監管唔到的字花檔（下）

開放賣賭之初，冇人會估到有咁多花旗集團會睇中小城之賭業，諗住都係鄰埠新貴同埋地頭蟲各爭長短，但係官府取態就係要做大做強，直接到拉城取經，順勢叫埋花旗賭王過嚟開檔，呢一招成功引入咗兩條花旗水魚到小城插旗，只不過官府同花旗賭界之間各自盤算，自然好戲在後頭。正當花旗神話之一年回本於濠江乍現之後，大家窺視之祖國市場自然被強烈的紙醉金迷所吸引，其餘外國小鱷紛紛搵地頭蟲靠碼頭希望攞著數，最後官府才發現自己訂下之條件唔夠清楚，被人將個牌一開二過咗兩棟，至會搞出有未開工先搵八億之天下大荒謬。由於呢個天下大荒謬實在太荒謬，竟然又引到另一班海外傻仔相信小城有金執，紛紛在小城開賭以免執輸，結果係最後連知縣都估到之阿爺出手，限制國民之出入境，冇客到自然搞到花旗佬一時進退失據，再加上海嘯殺到，導致原定發展之項目無限期暫停。面對世紀海嘯企業需要減薪裁員當然無可厚非，不過在博企而言，從一開始就被官府作人手操控，限制持牌機構數量，但係又唔清唔楚地任由持牌人開分店，搞到原本由十間八間之字花檔，一下子暴增到至廿多間，而賭檯數目更突破數千張，個個都想學花旗富豪般，希望能在最短時間內搵夠籌，唔使借錢就可以繼續發展其他項目，自然搏命增加賭檯。官府完全冇管理只要你申請就差唔多一定批你加檯，結果梗係請到成公司都係荷官，稍一不留神市場逆轉，就要炒魷魚以解決過剩之人手。今天就是出現如此局面，令到全城氣氛緊張，要求官府監管博企盈利下仍要減薪裁員是否合理，但係呢樣嘢根本就係官府一開始冇做到好好的風險評估任由博企開檯，造成今天搵自己笨的局面。

監管唔到的字花檔（上）

自從小城開放賣賭之後，對全城各行業各部分都出現唔少嘅衝擊，當中由籌劃發幾多個牌，至今日各牌主力旗艦完成後，卻出現金融海嘯而要裁員的局面。正正表現了世界級的企業大鱷都會因為未能洞悉市場之變化，而令集團整體陷入絕境亦可謂時有發生，看似巨無霸的跨國巨企，世界各地尖子爭相成為一份子，亦可一夜宣佈破產，引致全球金融體制重新定位，人們需要改變概念重估過去的一套是否仍行得通，就等如大家都估唔到雷曼兄弟會摺埋，本地幾大銀行落力推銷之債券一下全部差唔多變晒廢紙，又有鄰埠上市國企竟然擺公司錢走去同銀行對賭結果輸突到要母公司出手相救，但凡種種都印證了現代企業追求利潤的時候，根本就不會計較是否有後遺症、會否出現連火箭專家都計不出的缺陷盲點，引發出全球信貸危機，環球銀行信譽崩壞，連接人與人之間的信任亦薄弱如毛，益發令世人追求自保的心態反映於各個生活環節。大廈管理公司加費小業主開記招反對，鄰埠機場冇行李三個鐘因為公司取消花紅，這類新聞只不過真係小兒科，同海嘯震央之華爾街瞓緊街、小城部分拾荒者之換錢價格急降，都反映了人類追利潤不擇手段之後遺症。同樣地，開放賣賭後之小城博企經歷大量精算之後都係要裁員減薪，擺脫不了大圍經濟的漩渦，一一被巨浪吞噬。乍看之下博企毫無人性只顧保障利益，部分界別代議士炮轟外資博企只顧將錢轉去星洲開展新項目，反而貢獻最多之小城分店，竟然要減薪裁員，仲要即時暫停進行中的新項目工程，搞到淨係外勞都裁咗成萬人，呢樣嘢除咗博企要負最大責任之外，官府亦要為監管賣賭政策之不足負上其中一個最重要嘅責任。

碼頭風雲（下）

鄰埠班垃圾師爺被拒入境之際，碼頭外兩幫人馬各據一方叫喊閩南話橫飛，帶晒相機舉埋牌，唔知仲以為佢哋歡迎緊航天員。兩班人馬自然一班係準備接風，另一班就係反對師爺團走嚟小城指手劃腳者。從公仔箱畫面見到，班反對者竟然個個舉牌遮面慌死人見到佢哋個樣，背景表露無遺，接風派自然手起相機落逐個捉嚟影，結果拉扯之下出現混亂嘅場面就好正常。雖然兩幫人立場鮮明壁壘分明，但係對於垃圾會玩廿三章呢個真正意義，另一邊人馬就似乎唔係好清楚做緊乜，因為人馬始終只不過係人馬，唔會比接風社團叻。不過今次接風社團引入呢班外地師爺叫做壯大聲勢，其結果可能適得其反。點解咁講？小城表面和諧但係各有立場，亦有唔少人反對垃圾會玩廿三張，之前接風社團之旗手搞事議員亦起個壇作過法，邀請知縣出席佢哋搞之廿三張咨詢會，此類直接引起庶民反思之活動，其作用會比搵鄰埠垃圾師爺嚟請槍更有作用。鄰埠垃圾師爺可能真係假期太多冇嘢搵嘢嚟搞，連佢哋嘅癲狗議員都產班師爺無聊，自己地方都未搞得掂走去人哋度玩嘢。但係小城庶民就有唔同嘅睇法，小城內部自己都會有清楚嘅反對理據，冇乜理據事必要搵鄰埠垃圾師爺代出頭，而且兩地法例唔一樣，就算係垃圾師爺都未必能有清楚之反建議俾番官府，咁可靠性就自然大大降低，而今次鄰埠垃圾師爺嚟小城就變成為反對而反對，對於小城庶民擔心之完善廿三張立場完全唔同，加上鄰埠人士表現一向自大，今次直接向小城事務指手劃腳，反而仲增加咗對接風社團要依靠外人的反感，如果小城之垃圾議員去到鄰埠反對佢哋增加生果金又如何？大家會唔會鬧番句黐線？

碼頭風雲（上）

呢排可能接近年尾，小城佳節假期特別多，而茶餐廳亦多咗唔少外地旅客出入，包括問路，當中最識搵小城地道美食者首推鄰埠自由人，無他者語言背景相近，唔係見佢揸住地圖問路都唔知佢哋係外地人。不過可以分辨出鄰埠自由人唔單止係睇佢有冇揸地圖，最大分別係佢哋一開口講嘢都會夾雜住一啲雞腸語言，而語氣中亦帶點大枝嘢嘅感覺，小城觀光局就最歡迎外地旅客到小城花費支持經濟，但係最近移民警就一口氣拒絕咗整團幾廿人嘅鄰埠自由團從碼頭入境，仲喺碼頭上演咗一場大龍鳳。
　話說小城庶民當家作主紀念之喜慶日子，鄰埠一班師爺垃圾議員帶同橫額準備嚟贈慶，當中部分先頭部隊之前已經到過小城，仲高調話會過嚟幫小城慶祝。今次成班友操到嚟估唔到竟然小城會拒絕俾佢哋入境，由於佢哋咁高調自由出入都帶同一班狗仔作保護，佢哋被拒入境後原船返回鄰埠同狗仔講，移民警話佢哋影響小城之安定，淨係俾咗一張紙俾佢，佢哋仲恃住自己係師爺，問個移民官用邊條例拒絕佢哋入境，個移民警都唔識答咁話。話時話呢班垃圾師爺只不過係鄰埠師爺，對於小城嘅例唔通佢地會清楚過移民警？再者師爺應該知道任何地方之移民警都有權拒絕任何人入境而無需解釋，大條道理啋你班垃圾師爺都傻。佢哋操到嚟無非係反對小城議會玩廿三張，咁又有乜理據要小城容許你班外地人嚟搞事呢？但係茶餐廳老闆就有啲可惜，佢話計落條數呢班人連埋狗仔，大大話話都有四五十人，如果佢哋過嚟飲番餐茶或者係同本地接風社團聯誼整番幾圍，小城至少都賺番一萬幾千，過埋夜玩番兩手仲唔止呢個數添。不過大家話如果俾佢哋過到嚟好似韓國農民咁搞到七國咁亂，小城損失嘅就唔止一萬幾千咁少嘢啦。

搵嘢嚟插（下）

公仔箱之瘋煙節目上，幾位台柱議論司庫插兩大部門之報告，兩位學術界台柱用奢華嚟形容其中一份紀念冊，指部門浪費資源。司庫係以數佬方式作報告嚟批評其他部門大洗，呢樣無可厚非，因為佢地唔會知乜嘢係藝術，佢地淨係對數字有興趣，從數佬角度出發只要貨比三家，搵最平之供應商，然後簽一份十分硬淨之合同確保供應，完成唔倒就要賠錢，咁就梗係冇煩惱啦。但係節目內三位台柱作為評論者，大家都以為佢地之視野冇咁狹隘，會從整體宏觀角度作出批評而唔係同司庫一樣執婆仔數，點知今次竟然差唔多百分百同意司庫之報告外，仲外加唔環保為理由叫兩家部門用少啲紙，用多點互聯網作宣傳。我就想問下不如佢地個個喺屋企開住部web cam，喺番電視台之網站內作視像直播，咁就唔使又要打燈又要佢幾位專程走去電視台，仲要化埋妝至出鏡，連推機之人手都慳番，咁咪更環保更具經濟效益？咁大家有冇興趣睇呢個節目呢？事實上小城之出版業一向都唔成氣候，作為兩大推廣部門其實一直都係宣傳上作出唔少努力，使小城仍有少量地方文獻出現，只不過正如司庫話齋對於活動後印刷物之保存真係做得唔好，冇適當之空調作保護，對自己所出之物品尊重不足，同時亦沒有對存貨作一定之銷售處理，兩部門之反應都係話缺乏銷售渠道，但喺小城每年都有幾趟書市活動，點解又唔自己搞番次官府刊物推廣活動呢？如果印刷之書刊只有部分在活動期間用作送禮推廣，咁到活動完後倉儲了一段時間，係唔係又可以搞下開倉促銷大平賣，好等有興趣但嫌貴之庶民可以擁有這些精美書刊，以達至更大之推廣目的呢？

搵嘢嚟插（上）

早前又到咗官府司庫一年一度向同袍開炮出報告之日子，過去幾年明眼人都睇得出官府幾大部門都係洗腳唔抹腳，到司庫插完一輪之後就發生走資司長一案，同時間相關大洗部門完成歷史任務後，一時間官場內的大洗文化似乎因為司庫之指摘而有所收歛。但係唔知係咪呢個原因，又或者係冇部門洗大咗司庫就冇得撈，今年司庫就搵咗搞地方藝術之「唔化局」，同埋官府內最大棚人之「聞柱」嚟開刀，報告仲要唔係對部門之整體，而係針對兩部門所製作之出版物，即係話淨係睇你某部分洗大咗幾多咁解，其他一概唔理。正因為呢個原因，司庫報告內的數字同批評之公正性就十分存疑，佢地有冇幫過兩部門找出問題所在？發現問題後又有冇提出解決建議俾該當部門？表面上兩樣都有，但係報告一開始就只針對出版物而作判斷就已經有所偏差。事關「唔化局」同「聞柱」兩個部門都係做緊向全城庶民直接推廣之工作，只是服務範圍之大小有所不同。報告內簡單地將兩個部門相同尺寸及印數之印刷品價格作對比就十分唔公平，「聞柱」以推廣大眾服務之目的為主，自然印刷數量較大單價較平。相對於「唔化局」作為推廣文化藝術，自然印刷質量上都要求較高，就算相同印數及尺寸亦會於價格上較貴。報告建議謂兩部門對出版工作重視不足，但如果對兩局之出版物有興趣者，都清楚兩局好大部分出版物都係同隨相關活動或展覽等推出，如果單單針對出版流程制訂指引上的不足作批評亦有欠公允。而報告內又以乜乜法令插兩部門冇向官印局提出詢價，需知道這個官府印刷部門之報價三個星期後至有喺行內都出晒名，司庫如果實地了解下情況，就知道一般商業印刷廠唔止印好晒交埋貨，連部門之活動推廣都完埋，你又點敢搵佢呢？司庫今次係唔係搵錯對象嚟插呢？

燒毀腦真喺燒毀咗個腦（下）

圖片來源：環委會
知縣話小城之廉政工程一直在發展，似乎同現實仲有一段距離，皆因官府內部制度仍然有好大缺陷，大多灰色地帶比官員以權謀私，同埋大多引誘。就正如之前的走資司長與今次燒毀腦事件，當事人都有高學歷、有專業，本身亦有一定之經濟能力，大家都會問點解會做D咁嘅野？況且一個喺由專營工程公司轉為官府第六把交椅，另一個仲曾經喺三屆代議事，時任多項公職，最後一項仲喺為民請命之燒毀腦主席，竟然都會走上貪腐之路，究其原因無非喺冇王管，喺部門內可以為所欲為，有法不依喺因為冇人會查，就算喺查都喺自己查自己，同銀行查自己員工有冇違返守則賣雷曼一樣。結果造就咗一單又一單嘅貪污醜聞，官府九年以黎一直都冇改進過監管機制，任由內部自把自為，而行政官僚又互不關心協調，制度下各個部門嚴如私人王國一般冇人管得掂，出事喺遲早嘅事。問題喺官府咁多年不斷話聽從民意從善如流，制度上唔改進根本就冇辦法根治貪官嘅出現，講乜野廉政工程不斷改進唔單止喺教育公僕，其實更應該改變制度同架構，將官員過大之權力減低，增加民間之監察機制使施政透明化、公開化，有監管就有效減低從中取利之吸引力，從而減少貪官的出現。當然世上沒有完美的制度，相信日後亦會不斷出現貪官落馬的消息，制度亦不會一天改變至完善，但制度一日不改善，只會製造更多引誘吸引高官以身拭法，造成原本僅有的人材都因制度上的缺憾加上個人貪念而成為皆下囚，呢樣唔單止喺官府嘅損失，亦都喺庶民嘅損失，而且只會更加嚴重。

燒毀腦真喺燒毀咗個腦（上）

圖片來源：消委會
臨近年尾，官府又搞單涉嫌貪瀆高官被停職事件，唔通又喺一年一度？本來走資司長一案已接近尾聲，相關涉案者走得嘅走，入獄嘅入獄，判刑上訴嘅都上訴完畢，而二奶司長剛剛仲喺議事堂用仍然口震嘅態度去回答完代議士嘅問題，正當全民開始淡忘事件嘅時候，又搞出個自治實體之委任官員涉嫌瀆職貪污，涉及金額約六百萬。但喺睇番傳媒今次似乎已經冇咁大反應，各主要媒體只報導了一兩天就了咗件事。當然論大單論震撼，走資司長呢單可謂前無古人，至於後有冇來者，呢幾年都應該比較難，因為小城之大型工程都相繼停工，外資大鱷都話唔夠錢，要貪都冇咁多你貪，所以“燒毀腦“呢單案都喺小兒科，媒體同庶民都唔放在眼內。但喺官府一再爆出呢類醜聞，不得不令庶民擔心官場內大有大貪小有小貪的習性。當初走資司長一案被揭發以來，知縣表明喺個別事件，叫大家相信公僕團隊，呢D當然喺政治詞語，目的只不過喺解決政治危機，免得官府受到更大震盪，但事實知縣亦心知肚明，官場內的貪腐情況十分嚴重。不過經歷走資司長一案，大家有所收斂而又未有實質證據，叫做不了了之咁解。可惜風聲一過，食開魚嘅貓自然頂唔順有魚都唔食，最終亦難逃被揭發的末路。原本八億同六百幾萬可謂差天共地根本冇得比，不過作為公僕貪污就唔喺咁講。唔理你貪咗幾多同你官位有幾高，作為庶民公僕為庶民服務，就算做一般街道清潔之公務人員私人收取小費作特別清潔，都喺利用庶民之信任下以權謀私，損害市民之利益及官府之聲譽，同金額大小關係不大