垃圾會內的垃圾代議士（下）

圖片來源：澳門建置商會早兩日又有代議士提議辯論面對海水倒灌威脅應否重新檢討小城之間水域大規模填海計劃，當然又係被官府代議士否決動議，有人用「都幾滑稽」嚟形容動議，以議事堂內在座代議士冇一位係水利專家，點會知道填海同水浸有冇關係，所以辯論係冇意思。又有人話都幾荒謬，佢用十分簡單嘅道理同大家講話明低窪地方就梗係會積水，仲引用專家指填海有助加速水流，將沉積物沖出公海咁話。直頭當我地全城庶民都係目不識丁，仲要搵佢教阿媽係唔係女人。人地叫大家討論下要唔要檢討填海計劃，佢地就一係話唔係專家討論都冇意思，一係就話填海有助加速水流沖走沉積物，都唔明邊個至係荒謬滑稽，連人家提議之問題都睇唔明，點樣學人做代議士？連細路都識做代議士啦，只要有人提出動議，就投反對票，唔使討論唔使用腦，坐喺度淨袋幾萬銀，呢份工幾好做呢。人地鄰埠就話要做好呢份工，我地小城就係份工幾好做，被人睇倒真係笑死街坊，咁樣水平都可以做代議士，不過冇辦法有咁嘅制度，先可以出到咁嘅代議士。反正佢地都未清楚垃圾會嘅真正功能，就係通過辯論及質詢，提高官府施政之透明度，讓大家了解官府之政策，協助官府制訂合適小城之法律，作為官府與庶民之間的溝通橋樑，促進雙方的溝通以達至社會的和諧。奈何年復年地小城垃圾會一直起唔到有效之監管作用之餘，更被部份代議士阻礙庶民了解政府施政，莫非佢地係唔想庶民太聰明太了解政府政策，驚被人知佢地根本唔夠資格成為小城代議事去代表庶民議政？

垃圾會內的垃圾代議士（上）

圖片來源：informac近日垃圾會內經常熱烘烘，會內兩派代議士不時互放起飛劍，令議會不時由議事討論延伸至立場對立，結果導致議事堂變成吹水堂，部分庶民關切的官府政策及民生議題不能正常在議事堂上被討論，完全不能發揮議事功能成為正宗的「垃圾會」。好似早前官府同專營的兩家公車公司延續兩年臨時合約，同時批准公車加價四成，更動用兩億幾派比公車公司作為補貼庶民搭車。有代議士提出官府派兩億幾嚟「關心」庶民搭車，算係「重大民生決策」，要求提請議事堂進行討論，而另一派代議士無端端用涉及憲制品題的理由去否決動議，茶餐廳各人即刻傻晒，官府作為行政當局就梗係官府嘅事，但係垃圾會作為小城唯一可以對官府作出監管的重要機構，就算未能改變官府之政策，至少可以將庶民關心之問題經議事討論，達至庶民清楚官府的構想與執行方法，事實上基本法亦授權小城議會可動用這個作為監察官府之權利，協助官府改善施政以保民生。奈何由於議會內訌，各派別只顧自身利益尤其是官委人士，不時將民選代議士視為搞事者「阻住官府做嘢」之人，但凡該派人士提議之討論都視作搞事舉措，運用自身的權力否決動議，好協助官員們唔使做咁多嘢去答問題。當中最好笑者竟然有代議士表示：合約都簽咗仲討論嚟做乜？樣樣都話要討論，邊有咁多時間？咁我地就好想問下：咁你佬哥係唔係喺度呃飯食？對民生咁重要嘅事你都唔理，要你地坐喺度做乜？我地真係出緊糧俾班垃圾？都唔係，佢地係坐喺度幫班官員減少工作量，唔使講清楚佢地點解會咁作出決策同埋過程發生乜嘢事。

拖泥帶水的危機（下）

圖片來源：維基百科
環顧小城因迷債出事之幾間銀號，除了一間由鄰埠總行直資的小城分行，表明一切跟足鄰埠做法外，其餘銀號一直都放流料，成日講緊點樣積極參考鄰埠做法，盡力保障客戶的投資，除了官腔及帶大家遊花園之外，毫無承擔。而幾間銀號之中，更加有京城國家級銀號在內，而且更加與鄰埠之上市同系銀號無關直接受京官管理，一個以國家級信譽的銀號竟然到今日都冇厘擔帶，小城苦主的憤怨可想而知。有部分金融界人士講，這家京城銀號之表現其實十分差勁，而且日後將會對其商譽有著重大影響，該銀號在小城行商賺咗咁多年錢，況且該行迷債苦主所涉及的資金只不過三數億，若以長遠之經營利益，就算賠足俾苦主都仲有數圍咁話。事實上該銀號是次表現態度曖昧唔肯承擔，坊間已傳該行被人貼大字報，而事件已驚動燒毀會同代議士出頭（雖然未必有實際幫助），更有苦主團體直接表明不排除報官追究。若然事件真係搞到咁大，真係對大家都冇好處。怪只怪銀號錯過咗最佳的處理時機，令人懷疑該銀號之危機意識有多高，而且臨危應變有沒有相對的措施都有商榷的餘地，每日前線的員工被人咀咒祖宗三代，每天背負全家甚至全族人的安危上班，聞說鄰埠部分銀號之前線員工已出現精神崩潰的狀況，可幸的是小城民風暫時仍未出現過激行為，只是若然銀號高層仍然拖泥帶水、議而不決、決而不行的話，難保小城亦會出現如鄰埠般的激烈行為，到時若演變成政治問題，最終銀號之高層都可能要為拖泥帶水的決策負上責任，咁又何必呢！

一蚊都唔值（上）

雷曼兄弟迷你債券已經有部分產品被評為一蚊都唔值，已經成為廢紙一堆，但係銀行仲係叫大家唔好覺得係等於一文不值，因為產品同到期日都唔同，叫大家耐心等候。但係而家大眾終於都明白銀行當日向大家大力推銷之債券，其實係花旗國將D物業抵押品再抵押，然後發行成為迷債再賣俾全球投資者，而當中只有獅城、鄰埠同小城會賣俾一般庶民。押上押如果仲值一點錢，都賠咗俾第一個接受抵壓的銀行或機構，其餘第二或第三受押者就梗係一毫子都分唔倒啦。咁樣想問下監管當局，其實佢地明唔明銀行喺度賣緊Ｄ乜？如果銀行唔明自己賣緊乜嘢，咁監管當局係唔係應該要清楚呢？但係而家監管當局講銀行係唔會咁傻倒自己米，不過今次真係連佢地都估唔倒咁大件事，咁樣講係唔係意味住監管當局都唔清楚銀行賣緊乜嘢呢？如果真係咁，監管當局又究竟監管緊乜嘢呢？事實上一直以嚟小城之金融政策都在參考鄰埠的政策，鮮有自己制定政策或與鄰埠政策相違背。由於事發時鄰埠受影響及反應最大，所以媒體一直集中報導鄰埠官府、銀行及受影響人士之間的對壘，再加上小城銀號連反應都冇乜，大家都在觀望鄰埠如何處理問題，所以當鄰埠知縣當眾向銀行施壓之際，小城庶民都祈待我們的父母官會做番少少嘢，至少都出嚟講番幾句丫，可惜小城知縣唔講嘢不特止，仲喺咁嘅時間推出數字法，連少少安慰都冇！部分苦主就苦笑「好彩我地仲有鄰埠知縣，會為我地出下聲」，不過大家真係唔使開心得太快，雖然鄰埠知縣曾估計仲淨六七成，不過以最新獨立核數師報告，獅城銀行賣的迷債只淨番零或二千蚊，大家唔好太天真，太傻。

終於要腊髮（下）

圖片來源：澳門日報
好多人都對呢次官府推廣數字法之腊髮推廣，時間上似乎有點倉猝。點解咁講，因為淨係睇公佈當天之記招安排，就令大家覺得所有官員都「滾水淥腳」，知縣大老爺就答咗三條問題就走人，大家只要睇番當天新聞就知道，淨係新聞都有五六段報導知縣大老爺出席活動，一日之內出席多項大型活動，中間竟然要插入腊髮推廣記者會，咁辛苦為乜？改遲或改早一兩日得唔得？跟住到髮帽師回答問題時，同樣講講下就同在場記者講唔好意思，等陣要出席施發年度開幕日，你哋大家都要去架啦，唔可以叫髮官等我口架嘛，問多兩個問題啦！時間上好似比知縣大老爺仲加趕，唔好唔記得知縣大老爺都要出席上述開幕禮，而且在場記者好多都仲未發問，咁髮官唔等得記者就等得，等到唔發問都得？我就非常懷疑佢哋時間安排上真係十分有問題，明知之前同之後都咁多場合需要出席，一般公司經理之秘書都會同你講你當日個 「卜瓊」好爆，不如改第二日啦！呢兩位小城重量級人物嘅秘書點解會安排成咁呢？定係當事人專登揀大家都唔多得閒嘅日子，冇咁多時間問太多問題，唔駛答錯嘢呢？知縣大老爺就話唔係髮律專家佢唔答都冇問題，但係若髮帽師用呢個方法避走就講唔過，因為呢樣係佢嘅工作。
　再者諮詢會共五場，四場係專業及相關社團、界別之諮詢，公開俾庶民參與嘅只有一場（當然座位有限啦），而且五場差唔多一日接一日，一個禮拜都未夠就完成公眾諮詢會，連大家研究同反應嘅時間都未有，跟住下個月尾就係公眾諮詢嘅限期，你估下有邊個識得反映意見呢？

終於要腊髮（上）

圖片來源：法新社
終於萬眾期待，等咗好耐嘅數字法，知縣大老爺正式提請議會進行腊髮。話時話呢單嘢鄰埠唔好講話提出，直情連講都唔敢講。相信大家都仲記得鄰埠有位掃把官力挺腊髮，以其獨特髮型同大家講腊髮嘅好處，但係就鋪鋪俾人鬧到隻狗咁，當中所謂汶煮派連番人身攻擊去到謾罵嘅地步，事件最後竟然係官府老爺取消腊髮，終於掃把官條氣頂唔順直頭玩唔撈，反而仲幫佢贏倒唔少庶民嘅尊重，跟住仲選贏議會做埋腊髮嘅議員，冇咗掃把這個經典嘅髮型。當然小城情況就唔同得多，小城議會一向反對聲音甚少，就算係反對聲音都係以民生問題居多，對於數字法呢類咁敏感嘅政治問題，係議會中差唔多聽都未聽過。況且小城亦都冇政治團體或社團，直頭連壓力團體都冇乜，更何況係政治異見嘅組織吖，所以小城推行腊髮可以謂冇乜難度也。不過由於有鄰埠之前車可以借鑒，小城官府亦都不敢怠慢，由知縣大老爺親自領軍出征，向廣大庶民及各界推介腊髮嘅諮詢工作，公佈首日就親身出席記者會親自闡述腊髮意向及其必要性，又向在場媒體表明，媒體及媒介相信唔會因為講下口號、寫兩篇批評官府或京城嘅文章而被定罪，不過佢又講明我唔係髮律專家但係佢相信，咁同買雷曼債券嘅師奶有乜唔同？但係我哋庶民所理解嘅髮律最多係唔好隨地掉垃圾，亂咁泊車會食牛肉乾等，早排先至搞咗單網民被銀行告，跟住衙差拉人起訴。雖然之後被法院發還衙差再查，但係小城網民已經被嚇餐飽，今次小城知縣連同官府選擇現在呢個時間進行腊髮推廣活動，驚魂未定之庶民將會有何反應？大家拭目以待。

「事實與偏見」的鬧劇（下）

圖片來源：澳門日報
若就今次「網上言論」事件受影響最大者並不是「被捕」帖主或網民，而是發起事件的銀行。根本上近期全球的金融風暴，相關傳聞自然滿天飛，事發銀行應該有相應的危機處理措施，就算邊個傳乜嘢只要銀行本身有實力，傳言根本就唔能夠擊倒銀行，最多都係加下班人手辛苦少少，傳聞自然不攻自破。相反今次銀行選擇報案而衙差高調拉人，直接令一眾網民對銀行的舉措表示反感，影響銀行於庶民的良好形象，因為銀行生意很大程度上依靠信譽及服務態度，影響銀行形象係直接損害本身生意的命脈。而第二受影響者當然係小城全體網民，因為就算現在檢察院將案件發還衙差再查，都唔等於帖主已經冇事，事件仍在發展當中，各網民最好都係出少句聲，未有案例真係唔知帖主最後會點，要密切留事態發展。第三受影響者當然係衙門，衙門今次的快速拉人真係嚇死人，連檢察院都未發現有強烈跡象犯案發還要求再查，衙差就高調將帖主由「協助調查」變為「拘捕」，小城庶民又點會對佢地有信心呢？最後亦係最無厘頭受影響者自然係小城庶民，搞到個個講嘢都小心翼翼，驚死唔知踩中乜嘢「地雷」會俾人告。事件發展到此「鬧劇」成分甚多，但小城民眾將來如何面對言論的底線？有學者清楚指出衙門到現在都冇公佈過去數次所發生的「傳言」案件最終結果如何，大眾未能掌握底線此類案件將會陸續發生，而新聞傳媒亦要遵守個人私隱，在事件未明朗前不要輕易公佈當時人的職業，事關今次涉及教師這個職業，與銀行及報紙一樣信譽最重要，若事件證實當事人無罪，就會變相打擊教師這個職業的信譽而引起行業的反感，破壞小城的和諧。

http://www.ugly-macau.com/

「代號」時代（上）

圖片來源：澳門日報
上月底小城兩銀行發生「ZZ」事件，第二日就成為主要報章頭條，而報導更標明那兩間銀行，亦有圖片顯示銀行前排隊的人龍，報導更講明銀行派籌都派左四百幾號，當然亦有報導銀行同官府負責人開記招闢謠。 而鄉公所負責人更呼籲官府切勿對事件掉以輕心，通過各種偵查手段，嚴查網絡包括手機短訊造謠的犯罪行為云云！
　兩週後其中一間「xx銀行」向衙門舉報，發現「ＣＣＣ」網站討論區內有人貼出「XX銀行ＺＺ」一帖而要告人，衙差第二日就拉咗人，效率之高近年罕見。事件翌日又即時成為新聞紙頭條，不過今次報紙做法就如這篇文章一樣，相關人物及機構名字全部變晒XX乜乜，除標題寫明被捕字眼外，副題又指「司警不排除再有人法辦」，而社論更指必須盡早立法規管網絡言論。但係有上網睇過該帖子之人士，全都十分驚訝點解「XX銀行」會報案，衙門又會咁快拉人？點計時間事實與帖子內容都唔構成衙門所控告帖主之罪名。一時間網民群情洶湧，有人呼籲捐錢幫帖主同銀行打官司，又有指如果帖主要被捕唔該拉埋報紙主理人。跟住電子媒體、代議士同埋學者紛紛發表意見，一時間全城鬧哄哄。過兩日法院指未有強烈跡象顯示帖主罪項成立。網民即時指衙門濫權，大部網民擔心小城言論自由被打壓，事件造成白色恐怖，最後網上更發現要求某大主要報章道歉等言論，執筆當日衙門澄清只係按「柯打」做嘢，無打壓言論自由，睇到此文完全用晒代號，看官都應該了解本人對事件的立場與態度，唔明代號答案自己上網搵。