「事實與偏見」的鬧劇（下）

圖片來源：澳門日報
若就今次「網上言論」事件受影響最大者並不是「被捕」帖主或網民，而是發起事件的銀行。根本上近期全球的金融風暴，相關傳聞自然滿天飛，事發銀行應該有相應的危機處理措施，就算邊個傳乜嘢只要銀行本身有實力，傳言根本就唔能夠擊倒銀行，最多都係加下班人手辛苦少少，傳聞自然不攻自破。相反今次銀行選擇報案而衙差高調拉人，直接令一眾網民對銀行的舉措表示反感，影響銀行於庶民的良好形象，因為銀行生意很大程度上依靠信譽及服務態度，影響銀行形象係直接損害本身生意的命脈。而第二受影響者當然係小城全體網民，因為就算現在檢察院將案件發還衙差再查，都唔等於帖主已經冇事，事件仍在發展當中，各網民最好都係出少句聲，未有案例真係唔知帖主最後會點，要密切留事態發展。第三受影響者當然係衙門，衙門今次的快速拉人真係嚇死人，連檢察院都未發現有強烈跡象犯案發還要求再查，衙差就高調將帖主由「協助調查」變為「拘捕」，小城庶民又點會對佢地有信心呢？最後亦係最無厘頭受影響者自然係小城庶民，搞到個個講嘢都小心翼翼，驚死唔知踩中乜嘢「地雷」會俾人告。事件發展到此「鬧劇」成分甚多，但小城民眾將來如何面對言論的底線？有學者清楚指出衙門到現在都冇公佈過去數次所發生的「傳言」案件最終結果如何，大眾未能掌握底線此類案件將會陸續發生，而新聞傳媒亦要遵守個人私隱，在事件未明朗前不要輕易公佈當時人的職業，事關今次涉及教師這個職業，與銀行及報紙一樣信譽最重要，若事件證實當事人無罪，就會變相打擊教師這個職業的信譽而引起行業的反感，破壞小城的和諧。

http://www.ugly-macau.com/

「代號」時代（上）

圖片來源：澳門日報
上月底小城兩銀行發生「ZZ」事件，第二日就成為主要報章頭條，而報導更標明那兩間銀行，亦有圖片顯示銀行前排隊的人龍，報導更講明銀行派籌都派左四百幾號，當然亦有報導銀行同官府負責人開記招闢謠。 而鄉公所負責人更呼籲官府切勿對事件掉以輕心，通過各種偵查手段，嚴查網絡包括手機短訊造謠的犯罪行為云云！
　兩週後其中一間「xx銀行」向衙門舉報，發現「ＣＣＣ」網站討論區內有人貼出「XX銀行ＺＺ」一帖而要告人，衙差第二日就拉咗人，效率之高近年罕見。事件翌日又即時成為新聞紙頭條，不過今次報紙做法就如這篇文章一樣，相關人物及機構名字全部變晒XX乜乜，除標題寫明被捕字眼外，副題又指「司警不排除再有人法辦」，而社論更指必須盡早立法規管網絡言論。但係有上網睇過該帖子之人士，全都十分驚訝點解「XX銀行」會報案，衙門又會咁快拉人？點計時間事實與帖子內容都唔構成衙門所控告帖主之罪名。一時間網民群情洶湧，有人呼籲捐錢幫帖主同銀行打官司，又有指如果帖主要被捕唔該拉埋報紙主理人。跟住電子媒體、代議士同埋學者紛紛發表意見，一時間全城鬧哄哄。過兩日法院指未有強烈跡象顯示帖主罪項成立。網民即時指衙門濫權，大部網民擔心小城言論自由被打壓，事件造成白色恐怖，最後網上更發現要求某大主要報章道歉等言論，執筆當日衙門澄清只係按「柯打」做嘢，無打壓言論自由，睇到此文完全用晒代號，看官都應該了解本人對事件的立場與態度，唔明代號答案自己上網搵。

加價理由（下）

圖片來源：AutoMK
自從國際油價回落到唔使一百蚊美元一桶之後，成個幾月先聽見油站會減每升兩毫咁大把，電視新聞即刻翻查資料及向官府統計部門查詢，官府回覆石油產品之前只升咗幾巴仙，但係看回石油產品內其中一項之石油氣，就係幾個月前加咗成十多巴仙，到今時今日都未有減過價，國際原油都唔使「一舊水美金」一桶，一罐百三升「大氣」竟然要百幾二百蚊，唔好講煮個飯，連沖多個涼都覺得貴，飲食店老闆直言「煲一煲粥就用晒成支氣，咁樣要賣幾錢碗粥先夠皮」，電視台向埋代理商查詢但係自然冇人理佢哋，最終搵番以關注公共事業嘅梁生發表下，梁生直指：「小城有能源辦呢個部門，就算商人唔肯公開貨源來價的機密資料，官府點解唔公佈番官方嘅資料俾公眾參考？」等庶民有機會判斷商人點樣加價同唔減價。果然係專業關注。我哋回想下我們的能源辦究竟做緊乜嘢功能，該部門於簡介中從來冇提及會對能源銷售行為進行監管，然則我們是否要向消委會追究點解加快減慢或者係直頭唔減呢？但係呢樣嘢消委會之前已經表明，自身仲裁都冇法律效力，仲有要雙方願意先至可以仲裁。咁即係話根本冇人有供應商嘅符，任由業界利用唔同理由加價，呢個唔係自由市場調節基制可以改善嘅事，況且大家睇下花旗國嘅自由市場主義都搞到今時今日咁款，你仲信市場調節基制有用？事實上能源對於小城發展十分重要，如果唔係都唔會只有一間電力公司，加親價都要官府批准，咁點解石油氣同氣油呢類能源又唔使官府批准可以話加就加呢？究竟係佢哋冇專營所以官府冇權管？定係市場太細官府驚管得太多冇人投資所以唔管呢？邊位可以答我呢個問題呢？

加價理由（上）

圖片來源：廣州電視
今日茶餐廳老闆又話加價，即罵聲四起！已經被兩兄弟呃咗成副身家，你而家仲玩加價？係咪老闆你都輸得好勁，要搵我哋班客幫手救你先？！老闆自然猛拎頭話唔係啦，老闆指成本上升冇辦法唔加價，不過當然根本就冇人信佢，全場人都認為佢平日聽埋聽埋人哋講點投資好，梗係同樣被嗰兩兄弟搞到身無分文，就算唔係直接被兩兄弟搞死，都係相關事件令到佢唔見咗一大截。不過就算點，茶餐廳加價都係無可避免，茶客們都應該心裡有數。點解咁講？今次金融海嘯只不過係第一波，小城暫時仲未係影響太大，最多炒咗屋企個印傭緊縮開支，搵番高堂幫手湊仔、出街食少兩餐飯咁多。但係老闆除咗人工之外，基本上生財原料就冇得減不特止，紛紛鐘仲加番一兩成問你點頂。遠就唔講，以茶餐廳老闆嚟講，小城食物原材料差唔多百分百進口，人哋加你就要加，根本冇議價能力，再加上呢排咁多食物出事，要令食客放心就要改用更貴及更高質量嘅食品作為原材料，就算你想買回有問題嘅食品都非常之難，咁自然增加咗成本就要轉嫁食客負擔啦。況且，經濟不景唔等於商品會平咗而是係貴咗，因為下跌嘅只係購買力同消費信心，但係相關嘅經濟鏈緊縮自然會令到物價好似貴咗好多。大公司都話搵唔到錢，自然將商品訂立更高價格保障利潤，大家可以想像到未來一兩年，外面所有嘢都只會有加冇減，同石油產品一樣，就算世界油價減到乜嘢狀況，小城的各大小石油產品公司，依然維持油價高峰期價格，加快減慢就係呢個道理，因為仲有大把理由唔想減價住，所以大家不要有所期待。

「富蘭克林」的咒詛（下）

圖片來源：經濟日報掌管金融血脈的一眾財經界人士，在花旗國的借貸生活模式下，越發利慾熏心走火入魔， 而著名的金融城市｜｜鄰埠更出現「負債越多越代表閣下信譽良好」的金句。 在花旗國則自恃世界經濟龍頭，金融界把原本良好的金融工具改頭換面，花巧包裝下加入大量賭博成分，利用強大的銀行網絡吸引對投資一無所知的平民百姓，把所有儲蓄投入到風險投資項目上，直接把大部分謹慎理財的無辜市民拖進賭局中，亦把原本作為推動經濟集資的股票市場作為世界最大賭注的輪盤遊戲。原因十分簡單，因為股市受經濟週期的循環而起跌，投資損失時委託人會對受託者進行強烈批評甚至直接轉換對象，基金經理就成為高壓階級，成王敗寇的遊戲每天上演，最後高壓階級自然成為豪賭之徒，在有限的職位生命中越博越大，皆因在每次交易從中獲利的基金經理每每享受著過千萬美元年薪，出市代表又從每次交易中獲取豐厚的交易費用，而且交易越大收費越高。原本作為「市民掌櫃」的一眾零售銀行，眼見投資銀行的風光日子吸走不少客戶及內部精英，反而在擁有最平現金的自己要辛苦經營一分一毫，結果連零售銀行都借著出售經過包裝的「進取基金」或微型債券，不斷壯大個人理財部門的規模，這點何止花旗國如是，世界各地甚至連小城都吹著這種風氣，君不見小城的傳統銀行都紛紛變身，把原有的出納櫃位大幅減少，改變為有著舒服個人空間的個人理財專區，不管出納櫃的長龍有多長，閣下都可舒舒服服地到有專人服務的個人理財櫃檯，同客戶服務人員吹水都得，佢哋係唔會幫櫃位解決排隊出糧的人龍，結果零售銀行代替了投資銀行，「市民掌櫃」成為大眾的劊子手，最終連花旗製造的高利貸都要世界人民找上一份數。「富蘭克林」成為全世界的咒詛

「富蘭克林」的咒詛（上）

圖片來源：維基百科曾幾何時，花旗國因靠上世紀的工業革命而橫掃全球，經濟從「大蕭條」谷底出走後一路拾級而上，經歷二次大戰後的花旗國逐漸被神話化。而因應強大的經濟力量，花旗國貨幣上的「富蘭克林」更變得可令「鬼推磨」般世界通行。從前的商品貿易一般都是以貨易貨或黃金、白銀等作交易，何解「富蘭克林」能代替黃金白銀這些傳統的貴金屬？全因花旗國當年的東征西伐，依仗當年強大的國力及軍事強勢，迅速控制世界各地的主要商貿通道，亦建立了花旗國這個世上最大的消費市場，新興工業生產國紛紛以接到花旗訂單，作為生產規模的指標，而商人們在貨物交易上亦不得不選用美元以作共同應許的交易貨幣，當中的信心全因花旗國的強勁經濟力量，才可令「富蘭克林」取代黃金白銀變成財富的象徵。只是，這個由前人努力打造成的魔幻法術，改變了辛勤工作、腳踏實地努力發展的傳統思想，加上經濟力量下的驕傲及財大氣粗，慢慢地把新一代打造成不事生產、洗腳唔抹腳的「二世祖」。原本花旗人民大部份都有著不懈的創造力，富有開拓精神，同時為世界提供不同願景，吸引世界各地人們追求花旗國的美麗圖畫。可惜這個強勁經濟在不斷創新及開拓之下，各行各業都開始盲目追求利潤，追求成本效益不斷把工序外移，而全民逐步脫離厭惡性的製造業為生，轉型以金融服務業這種非實業的行業為生，而花旗國的國民生產力又從何而來的？自己冇生產但係又要有增長，咁就梗係唯有靠借，國民向銀行借、銀行向政府借，最後連政府都向全世界借，結果這個「強勁經濟」最後成為「富蘭克林」的咒詛。

共產資本主義（下）

回顧今次花旗與祖國出現兩個問題處理手法，花旗國選用掟錢入金融機構化解危機，祖國就掟人去牧場睇實生產以保過程安全，但喺兩個政策都沒有將出事的企業禁止運作，反而指令其變回一般控股銀行，即喺同鄰埠D酒樓唔出糧比班伙記玩執粒之後，改個名又開過另一間冇分別，都喺玩移形換影至在呃錢！至於祖國就只識得炒企業責任魷魚，外加負官員落台，國家醫療體系幫手執爛攤，最後又要勞動溫總向全國人民道歉。 毒牛奶同雷曼爆煲的共通點都是，兩個人為製造出來的危機都要由庶民大眾附出代價，同樣地問題老早就出現，犯行者以外的知情者十分之多，只不過大家都覺得應該唔會出事嘅，又或者喺出咗事都唔關我事，我唔會飲呢D奶，唔會買呢D債券，只要唔喺我出事就一概當睇唔倒，根本整個經濟架構都充斥著為提高利潤不擇手段的思維，完全致企業形象、品質聲譽等現代商業最重要的因素於不顧，盲目追求利潤至殺雞取卵地步。而出咗事之後唔單止喺企業形象破產，更要國家信譽陪葬。外國投資都對花旗出動七千億救市憂心忡忡，直指投入資金過大會影響未來幾年花旗的經濟增長，直接打擊花旗貨幣的價值。而毒奶事件更令全球震驚，各國紛紛提出禁止祖國奶類食品進口，部分國家更出現禁止全部祖國生產之食品進口，雖然可以說是過度反應，但喺當信心破產之後就算唔禁止入口，各國市民都唔會再有信心購買，亦都唔會有進口商肯夠膽入貨。至此，兩國除了要找出更佳辦法對事件作出善後之外，更重要的是嚴懲商界集體對市民的蒙騙，扭轉這種瘋狂窄取利潤商界生態，真正保障小市民。

共產資本主義（上）

一個顛覆全世界經濟概念的新模式，出現在當今的世界上，叫做「共產資本主義」！花旗老闆開晒口向國會施壓：如果唔盡快批准七千億挽救金融機構計劃，唔止花旗國，連全球經濟都會被拖垮。大家可能會問：「咿！咪等同我地祖國所謂有特色嘅社會主義？國內一早用緊呢招啦！有乜唔妥阿公自然會出手相救，最多都喺一兩個官員下台，呢樣野已經唔喺新聞啦！」。答案當然喺另一回事，唔係邊會有呢編文呢？講緊嘅當然係現今花旗官府出招救市政策的幾個特點。我地由細到大，喺小城都係靠自己努力發奮，爭取倒今日所得。即喺話大部分小城庶民辛苦抗拒賭場之引誘，努力耕耘改善生活才能得到今天的成果。但喺花旗國動用花旗庶民的金錢，去挽救一批在全世界搏奕最大的股票市場中的企業，令這個號稱世界最自由的國家及市場之信譽即時破產。而國內環境同花旗國又不盡相同，國內要交稅之人口比例遠遠不及花旗國，甚至連經濟規模都有一段距離，所以就咁直接將國內情況同花旗國相比喺十分危險。花旗國出招仲有一個最大問題喺限制沽空，即喺話你冇貨就唔下以用沽空手段壓低股價，結果個市梗喺有升冇跌啦！呢種人為造市一直都喺被視作犯法行為，如今政府直接利用行政手段改變遊戲規則，究竟對投資者公唔公平呢？既然一間公司出現問題，要官府出手利用大家繳納的稅款去作救濟，就算牽連著公眾之本金保護，亦唔算喺公平嘅做法，何況山手挽救問題金融機構，只會縱容該機構繼續使用過去沿用的不良手段，對於問題的改善根本就沒有幫助。