賊母子與搶錢家族

圖片來源：澳門日報
小城早前發生阿仔打劫得手後，阿媽將贓物的存摺及身分證去銀行提取受害人的款項時斷正，因而揭發這對賊母子的犯罪手法。茶餐廳當然係一面倒鬧個阿媽唔識教仔不特止，仲教埋佢去打劫、跟住自己再去搏矇想再偷多筆，直情係價值觀崩壞的典範，究竟呢對母子知唔知乜嘢係啱同錯？呢個世界究竟又已經變成點？但係睇真啲呢對母子，個仔都有番咁上下年紀，可以出去打劫人仲成功逃脫，其智慧、能力及膽色都有番咁上下，根本就有能力及智商去分析對與錯，如果真係咁聽教聽話又未必會去打劫咁大膽，當中對錯及犯案背景都要留待警方調查才可知道。
圖片來源：北湖新聞但係無獨有偶，對岸的前「總統家庭」的洗錢風波就越鬧越大，「搶錢家族」的行為直頭令世界震驚，連一向沒甚邦交的外國之金融機構，當發現有不尋常嘅資金流向，為了國際安全亦立刻向當時的執法當局作出通報。只不過前「總統」未落台前就有免死金牌，可謂隻手遮天乜人都冇佢符。但係一落台後司法同執法機關即刻大舉深入調查，之前曾被打壓的媒體更相繼向調查當局通風報訊，令過去一直被埋藏的絕密資料一一曝光，執法機關更一度發出通緝令緝拿涉案人士，而相信當絕密資料的不斷曝光下，現在被發掘出的貪污數字估計只不過是冰山一角，世人驚訝其「搶錢絕技」可謂極其滲透，據報已被列作「被告」的前「總統」、夫人及其子女擁有超過一百個戶口，地點更遍及世界六大洲，總金額億億聲，就算佢最後在法律面前無罪，民眾都只會怪呢個家族太懂得利用法律的漏洞，後悔當初選投這個最高級嘅騙子，而我哋則慨嘆由平民到「總統」都可以不擇手段地搶錢。

「水上飛機」又出事

圖片來源：星島日報
上個禮拜再次發生「黃金船隊」撞沉內地機動舢舨，釀成一死兩傷的意外，至今當然唔會咁快有意外報告，但係「黃金船隊」及「土產飛航」接連發生的意外值得官府關注。由於出事現場水域接近小城一方，小城海關迅速派員前往營救，可惜舢舨船主最後返魂乏術。而出事的快速航道於年頭亦發生重大事故，兩艘同屬「土產飛航」的兄弟船亦於上述水道相撞造成百多人受傷。原本小城對於管理快速航道的經驗十分豐富，可說世界少有的經驗者之一，無他者小城早於上世紀七十年代，就擁有十多艘此種世上高速噴射船船隊，論其管理及維修保養可說是經驗老到。而同樣地戶籍屬於小城或鄰近地區的老漁民或船主船員，都對這種「水上飛機」見慣見熟，一直都知道如何與之共同相處，再加上近年先進的航行設備，各種雷達及衛星定位、通訊器材等的完備，點講都唔容易發生撞船意外。但點解近年經常發生撞船意外仲死埋人添？！歸根究柢小城經濟的高速發展，與鄰埠設定的這條高速水道經已變得十分繁忙，高速水道上充斥著各種工程船、「三無船」、「唔識死嘅新牌漁船」，連垃圾船都有，令本來甚安全的航道變得複雜多變，考驗船長的經驗及反應，加上近年來往兩地以至其他口岸的船公司、航班都相繼增加，航道負荷之大與十數年前已相差甚遠，基本上與小城的陸上交通一樣得個亂字。但係快船唔同快車，冇得剎掣唔可以話停就停，加上「水上飛機」動輒百多人一齊坐，撞起上嚟可以講係災難性。雖然小城冇專屬海域權，但係官府都應該同內地有關部門協商，如何管理這條「龍頭產業的專屬經濟水道」，增加其安全性以保旅客安全。