偷步宣傳的後遺症

圖片來源：澳廣視
傳統勢力偷步宣傳，終於被人擺咗上枱，咁當然又係用官府習慣嗰句去回應「我哋係公平公正、依法宣傳」。而且仲有官府俾錢支持，如果唔合法佢哋又點會俾錢呢？咁即係話又要入官府數。當然選舉宣傳限制之法規係當局定出，只要唔干犯法規之任何一條，就唔係叫做犯法，而能夠俾佢哋偷步宣傳，就只能夠怪官府條例立得唔好，至會有位被人偷雞，又或者怪你哋啲小單位冇咁嘅財力研究法律漏洞，被人快咗一步諗到條好橋偷步成功。不過法律歸法律，遊戲規則就係以規範之大方向作為認知。傳統勢力呢次以咁樣嘅方式去偷步，連部分支持開嘅街坊都睇唔過眼，雖然單嘢係被對頭踢爆，但係份資訊根本每間大廈都起碼有幾份喺信箱，而且又唔包好就咁寄出，你想話俾人聽唔係偷步宣傳都冇人信啦。而且以傳統勢力一路以嚟做嘅嘢，亦都唔愁今屆唔夠票，何苦要做到被人話呢！況且呢幾年小城庶民對於選票之重視已經有長足進步，投俾邊個根本就係睇你有冇能力幫到庶民，而唔係睇你宣傳得有幾好，如果單靠宣傳就可以成功，咁一開始就搵間廣告公司同你哋搵個「口靚模」代言人搞包裝宣傳，就可以打抵嗰兩個「天線低低Ｂ」，其他人根本連選嘅機會都冇。其實只要做好本份用心去服務庶民，根本就唔使搞埋晒啲咁低莊嘅手法，庶民自然會睇你哋係唔係做到嘢。而傳統勢力今次搞單咁嘅嘢出嚟，喺選民心目中已經造成一個唔好嘅影響，就係被人覺得今次大換血係一個好大膽嘅決定，佢哋根本就冇信心能夠保持兩席，所以至會出到呢種招數，反而成為後遺症。

掘路工程冇監管

中區爛路經已持續一段日子，當局公佈月底將會完成整治工程。呢個宣佈根本唔使佢做，事關全城庶民都知道，官府每年到咗暑假，就會借意修掘路面，搞到全城馬路總有一段「與別不同」。當然，當局之做法都係刻意咁避開平日上班上學的混亂狀態，減少工程對庶民之影響實在係無可厚非。但係小城如今已經係活力之城，即係話就算唔使返學，暑假又特別多人外遊（包括所有高官同中高層管理人員），小城出行的人口減少咗，但係交通之壓力並無因此而減少。反而進入暑假旅遊黃金檔期，一車車的祖國遊客陸續殺到，加上鄰埠自由行大軍，中區交通比平日更為擠擁，而幾條主要幹道都被當局掘到只剩三分之一的交通能力，冇能力外遊之庶民就只好日日以步行出門代替交通公具，免得只係等車同塞車時間已足夠去到目的地。本來每年暑假都掘路大家都習以為常，不過唔知係唔係趁今年「傷損」同「雙慶」搞大佢，偏偏今年就玩擴大規模，集中喺幾大名門中學前的路段、搞重鋪電纜或者係擴闊路面之工程，而且工程規模唔細，挖掘深度足夠成架鐵馬填平，到今日仲未有車跌落此等陷阱已經係奇蹟。而且唔知係咪官府落咗命令要暑假完結前起貨，相關道路工程進行到中段嘅時候，竟然有幾日係冇人開工。係咪個工程仲有成半個月至到交貨期，就可以唔使咁趕？早啲起貨冇著數？事實上環顧其他大城市，主要幹道的修整工程都係二十四小時不停趕工，務求以最短的時間完成，減少對交通的壓力同市民之影響，偏偏小城從來都未見過有人通宵整路，係工程技術未夠班？抑或係銀碼唔夠？定係當局根本冇監管過工程之進度？

數零你識唔識？（下）

圖片來源：澳門新聞局
【內部員工通知】獎券管理局代表冬叔今日宣佈，當局經過九個月時間的嚴格查核、科學論政、備受爭議嘅32,000,000.00獎金得獎者係合情合法合理地去中獎，當中完全搵唔到邊條法例可以告得入我哋獎券管理局，而局方根據高人指點，利用「麥提爽」提供之合理化煙幕橋段，已經喺發佈消息時將個得獎日期改早咗差唔多成年咁滯，夠晒俾老廉可以大大聲聲同人講「成年都冇被人投訴過，你叫我做乜好呀！」。另外，我哋用咗現今世上最高嘅LCD同PLASMA科技無邊無際咁去支持中獎幸運兒，淨係呢樣都值得佢哋中千四萬獎啦。況且各位同事要對我哋老頂有信心，佢本人經過多年浸淫亦學得一身好武功，喺光明頂上運用佢哋絕招乾坤大羅移，已經將全城視線移去候選人同中獎者關係之中，對局方進行攪珠與否根本已經冇人關心，所以根本唔會有人知道部攪珠機係一開始就係壞嘅，咁多年以嚟從來都冇運作過，亦都唔會有人知道佢哋見到嘅都係六四級電腦科技一滴汗都冇流過。所以局方可以向各位同事保證，一定唔會有人好似寶島班官咁傻，被人插兩嘢就話要度頸，又學人哋日本仔九十度鞠躬致歉，因為冇位俾佢哋入。仲有，小城呢度邊個唔係我哋睇口架！？要做獎券管理局嘅受惠機構就同我收聲唔好亂講！就算唔做受惠機構我都可以唔發個牌俾你等你冇得做。咁多瓣夾埋一齊邊個夠我哋揍？所以喺呢個局裡面各同事一定要口徑一致，千祈唔好穿崩！咁樣就可以保證社會河蟹、有風都無浪！

數零你識唔識？（上）

圖片來源：澳廣視
32,000,000.00看官有冇數錯過呢？當中嘅零唔係人人都數得出正確嘅數字，事關你見唔慣咁嘅數，又或者你見都未見過，所以唔好怪人哋只好怪自己。
　三千二百萬唔係今期六合彩，但係就好多人講緊中咗呢份錢嘅幸運兒，無他者因為大家都認為幸運兒，唔使經過攪珠過程就收到派彩，茶客直頭研究緊呢位幸運兒究竟有冇落過注去買張彩票，因為如果唔係咁大家又點解會見唔到攪珠過程呢？派彩機構早前出嚟向公眾解釋話佢哋都唔想，事關佢哋做過調查，發現好多人都唔適合中呢張彩票，佢哋竟然發現大部分人都有情緒問題、妄想症、精神病、發錢寒，當局擔心冇經驗又冇番咁上下身家之人，一下子俾佢哋中成三千幾萬獎，佢哋會頂唔順自己真係中咗獎，搞到精神錯亂，當局為免呢三千二百萬害咗無辜嘅人，自然要搵一個有中獎經驗家底又有番咁上下嘅人去中啦，事關若果冇番咁上下家底數慣咁多零，點頂得順先？結果又被佢哋搵到唯一一個合適嘅人中獎既然係咁唔通仲要去執行攪珠過程再使多幾個零！但係你班友就話唔玩攪珠就唔公平，人哋為你好都唔知，你班窮鬼根本就虛不受補，數零都未識數，俾你啃到盞累咗你咁又何必呢！況且今次獎金派發地點並唔喺小城，而係喺京城，各位識唔識唱京腔？如果各位唔識京腔又點樣上京呢？上到京連問路都唔識又點去領獎呢？再者今次領獎其實係要用一批好高科技嘅電子儀器去核實得獎者嘅身份，如果你連高科技都搞唔掂，咁點樣可以去證實你有資格領呢份獎先？事關大拿拿三千幾萬，應該會有好多人想博懵去領獎，但係大家唔知道咁樣其實係會害咗佢哋（有辦大家睇得獎者領咗獎即刻失蹤到而家）。所以大家都係唔好再嘈啦，要明白當局嘅苦心！

砌生豬肉（下）

圖片來源：蘋果日報

近期熱炒當然就係官府又玩唔使開標，判咗三千二百萬合同俾某間公司搞十年展呢單嘢。過往官府同類事件根本係經常發生，仲要係大大聲聲講係依法批給根本就見慣不怪。但今次又係衰在受益公司負責人竟然係剛剛先至幫未來知縣搞完競選獨腳戲，唔被人插到飛起至奇。雖則受益公司一直做開官府大騷，論經驗同實力外界一般公司根本唔可能同佢競爭，但係官府一句因為佢嘅經驗夠又有實力就咁就批咗，唯一可以講嘅係官府批給部門實在太懶。事關據熟悉行內人士透露，該公司一向以主理官府大騷之實力出名，就算公開招標以其實力亦無懼競爭，有可能批給部門根本就諗住唔使煩直接批給就算，反正都唔會有第二間公司會投，但係今次同估領袖遊戲一樣，就係欠缺咗一場儀式同埋展覽嘅內容。但係單嘢最騎呢乃係由鄰埠之生果報所爆出嚟，當然話明係爆出嚟就梗係唔慌會寫好唱好，不過為求增加力度求其搵個二百萬嘅數去做對比就唔應該。事關所謂的二百萬同實使一千萬就真係差好遠，係六合彩頭獎同二獎嘅分別。再講鄰埠同小城係兩個地區大家點做根本就唔可以比，唔一定要做到你咁寒酸，況且鄰埠對小城近年比對方更豪一直耿耿於懷，只要有位入自然插你一刀。加上生果報出名之報道手法係起晒人物嘅底，可惜今次都漏咗其中一個背景，就係該公司主政人物曾經早年得過專業領域嘅荷蘭水蓋，不過呢種漏自然係有心遺漏，要砌你唔通仲幫你加分？所以砌生豬肉就係有齊物料炒作後，再刻意收起部分訊息先至係高一班嘅砌，小城代表之所謂「喉舌」根本未入流。

砌生豬肉（上）

圖片來源：澳門日報

面對雙慶及傷損年，坊間奇形怪招層出不窮。最近於垃圾會激烈討論的「白衣天使薪俸」一役，到表決的臨門一腳，罕有地被主席取消表決壓後再審。原因之一乃代議士中一位對官府運作極為熟悉的土生代議士，反對加人工法案中部分人士無端端比第一次官府提出的加人工方案更低。另外亦有代議士對於部分條文中的可追溯與否而引申出的合約公平原則產生重大分歧，主席自然要壓後待大家冷靜後再進行討論表決，主席更在結束前向在場旁聽的白衣天使幽了一默說：「如果通過唔到，你哋就冇人工加」。翌日某大媒體即刻以「土生代議士反對白衣天使加人工」為題，作為議會報道之頭條新聞。報道中並沒有提及土生代議士何以反對加人工法內的附件，其他都係引用另一位議員同主席之說話。土生代議士自然不甘被白白「砌生豬肉」，即時發聲明指「喉舌」斷章取義，言明自身反對加人工法的範圍及理據。事關當天小城「公仔箱」亦有報道該議事堂新聞片段，「公仔箱」以報道多位議員對於條文中的不可追溯出現之不公平而反對令到討論要壓後為重心，報道取向完全一百八十度唔一樣。「喉舌」呢舊「生豬肉」可謂size唔細，事關終於表決通過後「喉舌」又出招，以「天使會指土生代議士唔尊重前線」繼續追擊土生代議士，又出現整段引述他人言論的以偏概全作結。當然我哋唔清楚佢兩家有乜恩怨，但係砌咁大件生豬肉俾人就一啲都唔似係有社會責任之企業應有之道，更加打擊媒體的公信力。

因乜放棄強制隔離？（下）

估官府因乜解究決定放棄強制隔離可以有幾大原因，第一可能因為負責開之主要官員，走咗去選知縣而要現任知縣做埋佢嗰份，而現任知縣咁多嘢做又唔具備專業知識，淨係睇佢早排一日走幾場剪綵就知佢有幾忙啦，結果冇時間又覺得煩就乜都跟晒鄰埠就算。再者官府心諗，眼見鄰埠由最初嚴陣以待見一個捉一個，有事冇事都隔離咗先講，到最後都係失守長城，連死亡個案都出埋，以小城咁嘅醫療系統根本就冇得同鄰埠比，唯有放棄慳番啲資源好過。最後加埋流感活躍期過咗但係又進入暑假人流的高峰期，要繼續維持隔離措施可能要徵用晒小城所有酒店都未定，再加上到今日官府都冇表示，若果係全球最大之字花檔內發生人傳人感染個案，會否封鎖所有字花枱及酒店嚟確保疫情唔會蔓延，即係佢負擔唔起當日嘅損失，亦負擔唔起對小城龍頭產業之打擊也。官府今天已經冇心機抗疫另一個最大象徵，就係公仔箱之宣傳片。話說某日喺茶餐廳食食下飯，老闆睇完港聞自然要關心埋本地消息啦，點知轉完台又播番剛剛播完鄰埠官府呼籲預防流感大流行嘅宣傳片，正想投訴老闆按錯掣之時，駭然發現宣傳片尾竟打出衛生當局借用鄰埠官方宣傳片之字幕。話晒都係官府嘢莫非衛生當局窮到自己拍番條片都冇錢？抑或小城冇人識拍嘢？定係乜都唔使做照搬鄰埠做法就得？如果係咁使乜借人條片呢？索性將小城公仔台摺埋，向鄰埠買時間播小城新聞就仲加慳啦。豪使三千幾萬搞十年展就得，拍條宣傳片俾自己人就唔肯，呢個究竟係乜嘢官府？

因乜放棄強制隔離？（上）

自從「甲豬感」殺到埋身之後，小城之防衛機制終於棄守長城，改為主打發病後之診治及護理，惹唔惹到結果只靠庶民自己執生，最後導致庶民防衛意識低下。今日小城已經取消咗強制隔離措施，亦都唔會再照顧確認病患但未有發病之密切接觸者，要自己家居隔離搞掂自行求診。大家梗係唔明官府用乜嘢理據去決定唔再係實行強制隔離政策，係因為死亡率唔高定係鄰近地區都咁做，所以大家都咁做？抑或時間耐咗戰線拉長，最終覺得花費太大所以決定取消守城行動？話晒世衛都定咗佢係六星級頂晒錶喎！咁都值得官府去博一鋪放棄強制隔離？咁多理由話分唔到邊個係外地傳入同本地個案，係根本唔夠資源繼續做落去，定係主事人覺得煩加上鄰埠都係咁做，所以佢又多咗個藉口唔使做？當然取消強制隔離都係因為鄰近周邊地區同樣咁做，而且「甲豬感」死亡率唔高冇咁大殺傷力，所以可以唔使咁大陣仗。官府唯一係若有第一個死亡個案，先至再會有新措施出台。小城咁細要對抗外來病毒入侵其實十分容易，要追縱來源所需資源及時間相對於鄰近周邊城市，等於兩房單位與花園洋房的保安規模之差距，再加上庶民大部分都係「河蟹」族，絕對配合官府政策指導要佢哋做乜都得，所以更加唔會花費監察當局太多人力物力。就咁就放棄咗強制隔離的防衛機會，是否太過求其及有樣學樣？既然現今全球疫苗生產仍未到位，有類似有效之特效藥又唔夠貨，咁究竟放棄強制隔離是否又係明智之舉呢？官府咁樣處理防疫似乎係話咗俾大家聽唔使擔心，病你唔死係有得醫，結果同普通感冒一樣大家都會忽視防疫衛生之重要性。