大學夠大就叫大學？（上）

圖片來源：澳門日報

小城「位置最高」之學府橫琴留地？某大報章大大隻頭條咁樣寫，跟住同一版就出現某教育界表示遷戶有利該校發展、同校師生贊同遷校、舊地皮搶手等題目之報道，雖然唔敢批評其真確性如何，但係報道內容極具指向性則無可否認，因為過兩日公仔箱就同樣訪問該校師生，大家都對遷校態度表示保留，並非如報章所指大家舉腳贊成。但係故事又有新發展，連街區代表都話橫琴塊地建乜都好，一定要留番部分建公屋以解決小城上樓難。
　事情越搞越複雜，報道中冇明確交代學府係遷校定擴校，當然亦冇清楚交代點樣得到呢個消息，但係就實牙實齒咁講兩地將中央指示提到議事日程，同埋已經係初步規劃所得出的結果。看來該報唔止代表黨的喉舌，更發表指導性言論俾壓力予有關當局。事關小城突然多咗塊地，自然各方勢力虎視眈眈，搞盡腦汁爭奪資源利益，至於當中邊個真係為小城學府之利益，就真係冇人知。自從該消息一出，各路人馬都爭相表述抒發己見，試圖主導輿論爭取制空權。首先最關心學府之遷擴者就梗係該校教授學生，同埋地產業界。因為關乎兩者切身利益，自然努力發表意見。尤其影響人員進出、校譽甚至空間之運用都牽動全校師生，甚至已畢業之校友。所以當公仔箱評論節目以此為題作評論，自然又與「黨報」口徑不同，大多反對遷校而支持擴校，更有先在規劃中「霸咗塊地先」之言論，亦有主持羅列小城周邊較佳學府都處於一個規模地理，有利教學研究及學校風氣，咁呢樣嘢又是否等同是良好校園必定水平高呢？

三百蚊的結構性思維失調（下）

其實搞呢類型所謂慶回歸活動，本身官府用意如何？不言而喻，希望搞吓公民教育叫大家記得回歸同國慶，製造全城賀回歸嘅市面氣氛，又好向阿爺交代，順便刺激吓經濟提高內需，可以叫做一石幾鳥。
　但係對於要爭表態求資助嘅社團就可謂大件事，因為官府之派錢方式係用記名及身分證作登記，呢個方式無可厚非，因為如果唔係咁，就肯定有人食足一個月都未完兼會浪費公帑。不過監管方式就成疑，事關登記身分證好容易俾人知道，但係究竟邊個證實佢本人去食過就真係冇人知啦。但係官府呢個資助最弔詭嘅地方係變為小城社團照妖鏡，就連官府都估唔到嘅副作用。因為官府之派錢，個個社團都會爭取表現，連根本一年都唔會有搞一、兩個活動之隱形社團，都會搞賀回歸慶國慶活動以爭取表現，因為如果派埋錢都唔搞，社團擔心會影響第日官府資助的評核。結果反而導致平日同時參與九萬幾個社團，希望撈著數嘅活躍人士即時現形，為要表態自己企喺邊一面而頭痕。又或者係幾家都答應出席，結果只能去到一家甚至一家都冇去，搞到社團亦失晒預算。呢啲都係小城奇特之社團文化所得出的產物，再加上大部分隱形社團根本就冇乜策劃力及組織力，參與者更加唔會放乜嘢時間去搞好佢，最簡單直接乾手淨腳就係訂番幾圍叫做搞咗個活動，就連部分大型傳統社團都患上結構性思維失調，見人訂佢又訂。結果搞到大部分酒樓酒席都被社團訂晒，就咁睇落好似可以幫助到經濟刺激內需，不過但凡有出席過同類型活動者，都會記得最後每圍根本都唔夠人，每一圍都食唔晒而嚴重浪費食物。若果官府真係有心搞好慶祝回歸同國慶，唔該用多少少腦去做真正嘅推廣，少做呢類粉飾太平嘅舉措以免造成浪費。

三百蚊的結構性思維失調（上）

過完農曆新年，大家都食咗唔少餐豐富美食或新年食品，喺呢度希望大家保重身體，保護好個胃準備迎接下一個挑戰。因為大家應該年中或年尾有九萬幾人想請你食飯，點解？因為今年又到五年一次大食年。官府錢倉公佈小城社團搞慶回歸活動會補助每個參與者三大舊水，但係就要用身分證登記而每人只資助一次，全城有成千幾個合資格社團，只要肯搞又符合條件就會被資助。呢類型派錢支持社團搞活動嘅資助方式，對於社團嚟講可謂幾年一次推廣自己嘅好機會，梗係唔會放過。可惜正如幾年前那次一樣，部分大型傳統社團今年早已開口話咁樣安排好難搞，仲同記者講錢倉應該多聽社團意見，若果唔係佢哋又好似當年咁，明明訂咗一百圍酒席，點知唔夠其他人快爭取參與人士，最後只得五十圍人而造成浪費。即係同緊大家講，經過五年之後，佢哋仍然只會選用請人食飯呢個方式，嚟同大家慶祝回歸同國慶。而錢倉亦同樣只識得用番五年前嘅方式嚟叫人搞回歸慶祝活動。坦白講，經過咁多年，呢類所謂傳統社團除咗夠傳統外，就連搞活動之方式都係幾十年不變咁傳統，淨係識得搵間酒樓擺番一百幾十圍，跟住搞下抽獎咁就叫做慶祝咗回歸，根本完全冇用過腦，同樣地錢倉到時到候好似例行公事咁開倉派錢叫人搞活動，就叫做同大家慶祝國慶，只係形式重於一切，有搞過交咗差，又可以同官府講佢哋出咗幾多力團結社會。基本上食完餐飯之後都唔記得自己慶祝過乜嘢，結果錢倉同社團只不過白白浪費咗社會資源甚至食物等天然資源，得個搞字，對小城一啲益處都冇。

心態要修正（下）

自從兩地都回歸祖國之後，雖說兩地同是高度自治，但係兩地知縣及高層同袍時有交往，又經常同一天上京述職報告京官，又同時出訪四川災區以表兩地之關心，加上現任鄰埠知縣的太座亦是小城出身，原本兩地就有著密不可割的關係。但係唔知點解當年兩地先後推出智能身分證後，小城都未能取締專為赴鄰埠的證件，反觀鄰埠自推出相片身分證以來，已被認可作為過大海之間的身分辨析物。從來前朝官府所推出的專屬鄰埠旅遊證件，乃用來增加官府收入，亦只有小城有這樣奇怪的安排。但係到咗今日，依然有人持有灰簿作為赴鄰埠的證件，又有前往各海外地區用之旅遊證，再加上智能身分證，小城能合法前往鄰埠之證件多達三種，看似十分方便其實認真麻煩，雖然灰簿於智能身分證推出後，使用率已近乎零，但係智能身分證最麻煩就是要用專用的打印櫃打印一張赴鄰申報表，呢樣又唔及灰簿方便。加咗咁多關卡無非都係因為鄰埠曾經出現小城黑工影響社會，但係到咗今天被小城遣返之鄰埠黑工不計其數，而金融海嘯下小城被裁之鄰埠勞工亦接近萬人，若鄰埠依然以小城只作自己後花園之心態對待，只會加大小城對鄰埠的反感，窒礙小城在經濟發展中鄰埠可參與的空間，變成自我邊緣化。大家睇下回歸以來，鄰埠每當面對經濟逆境都總會向阿爺求救。而小城則從未主動向阿爺提出特別的傾斜政策，只是若果阿爺出手救鄰埠，基於公平原則必需同樣對小城作出優待，這樣已經使小城數年間實現高速的經濟增長，可見鄰埠必須修正以往對小城的心態，以平等互惠的心態謀求共同發展。而據報這個被庶民一直視為不平等條約的出入境安排，終於可望在不久將來被取消，實為兩地之福。

心態要修正（上）

小城爭取多年的入境表打印機終於可望落戶鄰埠碼頭，解決匆忙過大海卻忘記在小城打印而被無辜遣返、慘被鄰埠邊檢人員當非法入境者處置的屈辱。根本上這個問題，由兩地官府批准持身分證就可以過海入境之初就已發生。從來世界各地出入境部門，對於有邦交或承認對方政權所發出之護照或旅遊證件，一般都需簽證才批准入境，而對於豁免簽證地區之入境者，大都需填寫入境表以便核實身分及便於管理等，以上規則已成為國際旅客的基本共識。而對於鄰埠及小城兩個都以旅遊城市自居、每年各自接待三千萬入境人次的地方，更應該較其他地方懂得處理旅客出入境問題，可惜偏偏就是兩地間之出入境問題搞到居民無所適從。
　自從賭公司建立船隊接載鄰埠水魚到小城屠場進貢後，鄰埠賭仔一面倒地每周向小城賭王朝拜，而小城庶民則最多一年數次過海購物，鮮有每周到鄰埠之行為，所以兩地之出入境關係乃一面倒地以鄰埠旅客壓倒性。從鄰埠角度出發，以前限制小城人士入境乃擔心會出現逾期逗留而成為黑工等社會問題，加上單向的文化輸出及兩地經濟實力的差距，使小城被看作一直處於鄰埠的陰影之下，形成兩地不能對等之出入境關係，該心態從一開始就存在於鄰埠人的心內。直到今天，這種關係仍然存在於兩地各類型交往中。而過往小城上手官府之管治無能，是縱容這種不平等條約出現的元兇之一，亦令小城庶民一直未能抬起頭做人，就算出到海外亦只能向人家表示小城位於鄰埠隔籬，當然這亦是當年小城過客政權管治下所得出的產物之一。

小城上榜步步高陞？

傳統基金會喺全球經濟自由度指數報告中，首次選出小城排行全球廿一位，個個都以為這證實咗小城喺世界上具有排行廿一位之競爭力，喺亞太區仲排第六跟隨日本之後，開心到班茶客傻晒。由早兩年小城賭收開始超越拉城後，城內就出現咗部分自大人士，開始否定小城其他方面過往所作出的努力。當然啦，呢兩年小城大部分打工仔或多或少工作條件及環境都有所改善，加薪加福利等都令到唔少人以為只要做好博彩旅遊，就可以在全球佔有一定位置。但係大家唔好唔記得，小城受到祖國及官府的政策傾斜，才可享有開賭呢個咁特別嘅待遇。所以大家對呢個話到明傳統基金會對環球經濟體作出嘅報告，千祈唔好有太大妄想。首先，發出報告之機構稱為傳統基金會，即係十分之保守，對於新興經濟模式唔係咁明，對新一代的行為就更加唔多清楚，而小城之所以上榜，可能只不過係因為小城開放賭博經營予隸屬花旗資金的賭場，而小城官府又對花旗賭場所提出之各項要求可謂全無托手肘，要地有地要人有人，同屬花旗之傳統基金會自然覺得小城對商人唔錯，抽稅少而支援大，所以，有乜法子唔一下子上榜就去到廿一位呢。試想該榜十四年以來榜首位置都由鄰埠獨得，我哋見證咗鄰埠不少起跌及官府政策的搖擺不定，點解可以連續十四年霸住榜首位置確令人生疑。而報告亦只有兩頁紙去評述小城，始終都流於表面，再加上全都以花旗國角度出發作評審，並非真的十分全球性。但就的確證明小城對於花旗國的企業來說是一個較佳的地方。可惜在環球金融海嘯影響的今天，冇邊個唔知始作俑者正是花旗國本身，而被海嘯影響最深遠的地區，亦全佔榜上的前列位置，咁即係話越上得高，被海嘯影響就越大，所以上榜都未必係好事。因為睇吓花旗神話手起刀落就喺小城炒咗近萬人，如果唔係官府出招保小城人飯碗，分分鐘小城都係重災區其中之一，所以話新年步步高陞，如果明年小城繼續上榜，呢樣就千祈唔好升到咁高。祝大家新年快樂好過！

間接認衰（下）

新打工法實行前，就已經俾打工界別代議事狂插新法只涉及一般打工仔，作為全城最大僱主之官府係唔受規範咁話，即刻俾全城鬧官府只規範小城一般僱主，而官府就可免疫，根本唔止係大細超咁簡單，連僱主界代表都質疑官府冇担帶，只識向勞工界送禮向僱主開刀，自己就唔使上身。當然發炮者包括作為公僕代表之代議士，由佢發表之公僕內部體制，一般人才如夢初醒地發現，公僕內部之管理混亂，官場中的以大欺小，制度上為了政治上的不確定性，有人代位代咗十年八年，而新入職之有能之士，又做咗咁多年都係合同工逐年簽約一次，最慘仲係有人升到一定位置之後就冇得再升，唔係佢能力唔夠，而係制度上佢條路已經升無可升，結果做咗七八年都係同一位置，想表現自己或者係改善現行運作嘅動力都冇埋，咁有乜法子官府近年表現每況愈下，加上早兩年小城經濟火紅，大量有經驗之管理層公僕都去咗大型外資博企，造成人材流失的情況十分嚴重。終於，日前知縣作出批示，規定官府內的編制合約員工之聘用條件不能低於新執行之打工法。叫做安撫一班前線公僕，亦還佢哋一個公道。大家都知道官府係小城最大之僱主，從前亦有人認為打官府工係金飯碗，雖然早兩年外資博企搶走唔少有經驗之中層管理，但係新入職之公僕仍然當公僕係一個十分穩定同埋安全嘅職業，如果公僕之聘用條件竟然俾一般打工仔仲差嘅話，仲邊有人去官府打工？官府權衡輕重之後，由知縣出面為官府補鑊，以挽救公僕內之人心散渙。畢竟任何政府都需要有一個穩定的團隊來執行管治工作，今次以批示形式作規定，除了還公僕一個公道外，亦為之前被炮轟之政策，作出間接認衰，以保團隊之穩定，都不失為一個負責任的態度。

間接認衰（上）

小城最新之打工規矩，由新年依始執行咗差唔多成廿日都有，官方公仔箱每日都播不下數十次廣告，話俾大家聽新例已經生效，有唔明就去搵美猴王老孫問吓，千祈唔好以身試法，終於喺大家唔係好明，又唔係好理嘅情況下，元旦日大部分小型零售店同茶餐廳都唔開工，茶客都冇聲出，唔通要老闆搵埋都唔夠俾伙記咩。但係學老孫話齋，元旦日等假期開工要俾三工，一路以嚟條例都係咁，點解而家班老闆先至話成本貴唔開工？係唔係以前一直都冇俾伙記三工，大家又冇出聲而默許老闆犯法？所以部分顧主以此為理由，向官府投訴新法加大成本，影響小城旅遊形象。咁都俾班老闆搵出條屎橋，小城打工仔有乜法子有好日子過呢！根本呢班識開聲嘅老闆，全部都係擁有數十甚至數百員工之小城中企，就算真係法定公眾假期要俾三工，對佢哋嚟講都係有賺冇賠，只不過係出口術想俾啲壓力官府，想有另外一啲補償咁解，但係似乎影響最大之微企例如茶餐廳等，俾多兩工根本都唔係問題，最大問題都係佢哋根本冇人願做，願做嘅都去晒酒樓或酒店餐廳等可以俾得更高人工嘅地方做，所以資方出口術根本就冇人理會，而茶餐廳唔開舖都係因為人講佢哋就以為真，學人唔開舖，老友，如果認真睇條例，就知道如果唔想俾三工，係可以補番日假俾佢和俾兩工就掂，根本唔使頭痕，老闆聽到大伙咁講，終於呻笨冇睇清條例，又搞到班熟客要周圍搵食。不過話時話，小城庶民都係時候要認真少少對待官府所提出嘅諮詢啦，尤其係手作仔一家大細請咗一兩個伙記嘅舖頭仔，千祈唔好再以為只有自己一家大細做，就唔使理請咗嗰一兩個伙記嘅事，而家係大家都意識到自己嘅權利，再已經唔係幾十年前大家一齊捱世界嘅日子，做乜都應該有規有矩，再唔可以拍拍膊頭就算數。