執笠法務（下）

今次官府無端端推出一個咁嘅法案，唔少人都莫名其妙。首先官府提出嘅理據並唔充足，因為小城嘅公務人員有唔少官府嘅資助，無端端再開多一條水喉比公務員於理不合。另外喺小城嘅法律體系裡面，都有法律援助嘅支援，任何人都有資格作出申請，只係要法官判斷合理與否，所以根本官府就無需要另闢渠道協助官員。另外經已卸任之代議士主席亦力指，官府推出之法案有違基本法內「法律面前人人平等」的精神，而且法案亦將會破壞小城一直以嚟行政、立法同司法三個範疇嘅平均，因為由庶民選出之代議士，不時會就官府政策、官員行為以及執法機關的種種行為發表意見，甚至作出批評。呢啲都係小城法律賦予代議士必要之權利及功能，若果被指摘之官員可以隨時作出訴訟，相信唔少代議士都要立刻請辭，至可以保住自己唔會被人告到褲甩。記者會當日管家婆被記者問到，若果當日走資司長未被揭發時有咗呢條法例，記者報道咗會唔會被走資司長告到暈？管家婆只係回返句佢唔會答呢啲假設性嘅問題，咁即係第日有多個走資官員嘅話，佢係唔保證會唔會唔告到你褲甩。好難明管家婆而家日日都被人追佢法律改革做得太慢、條文翻譯又做得唔好，喺咁嘅情況下有正經嘢唔做，走去搞埋咁多不知所謂嘅草案，浪費公帑之餘又擾民，更重要嘅係令人覺得官府只想減少麻煩所以整條法案出嚟叫大家收口，係最令人唔能夠接受，但係偏偏今日垃圾會嘅構成都係行政主導，連國內都無呢類咁嘅惡法，呢個執笠法務唔該學習下乜嘢叫政治正確，唔好又將新知縣艱辛建立嘅形象毀於一旦。

執笠法務（上）

官府近日積極籌備推出新法例，就係準備推出容許公帑資助公務員，向個人或團體提出訴訟。各大媒體一致指責條例漏洞極大，好大機會被官員濫用，從而影響新聞及言論自由。講真，大部分學者同媒體新聞工作者，都傾向相信官府今次唔係真係有心打壓言論自由，但係由於官府推出嘅法例極不合理，往後勢必出現唔少爭議，所以媒體及學者至群起反對，事關條法案分分鐘仲衰過廿三條，因為若果法例通過咗官員隨時郁下就可以告你，又唔使用自己錢，告唔入都唔肉痛。相反若果被告人就要自己拎錢請律師為自己辯護，到時唔夠錢打官司最多都只能申請法援，都係要等法官判你夠唔夠資格。喺呢種咁嘅環境前提底下，相信無乜人敢寫官府嘅政策，或者係對官員或官府嘅問題發表意見。況且阿法務官當住咁多記者面前講過，全城人都知公僕嘅條件真係比一般打私人公司工嘅庶民條件優厚，既然管家婆講得咁清楚，即刻俾人問咁點解官府仲要用公帑去支持公職人員打官司？從庶民角度睇，官府人員除咗經濟條件較一般庶民優厚之外，最重要嘅係官府所收到嘅公帑，都係庶民有份出嘅，而家官府出條咁嘅法例，俾官員用自己嘅錢向自己興起官司，而自己仲要再搵錢出嚟同對方打官司，點講都唔通。再者現今小城法院積存大量案件未審未判，而家再推出條咁樣嘅法例，去變相鼓勵官員動輒告人，法院自不然會有更多案件積壓，到時真係審極都唔完，做到法院職員氣都咳。

掉哪嗎！頂硬上（下）

廣府話被打壓，突然間令到一眾用廣州話作為母語的人團結起嚟，唔多唔少都要多謝打壓者令我哋明白到，廣州話其實就係我哋嘅根基，亦令到好多例如吾等市井之徒，發覺如果我哋唔作出反應，就會好似沖繩嘅琉球話一樣，全日本搵唔到幾多個人識。正如小弟而家打緊嘅好多字，發表嘅謬論，都係只有識聽同識講廣府話嘅人至會明。因為小弟宗旨係服務茶餐廳嘅社群，唔會扮清高講番話或者鬼話，至於經常喺餐廳出現嘅粗口類，基本上除咗性器官代名詞之外，我都會用喺文章內，務求看官能夠睇得開心，有所回味。事實上粵語作為大家嘅基本語言，雖然對大家嚟講唔使點學就可以掌握，但係唔可以就咁否定粵語對大家之影響，因為作為第一語言，各位嘅基礎知識都係靠呢種語言作踏腳石，先至可以有能力學習其他外語增進知識。

不過今時今日廣府話嘅情況同西洋話一樣面臨著功能性障礙。即係話除咗日常生活之外，可以令自己增值嘅竟然係大家學極都唔識嘅番文。就係因為咁樣，小弟唔少朋友同自己仔女嘅對話只會用番文，呢類現代競爭所得出嚟嘅文化，多少都以學識邊種語言嘅搵食空間比較大作判斷。就等鄰埠去省城撐場之外籍語文教師講，鄰埠好多朋友都同佢講用廣府話無用，學「煲冬瓜」至係未來大趨勢。若果語言係以影響力嚟衡量，咁嗰社會嘅文化就會十分貧乏。喺祖國一直強調文化融合和諧社會嘅大原則下，省城呢班官搞單咁嘅嘢出嚟係唔係自找麻煩呢？又唔見人哋世博要用「煲冬瓜」去取代上海話！就算要擦京官嘅鞋都唔係咁擦掛？

掉哪嗎！頂硬上（上）

鄰埠早幾年經常推出例如妙趣廣州話、最緊要正字等益智節目，目的都係為咗加強庶民對母語之認識，配合鄰埠官府推行母語教學嘅政策。令到鄰埠與小城兩地庶民，無不重新對廣府話之深奧讚不絕口，亦令到一眾崇洋媚外之假洋鬼子無言以對，因為呢班人根本唔能夠用一句完整嘅廣州話去表達自己嘅意思，鄰埠呢種對本土母語的推動，其實無非都係想將鄰埠過份崇拜英語呢種畸型嘅社會現象稍為壓抑，免得新一代完全唔能夠適應本土生活。
　不過可惜嘅係，我哋母語嘅始祖省城，市政府近日竟然用令城市走向國際化為理由 ，要求主要電視台之黃金時段，改為用「煲冬瓜」作廣播。此舉即時引起群眾震驚及震怒，原來冰封三尺非一日之寒。早前東莞文化部經已因為不雅低俗等理由，派人拆毀明朝將領袁崇煥雕像下的「掉哪嗎！頂硬上」名句。原本一代名將之紀念像中的名句，竟然用國際化做理由而要拆除，自然引起唔少原居民反感，最後引發數千人街上集結宣洩捍衛廣州話，當中更有由鄰埠出發到省城撐場嘅外籍廣州話教師。官府勢估唔到一個自己以為好簡單嘅行政指令，竟然會換嚟咁大嘅反彈。因為呢班芝麻官根本就唔識用個腦去諗嘢，令城市國際化竟然要改變地方母語，除咗係唔用腦根本就搵唔到其他解釋。唔好話下面班擦鞋仔無做過嘢，佢哋只不過搵到一條「屎橋」去擦班官嘅鞋，最後要上身嘅並唔係佢哋。但係呢班芝麻官唔單止唔知自己錯喺邊，就連自己做過乜嘢都唔係好明，咁有乜法子唔被人「掉哪嗎！」呢！

零團負團禁不絕（下）

媒介接連炮轟阿珍，但係點講都好，阿珍嗰七分鐘片段全車人都無人敢反駁過阿珍一句，街坊們開始懷疑呢班團友其實都自覺身有屎。果然近日阿珍終於蒲頭，而放片上網嘅隱形團友亦都現真身。但係隱形團友安徽商人則向媒體表示，三月份參加四日三夜港澳遊抵達鄰埠，團費只不過係六百一十人仔，而全團人都知道呢個係購物團，而到埗後各人都向導遊交咗千多元，用作包括司機小費等。雖然話額外俾多千多元，但係夾埋都唔夠兩千銀，試問點可能喺鄰埠過到兩日呢！而且大家一早都清楚呢個係購物團，但係兩車之購物額相距成十幾萬，都好難怪阿珍嬲到震。而據安徽商人表示該團分開咗男子組同女子組兩車人，結果就造成咁大差距，因為該購物景點係珠寶店。阿珍今次其實十分唔好彩，撞正對方呢團係全團知明嘅徽商，佢哋做生意數口比你精幾百倍，要測試你底線話都無咁易。
　原本一個團係點樣嘅組合，照道理同個導遊收入及表現應該無關係，團友係乜嘢人買唔買到嘢根本就同旅遊無關，強迫購物嘅旅行團自然會產生唔少矛盾。而團友報團時亦都係一心去購物天堂購物，佢哋當然唔介意以平價團費參團，總之買番夠數就應該無問題。就正如阿珍片段中所講，個世界係無免費午餐，你買唔夠數就自然會有得你受。但當你見到個團帶你去購物嘅地方根本無你想買嘅嘢，如果呢個時候都要買咁就對自己唔住。結果呢種係全世界只有中港澳至有嘅超抵旅行團，經已發展成風土病，隔幾個禮拜就又會有一單，就算要禁都禁唔嚟。

零團負團禁不絕（上）

鄰埠導遊阿珍喪鬧車上遊客，反而被人偷拍片段上網公祭。媒介一致指摘阿珍破壞旅遊城市形象，又出動人肉搜索想迫佢現身出席解畫。結果到今日佢都仲係帶罪在身，全世界都認定佢一個人搞死鄰埠投資咁多年所打造嘅購物天堂美譽，不過由於早前鄰埠經已發生過無牌導遊迫客買嘢，搞到個客心臟病發致死，結果各路人馬首先查咗佢係唔係真正嘅導遊。但係唔查由至可一查把幾火，因為呢位珍姐經已大大聲喺片段裡面講，佢大大話話都做咗成八年導遊，如果係冒牌假導遊，斷估都冒唔到咁耐，所以佢唔只係真正導遊，仲係正正式式嘅桂枝人。最後媒介唯有卸膊話佢係新移民，即係唔係地道桂枝，桂枝唔會咁做。跟手各大負責官員即時嚴詞指責，話業界自我監管不力，而業界領導又推落少部分害群之馬，損害團體名譽及利益。最後官方仲放風考慮立法規管導遊質素，將事件推向高峰。無他者，事關國家旅遊局經已向國民發出鄰埠旅遊警示，鄰埠業界同官府即時大地震，因為以阿公咁睇鄰埠檯戲，點都會俾番幾分薄面，今次搞到咁大都係第一次，而且今時今日越嚟越唔可以得罪國內同胞，國家旅遊局咁樣示警法，官府想唔做嘢都唔得啦！事實上近年由於鄰埠同小城的旅遊業，都係靠祖國同胞的消費所支撐，同胞嚟得多磨擦自然會增加，過去幾年鄰埠同小城都不時發生有旅行社同團發生爭執，事件一直反映咗兩地都未有好好咁解決零團費或負團費的問題，結果造成給國人一種奇怪扭曲的消費模式，即係大家都特別喜歡唔係明碼實價嘅交易，鍾意偷偷摸摸。

諮詢要宣傳（下）

近期咁多重大基建而且涉及民生利益嘅決策即將展開，庶民其實都好應該負番部分責任去表達自己意見。正如準備於年底對交通大動脈高士德，進行下水道重建工程為例。官府向附近商號同居民諮詢意見盡量將工程影響減至最低，其態度正面，居民亦積極配合發表意見，雙方都展現足夠誠意。但呢類地區性嘅問題，相對於全城庶民重大利益關係，自然係容易處理好多。要真正回應庶民要求，官府必須要做到果敢決斷、高效透明，方能讓庶民對官府重拾信心。例子之一，就係唔知邊個芝麻官諗出一條屎橋話建個輕軌博物館單嘢。首先條輕軌還未建，咁多爭議都仲未解決情況之下，竟然會建議建間博物館出嚟，諗計條友究竟係唔係想被人用臭彈掟死呢？今次知縣就決斷處理，就算身在內地都立刻決定否決興建。不過經屋訂價又出現一屋兩價嘅問題，就算官府同發展商訂合同時候無諗到咁充分，都可以用更靈活方式去處理，既然發展商係回報單位，就俾番啲回報俾人而罰番佢哋遲交樓，咁就雙方都無拖無欠。官府呢類事件層出不窮，往往就係要到最後，先至被公眾發現問題，而官府又無準備到有力答案去解答庶民疑問，最後就自然被人懷疑黑箱作業，呢啲都係官府一直被人垢病嘅地方。今日官府不斷宣稱要建立陽光政府，但要成功轉變並唔係一朝一夕，喺改變嘅同時，應該要對即將推出之政策配合有力之宣傳，至可能令庶民得知官府即將有政策關係到自己，到時諮詢會至可以得到有效收益，並唔係好似而家咁諮詢完都無乜人明，最後政策推出之後被人鬧到飛起。

諮詢要宣傳（上）

官府接連推出牽涉未來重大民生政策的諮詢會，又上議事堂又邀代議士到另一地方進行政策介紹，當中發生會議僅僅過半數代議士出席事件，顯示官員同代議士之間溝通出現問題，但當官員離場之際被媒介追問時、卻又支吾以對表示已經喺會上講清楚，難怪被代議士質疑官員對其政策推介之誠意。近期接連推出的重大政策問題包括輕軌建設、經屋訂價標準以及新批填海地之規劃，全部都係關係到未來小城十幾廿年的城規發展，以至庶民未來生活的變化作出部署。過去小城庶民一直對於社會發展關心不足，原因係幾百年嚟社會點樣走向根本都唔輪到庶民去參與。直到回歸後庶民可以直接同官府溝通，情況先至有少少改變。可惜官府依然未搵到一個有效方法，去學習點樣同庶民溝通，至令到政策每每喺出台之後至發覺完全唔係大家想要的。過往庶民唔同官府溝通，主要都係因為言語不通，亦都對末日政權無期待，但咁並唔等於庶民唔會有意見。因為同樣回歸祖國之鄰埠，早就喺傳媒力量之下，教識咗小城庶民點樣去表達自己嘅意見，只係小城地方特色係「今日留一線日後好相見」，習慣上會俾多一次機會對方免傷和氣。只可惜既得利益集團一直採取殺雞取卵方式去榨取小城僅有資源，官府管理不力俾既得利益者不斷走法律罅，令唔少人認為官府有人同利益集團勾結圖利亦不足為奇。而近年要求官府施政要提高透明度的呼聲日高，正正就係官府唔少決策根本就係唔清唔楚咁就上馬，當大家只知道輕軌路線點走法時候，工程物料嘅標書就差唔多要決定，你話庶民乜都慢點都好，一個有效而強力嘅宣傳係而家官府不可或缺嘅一部分。