拆樓為旅遊？（上）

官府終於對高園街之荒廢舊公務員宿舍進行清拆，預算逐步清拆位於牌坊腳上的舊建築，再於原址進行考古發掘，睇吓地底有無屬於舊西洋大廟的遺物。原本對於古物發掘庶民自然唔會反對，畢竟對於小城歷史，庶民都係十分關心同保護，但係今次之發掘，係需要清拆一批六十年代之公僕宿舍，另外官府亦計劃將上述之石仔街，改為步行者天國。而看回官府公佈之拆卸計劃，首先拆兩幢，然後進行考古發掘，第二期至拆埋其餘兩幢，安排做臨時旅遊巴上落客區。第一期拆舊樓進行發掘考古，官府明顯為應付聯合國發世遺牌照的機構，所以安排一次考古示範，俾大家睇吓官府係有尊重小城之文物保護。至於第二期清拆後安排作臨時大巴上落客區，則係為咗安撫旅遊業界，讓業界越來越少之祖國團客，提供較自由行更佳的上落點，否則業界已經無乜賣點可以再賣，到時打擊咗零團費之後，景點又唔能夠滿足跟團之老人家全程車載到點之要求。事關各大字花酒店都經已有龐大車隊應付好此道人士，業界想插手分一杯羹根本就無機會同無能力，所以業界一直只會提出點對點的旅遊路線，要求客人從一點直達另一點，節省時間好讓客人以最少時間完成觀光，留最多時間予指定行程的購物點，好讓客戶能買夠數令業界能有足夠回佣生存，即係同大家講，旅遊業界仲係用緊三十多年前對付日本客人的經營手法，不過今日嘅對象變咗係祖國同胞，方式仍然一樣咁解，咁樣落去此部分旅遊業界想繼續生存落去都幾難。

火燒神檯（下）

康公廟火災所燒毀的咸豐年貢檯，見證十月初五街的半百興衰。亦再次展示小城文物的哀歌。小城自從申遺成功之後，歷史文物開始受人重視，過去西洋人只重點保護洋式文物，各大教堂每年花費鉅款進行修補工程，甚至只燒淨一度牆的教堂遺址，都要重點保護，相反傳統的廟宇則基本屬於自生自滅，間中會作外牆翻新工程，主力結構的保護，則完全靠庶民中的有心人，以最傳統的方式每年向街坊募捐維修。只要看小城申遺的建築物名單中，若非有部分廟宇建築能與申遺主題結合，相信都唔會被列入世遺名錄而受到保護。相反，眾多埋藏於庶民周邊，日常出行沒有察覺的細小廟宇、石敢當等傳統民間信仰的文物，一直被有關當局所忽視。曾經有人批評小城廟宇各自為政未有有效之中央管理，但係正如申遺名單一樣，官府從一開始都無認真保護過小城傳統的民間文化及文物，到後來申遺成功，才急急加大文物保護的力度，事關申遺成功所帶來的巨大經濟效益，令文化當局不得不正視問題。今次百年貢檯被燒毀，再次警告有關當局，得來不易之文物係好容易就會消失喺世上，以佢哋今時今日呢種咁落後之所謂保育方式，過多十年不難被聯合國除掉於世遺名錄之外，以貢檯呢種古物如要保護其實十分容易，只要將文物複製另一個耐燃替身，將正版珍藏於博物館中，就可以解決火災危機及平衡信眾需要。呢種做法世界各大歷史名城都沿用至今，唔明點解管理當局可以咁輕佻以為文物就咁放喺度唔會有問題。再係咁落去，小城可能最後只剩下列入世遺的廿多座文物，其他作為集體記憶的歷史文物都會消失於庶民眼前。

火燒神檯（上）

小城近年大興土木，現代化建築比目皆視，不過終歸小城開埠四百多年，有番咁上下文化底縕，唔少文物於多年城市化後隱沒於城內例如天橋底等地方不被發現，所以大家身邊不時存在百多二百年的文物而不知。早前新春期間，古廟因香火鼎盛，搞到百五載真正咸豐年神檯化為灰燼，事件幸好未有波及整幢廟宇及附近民房，否則後果不堪設想。事後有人歸咎小城各廟宇各自為政，缺乏有效的中央管理，令小城不時發生廟宇火警，導致廟宇文物損失慘重。從宗教儀式角度睇，國人之入廟拜神習俗有成千年歷史，根本唔容易改變大家燒香化寶的習慣，就算如何中央管理，只要一日宗教儀式上需要點火，咁文物都有機會因為發生火警而被燒毀。事實上小城現存唔少文物都經歷大小火災，最出名莫過於小城地標的大三巴，多年來經歷三次火災，最後一次才使佢由一間完整教堂變成今日淨番門面嘅牌坊。而媽閣廟內現今的天后大殿，亦曾於一九八八年大火之中焚毀，今日大家所見的都係重建得來的新選築，而觀音仔、益隆炮竹廠等亦曾受火災所損，只是它們都較大三巴好運，未有完全燒毀而仍然有重建的機會。但係更有大部分文物未有機會留低與大家見面，全部都在火災之後永遠消失於地平線上，呢啲與其說係小城嘅損失，倒不如話係人類全體之損失，因為就算大家點復修，被重建之文物都唔會係原裝正貨，而唔能夠重建之文物就更加係只有喺照片中才能回憶。就算小城經濟幾咁發達，建幾多冒牌外國文物，都唔能夠補償所損失之本地瑰寶。

標籤下的青少年（下）

早前鄰埠發生母親將女兒拋落樓然後自己跳樓的倫常慘劇，原來只因女兒未能通過面試，升讀被視為貴族名校的原校，而女兒到今天仍然唔明白父親同佢解釋母親死咗嘅事實。呢類倫常慘劇與生活及社會壓力下所發生的不一樣。其父親月入數萬而母親則是全職主婦，唯一能令母親作出這種行為，最大可能就只有母親不能忍受女兒明明已經入讀同校幼稚園，竟然未能成功升上小學。當中可能是母親覺得無面、亦可能受到周邊親屬的壓力而突然發生奇怪的念頭，但係最重要嘅係成人只顧自己個人感受而根本無理過其女兒的意願。而為人丈夫的男事主同樣未能察覺太太出現的問題而眼白白讓慘劇發生。家長雙方都未有足夠的互相關懷，更遑論對子女的溝通，到最後發生的慘劇其實是可以避免，只是大家都只在事後才驚覺問題所在。當家庭或生活上出現問題，今天的成年人一般都缺乏承擔，往往選擇逃避問題而沒有勇氣面對及解決問題。呢啲都係今天的成年人其實自己都未有受到足夠的磨練，遇到挫折經常將責任推到其他人身上，即係所謂成人其實亦都未成熟，要佢哋去理解唔同年代嘅問題存在一定難度。點解會發生成人幼子化呢種情況？其實就係呢一代經歷經濟起飛，環境只有不斷改善而沒有受到太大考驗，所以只要遇上少少挫折就唔能夠承受，而且仲要硬將自己的一套強加於新一代身上。就於鄰埠知縣不由分說，就標籤了八十年代成長的青少年，但係喺佢哋家長式管制下又唔見得鄰埠青年特別有貢獻，奉勸各位成人及家長，想子女好就要多溝通，同時要與時並進，至少知道點樣用Facebook同仔女溝通才為上策。

標籤下的青少年（上）

社會經常批評今天青少年沉迷上網成癮，不懂人際溝通，造成心理及生理上的影響。成人世界裡經常容易將青少年進行標籤化，以簡化個人對一般青少年理解的程序。在今天社會個人主義抬頭的風氣下，莫講是青少年，就連成年人都只顧個人感受而缺乏關顧別人。若果只講青少年沉迷上網，咁點解學校要將上課同考試時間表放上網供大家參考？點解教育當局每年之暑期活動又在網上公佈其抽籤結果？最後連老師都在網上開個人博客與學生分享及交流，呢啲係為咗乜？都係為咗同新世代有良好的溝通，好多嘢青年人係唔會直接同成人面對面咁講，原因佢哋都係因為尊重成年人，唔想將大家唔鍾意聽但係又係事實嘅嘢，兜口兜面咁同大家講。但係成人就往往鍾意將唔同你正面衝突曲解為沉迷上網，試想下今天一個銀行銷售經理，如果佢一日無上網十幾小時，試問佢點樣生存落去？
　一個貿易商人如果唔俾佢用電郵同MSN，咁你叫佢點做生意？連溫總都係新年上網同大家增進溝通，減少上網只會令大家同世界脫節，而卻又只有行街睇戲食飯唱Ｋ，唔通大家想自己的小朋友去埋酒吧同夜總會乎？當然，總有人會沉迷上網打機及玩MSN、Facebook等，但係好多今日的家長都情願佢哋喺屋企打機，都唔想自己的小朋友出街酺，因為總好過佢哋過關食丸仔。咁即係出街玩又唔俾，係屋企上網又話你沉迷上網，咁請問大家想年青人點做至好？大家有無真正關心過當代的年青人，究竟佢哋想要乜同想做啲乜呢？

塌樓與小城（下）

鄰埠塌樓小城亦唔見得好過人，咁多年以嚟官府同代議士們一直討論舊區重整，一直都係只聞樓梯響但係就影都唔見，終於鄰埠發生塌樓事件，班人就即刻話要加強巡查保障庶民生命安全，三行部話而家小城幾十年樓齡嘅唐樓唔多，而且仲不時有監管，又有官府免息維修貸款，但係民間團體就一直追究小城由來以久的僭建問題。自上世紀末小城出現大量五層高唐樓建築，僭建天台經已成為指定動作，原本作為公眾地方的天台，被頂樓業主當作私人空間肆意僭建，一般有良心之業主會作簡單鐵皮屋，將天台闢作私人花園或寵物樂園，至於無良業主就唔單止用石屎水泥僭建永久建築，而且仲建唔止一兩層，仲要僭建後再加天台花園，最後搞到大廈傾斜漏水破壞結構而造成危險。雖然官府有例明令禁止違法加建改建，但係過去之三行部一向唔多理嘢，而且回歸前貪污風氣瀰漫，就算有人投訴只要肯俾錢，一般都能夠搞得掂。所以到今日僭建物隨處可見，已經去到無可挽救的局面，部分石屎脫落及屋頂剝落事件時有發生，再加上大部分舊僭建屋於近年已經轉手，而轉手費時更會將僭建屋當作正式建築物看待，會賣得貴啲。基於利益關係，連民間社團都建議官府唔好一刀切處理僭建物。近日官府的巡查結果都係話無即時危險，但係到咗有即時危險嘅時候，其實亦即係意外發生之時，咁同無巡過樓有乜分別呢？加上法例上又令官員入屋巡查有困難，所以如果官府唔大刀闊斧清除現存小城的所有僭建物，咁樣只會令問題繼續惡化落去，最終只會重現鄰埠的慘劇。

塌樓與小城（上）

鄰埠塌樓造成四死多人傷的意外，令人驚醒呢個高度成熟的資本主義社會、擁有亞洲第一國際金融中心地位、以及種種世界矚目的經濟成就底下，竟然出現五層舊樓好似「九一一」的倒塌意外，兩極化社會向大家展示一個活生生的新奴隸社會。多年來鄰埠的摩天大樓群早已冠絕亞洲，繼有曾奪全球第六高之國金二期（真八十八層）、又有即將完工之世界第四大樓環球貿易中心，早前又有報道指鄰埠某大廈頂樓（假八十八樓）以呎價七萬多、單位售價達四億多港元賣出。相對今次倒塌樓宇則只有五層高，而且仲有成五十多年樓齡，全幢業權由一間公司持有，那個天價單位經已足夠建過幾幢全新的唐樓，呢啲就係鄰埠的現實寫照。鄰埠以高地價政策，改變原本自身的經濟模式，令原先以製造業為主的經濟體系，發展成金融服務業，同時以計劃住屋，分化社會結構，將無經濟能力的人趕入官樓或者係平價屋，但係卻任由市場上的物業缺乏監管，當無能力同埋唔符合資格的邊緣人要搵個竇，就要被迫租上像塌樓現場之危樓，只要睇番今次意外的災民，就係一班被社會遺忘的一群：南亞裔移民、單親複雜家庭等，都係生活在臨界邊緣的困境。情況與天水圍的狀況不一樣，天水圍屬於明顯底下層而受官府規劃下得出的悲情社區，而馬頭圍塌樓現場則屬唔夠條件的夾心階層被迫租住無人管理的樓宇，屬於隱性個案官府睇唔到之餘，私人社福機構亦都無能為力，最後呢個亞洲國際大都會任由塌樓悲劇發生。

現代官場現形記（下）

新知縣自從未上任就搞掂查數部成功踢走該部門阿頭之外，經歷京官加冕及上任過年等沖喜事件之後，所謂蜜月期一瞬即逝。正當大家等緊新知縣如何出招，解拆小城龍頭獨大困局之際，冷不防舊朝之司級對落官員，被新任知縣於短時間內逐一擊破，官場內不乏人心惶惶。事關新知縣喺解決查數部長一役，經已被民間狠批庸才當道有能者走佬，之後有一陣子的平靜，正當大家以為新知縣將會全盤承接上手交低之人馬之際，原來換血行動陸續有來。首先原本以暫代形式之二級官員，都逐步正式就任一個位置而唔係繼續代任。繼而再經一輪調任等人事安排，將一班表現唔合心水之局級官員，安排到投閒棄散位置甚或離職，改而起用與知縣更為合拍之二線官員出掌局級。姑勿論連串調任及升遷，對於官府內部運作會否更暢順、或有更多新火花，就要睇日後表現才可作定論。不過對於新知縣嚟講就應該係最合適之選，當然啦自己揀唔通都唔啱咩，最多咪喺揀無可揀嘅情況之下得出最佳選擇。但係今次人事調動，睇得出其實新知縣十分理解官府內部運作及人脈關係，同時清楚自己唔及首屆卸任知縣咁有壓場能力，需要更多與自己理念相近、處事手法配合之人員協助推行施政。大家只要睇番今次新知縣的【點將錄】就會發現，只有直屬知縣的查數部阿頭要換人，其他主要司級官員由於過往都係不同範疇之同事，大家都無乜兩句亦都知佢哋聽教聽話，所以只會鏟除咗窒得佢最應之查數部阿頭。反而局級之實幹官員，最容易發現問題所在，就算前朝遺下司級班底要佢順利過渡，只要換咗班局級係自己友，自然容易了解各部門之內部情況。