等「摩西」

自從官府主打賣賭政策之後，小城之發展以每年百分之廿幾的健力士速度榮登全球榜首。亦以火箭年代置換小城從前朱羅紀的面貌，庶民不覺間發現廿四小時便利店如雨後春筍，過去的銀行多過米舖變成老虎檔多過金行，當然梗有一間係左近。有外地智者指出，小城奇怪在每間高等學府傍總有一間賭場，仿佛高等學府就是為這些賭坊提供人材一樣。我當然不置可否，只是官府政策每每不是我等庶民可理解。就等於官府的管家婆出報告亦被大掌櫃指誤導庶民，就真係做又死咁做又死，庶民唯一靠管家婆解畫先知縣洗錢洗成點，現在反而被掌櫃指摘誤導。咁點解又唔試下同阿爺講取消管家婆呢個位，好等佢連阿爺都呃埋呢？

近期官府一直被坊間指摘對庶民咨詢不足，所有工程都係庶民一覺醒來就拍左板，放工回家就有舊野放在你屋企前面，以搵水效率計當然係超光速，大家都唔想錯過呢兩年黃金機會。但近期被公仔箱狂插之廣場工程則剛好相反，埋尾改道時公告天下一個月搞掂，各位好記性都知半年有多，現以所謂順應民意拆魔鬼爪用兩星期，結果亦係唔只一個月，睇怕官府都係以為只有佢至明白可謂工程，庶民只懂裝修家居。又唔見佢拆電廠起友報大樓咁慢？呢種叫順應民意，庶民要忍耐下，因為大家要我改就一定費時 ，若推倒再來當然更開心，可以再賺多筆。改改下可能要等再選知縣才能埋尾，反正官府人同車都不會走這條越野賽道，只有冇得揀的庶民才需翻山越嶺才可回家小睡，皆因官府設定換水喉，未來一年仲有排大家受，相信今趟大家都要返回原始穴居生活，等下一個摩西帶庶民出紅海吧。

繼續打荷包

自從走資司長瑯璫入獄後，小城庶民以為打了大老虎，可以有番兩三年清廉官政享受一下，誰之新官凳都未坐暖，又被坊間以至垃圾會質疑被人偷左塊地。今番最離普者乃係完全無人知的情況下，官府只拋出一句“呢幅係私人地，我們無權”咁就搞掂，難怪垃圾會勇士要問番官府點解無啦啦就可以變為私家地？最大鑊者當然係新官也，新官今日執掌劃地大權，但拋出上述金句者則係佢前部屬，你話唔比人有更大想像空間都幾難。

坊間吹水友謂：“如果連佢都係咁，大佬睇怕都要學下鄰埠先人，搵定個領導級神檯位做水抱至掂”。庶民當然只係以事論事，冇咁多內部消息可以知，所以亦係估下估下，但又無人解畫，官府之處事手法從來都幾百年不變。官府庫房水浸但毫無計劃，耕地不足亦心知肚明，奈何國際大鱷殺到埋身，之前的蘇州屎亦要面對埋尾，無計可施之下就來個狗急跳牆。難為大佬去歲以有限墨水交出之玄學級報告：“官府會以公平公正公開的科學化手段將事情處理好，以保障社會和諧及可持續發展”。此金句之玄可直迫“明鏡亦非台”，我等耕田佬當然唔知佢講乜，但眾達官人大則大表讚同及差點學鄰埠舊例要動議答謝。只怪我等庶民盲字唔識多隻，冇能力理解當中玄機，只會每次去街市都要求檔主比多個“膠袋”，閣下冇“膠袋”就唔駛旨意我會幫襯。難怪呢排官府大力推行環保政策，原來佢地以為少D“膠袋”，就可以保護小城環境。莫非官府學習了今天的雜貨舖態度， 係唔會有“膠袋”， 你唔高興可以唔幫襯，最好即刻告老歸田就可安享太平？