太陽國本身都要靠進口食材至可以保持傳統，市面上口口聲聲話「產地直送飛機運到」，其實都唔知係邊度嚟嘅，要擔心都留返太陽國嘅人擔心自己有無得食仲好啦。

災難後的光怪陸離（上）

2011-05-12T01:20:00.001+08:00

一場災難，引發出各方人性。當中最多嘅當然係為遇難災民難過，亦替太陽國民未來嘅重建擔心等等，當然附近周邊地區例如小城等地方，最關心嘅莫過如核子輻射殺到埋身，如果唔係點會鬧出搶鹽防輻射呢類國際笑話呢。但係亦有國內壞腦憤青慶祝太陽小國受難，也有太陽國首都知縣發出「國家天譴論」。當然，大災難發生後出現最多嘅應該係「馬後炮」，除咗唔少原子能機構話之前經已有報告指間核電廠有問題，又有唔少人話「超級月亮」影響地球，所以太陽國等地先後遭受天災蹂躪，不過到咗「正日」，唔好話「超級月亮」連「超級氣球」都見唔到一個，呢類騎呢「馬後炮」都仲未算表表者，最新網上消息嘅，竟然係有人話鄭成功顯靈成功渡海，阻止太陽國災難繼續擴大，咁都要借人嘅國難嚟出位，但係又竟然有小城大報真係將佢當新聞嚟登至離奇。人家大企業應太陽國要求，無償借出部六十米高嘅噴水泥車去救核電站間國內公司，都未有領導出嚟邀功博出名啦（雖然都上晒國際新聞，廣告費慳番唔少），亦有唔少憤青話都係靠我國偉大，太陽國至有得救，係都要過番一棟。以上種種，都體驗到唔同國家同唔同嘅人，對災難發生後唔同嘅反應，但係對於一眾有常識嘅人嚟講，點都唔會受到咁無聊無稽嘅說法所騙到，充其量係將說法當笑料向其他人分享，但係一不留神，呢類轉發就好容易被其他人斷章取義加鹽加醋，至會有人聯想到連鹹魚都可以防輻射而被搶購，所以大家喺分享笑料嘅時候切記小心演繹，避免不必要嘅誤會同誤解。

乜嘢盟友？（上）

2011-05-12T01:19:00.001+08:00

太陽國世紀大災難，各國救援隊紛紛出動協助救災，連一向唔啱嘴形嘅祖國同俄羅斯，都對太陽國伸出人道援手，到達災區協助搜救生還者。太陽國嘅主要盟友花旗國更派出兩艘空母前往救災，另外先進集團國嘅法蘭西都派出搜救隊進行搜救。不過自從核電廠出事之後，各國官府立刻將注意力集中喺核電廠嘅意外上，大家睇住太陽國官府兩三日都處理唔到核意外之後，救援隊嘅用途即刻變成撤僑協調隊。花旗國大總統之前大大聲聲講會對重要盟友嘅太陽國提供一切協助，點知個核電廠爆咗兩嘢之後，被佢哋測出少量核洩漏，隻龐然大物嘅核動力航母竟然驚到即刻退到出外海睇定啲。至於法蘭西就仲厲害，一聽到話有核洩漏，救援隊即時停工拉隊走佬，仲喺之後嘅撤僑行動中，第一個派包機將僑民送離太陽國。當然小心駛得萬年船，佢喺要撤退都係無可厚非，但係至少可以肯定，法蘭西同花旗國呢兩個所謂太陽國嘅盟友，喺咁短時間內就離太陽國而去，佢哋嘅友誼關係有幾強，經已一眼睇晒。反而唔啱咀形嘅祖國同俄羅斯之搜救隊，依然喺災區繼續進行搜救行動，而且祖國之搜救隊仲嘅首次踏足太陽國，雖然技術同經驗都未必夠太陽國本身嘅救援隊咁好，但係依然堅守崗位，喺大雪中嘅災區為太陽國嘅災民盡一分力，足以印證遠親不如近鄰。不過，今次太陽國發生嘅核危機，搞咗成個禮拜都未搞得掂，就算太陽國自己話無事都好，對鄰近地區同國家都經已造成影響，再者今次太陽國嘅處理手法同資訊嘅公佈都做得唔係咁好，外國嘅核專家都一致指出，太陽國一方有資料無向外公開，造成各國都對太陽國嘅公佈抱有懷疑。

無得救（下）

2011-05-12T01:17:00.002+08:00

太陽國嘅核危機一觸即發，通過公仔箱全世界都睇住四個核子發電爐一個個咁爆，爆咗成個禮拜之後，由國內開始不斷有謠言及流言傳出。當第一爆發生之後，鄰埠就有唔少人搶購太陽國奶粉，因為就係怕未來嘅牛奶會受污染，有排都無貨賣，就算有得賣都唔慌會乾淨。呢種咁奇怪嘅思想真係唔知點樣出嚟嘅，而家嘅小朋友飲奶粉飲幾年，咁班家長點樣儲存幾年嘅奶粉呢？就算俾你有地方存放，奶粉都會過期啦，若果飲多一罐得一罐，倒不如早日轉個另一國家嘅產品，唔使一定要飲太陽國嘅奶粉啫，睇怕都只不過係借意炒作！另外就係碘，因為唔少核專家都喺公仔箱講，核洩漏之後會向附近居民派碘片，不過班專家講啲唔講啲，搞到一班無讀過乜嘢書嘅盲毛，以為食碘片就可以防止輻射感染，結果一般藥房都無乜點賣嘅碘片一陣間就無晒，跟住就有人諗碘酒都有個碘字，買呢隻嘢搽或者飲都得啫，結果連碘酒都被買光。最好笑嘅竟然係有人傳鹽都含有碘成分，食鹽都可以防輻射，不過呢次就真係大鑊，因為鹽就周圍都有且價格便宜，反而能夠引發乜人都走去搶購，謠言由大陸京城傳到沿岸地區，一蚊幾毫一包嘅鹽炒到幾十蚊一包，講到恐慌性搶購，小城又點會輸蝕過人吖，睇住幾百人圍住間舖頭仔，又打尖又打交，真係替呢班人可憐，舖頭老闆仲加心明大義，對住搶購人潮講你哋仲差過災區嘅人，人哋受緊災都未出現搶購，呢度謠傳一吓就搞成咁！有人仲講鹽都擠提。不過呢樣都未算，大陸有人買唔到鹽就豉油都買幾十支，最新消息係連鹹魚都開始有人搶購，想唔講呢個民族真係無得救都唔得。

壞腦憤青（下）

2011-05-12T01:16:00.001+08:00

呢次太陽國發生嘅巨大天然災難，世界各國都寄予無限同情及伸出援手協助救援。不過好快就有民族主義者喺網上留言，慶祝太陽國地震抵死等。當中有疑似國內憤青，亦都有鄰埠或本地嘅人留言，好快就發生兩派對罵嘅場面。雖然我國同太陽國都有過一段悲慘嘅歷史，而且太陽國確係同鄰近國家嘅關係唔係搞得咁愉快。但係喺自然天災慘劇嘅情況下發表泯滅人性嘅言論，只為自己腦下垂體一時之快，除咗唔尊重死傷者及其家屬之外，亦都係對自己身為「人」呢個身分嘅侮辱。人作為自然界嘅高級生物之一，喺呢類大是大非嘅情況下絕大部分人都會發出一種自然嘅悲天憫人嘅表現，大家同為地球村一分子，就算同個人發生過乜嘢恩怨情仇，都唔會喺大災難期間做出拍手鼓掌嘅行為。偏偏今時今日國家發展強大嘅同時，造就咗一批自大無腦嘅低能兒，以為喺網上就可以發表詆譭言論而唔使負責任，但只表現出自己嘅無能同無知。呢類人喺記住仇恨同時，又選擇性咁忘記四川大地震時候，太陽國派出救援隊無條件咁努力作出搜救，雖然最終只能找到遺體，但人家救援隊喺救出遺體嘅時候，對遺體作出咗默哀敬禮，亦獲得大批國民讚賞及嘉許。呢班壞腦嘅憤青既然有咁多時間喺網絡煽動言論，不如去雲南做吓義工協助重建把啦，總好過喺度無聊無建樹不特止，仲要破壞國際和諧，比破壞國家同社會和諧更嚴重。所以太陽國只會向聯合國求救，而唔會向聲稱大國已經崛起嘅祖國求救，況且太陽國嘅搜救隊本身就係世上最強嘅隊伍之一，只不過喺受災面積太大隊伍同人員唔能夠即時到各災區搜救，至會向聯國求助。

訓練有素（上）

2011-05-12T01:15:00.000+08:00

太陽旗國終極大災難，史上最強地震造成的破壞至今經已完全將一個城市毀滅。街坊都關注公仔箱之最新報道，但傳來的一幕幕嘅受災畫面更讓觀眾目瞪口呆，大家都以為睇緊災難電影《二Ｏ一二》。可幸嘅係同一時間，以太陽國國民對自然災難應對之訓練有素，再次令世人讚頌。災難發生後除了對主要受災地區造成致命打擊之外，大災難更波及遠至四百公里外之首都，一個世上最發達之大城市之一，造成市內交通癱瘓通訊中斷。到下班時間各大車站擠滿等候回家之人群，但就算出現咁大災難，太陽國國民一樣咁有秩序，無爭先恐後逼上車回家嘅場面，亦無出現民眾爭相到超市搶購糧油食水畫面，大家都一個接一個乖乖咁排隊等車等付款。唔少人都話若果喺花旗國，早就出現趁火打劫商舖搶奪嘅場面。至於排隊候車，唔好話喺災難時期，就算係和平大好日子，我們國內都唔可能出現。單為咗爭奪心儀名牌手袋，兩位打扮入時外表斯文嘅女子竟然喺商場大打出手，更加唔好講當年小城首間外資字花檔開幕時，被大批自由旅客逼爆玻璃嘅畫面。若果係特區兩地或者係國內發生同樣災難，相信受害者最多嘅應該係被人踩死而唔係被地震破壞嘅重物壓死。喺咁大嘅天然災難下為咗唔會造成第二次災害，冷靜有紀律地應對係必須嘅，呢樣就係點解日本國經歷咁多次自然災難，都能夠將死傷者嘅數字控制喺咁低嘅水平。真係向世界表明，死傷者嘅數字就係自然災害所造成，當中人為災害含量真係少之又少，都係應對災難訓練得出嘅成果。

偷雞唔到（下）

2011-05-12T01:14:00.000+08:00

今次新巴請唔夠人，開口要求官府放寬外勞司機解救，好早以前官府嘅交通官員經已講明，唔會開放職業司機市場予外勞。今次新巴就改向官府嘅財金官員埋手，希望對方想吓辦法。但係呢樣嘢點講都講唔通，事關官府對推出新專營合約之初，已經講咗唔會放寬外勞司機到小城搵食，投標者要自行解決人手問題，如果中標又唔夠人手做嘢，官府就會出手解決兼對中標者有一定罰則。既然講到咁白，真係唔明點解新巴仲諗住向官府求救要求輸入外勞。商業社會首重合約精神，官府開咗咁嘅條件，無能力者就唔好投標啦。而且今次好明顯新巴喺投標前對巴士司機嘅勞動市場研究不足，至會中標咁耐都未請夠司機開工，再者之前又呻搵唔到總站停泊，真係未見過咁流嘅巴士公司，所以司機們對呢間新公司無信心係應該嘅。但係有能力獲官府垂青中標，新公司嘅財政實力應該有番咁上下，而且巴士公司嘅初期投入龐大，有無實力根本無得呃，母公司亦係小城立足多年嘅實力派，何解會出手咁低搞到職位乏人問津呢？有理由相信佢哋最初只係想用同一條件，聘請原本會失去專營權喺另一巴士公司舊職員，可惜嘅投標批給程序上面出現阻滯，令到原本只有兩間專營公司變成三間一齊做，結果如意算盤打唔響，搞到又無總站又無車廠，連原本希望全線過檔甚至有得揀嘅司機，最終都因為做開有感情而無全體跳槽。結果新公司進退維谷，自然要放風搵官府求救。呢次偷雞唔到，只怪入標前無做好兩手準備，以防官府呢種突發性神經失誤。若果到時真係唔夠司機嘅話，而家官府話有應變措施應付，睇嚟到時新公司真係唔知點收科。

新巴請人難（上）

2011-05-12T01:13:00.000+08:00

被官府形容為交通黑暗時期嘅整治大動脈工程，經已開展咗一段時間，初期反應未如官府講咁樣塞到媽都唔認得，但係第二階段嘅工程果然「不負眾望」，到而家都未掘好。面對八月即將有第三間巴士公司加入營運，到時巴士多咗但係路面依然無改善，可能真係黑暗時期到臨都未定。不過，新巴士公司最近一直呻請極都請唔夠人，向外界放風希望官府批准佢哋招聘外勞司機，以解決開業初期人手不足問題。有代議士就指，新公司嘅招聘待遇較差，所以舉辦嘅招聘會反應冷淡，而且應聘者大多數都係上年紀嘅工友，足以證明薪酬待遇未能吸引富經驗及體能嘅好手。小城乃自由市場，打工仔都係為咗搵兩餐，新嘅營運者既未有營運背景同公司文化，要吸引「熟手技工」只能喺提高薪酬待遇方面著手，至有機會請到足夠人手開業，況且依家小城對大型集體運輸司機有唔少需求，除嘅「發財車隊」有唔少數量之外，各大地接社同學校等固有用家，都係新巴士公司嘅競爭對手。按「發財車隊」嘅工作條件為例，就算同一薪酬水平，「發財車隊」以行走固定點對點嘅路線，與巴士各站停車相比，工作自然較輕鬆，而且仲唔使睇住個錢箱望住客人有無俾足夠車資，唔使大聲叫乘客企入啲俾其他乘客上車，車上夠人司機就開得，乾手淨腳。至於地接社只會跟住旅行團走，都唔會好似公共巴士咁一日走到黑，景點與景點之間都會有唔少時間休息，最多係旅客遲咗上車，去下個點要比較趕咁解，有問題嘅都係導遊嘅事，一般旅客好少同司機過唔去。校巴更加唔好講，一日只需返學放學兩段時間行走，所以好多校巴司機都有多份兼職，新巴士公司如果唔調升待遇條件，隨時連而家請咗嘅工人都會頂唔順走埋。

衙差助長犯罪行為（下）

2011-05-12T01:12:00.000+08:00

小城錢莊嘅「掌櫃機」系統過去兩星期，被十幾張假卡衝擊，雖然只有一次成功案例，大家可能都以為只係個別事件，但事件反映咗小城旅遊業火旺下的副作用，就引入旅客之餘亦引狼入室，外地嘅犯罪集團經已睇中咗小城。只要有機會罪犯一定唔放過，若果唔係錢莊嘅網絡關係，知道有人能夠突破舊款「掌櫃機」嘅保安，都唔會花費咁多錢去更換一部「掌櫃機」，如果靠小城衙差負責保護，就真係唔知損失幾多至發現得到。小城衙差近排做嘅都係有事發生至出手，斷唔會有未卜先知能力，就算出現未發先至嘅案件，都只能多得海外情報嘅幫忙。事實上小城呢幾年真係開始富貴，由內向保守社會，轉變做外向經濟結構，有錢佬亦都多咗唔少。年間兩千幾萬旅客，每日平均多咗成七萬人，人口結構變得複雜，罪犯嘅犯案方式亦都開始層出不窮。由一般扒竊小偷，到新型嘅科技犯罪都有發生，而圍繞字花檔關係嘅罪案更加係三日兩單嘅社會問題。雖然話新型犯罪手法多數都係由外地引入，但經濟起飛後人心思變，亦係令到小城內在犯罪行為增加。今時今日庶民對小城衙差嘅口碑每況愈下，都係因為衙差嘅處事手法大有問題，就如早前導遊被毆事件中，衙差竟然係保護現行犯離開現場甚至離境，好讓事件能盡快了事，呢種咁嘅處理手法除咗唔能夠平息事件之外，更令人質疑衙差有無法理原則。衙差若果仍然停留喺石器時代見招拆招少做少錯，只會更加助長犯罪行為，未來必然會有更多人挑戰衙差嘅能力，就算用法規滯後嚟推卸責任都無用，出咗事都係衙差做番。

點至算係最悲哀？（上）

2011-05-12T01:11:00.002+08:00

近排去親錢莊扌禁錢，都發現部「掌櫃機」型咗又靚咗，事關部機除咗「圓滑」咗之外，仲有懶「高科技」嘅綠色燈閃閃吓，唔知以為佢套緊我嘅手指模添。但小城唔少錢莊經已陸續換上呢款新型嘅掌櫃機小露保，當中又以設置於「字花檔」內嘅「掌櫃機」換得最快。無他，現今小城最新建成嘅地標建築，除咗國寶屋之外，就梗係字花旅館。新嘅字花旅館近排幾乎每一兩年就整一間鬥大鬥豪嘅出嚟，如果唔係點引到兩千幾萬水魚到訪呢！既然係咁，小城錢莊自然不敢怠慢，推出最新最豪及最高科技之「掌櫃機」，以配合「字花旅館」接待呢班富x代嘅貴客。但當一般街邊嘅民居「掌櫃機」都更換新款型號之後，大家就會估「錢莊發咗呀？咁貴都換！」。不過大家唔好誤會以為小城各大錢莊都發咗，會自動更換新嘅「掌櫃機」去展示實力，佢哋咁做無非都係為咗保障自身安全同埋利益，先至會逐步更換新款「掌櫃機」。事關早兩日就有消息指小城呢兩個月，有成十幾張假卡衝擊小城錢莊嘅「掌櫃機」，其中只有一部「掌櫃機」受騙奉上「大牛」一隻。事後衙門當然四出偵查可惜仲未有料到，但就代表咗小城金融系統經已被不法份子睇中，未來將陸續有更多挑戰金融系統嘅罪案發生，除考驗衙差查案能力之外，亦考驗大家對金融資本了解有幾多。最簡單就係竟然有人被騙徒利用開演唱會條橋，呃咗成三千幾萬都得，就足以證明小城忽然富貴之後利慾薰心，連唔可能嘅大話都開始有人信，呢樣先至係最悲哀！

衙差嘅處理手法（下）

2011-05-12T01:11:00.001+08:00

由於鄰埠陸客男團友聲稱被女導遊毆打後，翌日上演國技「變臉」，有媒體指男團友懷疑私底下收取旅行社賠償十多萬元了事，引發有律師背景之男團友，被懷疑利用專業知識到鄰埠旅遊搵食。事件廣泛被鄰近地區報道，亦令到與鄰埠一樣旅遊行業向陸客傾斜之小城，擔心同樣事件會發生在小城。不過原來剛剛相反，鄰埠發生嘅係團客與導遊互毆，小城就發生導遊被團客齋毆，仲要係發生喺海關管轄範圍嘅碼頭內，當中衙差無即時介入調查同處理，甚至無帶走嫌犯一干人等回署偵訊，至會引發上百名導遊包圍旅遊巴阻團客離開事件。管轄範圍無介入毆鬥事件經已離譜，百人包圍旅遊巴發生之後，衙差都無帶一干人等回署再調查處理，都要喺條街度搞幾粒鐘，又要動員差人做人鍊作保護，根本就唔明班衙差喺度做緊乜嘢。正常就算有無人報官被毆打，咁混亂嘅情況下衙差只要一句帶署調查，邊度有人可以反對！但係位大蛇竟然親自上車同嫌犯傾談，又帶埋受害人家屬一同上車傾，呢種咁唔專業同咁人治嘅方式，我唔相信學堂會咁樣教佢。事件反映小城法律有極大漏洞，執法能力低下，根本就唔識得危機處理。如果話場面太多人太混亂，唔可以帶返署調查，咁點解衙差人鍊又可以阻隔到上百導遊呢？即係話班導遊唔係暴徒，要帶嫌犯回署根本無難度而且同警力無關，場面搞成咁全部都係衙差處理手法所造成。事件至此，本來可以喺小城嘅體制下好好處理嘅事件，今次仲要涉及國家嘅司法同執法機關協助，搞咗個爛尾盤出嚟而且仲有排拖，呢啲咪就係衙差嘅處理手法呢？唔怪得法院嘅案積到成層樓咁高都未解決啦！

陸客戲劇細胞 (上）

2011-05-12T01:06:00.001+08:00

剛過新十五，小城以及周邊地區，紛紛爆出內地旅客同當地接待旅行社，發生口角繼而動武嘅不愉快事件，當中全部都要出動警力調解。繼鄰埠發生內地男團客聲稱被女導毆打報警，當住攝記面前申冤告狀，翌日態度一百八十度轉變稱為誤會事件之後。接連寶島又發生兩團陸客團，因為爭上阿里山的小火車，兩幫人上演全武行，連累接待之當地導遊一併被毆傷，需要動用警方介入調查。好唔好彩小城呢個接待咁多陸客團嘅旅遊城市，早幾日亦發生團客當眾毆打導遊事件，事件引至小城導遊集體不滿包圍旅行團要求道歉賠償，結果衙差仲要組成人鍊保護被上百導遊包圍之陸客團。新春期間國人熱門出外旅遊，能夠「煲冬瓜」者莫過於小城、鄰埠及寶島，當中又以小城及鄰埠最容易進出，同時近年內地紙水上升不斷，亦是吸引陸客團趁旅遊之際到兩地大肆購物嘅動力之一。變成兩地之旅遊行業不斷向陸客傾斜，增加團客與旅行社之間的磨擦事件，而當中有唔少導遊唔清楚陸客嘅「戲劇細胞」而慘被「屈」。最厲害嘅莫過於早幾年黑沙海灘旅行團大嬸，警員手都未掂到佢就自動跌落地話警察打人一幕。今次鄰埠幾十歲大男人報稱被嬌小女導遊打傷申冤，明顯唔及大嬸咁好戲，不過佢聲壯如牛七情上面，加埋翌日出埋國技「變臉」，都多番少少觀賞指數。至於小城輪到導遊申冤事件，最好睇嘅反而係衙差出動一招「調虎離山」，將被包圍旅行團解救出重圍，但被人覺得衙差今次似係「放虎歸山」多過「調虎離山」，縱容行兇者返回內地草草了事，受害人則聲稱會追究到底。

心地唔好

2011-02-20T13:12:00.000+08:00

過年期間唔少鄰埠旅客鍾意嚟小城玩兩手，希望發番多少橫財博個新年頭彩，就算唔係咁，小城一向都被鄰埠人士視為自己嘅後花園咁，過嚟短假休息兩三日。不過近年小城旅客數量屢創新高，一向視過大海等同搭地鐵咁嘅鄰埠旅客，今年新春就出現咗預料唔到嘅意外，就連船公司都盡晒人事唔夠船疏導旅客，導致四百多名旅客滯留碼頭。事件當然被鄰埠媒體全面報道，有報紙大大隻寫住：即興過大海港客變「難民」。講真，呢單「意外」好明顯係人為造成，嚟小城玩即興除非你係「新哥」啦，否則無人敢擔保你有船票或者酒店房。今時今日就算小城地膽，遇上大時大節都只能預先訂位調度，方能確保有食有住。皆因單係今個春節高峰期，旅客入境就達到廿萬人咁多，邊有咁多船位同房間吖。再者今年酒店房價飆升嘅程度破晒紀錄，都係因為祖國嘅一班富二代都嚟小城玩兩手，就連鄰埠本土嘅名店都被祖國同胞所淪陷，要同佢哋喺小城爭房爭船票，鄰埠似乎人數同財力上都未夠班，而且國內同胞早就取代鄰埠旅客成為小城最大客仔，再唔係鄰埠嘅後花園很久矣。可惜鄰埠人士仍然未能調節心態，硬要將無船票賣嘅責任推俾小城。佢哋計落都係最多等咗三個幾鐘啫，都未及歐洲大風雪嘅英倫等咗三日都未返到屋企嘅二世祖咁辛苦，結果咁都要過小城一幢抽下水，心地真係唔係幾好，咁海洋公園班旅客係唔係更加似難民呢？話晒碼頭都有瓦遮頭，好過喺巴士站曬住話你知今日無票賣，明天請早。

小城開年飯

2011-02-20T13:11:00.002+08:00

新年流流為免大吉利是客死異鄉，或者撒手人寰之時剩番一具木乃伊（被人斬到放血咁一滴都唔剩），決定留低消費支持小城經濟。當然大時大節小城周圍都搵食艱難一位難求，雖則新春期間並未幫襯，但忽然覺得小丑漢堡包十分可愛，任何日子都能提供你飽肚嘅機會，仲係廿四小時隨到隨有唔使等位。記得開年飯當晚由於家族眾多，負責訂檯親屬足足訂咗三圍至能完全容納我哋呢班蝗蟲。由於今年首次族中長老下放權力比新一代拍板，新鮮人自然唔敢怠慢辜負長老期望，搵番間外資五星級酒店中餐廳舉行家族團拜。過往由於族人秉承傳統教誨，一直都係幫襯開甚有交情之地道中菜館，而且年年如是一間大房兩三圍人一齊吵鬧，私隱極強的個體空間。但係唔知係唔係地理空間設置關係，今年所訂之星級中菜廳竟然係無房，不過都唔緊要坐大廳舒服都一樣。可惜嘅係當晚呢間星級餐廳好明顯地over booking，可以話完全唔理空間幾大一樣加檯加櫈，結果當然係插針都插唔入啦。大軍殺到時知客竟然只識煲冬瓜咁都算嘞，更離譜嘅係全晚食飯要到不多埋單時，先至有人送上一早柯打咗嘅滾水，仲要係洗碗嘅阿嬸拎出嚟，上菜順序混亂，例湯喺美點雙輝時至出現，仲要係廚師客串埋傳菜一職。外資五星級大酒店嘅中菜都搞成咁，真係唔敢想像其他小企或者一般嘅粵菜館會提供乜嘢服務水準。大家可能會話大時大節有得你食都唔好要求咁高啦，但係作為一個國際休閒旅遊城市定位嘅小城嚟講，咁嘅服務水平唔單止唔合格，直情係無資格接待旅客，間菜館竟然仲敢收十個巴仙嘅服務費。

減少廢物處理

2011-02-20T13:11:00.001+08:00

風水部揭發有大量內地工業廢料，循正常途徑取道陸路運到小城之垃圾爐焚化，或者喺堆填區作傾倒。當中嘅工業廢料包括羊毛皮同牛皮邊角，呢次係首次發現國內有廢料會利用境外地方進行傾倒或處理。事件反映咗國內近年對環保意識加強咗唔少，令到以往一直罔顧損害環境嘅工廠不得不另覓途徑，處理工業廢料。今次嘅事件被懷疑係不法商人，睇準小城處理垃圾係分毫不收，所以不惜老遠由國內僱車，經過正式報關手續，將廢料寫成有用物料矇混過關，最後去到堆填區或者喺焚化爐燒毀，即係話就算搞好所有手續加埋跨境貨車租賃費，都仲比國內處理廢棄物嘅費用來得划算。事件證明咗小城官府各部門根本就無溝通，要佢哋合力去阻止不法行為唔使旨意。好簡單內地廢料通過合法報關途徑抵達小城海關，但係報關文件竟然可以無明確嘅收貨人，海關只係查過貨品並唔係違禁品就可以通行，明顯把關不力。另外廢料廢與唔廢根本就無人查證，就算今次風水部明確表示唔會接收呢類廢物，不法商人只要求其搵個人進行收貨，跟手轉車直接送去堆填區或者喺焚化爐處理都仲得，即係話法律同規範上有漏洞，不法廢料依然可以合法咁進入小城。要杜絕內地廢料利用小城免費處理廢物嘅漏洞，官府應從源頭處理，海關應該識得分辨何為廢料同有用物料。至於徹底啲就應該對垃圾處理進行收費，除咗可遏制非法處理之外地廢物之外，更可以減少小城自身所產生嘅廢物，令小城環境可以得到進一步嘅改善。

寶島派錢風雲

2011-02-20T13:10:00.001+08:00

內地富豪大鑼大鼓空降寶島，高調環島巡遊，向寶島貧窮戶進行救濟，而且宣佈以規定金額派利是「紅包」方式向民眾發放，每人約可收到一萬台幣的紅包。如此高調扶貧，惹起寶島朝野唔少爭議同評論。睇番呢位富豪嘅扶貧過程，一部大旅遊巴周遊寶島派錢，路上不時遇上阿公阿婆跪拜求錢求助，富豪儼如古代巡撫出遊，兩旁不時有人跪拜申冤。但係路過之地知道有錢派，連精力充沛嘅後生仔同中壯年人都出嚟跪埋一份，全程仲被媒體拍錄播出，搞到寶島唔少人覺得好無面。又難怪嘅，講貧窮寶島又幾時窮得過國內山區嘅人呢！目前小城仲有唔少志願團體，依然定期向國內貧困地區進行人道援助，大家就質疑國內富豪點解唔先照顧咗本地嘅低下階層之需要，反而千里迢迢走到寶島派錢。耶穌教落：「行善之道，左手唔能夠被右手知道。」即係話做好事要低調不讓人知，今次呢位國內富豪事先張揚，除咗令寶島官府面目無光之外，更令一眾得把口照顧民生嘅「立委」無地置容，搞到件事原本由扶貧變成「政壇照妖鏡」，如果話唔係政治騷講都無人信。至於出嚟跪地行乞嘅青年人大家睇唔過眼，但係有著數就梗係出嚟博吓矇啦，呢樣唔理喺邊度就算鄰埠同小城，都有人一樣咁做，只不過係金額多寡嘅問題。不過唔理係唔係政治騷，扶貧行善都係一件好事，就算乜嘢人利用今次事件進行炒作，呢位富豪嘅做法，總好過寶島嘅各大富豪同埋首富乜都唔做，淨係迫到同佢打工嘅跳樓。

如何教育下一代

2011-02-20T13:08:00.000+08:00

同叔幽咗賭王一默，回記者一句「我邊有咁多老婆呀」認真抵死，街坊拍爛手掌。果然係齊人之福唔易享，不過點都好，最緊要係平安過渡唔好搞咁多嘢。事關小城近年經濟成就得來唔易，大家都付出咗好多，呢幾年小城除經濟起飛之外，社會亦都付出咗唔少代價，由以前因為利息太貴買唔起樓，到今日樓價太貴而買唔起，代表咗呢幾年嘅經濟發展，徹底咁改變咗小城庶民嘅價值觀，咁大嘅問題，都係上任知縣一手造成。上任知縣改變遊戲規則，是福是禍到今日仍未分曉，不過小城於世上嘅知名度確實提高咗唔少，君不見近年海外旅客數量提升唔少，而且每逢小城發生大事，外地媒體都俾面撐場，甚至金融風暴核心國嘅冰島，都不惜千里迢迢到小城作過投資，雖然破咗產，但就確認咗小城嘅國際知名度提升咗唔少。不過就算知名度有所提升，都唔代表小城有足夠嘅市場力量，容許各方專才嚟小城咁彈丸嘅地方百花齊放。就等如小城近年唔少高等院校有唔同嘅課程，由博彩娛樂到電影視覺藝術都有學位課程，就連運動都話有畢業證書。小城究竟有幾多專業運動員？大家有睇過邊部戲係全部都由小城人主演同拍攝？邊個夠膽講小城可以容納幾多電影專業人才呢？以小農經濟體系發展出嚟嘅小城，就算有幾國際化都好，都唔可以排除小城嘅微型經濟體系唔能夠改變嘅事實，就係無出路！若果仲唔改變高等教育方向，未來將會有更多人白白付出四年時間讀完學位課程之後，最終走去派牌等養老，要改變呢種心態官府必須重新定位未來教育路向，好等小城嘅下一代能夠有足夠裝備，去應付下一波世界之變化所帶來嘅影響。

爭產下的受害者

2011-02-20T13:07:00.000+08:00

上個禮拜小城最轟動新聞，莫過於小城賭王家產分配一幕。年屆米壽之年嘅賭王，一個星期下來不停發出家產分配新聞。老實講以賭王一家四房，仔女都成十幾廿個，庶民一早都預咗賭王家庭遲早出現爭產問題，問題係搞幾耐同埋搞幾大咁解。鄰埠年中都發生唔少富豪死後家族爭產事件，其中最出名嘅梗係「小甜甜」單爭產官司到而家都未搞得掂。不過賭王呢次嘅劇目精彩到日日新鮮，除咗因為係富豪仍然在生就發生爭產事件之外，首先由家族公佈家產分配之後，跟手又話炒咗賭王嘅代表律師，不過未夠半日，律師就已經發炮指家族嘅分配唔符合賭王意願。但最重要嘅係竟然富豪本身都被人拎出嚟做道具，照貓紙讀聲明，最後仲要搞到律師要上法庭告十一個家族成員添！曾經叱咤吒風雲嘅賭王今日被迫做人肉佈景板，庶民關心嘅，梗係賭王轄下一眾企業，會唔會因為呢次產權分配而影響到公司運作同決策。好笑嘅係官府同鄰埠交易所都話未收過賭王企業股權變動嘅申報，即係話事件並唔係官方正式決定，因為如果真係咁做有規定必須向官府同埋交易所提出，否則就係犯法，因為法例上規定任何上市公司嘅股權變動，都要通知官府當局先至可以正式公佈。不過大家經過今次一役之後，知道原來咁樣做都係無王管，因為佢哋揀咗用送贈形式，就可以唔使通知官府自己話點就點，結果幾日落嚟賭王公司股價大上大落，雖然事實仍在發酵當中，但最終因為事件而損失嘅股民究竟邊個賠俾佢哋呢？官府係唔係有需要修訂法律，去規範呢種咁嘅消息發放方式？

高增長與國寶

2011-02-20T13:06:00.000+08:00

官府最近宣佈小城舊年嘅經濟增長，肯定超過百分之二十，連祖國嘅百份之十都唔夠小城嚟。呢啲咁驚人數字係好係壞真係見仁見智，只要稍為知經濟狀況嘅庶民，都可以預期呢種咁高增長情況隨時會逆轉。無幾多年之前小城周邊至發生過群集性傳染病，搞到人心惶惶，而經濟強如鄰埠等地，都因為疫情影響搞到死城一樣，以小城咁嘅休閒娛樂為主嘅經濟體，有乜風吹草動即刻回到未開發前嘅狀態。再者，近年小城高速增長，官府好大程度上係靠出賣小城嘅資源，加上京城開放國民支援小城旅遊字花業，令到小城喺人為政策傾斜下得倒咁驚人嘅數字。可惜嘅係小城由地方知縣以至平民百姓，對突如其來嘅財富根本就完全唔識得點用。簡單如國寶館咁細嘅工程，就算工程預算點樣差法，都唔會喺建館完工前一個月，官員仲誓神劈願話無超支，結果一個月後就由預算內嘅八千萬超支到九千萬，足足多左十幾巴仙，一個月內物價應該唔會加價十幾巴仙啩！官府就解釋因應專家意見將個館移入咗，跟住至發現新地點原來地質有好多石，結果就要超支，可以睇到官府最初所作出嘅預算，根本就冇聽過專家意見，只喺自己用一般建築嘅預算嚟做，到專家抵達現場至發現地方唔多好，同細路哥砌積木無乜分別。但就算移幾入都冇用，根本專家就唔知國寶館對面即將有大型私人屋苑落成，而且喺另一面既有由垃圾堆砌建成之高球場，更有分貝甚高至高卡車場，相信國寶住落一年之後，就會享受到呢個與別不同嘅小城生活，到時如果國寶有乜頭暈身　，結果又默搵地方搬，呢種咁求祈又唔科學嘅決策，遲早好似鄰埠嘅中華鱘咁凶多吉少。

博大霧

2011-02-20T13:05:00.002+08:00

新年無幾耐，小城風水除因為「飛灰」事件一路未解決之外，呢兩日又爆出垃圾高球場，竟然唔理「風水部」反對，偷雞喺場內自行築路，諗住製造既成事實嘅假象，博官府最後唔反對工程。可惜就喺差唔多完工之制，被官府揭發是項非法工程，「風水部」即時派員檢查工程對附近環境之破壞程度。
　各位只要唔係小學生，都應該有啲印象呢個高球場原本就係垃圾崗，喺未變成高球場之初，垃圾嘅高度高出附近路面成兩米有多，當時每次乘車前往路環，都要經過臭氣沖天嘅上址，先至可以到路環呼吸一下無咁污染嘅空氣。但唔知點解外資鬼佬唔了解歷史定扮唔識，一於唔理好醜整咗條路至算，博你官府無人無物，唔會查到呢個私人地方。結果造成條路都差唔多建成之後，官府至有人發現，呢個有條件嘅私人地方做緊犯法行為。好明顯地老外真係蝦你官府今天無人無物，民望低下，處理問題雜亂無章笠笠亂，最緊要嘅係無冇法冇規，就算犯法最多都只係罰款了事，點都唔使上身。要知道呢個垃圾高球場底部做嘅唔少設置，對垃圾進行生物解降，以對小城環保能夠進行適當保護。再者呢個垃圾區建設本身其實十分落後，好容易受破壞。外資就係睇準小城官府根本就未有能力抗衡，就算係罰都係好少事。呢樣咪就係官府嘅責任，本身官府除執法不嚴之外，最重要嘅係法規落後，唔好講環保法例，就連一般嘅民生同交通等法例，都仲係幾廿年前嘅舊例，要制裁今時今日嘅全球大鱷，根本就無還擊之力。大家要記住無法就無得執，就算有人投訴都好，執行者到達現場都唔能夠有即時嘅判斷，咁你又叫佢點執行法例呢？

蘇州屎(下)

2011-02-20T13:05:00.001+08:00

官府另一單「蘇州屎」就係離島垃圾爐飛灰事件。單嘢除由媒體爆出後官府至跟進之外，到而家官方都未有明確表明飛灰對人體有冇害。但係盲嘅都知道班工人倒灰都著晒全套保護衣，你話飛灰對人體有無害呢！至於附近居民同學校一直要求官府解釋事件，到目前為止都未有一個肯定答案。但當居民舉行記招強烈要求官府承擔責任，為附近全體居民進行驗身時候，官府至草草搵醫院發張通知叫大家去驗身。但居民代表就質疑都底發呢張通知究竟係乜嘢部門？首先張通知係由醫院發出，但又無署名。而大家一路都投訴緊「風水部」冇把關，事關負責監察燒垃圾理應係「風水部」，如果驗身話對居民健康無影響，係唔係居民就唔可以再提起追討賠償呢？如果驗明真係對居民身體有影響的話，官府又會唔會採取補救行動？再者「風水部」阿頭被媒體問到究竟官府邊個部門對事件負責時候，佢竟然答係全個官府都會負責。我真唔明其他部門例如郵差咁點樣幫佢哋一齊揹起呢單嘢呢？況且飛灰對身體禍害唔係一朝一夕，而家驗唔到有事唔等於將來都無事，有無專家報告可以證明到飛灰有無毒，同埋吸入幾耐至會對呼吸器官等造成影響？「風水部」阿頭明顯對事件逃避責任，就算你個部門係新成立以前無做開監管工作，到今日出事唔應該由你哋負責，但事件到今日作為一個責任官員，好應該早就制定危機應變措施，同埋表現出負責任嘅態度，去協助居民解決問題，而唔係同大家講出事之後成個官府所有人一同揹呢隻鑊。

蘇州屎(上)

2011-02-20T13:04:00.000+08:00

木屋拆遷事件結果官府洗手到尾，最後拆與被拆都各持自己理據，被拆一方收咗賠償但係依然聲言追究到底，另一邊執行拆遷之發展商就話，根據協議經已做晒佢哋嘅清拆工程交番塊地俾官府。當然大家都知道仲有三戶仲未拆遷，所以最後官府就話佢哋會按照合同執行罰則，至於罰啲乜同點罰法，官員一概扮唔知要睇番份約就耍咗去，遺下一大堆疑團叫做草草收場。但係心水清嘅代議士，自然唔會俾單嘅就咁就矇混過關啦。事關官府批塊地俾發展商成廿幾年，一直都唔發展唔進行清遷，等到今時今日官府急需用地建樓俾庶民住之時，官府又換返塊地俾發展商。但當初之原住民早就向官府完成登記，而官府就縱容發展商咁多年都唔圍板唔拆屋，結果搞到發生強拆傷人事件。要評理都唔知點評，但就肯定係一篤蘇州屎，仲開咗一個好壞嘅先例添。首先批咗廿幾年都唔發展嘅地，官府仲可以搵塊地同佢哋換都唔知乜道理。第二就係居民被多次強拆同暴力事件之後，衙差到而家都未有任何公佈事件詳情如何，而負責收地官府部門一直都只係得關注事件，從來都冇交代過點樣跟進無頭無尾。再者，最後收錢遷出嘅住戶仍然話繼續追究到底，咁點解佢哋有理據追究？官府究竟清唔清楚住戶係唔係合資格？如果唔合資格又會否執行檢控程序？而最後都冇遷出嘅三戶究竟官府點樣處理？官府聲稱嘅罰則會點進行？成單嘢根本都完全唔合邏輯同常理，無樣嘅講得通，若果就咁就算數根本就當庶民智商得三歲！

車輛貴族化(下)

2011-02-20T13:03:00.002+08:00

官府建議大幅提高泊車費用，增加養車難度，目的係想減少車輛增長從而令到路面暢通，官府又預期到二零二零年小城就會出現行路快過坐車嘅狀態，官府話車位增長數量遠唔及車輛增長數量，所以先至有呢個計算。首先想問吓，呢次又係唔係另一單嘅高士德「黑暗四年」事件？各位要記住，導致小城道路堵塞嘅係小城街道狹窄，道路兩旁泊滿各類型車輛，若要增加路面流量，更應該取消路面車位，鼓勵用家選用停車場，而唔係大幅增加泊車費用去令車輛減少，況且其後果只會令到今日泊車位去到成八十萬一個嘅炒風更加熾熱。今日提出呢個方案佢話預咗被人鬧。老實講，用加泊車費去控制車輛增幅好明顯係將私人車輛貴族化，無錢就唔可以享受駕駛樂趣同便利。要控制車輛增幅可以有好多方法，例如好似日本咁，將歐洲車嘅入口稅增加到兩三部車嘅車價，令到有錢仔要買多部靚車去撞死人都無咁易。另外將千六CC以上嘅大馬力私人車輛除咗大幅增加入口稅之外，仲要擁有指定之私人車位同埋要擁有高級駕駛證書方可購買，駕駛者無證書等同無牌駕駛要入獄。另外可以學省城咁鐵馬禁止進入小城半島，用騰出嘅道路空間改而設立單車道，令小城能有更佳空氣環境及安全之駕駛空間。再者又可以提高同埋嚴格執行環保標準，五年之後逐年驗車，超過十五年以上嘅車輛則要三個月驗一次車，確保古董車真係有人同有錢打理，先至容許有錢佬收藏，當然架古董車都要有指定專用嘅車位先至可以保留啦！正唔正？呢種共產化嘅交通政策官府根本都唔敢諗，所以先至會大幅加泊車費，等你班窮鬼放棄部車，好等佢班老闆行車可以暢順啲咁解！

齋講唔做(上)

2011-02-20T13:03:00.001+08:00

官府又向庶民諮詢，交咗份未來交通規劃研究報告，同庶民講大家要有心理準備，將來養車會越嚟越貴，因為佢哋將會建議官府大幅提高泊車費用，因為小城嘅養車費（講緊每日出行泊車嘅費用），相對於鄰近地區如鄰埠、省城甚至珠海都平成截，若果大幅提高相關費用，將會有效咁減少庶民買車嘅意慾，從而減少路面負荷令到交通暢順。有評論員更加大力推薦官員嘅睇法，話咁做可能會被庶民鬧，但乃有效辦法亦叫無辦法中嘅辦法，呼籲庶民支持方案。有庶民於諮詢會當面問官員，佢哋會唔會取消用官轎各自選用公交進行上落班，雖然官員當面回答庶民話佢哋嘅同事當然會選用公交進行上落班。我真係好想同呢位官員講，千祈咪齋講唔做，鄰埠負責環保工作嘅官員，早就親自下海，三十幾度高溫底下，坐無開冷氣嘅站頭小巴，感受吓佢自己推介嘅停車熄匙政策。我建議小城呢位交通官員學吓鄰埠咁樣，喺三十幾度日子裡面，下午四五點鐘去水坑尾老麥搭巴士到關閘，等佢感受吓一般上班族同學生哥，每日喺咁惡劣環境下點樣返工返學，睇吓佢要等幾多部巴士至可以上到車，同埋以佢咁嘅身型如何逼上部廿四座小巴上面，當部巴士衝落塔石隧道時佢會被幾多人嗌非禮。就算佢有錢，都未必同人爭得到部的士，所以齋講唔做嘅人都得，佢自己都識講小城交通唔係堵塞嘅問題，而係行得慢嘅問題，大幅提高泊車費用根本無助提高車輛流量，比加多間巴士公司呢條橋更加廢。

大風雪背後(下)

2011-02-20T13:02:00.001+08:00

今次英倫大風雪，困下鄰埠數百學子，被迫滯留首都機場三幾日，鄰埠傳媒即刻大篇幅報導，將被困學子慘況公告天下，為咗荒死唔夠慘烈，仲要每日到機場派駐人員，以求捕捉機場親子重逢一刻嘅痛哭流涕景況。當中鄰埠唔少人向官府投訴點解唔派專機即刻接自己仔女返嚟，要佢哋喺外地機場瞓幾日咁辛苦。因為當中唔少外地留學學子，知道被困機場之後，第一時間向父母申訴無啖好食，又無涼沖，仲要瞓會議廳而唔係星級酒店。當中有人見老外喺當地夠大聲就搵到機位回家，膽粗粗咁學人講得大聲啲，就竟然獲派機位回家。又有人見到因為有病或者係家人出事嘅人向當局反映而獲派機位之後，竟然全體聲稱大家都死咗老竇要回家奔喪，希望能夠早日獲得機位回鄉度假。但大家只要睇到呢班人為獲得一個機位而無所不用其極，連老竇死咗都可以亂報，根本同過關打尖一樣咁唔文明。但眼見此人去到機場同父母抱頭痛哭之後，其父母竟然讚佢哋叻仔夠聰明可以早人一步返屋企度假，大家都唔知應該俾乜嘅反應至好。
　今次小城官府無派專機去接送呢班二世祖都係幾好嘅決定。事關有本事升學英倫除咗成績之外，最重要係睇你屋企有無錢，事關下年度開始要加一倍學費，屋企無番咁上下錢點可以俾佢哋出國到英美留學！當然官府幫忙安排當地住宿同膳食就更加應記一功，因為二世祖都係國民，最基本嘅保障都要做到足。但班二世祖喺機場捱兩日就話要想死，其實只能夠怪佢哋父母有錢供佢哋去海外升學，但就無幫佢哋周詳咁計劃過萬一機場有意外或者突發事件，佢哋有乜後備計劃。而本來官府就已經提供咗高等教育予庶民，若果有錢唔選擇本土教育而出外留學，官府都唔應該使公帑去幫呢班有錢有能力嘅人，因為佢哋放棄本地就更應該自己準備喺海外之風險，否則對接受本土教育嘅人十分唔公平。

大風雪背後(上)

2011-02-20T12:59:00.000+08:00

西歐暴雪，航空交通癱瘓，鄰埠數百學子被困英倫，小城學生亦有數十人向官府求救，希望覓得一個難求機位，好等愛兒能回鄉度假。話時話西歐嘅百年一遇大風雪，除咗考驗當地官府應變能力之外，亦係國力展現嘅場口之一，觀乎今次英倫大風雪，令當地機場癱瘓逾兩個禮拜，唔好講歐洲大陸嘅短途航線，就連大部分長途客機都要停飛，真係估佢唔倒，唔知點解號稱先進列強嘅歐洲國家，一遇大雪機場就要停航，好多人都想問：乜佢哋唔係見慣風雪嘅咩？最離譜嘅係，喺某個機場，竟然會發生因為擔心風雪過多而要關閉部分航班大樓，簡直匪夷所思。曾經有個經驗，就係小弟流落太陽國嘅時候，曾經發生過因大雪關係，其首都主要鐵路停運事件，都令我不解為何見慣風雪嘅國家，竟然會因為風雪而阻礙自己正常嘅運作，事關大家都有面對大風雪經驗，只要稍為向北方嘅同業取下經，問題應該唔大，況且，今次英倫風雪問題，又未至於去到國內早兩年南方嘅雨雪天氣，根本就未面對過一樣。喺咁唔合理嘅情況下，最終官府都話派軍隊負責清理機場積雪，但就被機場當局拒絕咗，點解會咁？其實都係死要面咁解。事關落雪幾多，都唔能夠向官府求助，除咗關乎面子問題，最重要係會被外界睇小呢間管理公司，指佢哋無能力應付咁大嘅雪災問題，從而令到佢哋股價下跌，其市場領導地位不保，呢樣先至叫做大鑊。所以就算有北歐國家機場提出，佢哋嘅技術可以幫助到英倫機場不至於要關閉，相信最後管理當局都唔會俾人幫忙，因為呢樣至係生死攸關嘅問題。

拖越大鑊(下)

2011-02-20T12:58:00.001+08:00

青洲坊發展商出手低，居民自然唔願遷出，因為根本搵唔到其他可以住嘅地方，而官府一早就對住戶進行資格評審，遺下現在一班既唔合資格上樓，又無足夠賠償嘅邊緣戶。但係收地期限一拖再拖，官府萬九落成期就越壓越後，庶民對萬九承諾就更加不滿。官府壓力增加，自然就向番發展商施壓，要佢哋盡快收地交回官府建樓，發展商無計可施又唔想益晒班居民，結果居民生活不斷受到滋擾、半夜拆屋、偷偷拆屋、甚至強行拆屋。由於官府有規定呢類舊屋唔可以重建只可以維修，有住戶間屋無端端被車撞穿一邊、又有住戶同清拆工人發生衝突被帶上衙門，回家之後發現木屋被破壞，想進行修補時反被清拆工人報警禁止維修，搞到事態發展極度混亂。官府既為事件始作俑者，現在嘢單搞成咁，點都好應該盡快介入將事件妥善解決，如果唔係越鬧越大，對官府嘅管治打擊只會越嚟越嚴重。其實官府有心解快問題根本就唔難，事實上搞拆遷搞咗咁耐，官府對於居民資料嘅掌握應該十分充足，無就問番發展商喇，將呢班邊緣戶，按條件同收入逐戶進行細分，若果發現真有人想乘機搏懵，就可以告佢詐騙罪，而其他環境條件都唔好嘅住戶，官府社福部門自然要對其進行最低保障安排住宿，或者提供租金津貼，咁就可以解決居民無地方住嘅問題，只要官府做到公平公正咁去對待每一戶，若果居民咁都唔肯接受官府嘅條件遷出，到時候官府進行強拆普遍庶民都應該唔會怪責。官府一日唔介入，到時唔單止偷拆強拆，遲些可能連放火燒屋都有機會見到。

罪魁禍首(上)

2011-02-20T12:57:00.002+08:00

青洲木屋屢傳迫拆偷拆，居民生活受到不同程度滋擾，更甚者生命安全亦受到威脅，庶民多次報衙門兼向官府負責單位申訴，但事件照樣發生，雖然官府口口聲聲話關注青洲坊木屋遷拆，需要合法合理。但到今日為止衙門當局都仲未有一單立案或者係偵訊。青洲木屋區呢單嘢，自從幾年前官府開始發現小城公屋需求甚殷，決定拆遷木屋區嘅時候，區內就不時發生強拆破壞等不法事件。雖然現今區內有幾多真正原居民都成疑問，但罪魁禍首點計都係發展商。
　青洲呢片木屋群，我哋細路仔嘅時候都不時發生火警，環境衛生亦十分惡劣，住喺呢度嘅居民，若果唔係無辦法，真係送比你住都唔住啦。而早喺西洋人話事年代，早就將幅地皮，批給一間發展商發展成廉價樓，好等居民有較佳嘅生活條件。但呢間發展商咁多年以嚟一直都無發展個過呢幅地，直至官府準備收番幅地建公屋，忽然間發展商就好努力咁收樓收地。但發展商對每戶賠償價格不一，導致收樓進度被拖慢，而且區內住戶經歷咁多年，樓宇同土地都唔同咗價，套用行內術語就係麵粉貴過包，不過發展商依然無償咁代官府收屋收地，點解咁著數？原來係官府應承咗發展商換過另一塊地俾佢哋發展，條件係要負責埋呢個地段嘅拆遷賠償，即係話官府將成個青洲坊外判俾發展商，而用過一塊地去同佢換番一幅地。所以先至有唔使錢免費幫官府同居民進行拆遷。但係正正因為呢個咁嘅條件，發展商開出嘅收樓條件梗係差到無人有啦，真係慳得一蚊得一蚊，但官府就成功洗手唔理，總之發展商限期之內交番幅地皮出嚟就得。難怪居民日夜投訴備案，到依家都係石沉大海無乜進展。

冇解決過問題(下)

2011-02-20T12:57:00.001+08:00

「橙汁店」選點搞出個大龍鳳，本來就係一場鬧劇，可惜嘅係官民雙方都唔識點樣溝通，結果至會搞到咁僵。事情本身好簡單，都係一個利字掛帥。吸毒者以背景計，一般分兩大類。一種係低下階層，備受生活壓力影響，以為利用毒品可以逃避現實壓力，結果成為癮君子。另一類就係有家底但係缺乏關顧生活空虛，結交損友誤墮毒網。喺呢度好簡單兩句就解釋咗吸毒者嘅問題，但係真實嘅時間更加漫長，好彩喺一兩年戒毒成功，唔好彩者斷斷續續成世人都不斷戒完毒再吸毒，直至生命完結。可能好多人都講應該俾吸毒者知道犯錯後嘅後果，讓世人有所警惕，反正現今社會都唔會理邊個有冇問題。但係「橙汁店」本身係為咗希望戒毒者而設，即係話吸毒者希望作出改正而努力，即係話唔會有影響附近學校、社區等嘅行為出現。居民提出嘅有乜事發生邊個負責先？呢類咁嘅問題根本就係強人所難。如果過馬路被車撞親就梗係叫司機賠啦，但喺屋企食魚哽骨，唔通叫條魚負責賠咩，所以最後問題同屋企嘅小朋友，同埋附近嘅學校無關。真正嘅問題係附近居民唔想「橙汁店」出現之後，影響自己所住嘅樓價。事關呢兩年有幾個貴價樓盤落成，突然間帶動附近樓宇身價倍增，若果突然開間「橙汁店」，咁自己層樓想扮豪宅都唔成，白白唔見一大截，唔同你死過至奇啦！但係唔好唔記得點解官府要選址喺呢個地區，其實就係因為呢度係重災區，即係最有需要嘅地方，若果大家都唔理身邊附近有需要嘅人，到頭來想戒毒者冇地方戒毒，只好繼續吸毒，到時禍延下去就只有當地居民嘅下一代。當然，大家都只係希望保住自身樓價得到可觀價值，從而搬到另一社區生活就另當別論，只不過係問題根本冇解決過咁解。

蓮莖巷