自由波地（上）

上個禮拜去咗塔石廣場，踢咗半場自由波地，唔曬但係撞正打風前夕所以搞到身水身汗，由於冇諗過可以喺塔石踢波，終於有機會踢到半場都叫做過足癮。猶記得當年死口靚仔時期，除非閣下隸屬下半松山之數間名校，否則其他學生仔唔好話落場輪隊，差啲連旁觀球賽都有機會被人打。點解咁誇？事關當年學生功課壓力冇今日咁大，放學後都喜好聯群結黨，遊玩一番至肯返屋企做功課，再加上部份和尚學校係全男班，淨係一級人落嚟輪隊，輪到你都已經要到天黑至有得掂個波，所以基本上外來校生根本唔可能有機會落到場。而和尚校生踢波通常又會吸引師姑校友到場觀賽，以達致兩性溝通之聯誼關係。既然係咁，即係話球場旁邊都有唔少女觀眾做啦啦隊，所以觀眾席上根本想搵個位坐都難，要等一班冇腳法嘅死口靚仔入到一球輪到下一隊都要有排等。所以有得坐低輪隊之隊伍大部分有另一餘慶節目，就係睇波之餘同師姑女校聯誼之追女仔遊戲。既然有咁多節目喺球場上面發生，當然吸引到唔少其他學校之學生希望參與其中，至於裡面大家希望參與邊部份就人人唔同，有人可能想踢波、有人可能只係想睇波，又或者有人只不過係想搞聯誼都得。
　既然個球場之戲碼咁豐富，但係地方又有限，自然會有好多矛盾造成分黨分派。結果搞到外來學生要入場睇波或者踢波，都要過五關斬六將至有機會入到場，所以當年有段時期每個禮拜六下午，都有唔同學校不同派別之學生，於松山集結講數較量，成為游離學生無聊觀戰的節目之一，大家認為似唔似今日嘅垃圾會？

「發水會議」贈「慶」（下）

「發水會議」係由「掌櫃部」引發出嚟，而「掌櫃部」係官府嘅「管數」機關，即係話裏面嘅人已經係非一般數佬，數口之精直頭係獨步武林。但係今次「掌櫃部」遇著另一個數口精明之「查數部」，乜嘢牛鬼蛇神都被人扯晒出嚟。今次大家高手過招，大家係好難明白點解「掌櫃部」咁精於造數，都竟然會造得啲數咁誇張，連口靚仔都知道佢喺度造緊數。況且今次同屬官府機關之「查數部」，大家都係數字人兼同袍，本來都互相俾面唔會想搞大佢，但係該委員會之主席竟然提供錯漏百出之理由，以圖將「發水會議」之數量合理化，更話委員會之運作成本相對所收稅項只係零點幾個百分點，直情係低成本高效率咁話，迫得「查數部」罕有地使用「遺憾」咁去形容對方之回應。若果以茶餐廳庶民去評論，早就送咗佢兩親上天堂，而我哋就有一句「厚顏無恥」送俾該主席當係中秋大禮，事關按「查數部」之調查報告內容，委員會利用拆細會議紀錄嚟「發大」會議次數根本就證據確鑿，可以用「斷正」嚟形容，仲有乜嘢可以俾佢「死撐」呢？事件發展至今據報「老廉」都話會插手事件，而司長亦表示極度關注，提起咗內部紀律調查，相信事件有機會越搞越大，話唔定又走多個「走資局長」出嚟都未定。呢單嘢可謂「掌櫃部」今年雙慶而向庶民贈「慶」之代表作。

「發水會議」贈「慶」（上）

正當每日街上之廣播車日嘈夜嘈之際，官府竟然爆出「一日開會八次」之天文「筋數」，以圖收取更多開會費之事件，而相關官員已接受內部紀律調查。全城嘩然！今次「查數部」揭發之四輪估價會之筋數事件，證實有公職人員同時擔任多個不同會議之成員，一年間開會之總數就達九百六十七次，即係差唔多每日開兩個幾會，仲要係年中無休，而單係一年之開會收入就有五十幾萬，人工之高更加超過法定上限達七成，即係話開會費仲好搵過份人工。事關官府規定若出席類似委員會之會議，公職人員每次可獲得十點薪俸之報酬，一點五十九乘十就有五百九，一日開兩次都已經千幾銀，不過係工作時間以外至有錢收，而且更出現全體正選同候補委員一齊開會之笑料，點解有正選委員開會都仲要叫埋個後補嘅出嚟？莫非係請食飯大家交流下，等個正選知道自己唔得閒時係邊個頂自己個位？查數部亦表明「掌櫃部」屬下呢個委員會處理之開會報告，已經去到隨心所欲嘅地步，事關最離譜嘅係有一次會竟然只係傾將一個file close唔close咁大把。由於相關委員會包含公職人員同埋業界代表，有相關業界人士指未聽過日日都要開會咁誇張，最多都係每個禮拜開一次。咁講即係話會議紀錄有可能被人無限「發水」，先至會有一年開會開九百幾次咁駭人聽聞嘅事出現。當中亦發現部分會議中，係審批車輛稅項時，有利益衝突之相關業界代表並無執行迴避機制，即係自己有份評自己代理之車稅，咁咪好著數！？最終只可以用一個字嚟總括呢單「發水會議」事件，就係「亂」。

防疫

「甲豬感」終於出現首例死亡個案，所有官方發表都稱患者病情變化快，最後死因並非「甲豬感」而係併發症，當中並無人為疏忽。但係自從年中「甲豬感」全球爆發以嚟，外地及鄰近周邊地區的死亡個案統計，都集中於老人家、兒童、長期病患者的階層，與今次小城的首例死亡個案明顯背道而馳。事關今次患者乃中年女士，並非長期病患者，亦未有吸煙等不良習慣。所以官方在公佈患者詳細發病至死亡過程後，刻意表示當中並無發現有人為疏忽之情況。但係隨著「甲豬感」在小城擴散，好多人自己或身邊都有受感染者。
　例子一：某人早上發燒身體不適往私家醫院診治，經快速測試證實陰性反應，簡單配藥後自行回家。及後至翌日早上臨上班前數分鐘，突然接到公立醫院來電證實測驗報告呈陽性中咗招，急忙連同親密接觸者一同前往公立醫院接受治療。最後患者自然係配藥後回巢自行家居隔離，問題係同行之親密接觸者被派去一個集中房內等候檢驗期間，院方並無特別措施協助房內人士避免交差感染，事關房內各人唔知邊個中招與否，若果係房內有人中咗招，結果可能入咗家中患者數，就算親密接觸者並無出現病徵叫兩人自行回家，都有機會途中感染其他人。例子二：一人發燒前往私家醫院接受治療，快速測試呈陽性唯院方缺藥，公立醫院遂派車前往接候診者，到來的竟然是全套保護人員之防疫車，到達醫院候診室等足八小時後始獲配發特敏福，由於等候時間太長，患者曾一度離開候診室到櫃檯詢問，結果被指受感染者不能離開候診室，被推回房內後把門鎖上，最後房內病患於房內致電院方投訴後始獲治療。
　未來數月的流感高峰期，小城醫療系統仍然係咁的話，實在令人擔心。

鬚根法官的態度

垃圾會競選出現之偷雞宣傳一如既往，到今日都未有當選人因違規宣傳而要接受刑罰，甚至連管理當局都可話為咗唔益犯規者變相協助宣傳，連受警告的組別名都唔會公開，亦可以繼續選落去。今次鬚根法官喺記招被人發難渣，即刻「包公」上身公開斥責投訴者叫佢收聲，由法官變咗做判官，明顯忘記自己唔係喺法庭而係喺記招會場內，同時亦都冇人要被佢審而係要佢交代。事實上一直以來鬚根法官喺鏡頭前面都係態度傲慢，面對媒體記者的詢問以一貫最高權力下達判詞之口吻，大家冇得質疑及反對，甚至唔可以有想像的空間。鬚根法官可能由於長期職業病之關係，有咁嘅態度本來唔應該怪佢。不過佢本人已經唔係初哥且久經戰陣，佢做呢個位都做足幾屆，有機會面對鏡頭都係因為呢個位，經過咁多年態度依然都係咁。雖然話佢呢個位係要俾人公正無私嘅形象，不過公正無私並唔等於擺官威就係，而佢咁多年戲路都冇進步過，一直都係學校訓導主任之面孔及語調同記者交代。需知道面對鏡頭，公職人員及公眾人士都要有應有之禮儀，就算傳媒嘅問題幾咁白痴，都應該耐心地去解釋而唔係一味擺官威，況且鬚根法官每次有所發表之時，語句用詞往往習慣加上「即係話即係話」咁去延續佢嘅解釋，表示佢一開始就當大家聽唔明佢講緊嘅嘢，呢種表達方式等同大家見工時，人事部經理向你條新仔講解入嚟做嘅規矩一模一樣。咁樣又邊會認同你所講嘅嘢呢？建議鬚根法官若要挽回其不良判官形象，不如就喺今次選戰中搵個犯規候選人，唔好再等佢哋選完晒之後再慢慢查，即刻釘佢牌等佢連選都冇得繼續選，以表佢自己真係公正無私。

偷步宣傳的後遺症

圖片來源：澳廣視
傳統勢力偷步宣傳，終於被人擺咗上枱，咁當然又係用官府習慣嗰句去回應「我哋係公平公正、依法宣傳」。而且仲有官府俾錢支持，如果唔合法佢哋又點會俾錢呢？咁即係話又要入官府數。當然選舉宣傳限制之法規係當局定出，只要唔干犯法規之任何一條，就唔係叫做犯法，而能夠俾佢哋偷步宣傳，就只能夠怪官府條例立得唔好，至會有位被人偷雞，又或者怪你哋啲小單位冇咁嘅財力研究法律漏洞，被人快咗一步諗到條好橋偷步成功。不過法律歸法律，遊戲規則就係以規範之大方向作為認知。傳統勢力呢次以咁樣嘅方式去偷步，連部分支持開嘅街坊都睇唔過眼，雖然單嘢係被對頭踢爆，但係份資訊根本每間大廈都起碼有幾份喺信箱，而且又唔包好就咁寄出，你想話俾人聽唔係偷步宣傳都冇人信啦。而且以傳統勢力一路以嚟做嘅嘢，亦都唔愁今屆唔夠票，何苦要做到被人話呢！況且呢幾年小城庶民對於選票之重視已經有長足進步，投俾邊個根本就係睇你有冇能力幫到庶民，而唔係睇你宣傳得有幾好，如果單靠宣傳就可以成功，咁一開始就搵間廣告公司同你哋搵個「口靚模」代言人搞包裝宣傳，就可以打抵嗰兩個「天線低低Ｂ」，其他人根本連選嘅機會都冇。其實只要做好本份用心去服務庶民，根本就唔使搞埋晒啲咁低莊嘅手法，庶民自然會睇你哋係唔係做到嘢。而傳統勢力今次搞單咁嘅嘢出嚟，喺選民心目中已經造成一個唔好嘅影響，就係被人覺得今次大換血係一個好大膽嘅決定，佢哋根本就冇信心能夠保持兩席，所以至會出到呢種招數，反而成為後遺症。

掘路工程冇監管

中區爛路經已持續一段日子，當局公佈月底將會完成整治工程。呢個宣佈根本唔使佢做，事關全城庶民都知道，官府每年到咗暑假，就會借意修掘路面，搞到全城馬路總有一段「與別不同」。當然，當局之做法都係刻意咁避開平日上班上學的混亂狀態，減少工程對庶民之影響實在係無可厚非。但係小城如今已經係活力之城，即係話就算唔使返學，暑假又特別多人外遊（包括所有高官同中高層管理人員），小城出行的人口減少咗，但係交通之壓力並無因此而減少。反而進入暑假旅遊黃金檔期，一車車的祖國遊客陸續殺到，加上鄰埠自由行大軍，中區交通比平日更為擠擁，而幾條主要幹道都被當局掘到只剩三分之一的交通能力，冇能力外遊之庶民就只好日日以步行出門代替交通公具，免得只係等車同塞車時間已足夠去到目的地。本來每年暑假都掘路大家都習以為常，不過唔知係唔係趁今年「傷損」同「雙慶」搞大佢，偏偏今年就玩擴大規模，集中喺幾大名門中學前的路段、搞重鋪電纜或者係擴闊路面之工程，而且工程規模唔細，挖掘深度足夠成架鐵馬填平，到今日仲未有車跌落此等陷阱已經係奇蹟。而且唔知係咪官府落咗命令要暑假完結前起貨，相關道路工程進行到中段嘅時候，竟然有幾日係冇人開工。係咪個工程仲有成半個月至到交貨期，就可以唔使咁趕？早啲起貨冇著數？事實上環顧其他大城市，主要幹道的修整工程都係二十四小時不停趕工，務求以最短的時間完成，減少對交通的壓力同市民之影響，偏偏小城從來都未見過有人通宵整路，係工程技術未夠班？抑或係銀碼唔夠？定係當局根本冇監管過工程之進度？

數零你識唔識？（下）

圖片來源：澳門新聞局
【內部員工通知】獎券管理局代表冬叔今日宣佈，當局經過九個月時間的嚴格查核、科學論政、備受爭議嘅32,000,000.00獎金得獎者係合情合法合理地去中獎，當中完全搵唔到邊條法例可以告得入我哋獎券管理局，而局方根據高人指點，利用「麥提爽」提供之合理化煙幕橋段，已經喺發佈消息時將個得獎日期改早咗差唔多成年咁滯，夠晒俾老廉可以大大聲聲同人講「成年都冇被人投訴過，你叫我做乜好呀！」。另外，我哋用咗現今世上最高嘅LCD同PLASMA科技無邊無際咁去支持中獎幸運兒，淨係呢樣都值得佢哋中千四萬獎啦。況且各位同事要對我哋老頂有信心，佢本人經過多年浸淫亦學得一身好武功，喺光明頂上運用佢哋絕招乾坤大羅移，已經將全城視線移去候選人同中獎者關係之中，對局方進行攪珠與否根本已經冇人關心，所以根本唔會有人知道部攪珠機係一開始就係壞嘅，咁多年以嚟從來都冇運作過，亦都唔會有人知道佢哋見到嘅都係六四級電腦科技一滴汗都冇流過。所以局方可以向各位同事保證，一定唔會有人好似寶島班官咁傻，被人插兩嘢就話要度頸，又學人哋日本仔九十度鞠躬致歉，因為冇位俾佢哋入。仲有，小城呢度邊個唔係我哋睇口架！？要做獎券管理局嘅受惠機構就同我收聲唔好亂講！就算唔做受惠機構我都可以唔發個牌俾你等你冇得做。咁多瓣夾埋一齊邊個夠我哋揍？所以喺呢個局裡面各同事一定要口徑一致，千祈唔好穿崩！咁樣就可以保證社會河蟹、有風都無浪！