遷校背後（下）

圖片來源：澳門日報
學府遷校擴校仍存懸念之際，校長於記招表現直頭不堪入目，竟然會用婆仔式抓爛塊面般向外界展示其合理性。若然以校長所言校內環境如此擠迫，搞到咁嘅款校長好應該引咎辭職，好向一眾教職員同學生們有所交代。事關據校長所講兩年前已向官府提出另覓新地再建校園，不過到今天才成事。但係原本學校營運理念與發展，應該早就有所規劃，而並唔係好似賭場賭檯咁，多人嚟玩就開到一街都係，少人玩就摺埋佢。況且，學校人多人少，都係可以控制嘅，入學學額有所限制下，就算再多學生想入學，都要從學額限制的競爭中，交出好成績來爭取一個學位。另外，學校本身若希望擴大收生，早就應該有一個完善規劃，例如十年後要收生一萬，五年後就應該著手興建可以容納一萬學生的設施，否則規劃就要改變，呢Ｄ咁簡單嘅規劃，就連一般夫婦都會為未來下一代作出買屋或換屋的決定，但係作為大學竟然冇計劃到咁嘅地步，校長係唔係應該辭職以謝天下呢？再者學校一直拋出以國際知名學府予大家作參考，什麼哈佛牛津如何如何，我地都係學人地咁做，所以要有咁大地方咁樣規劃。咁大家就想問下，如果學校面積或設備能夠有世界名校咁嘅規模，是否就可以成為世界名校呢？有六星級嘅校園規模同設備，係唔係就可以創造出世界一流之學府呢？答案當然唔係啦，否則周街都係哈佛同牛津劍橋啦，使乜咁辛苦去到老遠考試同埋俾咁貴學費呢？所以好明顯根本就係官府政策主導，要擴校遷校都並非學府本身需要，只不過官府用學府嚟過橋咁解。

遷校背後（上）

圖片來源：澳門日報
小城終於獲京官首肯，蓮花福地得以向外擴張，以租借形式額外獲得超過一平方公里的土地，用作興建小城一級學府的新校園。當天由知縣帶領官府領導、連同學府校長等人出席新聞發佈會，向外界發佈這個消息。獲此額外厚禮，相信小城無不歡迎，同時能夠加速與省城的融合，對小城未來發展將更大得益。只是，一直被外界質疑原校址的用途如何處置，記招過程中官府一直迴避，只表明原校址不會改變用途，仍然會用作教學之用。
　觀乎記招過程，校長從發言開始，一直強調學府地方太細，未能提供足夠宿位予海外學生寄宿，只能在附近租借私人住宅。另外課室不足令同學們沒有足夠學習空間，連同教學員工都因為沒有足夠地方，來訪者只能在教員室內站著與教員對話。貴為最高學府校長，講到間學校同難民營差唔多，佢本人究竟知唔知自己係度做緊乜？究竟係向外界加強今次擴校之合法性，定係同學校倒米，向全世界外地學子講「我地呢間學校只比難民營好少少，就係有冷氣」咁話？本來為官府政策護航係無可厚非，但係都唔使咁肉酸硬係要話到自己間學校，好似鄰埠籠屋咁大家都係用緊板間房。而且貴為高等學府校長，係唔係應該要有番一D學者風範，科學理據去向外界更加清晰地交代事件的因由，而唔係不斷抹黑自己校園空間來達致合理化之目的。事實上就算空間如何不足，大學各師生一路走來，都繼續努力教學與學習，空間的大小並不直接影響其教學水平，況且大學更不像隔離埠之正生書院情況咁惡劣，想學校水平更上一層樓，加強改善教學方式將會更為有效。

點樣保護兒童？（下）

圖片來源：新浪網

鄰埠世紀爭產官司案，一直吸引各大小傳媒瘋狂追擊，當中除咗因為涉及整個上市皇國之利益之外，更主要係因為無厘頭殺出一個除咗幫人睇風水之外，仲會幫人按摩之所謂風水師，直言與死者早就超越一般人際關係，仲手執另一與其家人所持不同內容之遺囑，呢位當事人出現之後經已引發多方忖測此人與死者之間的關係。近日當事人正式上庭作供，自爆其風水佈局同埋燒銀紙都屬於「兩公婆間遊戲」，又不斷抽死人之水，說死者拜神求見證兩人關係，繼而又推諉認自己並不懂基本風水同埋唔識睇羅庚，總之不停地在法庭上營造曾與死者有不尋常關係，以證明其手持遺囑之真確性，但亦同時向外界證實其本人之人格，總之每晚的新聞報導直頭好睇過連續劇。就我們所認知新聞報導必然是合家歡的時段播出，若按早國向外界宣稱強制安裝「綠霸」，乃對網上低俗訊息的打擊，保護兒童不被低俗訊息所污染，似乎呢段新聞更應該禁止報導，事關當事人的不擇手段過程全公開，而且更加毫無廉恥地向世人表明佢根本有心乘人之危。若繼續報導落去就算官司邊個贏輸，都可能會破壞青少年之道德價值觀，而每天報導當事人的回答，簡直令人有想死之衝動，唔係想自殺而係想佢死。當然呢單新聞本身亦有唔少警世作用，就係叫人帶眼識人啦，尤其一眾有心準備出外滾之男男女女，咪以為咁簡單就有飛來艷福，加上而家人人都利字當頭，對得你咁好自然會向你攞返咁上下嘢，總之大家好自為之，咁大個人唔使搵「綠霸」幫你過濾啦！

點樣保護兒童？（上）

祖國下月規定所有國內組裝或發售之個人電腦，需預先安裝國產「綠霸」過濾軟件，以圖保護未成年人士之電腦用戶，避免誤闖「色情網站」等有害內容。此舉乃新一波國內反「低俗」網絡運動的措施，官方強調旨在保護兒童免受不良訊息污染，而軟件生產商則稱成人可免受規範，即可選擇不安裝。但係自從五月中官方公佈通知以來，唔少國內外用戶、專家及發燒友都指出，該軟件存在唔少缺陷，最大鑊就梗係裝咗上部電腦之後，係唔可以拆走，或者應該叫做拆極都唔走，令到唔少用戶覺得十分唔方便。而其內部缺陷在於主打的過濾色情網站功能中，圖片認知率十分低而經常誤判國家主席及偉人之大頭照為色情圖片，直頭笑死國際IT界。當然任何過濾軟件都有一個最大的缺陷就係上網慢到出奇，而這個國產軟件亦唔例外，加上用電腦上得網多之人都清楚，要用詞彙去過濾不良訊息基本上唔可能，有心搵就點都搵倒。不過最好笑者，乃學生用的版本原來係容許用戶將軟件關閉，更令部分媒體質疑強制安裝軟件背後之意圖。事實上唔少報告都指出，該軟件存在唔少安全漏洞，足以讓網絡黑客盜取用戶的私隱訊息或安裝電腦病毒。不過咁都未算大鑊，最大鑊其實係被一間海外軟件公司指「綠霸」抄襲其用戶介面及超連結，就連更新時都要走訪該公司的網站，該公司已計劃提出訴訟。最後連花旗國之華裔商務部長亦向當局敦促撤消強制安裝之政策，同時不排除向世貿投訴，而事實上該政策被傳招標過程僅以八日完成，而價格卻高達四千萬元，內裏引發多方揣測。而且除卻視窗版本之外，暫未發現其他系統之版本出現。不過最後向大家交代一下，該公司之主網頁已進入系統提升的維護狀態達數日之久，大家可以唔上去搵料。

環球笑料的無冕選舉（下）

圖片來源：時新網
今次「吹水」咁驚見人（事實上除咗宣佈參選當日的記招之外，遞表當日竟然搵幾個G4圍住唔俾人埋身，連記者都一樣），除咗一直以嚟「吹水」都唔係好適應面對公眾傳媒之外，另外亦因為記招當天被混水摸魚人士偷襲成功，再加網上反對民意強烈，連同發生有人於鄰埠登報公開反對佢本人登位，面對眾多反對壓力更加嚇窒「吹水」唔識得點樣反應好，結果好明顯「吹水」根本未有足夠準備參加「估領袖」遊戲。首先咁冇準備其實應該係佢本人太天真太傻，冇諗過自己民望咁差，另外亦估唔到佢老友做完呢十年之後竟然會有咁多人開咗開竅、會努力發聲爭取權益，而佢本人之最大皇牌就只不過係制度同埋個三百位鄉親。佢亦明白反壓之大當自己未有足夠支持時，倒不如龜至當選日當天，讓既成事實大家無奈接受之後可以逃過當選前的猛烈追擊。但係避得一時唔避得一世，如果佢真係有心做好小城領導人，應早有準備面對群眾，同時應該有更清晰的管治理念讓大眾知道佢本人將如何承擔小城之管理責任。不過今天除佢一人冇人敢出嚟同佢爭，其實對佢都好大壓力，因為佢好清楚只有佢一人面對所有嘢，群眾認受性不足加上本身並非如奧巴馬般能言善辯，未來的日子根本就唔好過。同時今次連阿爺之態度亦都唔清唔楚，更加令佢覺得自己孤軍上路，始終級數所限，阿爺對於新一代之培育未完成之際，轉眼已經要搵人接手新一任期，可以預期未來幾年小城仲有排煩，雖然大家都預期佢即將「高票」當選，但係咁是否代表佢本人有民意基礎可以帶領群眾面對未來的挑戰，難怪今次的無冕選戰被笑兒戲成為環球笑料一宗。

環球笑料的無冕選舉（上）

圖片來源：中新網

只有「吹水」一枝獨大的現實，終於變成事實。任何人講乜做乜，都改變唔到小城同「高麗參」官府冇乜分別，只容許幾百人維持固有得益者階層繼續掌管小城之各項利益分配。原本對於未來抱有希望的人，結果都只能眼白白睇住呢幾百人操控小城的未來，話晒小城都係與別不同，咁樣至叫做「河蟹」社會。不過話時話，過去十年小城都經歷咗唔少變化，雖然話小城官府幾百年來都冇乜民意，但係作為小城一份子，見證近年小城庶民追求民主民生、為小城未來而發聲的行動每日趨增，數千過萬人的示威遊行，原來最後都唔及三百位特權階級咁有力而且比例咁懸殊。
　其實早於起跑前的「估領袖」遊戲中，「吹水」一早就被視為上盤大熱，即係估中都冇肉食。但係總有包頂頸之士搏大霧，以為會有一個半個可以出嚟夾份做下「騷」，相信佢本人都係咁諗，希望有多個人出嚟夾下計，好等自己可以贏得得體D，冇而家咁肉酸。不過可惜事與願違，竟然連做場戲嘅對手都搵唔倒，呢樣嘢足以顯示「吹水」人緣唔太好，而且政治觸覺同手腕都不足。事關若果佢本人早就希望執掌小城最高權力，應該早就判斷到今天的情況，而且準備好無間道的競爭者以完成大「騷」，令自己之獲選更有認受性。可惜正如早幾期本欄所指，「吹水」的智囊水平之低，真係仲差過鄰埠嘅經理人公司，而且仲好學唔學，學咗「淫照藝人」出席記招之態度，即係上咗台自己講完就走人，大家冇機會發問，咁佢不如發張新聞稿就算啦，駛鬼Call晒人地出嚟幫你影相又浪費時間同埋交通？

趁你病攞你命（下）

圖片來源：澳門日報
官府民望沉底的狀態持續好一段時間，大家都趁官府病就攞佢命，全世界都對小城上下其手，都唔使扮盜墓者羅拉只需混水摸魚。尋寶遊戲開始以嚟，最大冒險家除咗係花旗賭王之外，竟然第一個以身犯險嘅係走資司長，觀其貪大洗大之背景，佢嘅原動力好明顯係小城今天最值錢之地皮也，原因係乜大家都明白，但係正正因為地皮最值錢，竟然亦係小城官府監管最混亂、最冇規劃、最受人垢弊嘅政策之一。多年來議事堂內代議士不斷質疑官府究竟點樣管理土地，被海外大鱷炒家插旗之後，一向見識少嘅庶民，其實到今日都仲未清楚發生緊乜嘢事。但係作為管理者自然好清楚小城地皮會有幾大作用，同埋點樣可以利用法律之漏洞去取得個人最大的利益，司長之所以玩走資就係其中一個代表。但係點解咁容易就可以比人偷到雞，莫過於小城法例之滯後。時至今日小城仲沿用緊一百幾十年前之咸豐法例，其實就係方便各方牛鬼蛇神出術之最佳途徑，當中除咗造就海外大鱷之外，仲有負責把關之相關官員，另外就梗係業界最清楚有乜窿罅可以捐。咁大家就會奇怪何解時至今日，點解有關當局都未能修正大家都睇到嘅漏洞？因為當全世界都睇到嘅時候，佢地都唔肯改嘅原因其實只得一個，就係佢地至係最大嘅得益者。事關由政策制訂以至資源分配完全掌管喺呢班人手中，而且更操批與唔批之生殺大權，所以根本就唔駛寄望佢地會加快法律法規之修正或修改。而當全世界都睇倒小城法律之漏洞、又睇住各人都出盡方法去捐其法律罅嘅時候，只要有膽有力就梗係用盡辦法博矇，即係話不法分子將會陸續有嚟，大家真係要放長雙眼至得。

趁你病攞你命（上）

圖片來源：新聞局
官府無能加上弱勢管治，竟然被不法分子公然搶地，趁住官府忙於應付大小議員的各樣質詢、「傷選雙慶」等大日子忙個不停的時候，當住全城幾十萬人面前破擗石，偷偷在路環山嶺進行挖掘平整，企圖製造既定事實的假象，去達到霸佔原本屬於全城庶民的自然生態，同時亦把小城唯一僅有的自然島嶼破壞得體無完膚。自從報導出現之後，多名專業人士紛紛指摘監管機構管理不足。事實上近年小城各處大興土木，小城三島各處都可見到大大小小的工程在進行中，當中包括一向甚少被發展的路環島。只是相對上路環島人煙亦比較稀少，官府監察亦沒有其餘發展得火紅的兩島般嚴密。但是經常穿梭各島的重型開發機械卻正好成為犯罪分子的屏障，使一般庶民不易發覺其非法活動。其實近年小城的不動產業火速發展，加上官府的公共房屋政策，小城各處都發生過土地糾紛，非法的山體開發活動亦不只發生一次，而故有土地的不法爭奪亦同時存在，最明顯的就是由官府宣佈發展的時候，企圖以租住者的名義向官府索取賠償，另外亦有部分不法分子企圖以過去沙紙契的歷史問題混淆視聽，企圖以大家不大清楚的法律盲點，以為可以混水摸魚向全城庶民打荷包、掠奪公共資源。加上過往發生土地糾紛、或者係非法開山等事件中，被指違法人士一直以官迫民反，指責官府莫視沙紙契持有人的權益，而官府亦只用行政角度指出對方違犯法律，至今有誰被起訴或被定案一直都未有對外公佈，令人有錯覺官府的執法未有確切的法律理據，所以引來多個有組織的不法分子繼續挑戰官威。