河蟹定係河蛙？（下）

候任知縣搵個政務官頂替查數部老頂技術官員個位，最大問題自然係認受性。技術上當然唔係問題，因為技術層面基本上無話唔可以少咗邊個，但係去到指揮決策層面，就唔係一般政務官可以應付得嚟，事關專業就係專業，唔係一般官僚有能力去處理，至少喺內部就要面對一眾技術人員，都要求有非常高的智慧及管治能力，今次候任知縣的選秀實在冒唔少風險。而面對外界，更加唔係單單對住鏡頭識講嘢就得，事關候任知縣今次份名單好明顯就係唔想以後喺政策執行上，被官府內部其他部門所左右，加上大部分舊人留任，可以預期未來幾年的官府都唔會有乜嘢大作為，但係唔等於佢哋無出錯，只不過係少做少錯咁解，咁嘅環境下查數部可以講無乜作為空間，同廢咗呢個部門無乜分別，只不過係京城規定必須要有此部門，咁就不如搵個唔多識嘅人去管，就搞唔出乜嘢花樣。而候任知縣亦履行競選時的承諾，就係【承傳】，可惜嘅亦都只係得【承傳】而無咗【創新】，唔單止無咗【創新】，直頭係走番轉頭。雖然現任知縣過去十年搞咗壇嘢出嚟要候任知縣執手尾，但係候任知縣都唔可以用龜縮方法，去逃避庶民對官府政策及運作的知情權。作為有責任有承擔的知縣係唔應該有呢種心態，但係陰謀論者有指今次候任知縣唔止係延續現任知縣嘅政策，現任知縣直頭係影子話事人。呢樣都唔難理解，事關現任知縣對小城各方之影響力實在太大，有事要搵人出面擺平幾乎不作他選，若然屬實，小城未來就真係河蛙同河蟹嘅世界。

河蟹定係河蛙？（上）

查數部老頂來屆無得留低，坊間即時罵罵聲。事關剛剛至發生新任垃圾會保皇代議士，開腔指查數部於提起內部調查程序時，向外公佈對掌櫃查數後之報告有違守則，似乎預視咗查數老頂不被候任知縣信任。但係查數部過去一直十分盡責，隔一排就會對官府某部門之使費及運作進行查數，每每令到被查部門更加神經緊張，因為查數部曾經嚴厲指明某大運動會揮金如土，結果最大鑊係搞到當時之社文部極度無面，但同時亦受到廣大庶民欣賞同支持。然而當年執掌社文部之人，今天已貴為候任知縣，時移勢易到佢有權揀人之時，自然一次過埋單計數。今次換馬原本唔單止查數部老頂有變，連老廉都調任新位，不過就再升一級，真係同人唔同命，但係大家都心中有數，查數部一日唔交報告，老廉都未必會做嘢，但係查數部交足數，老廉就唔做唔得。因為今次候任知縣公佈咗來屆官府各部門掌管名單之後，已經出現咗一個好清晰的未來知縣的要求，就係比河蟹更河蟹。點解咁講？事關候任官府各級主要官員幾乎完全無變，大家雖然以前係同事，但係到今日莊閒已定的時候，真係要買單計數者又點會只係查數老頂一個咁少呢？所以只能夠講候任知縣其實十分清楚整個官府之主要官員都只不過係泛泛之輩，如果再有十分盡責而又有能力之查數部主管在位，自然就會繼續發生過去一直打擊官府威信的事件。咁嘅情況對於一個新任知縣凳都未坐穩，自然唔會搵自己笨換得就換，以減少對自己能力不足的負面影響。

十年成就與遺憾（下）

過去十年，媒體仍然堅持面對權貴不斷追問的前線記者經已所餘無幾，再者十年來小城環境發生鉅變，工資比例不斷改變的同時，各類基本生活基數越來越高，要維持固有生活條件極不容易，加上各大企業對資深人才的需求與日俱增，能夠堅持理想守住前線長達十多二十年同樣工作除了不容易之外，更雖要有一份犧牲的精神，才能風雨不斷地為大家提供新聞現場的報道。回望過去十年小城媒體的態度，從最初的一面倒唱好，到間或出現指摘，及至近年開始對部分政策及施政主動進行評論，多少反映小城言論空間增多，亦有新增的全民議事及議政的節目，俾庶民有發洩的空間。但係話分兩頭，如果社會上唔係積貯咁多怨氣，媒體就算開放更多空間，都未必吸引到庶民參與同支持。咁即係話都係因為官府過去多年之管治不得人心，政策混亂及執行率偏低，使民間怨氣日深，至會催生媒體由全面保皇慢慢走向部分監察的方向，亦係庶民對於官府管治、媒體監察角色的認識加深了不少。從呢個角度去睇，庶民關心社會的意識提高，亦會推動到媒體更加積極咁去監察官府的工作，而官府亦都需要向全世界交代，所以亦會小心諮詢各界去進行施政。
　不過以往十年，知縣自己就唔覺遺憾，我哋就覺得非常遺憾。事關從媒體上所反映唔少官府在政策上執行的漏弊，至今能矯正的政策寥寥可數。而一直被指摘之法律滯後，到今天都唔見有任何進展。反而唔係關乎重大民生的廿三條，竟然又可以火速通過，咁樣就足以證明知縣同庶民期望有幾大落差，所以佢自己根本就唔會覺得遺憾，覺得遺憾嘅就只有廣大庶民。

十年成就與遺憾（上）

知縣早前對自我過去十年的評價唔打分，亦唔覺得有遺憾，亦都向前看，依然故我的勢態良好，帶各位遊足一個大花園，呢個亦都係大家一早預咗。但係今次有新嘢，就係由知縣本人親口講點解有人可以有船隊、點解有人可以自動放棄一塊地但係官府又會主動俾番塊新地俾佢哋用。當然結果係點已經唔使再評論，但係最奇怪嘅係原來一早佢本人就準備咗官方答案，而竟然刻意預留喺傳媒座談會上面先至向外公佈。作為小城回歸第一代政治人物，當然方方面面都圓滑平穩，而媒體仍然追逐其個人發表。事關作為過渡前後的庶民代表，十多二十年來面對各大小傳媒，基本上可以講唔單止對記者熟口熟面，部分更加係老友鬼鬼，對於見慣場面之政治人物，亦唯有久經鍛煉之前線記者，先至有本事面對人物作出正面挑戰以及尖銳發問。不過如果想講高手過招，今次知縣似乎開始技窮。經過以往多年的表現，知縣的應對以及反應大家都瞭如指掌，亦都無期望及盼望。不過面對資歷深厚的小艾，作為一代知縣最後唯一指明發問之前線記者，有機會真係想訪問一下她點樣面對小城一眾庸官，獲得問題問非所答及那種不禮貌對待之餘，點解仲可以堅持咁多年不停追問？眾所周知今天城內牛鬼蛇神當道，周邊誘惑不斷，要堅守前線報道絕不容易。但係我哋更加應該向呢批堅守多年前線採訪的記者們致敬，事關記者天職就係發問，同時亦唔係你問就會有人答你，最重要嘅當然係你識唔識發問嘅智慧。觀乎兩地前線記者水平，整體發問質數下降，今日有幸仍見小城存在資深人員能夠作出尖銳發問，這些才算是小城過去十年的成就才對。

烚足十年（下）

點解研究西洋法律史要到小城作研究？終審法官係話小城仲用緊西洋人係石器時代所訂立的法律，根本連西洋人都唔用好耐，咁如果要研究西洋法律歷史，就梗係要到小城參觀吓呢套石器時代法律可以點運作啦，遲早可以被列入人類非物質世界文化遺產，到時旅遊局又多一個賣點可以推廣自由行去法庭參觀運作。其實幾個世紀以來，小城法院對於大部分庶民嚟講都係只可遠觀、千祈唔好入去，因為入到去大家可能連廁所都唔識搵。幾百年以嚟小城法律只係俾少數識西洋話嘅人睇，庶民要理解除咗搵翻譯之外，就係靠相關輔助人員口傳口咁得到個大概。但係換咗官府十年咁耐，要將西洋話改做白話嘅工作進展緩慢，當中又涉及小城自己立法之後，部分翻譯咗嘅法律又被廢除，因為新立之法律要有翻譯，要廢之法律都要翻譯俾大家睇點解要廢咗佢，結果即係白做不特止，仲阻礙其他仍然生效之法律翻譯進度。情況等於整水喉唔閂大水掣，點整都係漏水。點解小城法律界咁羞家？要追究當然係要問最高負責之政治任命官員「管家婆」。先前提到法律譯完之後廢咗佢嘅狀態，更加係由佢一手搞出嚟，點解？佢身兼小城行政同法務，法律運作之好與壞關乎行政當局資源的配合與否。制訂法律翻譯步驟的同時，有無考慮到條例會否被廢？而唔夠資源培育法律人才更加係責無旁貸。但係以打工仔角度睇「管家婆」，法務既然要行政資源配合，打工仔自然要睇吓邊個出糧俾你，法務部分自然要讓路俾出糧俾佢嘅行政當局。了解其中因由就可以理解小城法律體制點解可以烚烚吓烚足十年。

烚足十年（上）

一年一度小城之司法年度又開始，照例所有官府執法與司法部門都出齊見人，咁當然連知縣同一眾法律相關官員都要俾面出席，向世界表現小城都有司法制度，同埋小城都被法律所保障及限制。但係除咗殺人放火之外，人治先至係小城嘅社會根基。我哋今日喺新聞紙有得寫咁耐，其實看官都根本清楚呢個欄從來都無乜點讚過法律單位，無他者只不過自己人當家之後，小城法律運作一直都無乜表現令庶民讚賞，十年來法庭依然高據庶民頭痛指數的第一位。但係小城法庭亦曾經數次裁決令庶民覺得，除卻人治之後仍然有需要靠法庭幫手解決嘅問題。例如「公共行政總規章」違法事件及剛過去的垃圾會死票復活事件，都表現出法院於小城中立仲裁的地位，亦令在人治勢力過大的情況下庶民有原則性的保護。而今屆司法年度開幕禮上，連終審法官、律師會主席及檢察院長，都罕有地對小城法律體制烚烚吓烚足十年忍無可忍，事關作為資源分配的行政當局在分配不均的情況下，令到司法界嚴重資源不足。大家睇吓南灣舊法院停用之後，小城之法院被安排分拆到不同的商業單位內，幾個一審法院及法庭竟然喺大家返工搭同一部電梯的商廈內，情況同非洲部分法庭喺民居旁邊的木屋內開庭無乜分別，甚至連門口個「石Ｑ」都係同一間公司負責。相反公共行政大樓就好快建好同埋可以運作。但係呢啲都只不過係硬件上之差距，真正令小城法庭效率低下嘅問題，係法律改革步伐仲慢過要國家航天員登陸月球，難怪連終審法官都講將來要研究西洋法律史一定要到小城。

有無新天地？（下）

剛剛官府同六大字花檔傾掂數，未來將所有人都規限於只有廿一歲以上至入得賭場，包括在內工作之員工。過兩日，又爆出其中一間字花檔交還一幅官地新聞，綜合各方資訊，明顯字花檔於海嘯後水喉失靈，原來之計劃被迫放棄，最後只能交還官府另作用途。今次官府能順利將入場門限提高到廿一歲，一般估計都係因為金融海嘯之後字花檔收入大減，變成人手鬆動咗但係請落之人手又唔可以隨便炒咗佢，結果若果將人手年齡提高，就可以簡單咁減少操作人手，就算唔炒人，未來集團擴張都可以請少啲人，甚至調配人手就可以搞掂，結果可以話，反而係官府俾返個台階字花檔落台，救佢一命都未定。經歷數年由字花檔政策所帶動下高速增長之後的小城，人民生活與民生面貌發生巨大變化，令小城庶民、官府以至商家仝人，都終於驚覺到單靠一條「橋」係唔可以走一世嘅，所以呢幾日適逢垃圾會換屆前夕，又將臨知縣亦喺年尾換人，大家都覺得來年即將有新氣象。而現屆官府亦都趁機會與字花檔講數，希望大家能有共識。但係呢次不能否認官府揀咗十分好時間同埋理據，令到事件能夠順利進行，少有地能夠把握最佳時機去處理自己搞落嘅手尾，都叫做做番啲嘢，原本對於現屆官府最後一年都唔會有乜動作嘅情況下，算做為來屆鋪番少少路，等下屆知縣唔使啃咁大舊豬頭骨。雖然係咁，來屆無論知縣定係垃圾會，都要面對更加大的困難，就係後金融海嘯下小城另外的出路將會如何，就要睇執政者有幾大胸襟，去平衡既得利益者同廣大庶民之利益分配。

有無新天地？（上）

本屆會期終於開波，一個完全無驚喜嘅垃圾會其實大家都唔會有乜期待，事關就算所有人都換晒班，但係遊戲規則唔變，幾叻都無用。而家連京城都玩改革開放，根本連鄉公所都係一人一票選代表、同埋選領導。反而今時今日嘅小城，知縣只係靠三百人選出嚟，而呢三百人，又係由一大班社團互選之後得出嘅產物，而呢班社團卻又係靠官府每年批錢俾佢哋營運落去，只要每年交兩三個活動同埋印番三數本刊物，就可以足夠將會內重量級人物、於政治利益交換下送入官府內的委員會、諮詢會、甚至垃圾會，當然最後就有可能做埋知縣都得，呢樣就係小城內政嘅組成部分。呢家嘢全個小城都知，但係又確實真係唔少人鍾意爭逐呢種政治勢力。無他，有咗政治勢力，自然有實際利益，就算唔係直接利益，至少都可以喺政策上作出傾斜而有利自己，即係油水位。以往之政治版圖，從西洋人與京城傾掂數之後，就將部分小城資源分配俾華人代表，以圖平定內部政局不安。到今日經已到咗習以為常咁分配利益，實質政治需要已經改變為利益互換，因為當初之西洋人經已變為自己人當家，已經唔再係被人殖民，所以如果再搵唔到第二條橋去解決內部政治問題的話，根本就唔可能達到京城指示「和諧社會」之目標。事實上要有效宣洩民間不滿，按照今天之遊戲規則就只有垃圾會可以作出適度之功效，但係單憑少數代表發聲就以為可以簡單解決問題就似乎太天真，若果未來官府仍然諗住就咁靠幾個勢力不均之代議士發吓聲，就可以平息內部紛爭，跟住政策依舊的話，唔好講「河蟹」，連「河蝦」都無機會。