最大客仔的禮物（下）

小城唔夠電係字花檔造成，但在商言商又唔可以怪得佢地，冇番咁上下吸引力又點做生意先？要解決問題當然係要賣電者增加供應啦，但係小城一下子咁多超級建築，要增加供應亦唔係一朝一夕，所以係改善賣電供應之前，衙門叫庶民慳電以減少停電次數。雖然呢過都係方法之一，但係官府唔知有冇計過，其實佢地先係賣電者之最大客仔也。因為小城每支街燈同每個公園、天橋等公共建築之用電都係由官府找數。雖然有官府參與事次節能活動，但係都只係一陣間o既事，長遠黎講管家婆就叫大家唔好開咁勁冷氣，順手閂燈咁上下野。呢一招我阿媽就由細教到我大，毫無新意。其實要節能可以好簡單咁用一D天然能源好似太陽能咁，又唔駛增加賣電負荷又夠環保。尤其是街燈，吾等冇做統計小城有幾多支街燈，幾千支點都有掛？淨係將街燈轉晒用太陽能街燈就可以為小城每年慳番唔少電啦。俗語謂小數怕長計，我又唔信官府冇人知道有呢種產品或者係唔識計呢條數，連吾等市井之徒都知道此等太陽能燈能儲電六天，冇太陽亦可用備用電源。咁點解小城官府一支都冇入貨，淨係入於西洋訂貨之貴價藝術燈呢？除左枝藝術燈樣靚身裁正之外，梗係每年都要找番咁多度電比賣電者也！其實小城都有部份公共空間有環保節能設備如文化中心，佢地部電梯同走廊燈都係有人走過才會運作，平時都係備用狀態。所以官府在冇計時只有向庶民埋手叫你地慳電，佢係唔會做，唔係點樣保證專營者之利潤呢？仲借機搞什麼能源效益標簽意圖轉移視線，多此一舉仲擾民，正一冇野搵野黎做未開波都已經被業界插到一幢都冇。

小城唔夠電（上）

圖片來源：GDSE最近衙門宣揚節能運動，叫各大商號及庶民一齊閂燈五分鐘，搞到自由同胞以為連小城主打都冇電，差D去燒毀腦投訴旅行團冇小城夜景睇。回顧呢次活動參與者除了幾大字花檔同官府衙門大樓外，幾條橋就熄左部份只有裝飾功能之照明，庶民參與寥寥可數。呢次官府咁高調宣揚節能，係希望庶民慳電唔好咁浪費。事實上庶民比官府更清楚節能之重要性，皆因全部都要自已pay，而且呢期專營公司之燃油附費好似過山車時上時落，但都係升得快跌得慢，自然唔會亂用電。咁點解仲要叫庶民再用少D電呢？唯一解釋就係小城根本唔夠電。何解？只要閣下回顧呢幾個月之新聞紙，至少有幾日頭條都係話邊度邊度停電，仲要被批好似番左去七十年代的第三世界狀態。雖然話近年小城經濟好轉，庶民改善生活必然用多左電器同埋電，但都冇理由增加得咁多，莫非真係家中所有電器都二十四小時用緊？一D都唔記得閂？我相信幾浪費之屋企都唔會有人冇人都開住電視掛？唯一可能者就只有監控系統之閉路電視，而全城最大之閉路電視系統就梗係字花檔內之系統也。而小城之唔夠電亦都因為幾大字花檔鬥法所致。以往專營字花檔時期只有一兩檔字花會係門口招牌砌個光管牌，花費電力又不算太大。依家新開的幾檔唔只有門口光管牌，仲張成幢客棧用燈包起，慌死衛星太空站之太空人認唔倒佢地間字花檔，未來幾年仲有離島幾間世紀字花城陸續落成，若果專營電公司都仲係咁搞落去，到時庶民連電冰箱都可能要隔日先開一次，全體回鄉退隱接受定時供電之習慣。

十一大限（下）

圖片來源：Marvin Hui近期大熱話題總離不開十一大限，大家都搏官府不敢執法太嚴，梗係啦！分分鐘衙差自已每日都犯緊法，收工番屋企都要推番部私家綿羊入屋，有乜法子唔要彈性執法丫！但咁樣問題就更大，未到大限前已經每日比人鬧選擇性執法，咁到時睇心情執法就真係暴動都有份，皆因小城唔似鄰埠有咖啡仔或咖啡妹幫手，可以把民怨分散到另一個特定群體。每每牛肉乾都係由有炮係身之正規軍發出，佢地有特定社會地位自然唔會咁容易放你一馬啦！所以更加冇彎轉。但係識你或者係同袍就可以好彩唔抄，就更加被庶民睇唔起衙差，對小城已冇乜形像分之衙差就更加唔抵，因為以後你做乜都冇人撐你，唔統一執法就梗話你大細超，咁條例又搞黎做乜？可能庶民估緊呢條法例會好似“公共虧張”咁其實唔合法，上到法院都可能仲有得打都未定。

事實上，今天大街小巷都努力查找即將實行的新例之不足，企圖發現法律內的灰色地帶走棧。但查找歸查找，大部份車主依然未改變自己的駕駛集慣，動不動就隨處亂泊甚或直接驅車跑上行人道逆駛再來個360度掉頭泊位，當正自己係職業特工第二集之湯告魯斯。事實上小城綿羊位不足只不過統計數字問題，現實係每次回鄉時仍然發現上回被燒毀多部綿羊之位置仍然泊滿綿羊，但當你走進前方不足30米遠的停車場內一看，可以發現大部份之綿羊車位空空如也，數量足夠容納地面的非法泊位綿羊有多一倍，而該處每小時泊綿羊亦不過一蚊雞。莫非綿羊主人以為十一有特赦舊例牛肉乾唔駛找數，新例前就更加亂黎？

當綿羊變成單車（上）

自從衙門推出道路交通法典後開左多場講解會，公僕自然要上堂，庶民更加不斷追問何謂犯法而廣範收集官府見解，都係為左睇下有冇彎轉而唔駛被罰咁多。吾等自出娘胎就被教導人包鐵與鐵包人教訓未有考取鐵馬執照，但都為了家庭方便而執番個“四個蹗“牌。無可否認當今小城車多個人，要出入方便當然係綿羊好過市虎啦。但係好奇怪我學交通時都同班考鐵馬學生一起授教，考牌亦同樣推一部車仔，何解今天的綿羊變左做市虎？莫非今天考交通會分開唔同內容？相信都冇乜可能也。

但係近牌就發現大家好似唔係好識定唔係好理，以前踩單車不守法都比差人捉住叫上差館，今天不但綿羊變成單車大白天逆線對住你車頭，仲比本人目到有執法者於零晨時份乘路人不多直接逆駛趕去簽簿，既然逆駛都得大白天直接駛上到行人道上簽簿、或者就咁停係路邊車位旁走去簽簿都唔係乜野大不了之事，真係懷疑小城究竟有冇交通法或人。但當大家都習慣衙差係咁做都冇計時，自然有更多人搏係睇唔倒，一於由星光踩上醫院後街或成條炮兵斜巷都可以直上，除左搏你睇唔倒衙差又冇，反正綿羊快過你影相過左海就神仙。買綿羊早已變成方便自己而阻住人地之用途，但官府因為唔想阻住庶民買車之少少願望而繼續放任增長，如果唔係又點會起極都唔夠車位比綿羊用呢？只要重溫一下近年之增長比例就會發現綿羊之增長比四個蹗大出幾倍，除左平過人快過人之外，仲可以唔駛理交通規則一未靠搏，真係想問下大家係因為太窮冇錢入油，定係小城太大每次都要搞到咁趕呢？相信就算到左十一都未必會有所改善，因為積習難改而執法力弱，大家都會繼續搏落去方便自己。

耆英集中營街坊（下）

圖片來源：蘋果日報街坊對話：“我買呢度山卡啦咁遠都係為左想住得舒服D同空氣好D，貪佢附近乜都冇、人口唔密車都唔多部，當初買時用作別墅，鄰居都係有一定級數人馬，唔駛擔心隔離住緊乜野人同埋治安差，而家小城交通同空氣質素都咁差，呢度係唯一可以住到退休老死o既地方架啦！”

“我就唔同啦，我買呢度係投資放租，而家有一批洋人係小城打工，佢地好鍾意住到冇雷公咁遠每日開車番工放工，遠離工作場所，又有綠化帶又夠靜，佢地話咁先似番係鄉下時o既生活咁話，得閒放狗唔怕被車車親，要浪漫又可以夜晚行沙灘！”

“咁點解會揀呢度地舖開耆英集中營呃？”

“從投資角度睇呢度D商舖邊會有生意丫！所以一直空置咁耐，終於等到今日小城經濟起飛加上人口老化，部份小城庶民有能力為自己年老後安排退休生活，至會有人睇中呢個地方開耆英集中營。不過住係度之業主們就要面對半夜三更擔架Benz黎接人走，放狗又驚嚇親人，對我班洋人客都可能有影響。”

另一批街坊對話：“我地買呢度係貪佢夠方便，附近有學校同醫院，超市又唔遠，一對腳就可以去晒小城主要地點，最好就係有埋停車場係隔離，牛肉乾都少過人。”“我買呢度投資除左你正話講o既條件之外，仲有東望洋燈塔景觀，已經唔係咁多地方可以睇倒架啦，靜中帶旺非常之有升值潛力。”

“點解搵咁多人迫係個商場度做耆英集中營呢？”

“ 耆英集中營選址要地方夠大環境夠靜，商場咁耐都冇出租過就係呢頭唔多人出入，附近又係醫院同停車場，萬一有事都容易搶救。但係二樓商場根本就唔係比人住o既地方，如果出入都要抬上抬落就大件事，況且空氣流通非常重要，佢地要改晒所有玻璃做窗，同埋做好獨立間隔及衛生設備，如果批左之後佢地做得唔好就真係問題大啦。”

“而家成日比人地話我地自私，佢地試下自已辛苦供番黎間屋突然間係樓下開間咁o既耆英集中營丫！我地買樓時都只諗佢會開商場，一早講明就未必考慮買呢度啦！”

耆英集中營選址（上）

圖片來源：小鳳情長
小城耆英集中營最近又炒鬧了幾次，當中兩間民營企業準備係民居地下及商場開檔，被樓上街坊鬧到九彩，開完大會上官府，動員所有勢力阻止屋企樓下有間耆英集中營。兩間所選位置與小城阿公設立的方式有很大不同，當中以選址方式分別最大。阿公開設的地方絕大部份為整體建築，即係一幢過獨立於其他建築物，唔會有樓上樓下街坊望住長者做早操或者食飯，衛生環境及設備都比較完善。而今次民間經營呢兩間集中營選址都非常唔同，一間係離島對住海灘之優雅環境下的屋苑，用地舖改建為集中營，出手可謂十分闊綽，相信將來如果開檔成功一定係一間五星級集中營，但係附近鬼影都冇隻，除非將來附設手術室自已搞掂，否則入住之耆英出事就唔知救唔救得切。相反另一間就位於鬧城的正中心，樓高廿多層的大廈二樓商場，耆英出入唔方便不特止，商場位置冇窗冇門，要改建開窗就好容易發生街坊所講有爆發病毒傳播的風險，而入住之耆英亦冇晒私隱望住對面住家睇緊邊套電視劇，但係大廈就貼近小城一間設備齊全的醫館，一出事就可直達ICU急救。

以民營企業之經營心態，當然係利之所在，上述兩間集中營之選址可反影出經營方向及規模都有很大差別，即係target唔同。細心者可以發現一間係五星級安享晚年之療養院，一間係籠屋集中營志在救命快過人。吾等老矣若要入住就視乎手頭淨番幾多至有資格揀邊間，而小城的人壽燕梳發展配合鄰埠醫療集團的進駐，就決定左大家以後可以入住邊間同埋有幾多人服待閣下最後幾年。

周官放火

圖片來源：www5.flickr.com進入今年，小城就新開了兩戶字花檔。兩檔字號同為父子家族而引入洋人一同經營的生意。被封龍頭大佬之的土王帝家族，經歷近年市場開放及祖國同胞崇洋心態等連串政策影響，面對競爭而引入環球經營概念亦不能避免。可惜幾十年之積集難改，做慣王帝自然改不了運用影響力使工作更順利。為了更早爭奪市場份額及利潤，年初開幕之龍頭主力“獎杯形字花檔”，原本客棧部份仍未完工，但為了方便客仔新正頭發橫財而急急開門做生意。另一檔由其子掌舵之“賭神字花檔”早前開張大吉，內部設備亦同樣不能完全埋尾。吾等至今都不敢入內參觀學習，因小人膽小兼命小，擔心一旦發生工業意外工字鐵直插字花檯就小命堪虞。

但又奇怪，一向衙門工程部對於三行之執法非常嚴格，閣下若新開雲吞麵檔亦有多個部門巡查設備如走火安全、對附近環境影響、食物衛生以至通渠去水都查足半年以上，稍有不合即要重新入稟申請再排期約見驗收，即係話冇一年半載都唔駛旨意可以做生意。但係若果開字花檔就一D都唔同，花旗賭王最名就係以火箭速度起好只需一年，另加批牌批地一年時間，星球客棧起好之後先發現斜左，仲有當然就係先前講呢間最經典o既“獎杯形字花檔”係開左檔都仲未起完。難怪代議士們不時又拎出黎口頭質詢下工程部，以乜野標準審批及驗收工程，何解新建字花檔可以咁亂黎？若果局部開放唔影響工程進度，做乜其他大廈唔可以做好地舖後即刻開門做生意，樓上住宅慢慢起呢？所以佢地自已工程部批出舊“蛋”又有乜法子唔要識輕功至入倒去丫！

計時炸彈

圖片來源：澳門日報
小城最近又再鬧紗紙契問題，問題由來已久，歷史可追溯幾代祠堂以至滿清最後皇朝，若果要動用考古學家作證，就要請埋ＣＳＩ鑑證科鑑證筆蹟，睇下有冇作假做幣。司長一句
了結：“暫時唔會處理呢單野！”。佢呢句究竟係佢任期內唔解決定係以後都唔解決呢？相信佢唔敢講以後都唔解決，但咁就要問下有冇時間表先？問題當然不能以簡單行政手段及一刀切方式解決，但紗紙契牽引著龐大的地產及庶民利益，司長簡單地一句唔處理就為小城埋下一個巨大的計時炸彈。

炸彈其實並不直接影響庶民生計之重大利益，無可能全小城都希望搬去離島居住，除左極之唔方便之外，更冇公共設施維護庶民之需要。但面對火紅之小城地產業，加上離島現今條件正正乎合老外洋人要求之生活條件，紗紙契之鬧大無疑係衙門預料唔倒之政策下產物。佢地勢估唔倒原來開放賣賭會影響小城這個唯一城市之綠化功能。利字當頭今時今日個個都想搵番筆自然無可厚非，但小城所有的綠化帶都被市場發展而改變甚或消滅，咁何來可持續發展的城市規劃？可能官府根本冇諗過小城要有所規劃，反正做多兩年又或者搵夠退休先講。當年西洋人不承認此等文物契約才令小城保留至今一大部份的綠色地區，可供市民假日呼吸一下清新空氣。若當今官府不好好處理紗紙契問題，再被人利用大搞發展經濟，不單止破壞小城長遠的生活環境，對小城生態發展造成永久性傷害，最終只會把小城打造為北美賭城翻版，完全沙漠化！令庶民可享受唯一的綠化區都被剝奪，到時所有庶民都要搬回祖國鄉下每天花三小時回來上下班，才可保身心健康。