數零你識唔識？（下）

圖片來源：澳門新聞局
【內部員工通知】獎券管理局代表冬叔今日宣佈，當局經過九個月時間的嚴格查核、科學論政、備受爭議嘅32,000,000.00獎金得獎者係合情合法合理地去中獎，當中完全搵唔到邊條法例可以告得入我哋獎券管理局，而局方根據高人指點，利用「麥提爽」提供之合理化煙幕橋段，已經喺發佈消息時將個得獎日期改早咗差唔多成年咁滯，夠晒俾老廉可以大大聲聲同人講「成年都冇被人投訴過，你叫我做乜好呀！」。另外，我哋用咗現今世上最高嘅LCD同PLASMA科技無邊無際咁去支持中獎幸運兒，淨係呢樣都值得佢哋中千四萬獎啦。況且各位同事要對我哋老頂有信心，佢本人經過多年浸淫亦學得一身好武功，喺光明頂上運用佢哋絕招乾坤大羅移，已經將全城視線移去候選人同中獎者關係之中，對局方進行攪珠與否根本已經冇人關心，所以根本唔會有人知道部攪珠機係一開始就係壞嘅，咁多年以嚟從來都冇運作過，亦都唔會有人知道佢哋見到嘅都係六四級電腦科技一滴汗都冇流過。所以局方可以向各位同事保證，一定唔會有人好似寶島班官咁傻，被人插兩嘢就話要度頸，又學人哋日本仔九十度鞠躬致歉，因為冇位俾佢哋入。仲有，小城呢度邊個唔係我哋睇口架！？要做獎券管理局嘅受惠機構就同我收聲唔好亂講！就算唔做受惠機構我都可以唔發個牌俾你等你冇得做。咁多瓣夾埋一齊邊個夠我哋揍？所以喺呢個局裡面各同事一定要口徑一致，千祈唔好穿崩！咁樣就可以保證社會河蟹、有風都無浪！

數零你識唔識？（上）

圖片來源：澳廣視
32,000,000.00看官有冇數錯過呢？當中嘅零唔係人人都數得出正確嘅數字，事關你見唔慣咁嘅數，又或者你見都未見過，所以唔好怪人哋只好怪自己。
　三千二百萬唔係今期六合彩，但係就好多人講緊中咗呢份錢嘅幸運兒，無他者因為大家都認為幸運兒，唔使經過攪珠過程就收到派彩，茶客直頭研究緊呢位幸運兒究竟有冇落過注去買張彩票，因為如果唔係咁大家又點解會見唔到攪珠過程呢？派彩機構早前出嚟向公眾解釋話佢哋都唔想，事關佢哋做過調查，發現好多人都唔適合中呢張彩票，佢哋竟然發現大部分人都有情緒問題、妄想症、精神病、發錢寒，當局擔心冇經驗又冇番咁上下身家之人，一下子俾佢哋中成三千幾萬獎，佢哋會頂唔順自己真係中咗獎，搞到精神錯亂，當局為免呢三千二百萬害咗無辜嘅人，自然要搵一個有中獎經驗家底又有番咁上下嘅人去中啦，事關若果冇番咁上下家底數慣咁多零，點頂得順先？結果又被佢哋搵到唯一一個合適嘅人中獎既然係咁唔通仲要去執行攪珠過程再使多幾個零！但係你班友就話唔玩攪珠就唔公平，人哋為你好都唔知，你班窮鬼根本就虛不受補，數零都未識數，俾你啃到盞累咗你咁又何必呢！況且今次獎金派發地點並唔喺小城，而係喺京城，各位識唔識唱京腔？如果各位唔識京腔又點樣上京呢？上到京連問路都唔識又點去領獎呢？再者今次領獎其實係要用一批好高科技嘅電子儀器去核實得獎者嘅身份，如果你連高科技都搞唔掂，咁點樣可以去證實你有資格領呢份獎先？事關大拿拿三千幾萬，應該會有好多人想博懵去領獎，但係大家唔知道咁樣其實係會害咗佢哋（有辦大家睇得獎者領咗獎即刻失蹤到而家）。所以大家都係唔好再嘈啦，要明白當局嘅苦心！

砌生豬肉（下）

圖片來源：蘋果日報

近期熱炒當然就係官府又玩唔使開標，判咗三千二百萬合同俾某間公司搞十年展呢單嘢。過往官府同類事件根本係經常發生，仲要係大大聲聲講係依法批給根本就見慣不怪。但今次又係衰在受益公司負責人竟然係剛剛先至幫未來知縣搞完競選獨腳戲，唔被人插到飛起至奇。雖則受益公司一直做開官府大騷，論經驗同實力外界一般公司根本唔可能同佢競爭，但係官府一句因為佢嘅經驗夠又有實力就咁就批咗，唯一可以講嘅係官府批給部門實在太懶。事關據熟悉行內人士透露，該公司一向以主理官府大騷之實力出名，就算公開招標以其實力亦無懼競爭，有可能批給部門根本就諗住唔使煩直接批給就算，反正都唔會有第二間公司會投，但係今次同估領袖遊戲一樣，就係欠缺咗一場儀式同埋展覽嘅內容。但係單嘢最騎呢乃係由鄰埠之生果報所爆出嚟，當然話明係爆出嚟就梗係唔慌會寫好唱好，不過為求增加力度求其搵個二百萬嘅數去做對比就唔應該。事關所謂的二百萬同實使一千萬就真係差好遠，係六合彩頭獎同二獎嘅分別。再講鄰埠同小城係兩個地區大家點做根本就唔可以比，唔一定要做到你咁寒酸，況且鄰埠對小城近年比對方更豪一直耿耿於懷，只要有位入自然插你一刀。加上生果報出名之報道手法係起晒人物嘅底，可惜今次都漏咗其中一個背景，就係該公司主政人物曾經早年得過專業領域嘅荷蘭水蓋，不過呢種漏自然係有心遺漏，要砌你唔通仲幫你加分？所以砌生豬肉就係有齊物料炒作後，再刻意收起部分訊息先至係高一班嘅砌，小城代表之所謂「喉舌」根本未入流。

砌生豬肉（上）

圖片來源：澳門日報

面對雙慶及傷損年，坊間奇形怪招層出不窮。最近於垃圾會激烈討論的「白衣天使薪俸」一役，到表決的臨門一腳，罕有地被主席取消表決壓後再審。原因之一乃代議士中一位對官府運作極為熟悉的土生代議士，反對加人工法案中部分人士無端端比第一次官府提出的加人工方案更低。另外亦有代議士對於部分條文中的可追溯與否而引申出的合約公平原則產生重大分歧，主席自然要壓後待大家冷靜後再進行討論表決，主席更在結束前向在場旁聽的白衣天使幽了一默說：「如果通過唔到，你哋就冇人工加」。翌日某大媒體即刻以「土生代議士反對白衣天使加人工」為題，作為議會報道之頭條新聞。報道中並沒有提及土生代議士何以反對加人工法內的附件，其他都係引用另一位議員同主席之說話。土生代議士自然不甘被白白「砌生豬肉」，即時發聲明指「喉舌」斷章取義，言明自身反對加人工法的範圍及理據。事關當天小城「公仔箱」亦有報道該議事堂新聞片段，「公仔箱」以報道多位議員對於條文中的不可追溯出現之不公平而反對令到討論要壓後為重心，報道取向完全一百八十度唔一樣。「喉舌」呢舊「生豬肉」可謂size唔細，事關終於表決通過後「喉舌」又出招，以「天使會指土生代議士唔尊重前線」繼續追擊土生代議士，又出現整段引述他人言論的以偏概全作結。當然我哋唔清楚佢兩家有乜恩怨，但係砌咁大件生豬肉俾人就一啲都唔似係有社會責任之企業應有之道，更加打擊媒體的公信力。

因乜放棄強制隔離？（下）

估官府因乜解究決定放棄強制隔離可以有幾大原因，第一可能因為負責開之主要官員，走咗去選知縣而要現任知縣做埋佢嗰份，而現任知縣咁多嘢做又唔具備專業知識，淨係睇佢早排一日走幾場剪綵就知佢有幾忙啦，結果冇時間又覺得煩就乜都跟晒鄰埠就算。再者官府心諗，眼見鄰埠由最初嚴陣以待見一個捉一個，有事冇事都隔離咗先講，到最後都係失守長城，連死亡個案都出埋，以小城咁嘅醫療系統根本就冇得同鄰埠比，唯有放棄慳番啲資源好過。最後加埋流感活躍期過咗但係又進入暑假人流的高峰期，要繼續維持隔離措施可能要徵用晒小城所有酒店都未定，再加上到今日官府都冇表示，若果係全球最大之字花檔內發生人傳人感染個案，會否封鎖所有字花枱及酒店嚟確保疫情唔會蔓延，即係佢負擔唔起當日嘅損失，亦負擔唔起對小城龍頭產業之打擊也。官府今天已經冇心機抗疫另一個最大象徵，就係公仔箱之宣傳片。話說某日喺茶餐廳食食下飯，老闆睇完港聞自然要關心埋本地消息啦，點知轉完台又播番剛剛播完鄰埠官府呼籲預防流感大流行嘅宣傳片，正想投訴老闆按錯掣之時，駭然發現宣傳片尾竟打出衛生當局借用鄰埠官方宣傳片之字幕。話晒都係官府嘢莫非衛生當局窮到自己拍番條片都冇錢？抑或小城冇人識拍嘢？定係乜都唔使做照搬鄰埠做法就得？如果係咁使乜借人條片呢？索性將小城公仔台摺埋，向鄰埠買時間播小城新聞就仲加慳啦。豪使三千幾萬搞十年展就得，拍條宣傳片俾自己人就唔肯，呢個究竟係乜嘢官府？

因乜放棄強制隔離？（上）

自從「甲豬感」殺到埋身之後，小城之防衛機制終於棄守長城，改為主打發病後之診治及護理，惹唔惹到結果只靠庶民自己執生，最後導致庶民防衛意識低下。今日小城已經取消咗強制隔離措施，亦都唔會再照顧確認病患但未有發病之密切接觸者，要自己家居隔離搞掂自行求診。大家梗係唔明官府用乜嘢理據去決定唔再係實行強制隔離政策，係因為死亡率唔高定係鄰近地區都咁做，所以大家都咁做？抑或時間耐咗戰線拉長，最終覺得花費太大所以決定取消守城行動？話晒世衛都定咗佢係六星級頂晒錶喎！咁都值得官府去博一鋪放棄強制隔離？咁多理由話分唔到邊個係外地傳入同本地個案，係根本唔夠資源繼續做落去，定係主事人覺得煩加上鄰埠都係咁做，所以佢又多咗個藉口唔使做？當然取消強制隔離都係因為鄰近周邊地區同樣咁做，而且「甲豬感」死亡率唔高冇咁大殺傷力，所以可以唔使咁大陣仗。官府唯一係若有第一個死亡個案，先至再會有新措施出台。小城咁細要對抗外來病毒入侵其實十分容易，要追縱來源所需資源及時間相對於鄰近周邊城市，等於兩房單位與花園洋房的保安規模之差距，再加上庶民大部分都係「河蟹」族，絕對配合官府政策指導要佢哋做乜都得，所以更加唔會花費監察當局太多人力物力。就咁就放棄咗強制隔離的防衛機會，是否太過求其及有樣學樣？既然現今全球疫苗生產仍未到位，有類似有效之特效藥又唔夠貨，咁究竟放棄強制隔離是否又係明智之舉呢？官府咁樣處理防疫似乎係話咗俾大家聽唔使擔心，病你唔死係有得醫，結果同普通感冒一樣大家都會忽視防疫衛生之重要性。

麻生與吹水（下）

小城自古開始就係固有利益集團瓜分利益之地，從開埠歷史起計古來就是外力入侵、梟雄爭逐之地，為的就是爭奪小城話事權之後，可再次奪得控制之後的利益。而庶民幾百年都只不過係習慣屈服於權貴以保安享生活，咁樣就係小城多年以嚟「河蟹」社會的形成。事實上小城除咗四十多年前的一次激烈反抗之外，數十年來都未發生過乜嘢民暴事件，然而過去幾年官府為咗發展小城所製造的利益分配不均，引發嘅示威抗爭亦係幾十年來首次。
　小城同太陽旗國最相似的地方，就係知縣即將換代之際，迎來的候任人選竟然同上任一樣，都係傳統利益的第二代繼承人。現在的麻生與吹水同樣係政治世家的後代，在政治協商同人脈關係上較一般人優勝，只是政治世家並不代表其個人擁有一定的管治能力同政治理念。一路以嚟唔理係傾生意定係傾政策，小城都流行著檯底拆掂佢嘅風氣，亦冇乜人反對呢種做法，結果種下今天社會資源集中於部分階層作出分配的惡果。無可否認吹水幾代生活於小城，要發表意見同建議，其他一般人唔容易作出批判，但係作為傳統家族後裔又有過多人脈關係要照顧，很難想像吹水能作出獨特而又有前瞻性的領導，充其量亦只可以由各方推動去形成一個較為可以接受的環境，即係話大家對佢都應該唔會有太大期望。情況同麻生一樣，上台咁耐大家都預咗佢冇乜大作為，但係正因為呢種妥協政治，結果令佢所謂揀選的內閣不斷爆出醜聞，成為即將下台的主要原因。在相同之背景之下吹水同麻生同樣係冇能力改變社會的現狀，只能在有限的妥協中令庶民唔好咁多嘢講，所以兩位都係充其量只可以叫做合同公務員，連政治人物都講唔上，結果係小城未來五或十年都唔會有乜改善。

麻生與吹水（上）

合成圖片
在一片冇癮聲中「估領袖」遊戲咁就曲終人散，唔單止反高潮，直情係鴉雀無聲，全世界都唔會有領袖選舉會好似小城咁，根本冇人關心。唯一有相類同嘅地區就係太陽旗國。點解咁講？大家問太陽旗國內唔係為咗爭議席爭到頭崩額裂咩？冇錯，太陽旗國作為亞洲大國而且百年沿襲西方議會制度，基本十分民主自由，但係點樣選出首相就同一般國民完全無關，國民係選咗一個黨之後個黨搵個人出嚟做首相領導國家就得，呢樣嘢同花旗國嘅玩法又好唔同，事關花旗國係搵咗個候選人代表黨去選總統，然之後國民揀邊個黨咁解，所以太陽旗國首相同吹水一樣，都係屬於小圈子選舉的典範，個人代表性根本唔高，只差咗吹水連黨支持嘅背景都冇，呢樣與佢無關，係祖國嘅問題。雖然話大家都係小圈子選出嚟，但係佢哋亦代表咗部分人企出嚟話事。事關太陽旗國同小城一樣屬於金權政治，所謂政治人物都係由一班大財團及既得利益階層，各自支持政黨或人物出去參政，以達至維持固有利益及擴大影響力的慾望遊戲。既然喺咁樣，各政治人物自然喺勢力範圍內爭取最大資源去擴大實力，同時各政客之間又會因為利益分配要互相協調。既然各大政客都其實係代表一個財閥集團，點講都好，政客點都唔可以喺大庭廣眾傾利益分配嘅嘢，結果水面之下好多時除咗係利益分配同條件交易之外，連政策取捨都變成交易條件之一。久而久之太陽旗國的國家政策全都決定於赤漀的高級俱樂部，或都喺偏遠隱蔽山中的高級溫泉酒店內，而並非國會的議事堂，從而引出太陽旗國的「赤坂政治」這個名詞。