當綿羊變成單車（上）

自從衙門推出道路交通法典後開左多場講解會，公僕自然要上堂，庶民更加不斷追問何謂犯法而廣範收集官府見解，都係為左睇下有冇彎轉而唔駛被罰咁多。吾等自出娘胎就被教導人包鐵與鐵包人教訓未有考取鐵馬執照，但都為了家庭方便而執番個“四個蹗“牌。無可否認當今小城車多個人，要出入方便當然係綿羊好過市虎啦。但係好奇怪我學交通時都同班考鐵馬學生一起授教，考牌亦同樣推一部車仔，何解今天的綿羊變左做市虎？莫非今天考交通會分開唔同內容？相信都冇乜可能也。

但係近牌就發現大家好似唔係好識定唔係好理，以前踩單車不守法都比差人捉住叫上差館，今天不但綿羊變成單車大白天逆線對住你車頭，仲比本人目到有執法者於零晨時份乘路人不多直接逆駛趕去簽簿，既然逆駛都得大白天直接駛上到行人道上簽簿、或者就咁停係路邊車位旁走去簽簿都唔係乜野大不了之事，真係懷疑小城究竟有冇交通法或人。但當大家都習慣衙差係咁做都冇計時，自然有更多人搏係睇唔倒，一於由星光踩上醫院後街或成條炮兵斜巷都可以直上，除左搏你睇唔倒衙差又冇，反正綿羊快過你影相過左海就神仙。買綿羊早已變成方便自己而阻住人地之用途，但官府因為唔想阻住庶民買車之少少願望而繼續放任增長，如果唔係又點會起極都唔夠車位比綿羊用呢？只要重溫一下近年之增長比例就會發現綿羊之增長比四個蹗大出幾倍，除左平過人快過人之外，仲可以唔駛理交通規則一未靠搏，真係想問下大家係因為太窮冇錢入油，定係小城太大每次都要搞到咁趕呢？相信就算到左十一都未必會有所改善，因為積習難改而執法力弱，大家都會繼續搏落去方便自己。

耆英集中營街坊（下）

圖片來源：蘋果日報街坊對話：“我買呢度山卡啦咁遠都係為左想住得舒服D同空氣好D，貪佢附近乜都冇、人口唔密車都唔多部，當初買時用作別墅，鄰居都係有一定級數人馬，唔駛擔心隔離住緊乜野人同埋治安差，而家小城交通同空氣質素都咁差，呢度係唯一可以住到退休老死o既地方架啦！”

“我就唔同啦，我買呢度係投資放租，而家有一批洋人係小城打工，佢地好鍾意住到冇雷公咁遠每日開車番工放工，遠離工作場所，又有綠化帶又夠靜，佢地話咁先似番係鄉下時o既生活咁話，得閒放狗唔怕被車車親，要浪漫又可以夜晚行沙灘！”

“咁點解會揀呢度地舖開耆英集中營呃？”

“從投資角度睇呢度D商舖邊會有生意丫！所以一直空置咁耐，終於等到今日小城經濟起飛加上人口老化，部份小城庶民有能力為自己年老後安排退休生活，至會有人睇中呢個地方開耆英集中營。不過住係度之業主們就要面對半夜三更擔架Benz黎接人走，放狗又驚嚇親人，對我班洋人客都可能有影響。”

另一批街坊對話：“我地買呢度係貪佢夠方便，附近有學校同醫院，超市又唔遠，一對腳就可以去晒小城主要地點，最好就係有埋停車場係隔離，牛肉乾都少過人。”“我買呢度投資除左你正話講o既條件之外，仲有東望洋燈塔景觀，已經唔係咁多地方可以睇倒架啦，靜中帶旺非常之有升值潛力。”

“點解搵咁多人迫係個商場度做耆英集中營呢？”

“ 耆英集中營選址要地方夠大環境夠靜，商場咁耐都冇出租過就係呢頭唔多人出入，附近又係醫院同停車場，萬一有事都容易搶救。但係二樓商場根本就唔係比人住o既地方，如果出入都要抬上抬落就大件事，況且空氣流通非常重要，佢地要改晒所有玻璃做窗，同埋做好獨立間隔及衛生設備，如果批左之後佢地做得唔好就真係問題大啦。”

“而家成日比人地話我地自私，佢地試下自已辛苦供番黎間屋突然間係樓下開間咁o既耆英集中營丫！我地買樓時都只諗佢會開商場，一早講明就未必考慮買呢度啦！”

耆英集中營選址（上）

圖片來源：小鳳情長
小城耆英集中營最近又炒鬧了幾次，當中兩間民營企業準備係民居地下及商場開檔，被樓上街坊鬧到九彩，開完大會上官府，動員所有勢力阻止屋企樓下有間耆英集中營。兩間所選位置與小城阿公設立的方式有很大不同，當中以選址方式分別最大。阿公開設的地方絕大部份為整體建築，即係一幢過獨立於其他建築物，唔會有樓上樓下街坊望住長者做早操或者食飯，衛生環境及設備都比較完善。而今次民間經營呢兩間集中營選址都非常唔同，一間係離島對住海灘之優雅環境下的屋苑，用地舖改建為集中營，出手可謂十分闊綽，相信將來如果開檔成功一定係一間五星級集中營，但係附近鬼影都冇隻，除非將來附設手術室自已搞掂，否則入住之耆英出事就唔知救唔救得切。相反另一間就位於鬧城的正中心，樓高廿多層的大廈二樓商場，耆英出入唔方便不特止，商場位置冇窗冇門，要改建開窗就好容易發生街坊所講有爆發病毒傳播的風險，而入住之耆英亦冇晒私隱望住對面住家睇緊邊套電視劇，但係大廈就貼近小城一間設備齊全的醫館，一出事就可直達ICU急救。

以民營企業之經營心態，當然係利之所在，上述兩間集中營之選址可反影出經營方向及規模都有很大差別，即係target唔同。細心者可以發現一間係五星級安享晚年之療養院，一間係籠屋集中營志在救命快過人。吾等老矣若要入住就視乎手頭淨番幾多至有資格揀邊間，而小城的人壽燕梳發展配合鄰埠醫療集團的進駐，就決定左大家以後可以入住邊間同埋有幾多人服待閣下最後幾年。

周官放火

圖片來源：www5.flickr.com進入今年，小城就新開了兩戶字花檔。兩檔字號同為父子家族而引入洋人一同經營的生意。被封龍頭大佬之的土王帝家族，經歷近年市場開放及祖國同胞崇洋心態等連串政策影響，面對競爭而引入環球經營概念亦不能避免。可惜幾十年之積集難改，做慣王帝自然改不了運用影響力使工作更順利。為了更早爭奪市場份額及利潤，年初開幕之龍頭主力“獎杯形字花檔”，原本客棧部份仍未完工，但為了方便客仔新正頭發橫財而急急開門做生意。另一檔由其子掌舵之“賭神字花檔”早前開張大吉，內部設備亦同樣不能完全埋尾。吾等至今都不敢入內參觀學習，因小人膽小兼命小，擔心一旦發生工業意外工字鐵直插字花檯就小命堪虞。

但又奇怪，一向衙門工程部對於三行之執法非常嚴格，閣下若新開雲吞麵檔亦有多個部門巡查設備如走火安全、對附近環境影響、食物衛生以至通渠去水都查足半年以上，稍有不合即要重新入稟申請再排期約見驗收，即係話冇一年半載都唔駛旨意可以做生意。但係若果開字花檔就一D都唔同，花旗賭王最名就係以火箭速度起好只需一年，另加批牌批地一年時間，星球客棧起好之後先發現斜左，仲有當然就係先前講呢間最經典o既“獎杯形字花檔”係開左檔都仲未起完。難怪代議士們不時又拎出黎口頭質詢下工程部，以乜野標準審批及驗收工程，何解新建字花檔可以咁亂黎？若果局部開放唔影響工程進度，做乜其他大廈唔可以做好地舖後即刻開門做生意，樓上住宅慢慢起呢？所以佢地自已工程部批出舊“蛋”又有乜法子唔要識輕功至入倒去丫！

計時炸彈

圖片來源：澳門日報
小城最近又再鬧紗紙契問題，問題由來已久，歷史可追溯幾代祠堂以至滿清最後皇朝，若果要動用考古學家作證，就要請埋ＣＳＩ鑑證科鑑證筆蹟，睇下有冇作假做幣。司長一句
了結：“暫時唔會處理呢單野！”。佢呢句究竟係佢任期內唔解決定係以後都唔解決呢？相信佢唔敢講以後都唔解決，但咁就要問下有冇時間表先？問題當然不能以簡單行政手段及一刀切方式解決，但紗紙契牽引著龐大的地產及庶民利益，司長簡單地一句唔處理就為小城埋下一個巨大的計時炸彈。

炸彈其實並不直接影響庶民生計之重大利益，無可能全小城都希望搬去離島居住，除左極之唔方便之外，更冇公共設施維護庶民之需要。但面對火紅之小城地產業，加上離島現今條件正正乎合老外洋人要求之生活條件，紗紙契之鬧大無疑係衙門預料唔倒之政策下產物。佢地勢估唔倒原來開放賣賭會影響小城這個唯一城市之綠化功能。利字當頭今時今日個個都想搵番筆自然無可厚非，但小城所有的綠化帶都被市場發展而改變甚或消滅，咁何來可持續發展的城市規劃？可能官府根本冇諗過小城要有所規劃，反正做多兩年又或者搵夠退休先講。當年西洋人不承認此等文物契約才令小城保留至今一大部份的綠色地區，可供市民假日呼吸一下清新空氣。若當今官府不好好處理紗紙契問題，再被人利用大搞發展經濟，不單止破壞小城長遠的生活環境，對小城生態發展造成永久性傷害，最終只會把小城打造為北美賭城翻版，完全沙漠化！令庶民可享受唯一的綠化區都被剝奪，到時所有庶民都要搬回祖國鄉下每天花三小時回來上下班，才可保身心健康。

澳門五一相關發表

旁觀者的正面介入──從大學生的“五．一”論述談起---林玉鳳
槍聲蓋不了對城市發展的詰問---林玉鳳
鳴槍示警的通識---林玉鳳
遊行問---林玉鳳
當訴求變成一條新馬路---林玉鳳
澳門「五．一」遊行淺見（一）---太皮（二）（三）（四）（五）
香港電台「鏗鏘集」一石激起千層浪
澳門人，說出你的心事---寂然
不遊行者的五一心事---寂然
現在，我們應該幫誰---寂然
那五下槍聲之後……---煲稀小脂
善良的人，別向弱者投石---煲稀小脂
從歪理到己所不欲 ---煲稀小脂
《風火台》談五一遊行 ---YouTube
聽見衆人的聲音：關於澳門“五一”的紀錄 ---李爾‧在此

業餘官僚（五一事件之六）完

圖片來源：新浪網游走網絡上發現，五一後衙門、社團以至執法者都變成了笑話，否則何解可以由一個茂里引發出更多茂里？有人質疑衙門的管治能力已蕩然無存。亦有人謂若現屆衙門要腳痛落台，恐怕地下勢力再次抬頭而影響小城之安定繁榮及社會和諧。綜合這個月來的事態發展，在各方壓力及傳媒監察下（正式講只有電子傳媒稍有監察）死撐的官衙都要默認流彈傷及平民，至於阿婆有沒有被推倒跌地就根本不是問題所在，只不過被衙門用作擋箭牌的最佳借口而已。

寫到這裡連自己都覺得非常之悶！當然並非討論關於五一出現的問題而覺得悶，而是對當局的處事手法到達厭惡的地步而悶，一連串的風波體驗了衙門相關部門的內部管理不足及官僚思維仍停留於上世紀六十年代，原本五一事件是想寫四篇就轉話題之際，突然又跑出新聞官被投訴入電視台指導編輯干預新聞自由。澳門傳媒工作者協會網頁

都就快六一啦，莫非各位要為兒童節提供公民教育節目而增加新聞？唔好以為最敏感時期已經過去就可以隻手遮天，雖然同是公僕你閣下之級數稍高，但都唔可以違反職能中的專業守則，就算你係業餘官僚管轄專業公營機構，都應該有最起碼之政治智慧，而唔係做埋晒Ｄ無謂野幫唔倒大老闆之餘，更搞到佢可能又一次要出面為你班友仔表態及解畫，再損耗已在下跌中的民望，係咪十分之吃力而不討好呢？在小城這個自我審查率極高之地方，為何仲要咁唔放心？試問為左小城之和諧穩定，有邊個唔支持大老闆？似乎這個衙門部門才是傷害小城之和諧穩定。吾等已不希望再有唔識死之官府中人亂搞小動作，要各位關心小城之叔伯父佬再次感到羞家，為何我們會有這樣的“父母官”？

小城「中產」（五一事件之五）

五一後有評論指小城並未有所謂中產人士，頂多只有中間人士。中產被界定有一定的學識水平及資產而不會被社會洪流左右其獨立思想。要說的是中產一詞原只有鄰埠使用，小城的所謂中產亦只為鄰埠媒體的過埠能力影響，以至大家於概念上認為小城存在中產或中產未合格，其實這只不過是鄰埠以自己的價值觀套在庶民上的一種定位。

我們無須爭認自己是否中產或者是否合格。從來小城就算大家差距多大，各位都能在一般公眾場合親身與一些所謂上流社會或名人見面，皆因小城實在小，只要留在小城就要在公眾場合面對群眾，這麼細小的地方是不需要出動望遠鏡才可接觸名人，所以小城內的所謂明星與其說是明星，不如說是有知名度的藝人。因為明星名人上流人士不可以與你距離太近，但我們每天接觸的本地藝人不是在電視台或電台門口，而是吃早餐時的茶餐廳、賣汽水的便利店、或晚間蒲點的酒吧，更甚者可能與你爭一同個車位。當他與你的距離越近，你最多只能把他或她當成朋友而不會有追星的衝動。就算閣下真是習慣只去皇朝區酒吧與三五知己暢飲，亦不能脫離要走路過關買書的命運，游走珠三角已是大部份庶民的指定動作，管你是水客、作家、公務員、老闆或管理層。鄰埠的中產對小城指指點點的同時，其實連黑沙環與黑沙灣都未分得出。鄰埠一直以小城作為自家後花園心態，當小城經濟有起色或稍為混亂時就以不俏的態度用主人身份為小城把脈。希望各位有志當小城所謂中產人士替小城把把脈，為大家洞悉問題或找出解決方案出一分力。