懷疑官府的決心（上）

早前官府擬於民居附近設立臨時戒毒中心，附近街坊立即反應強烈，有人於設點附近貼白抄，反對家園附近設置臨時戒毒所，認為會影響附近居民出入人身安全。呢種心態大家都明白，事關一般街坊都唔想自己屋企附近有癮君子出沒。但就算官府唔將上址改做臨時戒毒中心，現址其實過去都一直係禁毒教育資源中心，而早於八年前該建築物其實亦都曾經作過臨時戒毒的用途，只不過今時今日小城對於住家附近的設施變得更敏感。例如過去亦曾發生過住宅之商舖樓層設置老人院，被全幢業主群起反對。事關今時今日小城樓價飆升，任何少少環境改變，分分鐘影響小庶民所持物業的價值，有乜法子唔對所有嘢都咁敏感丫！不過情況同老人院單嘢一樣，部分手持物業者經已變得唔能夠包容，尤其對社會上的低下層或者弱勢群體，都作出視而不見的態度，為要保護其自身利益，不惜反對各項服務設施的興建。當然唔係話保護自己利益有罪，但社會上的各項設施都各有其功能，當然大部分人都希望自己屋企附近有公園有泳池，唔想有老人院、戒毒所、精神病院甚至監獄呢類不受歡迎設施。可惜小城就只有丁屎咁細嘅地方，不過就有咁多人喺度住，總要搵地方作出適當配合，方能讓小城有完善的城市功能，若果小城缺少其中一項設施，將會令小城整體嘅價值下降，到時就算再想發展其他行業，都會因為其功能設施不足而令外來投資者卻步，想小城嘅物業有升值空間都幾難。唔通真係將所有唔好嘅嘢都搬晒去離島先至得？到時大家又投訴離島都被設施佔有，小城嘅大自然空間不足。

經屋訂價（下）

今次官府首次放風試探市場反應，除咗第二日就有示威之外，唔少社團都即刻開會討論。因為官府今次以建築面積去計價，有別於過往用實用面積。庶民即時唔知點反應，因為經屋雖然係建好至賣嘅多，但係而家就訂價，買家都仲未有機會睇樓，要諮詢庶民樓價啱唔啱買根本就無可能，因為官樓以建築面積計價發咗幾多水都無人知。所以第二日即刻有人示威要求減到九百蚊樓下一呎都係好合理，事關該團體都係以一般建築面積減兩成嘅方式去計算實用面積，咁將呎價減兩成咪係實用價囉。又即管用番我哋嘅條件去計九百蚊一呎，每月供款係三千多少少，即係兩人合共收入只要過萬就得，以依家人工計無五千根本無人睬你，似乎真係較合理。因為今次官府披露嘅資料唔多，亦都無講明呢千一蚊呎嘅價格係平均價定係絕對值，而且經屋會推出幾多呎數之單位都未有，若果只有千呎單位俾大家買，就算九百蚊一呎都唔係個個負擔得起。再者官府所公佈嘅資料咁唔透明，令人好懷疑佢哋向庶民諮詢嘅誠意，就算想俾意見都唔得啦。有團體建議官府協助解決青年置業難問題，話時話後生細仔廿幾歲就話要買樓，喺青春嘅時間將大部分能力放晒喺層樓度做守樓奴，唔見得係一個健康嘅決定。廿幾至卅幾歲正正係人生最黃金之十年，咁早就決定要被層樓綁住自己，壓制嘅發展理想同事業嘅空間，到最後只會令小城出現守樓一族而欠缺創業新一代，好多人以為買到經屋好似抽中獎咁，就算最後經屋訂價真係九百蚊一呎，唔好唔記得要供成廿年。

經屋訂價（上）

萬九公屋點計都埋唔到尾，官府轉頭經已向庶民諮詢經屋訂價，公屋政策等。所以呢期新聞日日都係講官樓。當然吵鬧咗咁耐最矚目嘅當然係經屋售價點樣訂。有人話同市場掛鉤，又有人話官府樓係為咗協助中低層置業，唔可以同市場私樓作價格協同，大家都唔少意見。不過有番咁多年人嘅庶民，大都記得過去官府推出之經屋，確實令唔少人致富，事隔多年官府再推經屋，一眾曾經索到同索唔到之庶民自然牛咁眼，睇住官府點樣再定購買或轉讓方法。官府喺媒體多番追問之下，主要負責官員終於開咗個盤話，經過諮詢後，大家認為經屋以建築面積計千一元一呎較合適。第二日就即刻有人去總部示威，要佢哋訂喺九百蚊以下一呎合理。各有各開盤，邊個至係上下盤呢？同大家計吓數就知邊個至係筍盤。以兩人家團計要買樓，兩房廳單位實用面積點都要有四百呎至夠用，小城唐樓一盤實用面積高，建築面積若果有六百呎，實用都有四百幾五百。但係經屋大部分係高層設計，所以一般都要成七百呎樓至有五百呎你用。咁七百呎樓就要成八十萬至有交易，按官府設定，一成首期再供廿年唔計息每月都要供三千銀，計埋息差唔多四千，再按官府台計算方式以家庭收入三成作為供款上限，即係供樓兩人合共必定要有萬三四收入至得。而今日小城嘅入息中位數經已去到九千，睇落條數係幾吸引，應該好易供。不過問題係在於喺供樓嗰廿年內，小城要保持收入中位數唔會跌番去六七千至得，呢樣先至係最艱難。

目無王法（下）

目無王法者除咗非法霸地之外，仲有小城唔少駕駛者，甚至係行人添。早幾日某報頭條指小城的士急剎車、亂停車等造成交通亂象。文章指違規的士無視交通規管，黃實線、紅綠燈位以及斑馬線上落客，而市內專設的士站根本無車候客形同虛設。該報道只指出某個交通行業所產生的亂象，其實要數交通亂象又點只的士一個行業呢！小城交通擠迫已經係鐵一般嘅事實，人同車都只顧自己感受而唔理其他道路使用者安全與否，驚險場面自然日日新鮮日日甘。除咗的士之外，巴士亦都唔輸蝕，只要喺一般兩旁有泊車咪錶的巴士站，大部分巴士司機都唔會將部車泊晒埋站，佢哋大多將車泊入站位一半，另一半佔住主車道，只為後來車輛眾多，如果司機將全部車泊埋站位，佢哋唔知幾時至可以駛返出嚟。但係就因為咁樣，結果整條車道就被佔據而其他車無辦法通過，又製造一條街頭至街尾之車龍。旅遊巴更加唔使講，但凡停得到車旁邊夠一部車過的道路，佢哋都會泊喺度方便佢自己乘客，其他車輛可以話之你，而業內可能存在的過界司機就更加唔理你本地駕駛習慣，去到部分唔可能駛入的街道依然硬闖，結果經常導致意外產生。至於一眾私人車輛，鐵馬、四輪市虎等更加當「道路法典」無到，逆線行車、胡亂切線、邊行邊傾手機隨處可見，就連鐵馬都可以咁做，簡直係神乎奇技，但係最神奇嘅都係執法人員眼見目到，依然掂行掂過，大家都好似見慣不怪，根本都無諗過咁樣做啱唔啱，睇嚟目無王法已經唔係部分不法分子所為，而家已經傳染到一般唔守規矩嘅人度，只要大家都唔當一回事，條法存唔存在都無乜所謂，呢啲至係真正嘅目無王法。

目無王法（上）

官府再次向非法建築執行清拆，將離島一幢豪華別墅依法清拆。據官方表示該單位於兩年前首次被發現非法建築，但係官府經過年半內兩次發出「禁止施工令」，對方都無理會過，所以至執行強制清拆。呢種咁明目張膽嘅行為擺明當執法當局無到，雖然官府表明會追究刑事責任，但係大家都唔明白點解官府要等足兩年至肯清拆非法建築。官府本來就應該有一份好清晰嘅土地記錄，唔需要花好多時間，就可以查到有無人非法霸地同違規建築，過程點都唔會多過三個禮拜。但係官府竟然花咗成兩年時間，出咗兩張告票，到最後先至執行終院判決拆屋。不過大家都見到該單位經已完全駿工，樓高四層七房三大廳的建築物仲坐擁無敵大海景，屋內仲已經有少量傢俬準備入伙。即係話由第一張告票發出後開始，上址除咗唔理告票繼續開工之外，仲加快進度趕工，以求喺當局未執法之前完成建築物，以為可以製造既成事實的假象，博當局唔會咁重手將一幢簇新嘅樓宇拆除。呢種唔理法律強行侵佔公眾利益嘅行為，簡直令人髮指。事關由一開始霸地者就選擇咗喺小城僅有嘅綠化離島、風景氣候最怡人之黑沙半山地段，將原本一片青綠山坡，強行改建為私人豪華別墅，侵害小城珍貴的綠化郊野。執法當局要經過咁長時間先至進行清拆，該地段之綠化同山體經已被徹底破壞，若果執法當局能早日進行清拆，被破壞之山體仍然有機會復原。但今日整個地段經已被石屎水泥填滿，要重現昔日面貌相信要下一個世紀至有機會。官府要咁長時間至能夠執法，有乜法子唔令到不法分子目無王法呢。

數字樓花（下）

官府出完「小城樓價合理」之說之後，第二日又公佈小城私樓空置單位有成二萬六，大家唔知官府公佈數字有何目的，係唔係讓市場透明化就唔知，不過大家都估官府今次公佈呢個數字，係想幫建樓部減吓壓，話俾大家聽私樓市場都有兩萬六個單位空咗出嚟，唔使咁急要官府建萬九個單位俾大家住，事關官府萬九呢條死線喺明年要交貨，就算點日夜趕工明年都應該未夠數，所以向大家放定風叫人唔好俾咁大壓力佢哋。有學者就質疑二萬六個單位點計出嚟，舊年年尾官府之統計先至有萬四個，事隔半年竟然多咗成倍咁滯。但係萬四又好、兩萬六都好，坊間咁多人嘈上唔到樓，官府又話有成兩萬空置單位，即係表明小城樓宇炒風經已去到失調嘅地步，若果官府個萬九個單位仲唔及時推出，明年或後年可能仲會有更大嘅鑊會爆。事關今時今日小城炒樓者已經唔係過去嘅本地資金，小城現在有規模嘅地產仲介公司、發展商都係國際財團掌控，名噪一時嘅標誌性建築物，都係得外地人出入，小城庶民最多都只係出入送貨，連冰島都曾經染指小城不動產，佢哋一買就係成幢成幢咁買，結果樓價就被佢哋扯到貴晒，而國際大鱷又大把彈藥喺手，無人接貨都頂得住，所以你叫小城庶民點去同班國際大鱷接貨？如果官府真係公開透明咁俾大家知道市場嘅情況，就好應該公佈埋呢兩萬六個空置單位，屬於海外資金才查手嘅佔幾多百分比、屬本地資金嘅又佔幾多，咁至可以清楚海外炒家對小城樓價影響有幾大，到時向公眾諮詢制定政策，大家至可以有更合理嘅評估。

數字樓花（上）

官府接連公佈小城樓宇相關之數字，又將庶民入息同相關樓宇作價格比，結果竟然話而家小城之樓價符合居民供樓收入，翌日即時被民生派代議士們插到飛起。因為數據採納方式受到極大質疑，尤其是報告中用一個實用面積六十平方米之單位，售價為一百五十多萬作例子，就以小城今天的收入中位數之雙職家團去供樓，咁就梗係無問題啦，因為今日嘅收入中位數，只係被字花檔人工拉高咗，先至令到條數咁好計，但係其他唔喺字花檔開工嘅人，就唔可能供得起層樓，而且字花檔僱員總數只佔小城勞動人口約一成多，其他八成幾勞動人口又點算？剛過去之五一爆大鑊，除咗部分人搞事之外，大部分都係想表達開工不足的不滿，而呢班人就係小城一眾開工不足重災區的建築工人，佢係佔咗全部開工不足的八成以上。呢班工人一邊開工不足，另一邊自己有份辛辛苦苦建好嘅樓，竟然貴到阿媽都唔認得，唔好講話買番自己有份建嘅樓，直情連普通想有瓦遮頭都唔得，事關開工都唔夠，仲諗乜嘢買樓先？而且呢班建築工人大部分都係中壯年低學歷人士，以今時今日樓價，動輒都要供二十年以上至得，呢班中壯年人又點可能冒咁大嘅險去供二十年呢？因為工作本身唔穩定，工種又高危，有乜唔妥就要成家人揹住一條大債，結果當然只能望門興嘆。另一個最大嘅問題係小城通脹急升，過去數年因工資上升帶動下通脹率每年達百分之五至七，雖不及內地般增長快，但係因應內地貨幣升值帶來的輸入性通脹，較官方數字更高，中低收入庶民自然更加水深火熱，奉勸官府唔好再用花巧數字轉移視線，都係切實搞好低下層庶民生活好過啦！

形同虛設的天文台（下）

我哋好想問吓官府天文台究竟係隸屬邊個部門之下呢？點解天文台發唔發警告要問過教育部門？定係暴雨警告規定只係為學生而設？結果羅生門事件終於發生，教育當局第二日就表示天文台同事係八點半至打電話問佢哋意見，不過佢哋強調，教育當局一切會以學生嘅安全為先，考試遲一兩日係唔會死人。事件證明咗天文台喺度擺其他局上檯準備自己卸責，不過今時今日邊個仲肯同你啃。過往每年嘅雨季都會有類似情況發生，天文台次次都被人話係為咗小城班老闆打工，睇番最後今次發警告嘅時間，正好就係九點零五分，一般銀行企業同公司都已經過咗上班時間，仲要係只有五分鐘咁少，點會唔被人話係同小城老闆們打工呢？而天文台嘅解釋係同教育部門溝通，理由仲要係學生考緊試。照佢哋嘅邏輯就算外面六米深水浸，其他庶民都唔該自己另搵渠道查吓自己要唔要冒險上班咁解。
　天文台作為一個專業部門，同其他官府部門唔同之處係，佢哋嘅判斷就最終結果，無得上訴或者係反對。暴雨也好颱風也好，發唔發警告都應該以庶民之安全作為首要判斷，今日竟然以學生考緊試而同教育當局商討然後延遲發出警告，除咗破壞自身之專業性之外，亦破壞全體庶民對該局發佈資訊的信心。尤其小城一向有低漥地區水浸問題，商舖住戶都依賴天文台發出的預警作出防備，暴雨、颱風、天文大潮等影響小城生活之氣象訊息，今日天文台以咁嘅理由去解釋點解遲發警告，請問以後庶民應該憑乜嘢去判斷是否要做防風措施，或係落唔落水閘防止水浸入屋呢？天文台呢次刻意推遲發警告嘅行為根本無爭議性。官府不如索性摺埋個部門改發周邊地區天氣報告就得，反正就算幾危險嘅警告都會被人為推遲，發同唔發都無分別。

形同虛設的天文台（上）

上週成個禮拜唔停咁落雨，祖國、鄰埠、甚至其他地區國家嘅天文台，紛紛預測華南地區一帶有暴雨同埋雷暴，任何一個識少少上網嘅庶民，都可以睇到亞洲地區之氣象衛星圖清清楚楚咁顯示，小城整體被強雨帶所包圍，就算唔用咁高科技（實情只不過係今日小學生常識題），用吓老人家智慧睇吓個天，都知道小城會持續落雨，至於會落幾大就未必敢包，但係唔荒會係毛毛細雨就係人都敢講。唯獨是小城之天文台，竟然力排眾議喺落緊狗屎期間都唔發出暴雨警告，當然被全城庶民炮轟啦！天文台之氣象預測部門主任喺接受電話訪問時表示，未能提早發出暴雨警告而向全城庶民致歉，又解釋當日係同教育部門商討過後，知道大家都考緊試，驚發出咗警告之後影響學校考試，而又有部分學生返咗學所以遲到九點一個字至發出警告云云。呢位不知所謂嘅部門主任，喺解釋暴雨訊號遲發係因為同教育部門溝通後所下之決定，莫非暴雨警告原來只係為咗學生而設，一般成年庶民唔關事咁話？學生返學考試大過天，所以唔理乜嘢人身安全死人塌樓，安全警告一樣可以唔發，咁個所謂警告訊號究竟係用嚟做乜？唔通天文台認為暴雨會因為佢哋延遲發出警告而遲啲先落咁大雨？呢啲係乜嘢天文台？外面風大雨大都可以因為人為問題而唔發出警報，仲要去問另一個嘅部門發唔發警告好，咁要呢個部門嚟做乜呢？咁點解官府又要指定搵佢發警告呢？不如以後就由教育部向全體學生發警告就算啦。

世界賭波（下）

原本體育運動之對賽，觀眾自不然會支持唔同嘅隊伍或選手，賭餐飯賭餐茶等都係廣東人習慣用嘅同人鬥邊個眼光好嘅方式，但係去到賭波公司買波心態上就唔同，除咗唔單止係同人鬥之外，仲多咗份僥幸心，玩得多亦自不然會上癮。今時今日賭波經已成為龐大國際的商機，記得喺上屆世波期間，小城執法單位曾經喺路環一豪宅獨立屋，破獲一個擁有衛星接收器等高科技器材之龐大地下賭波集團，而鄰埠早前亦有球隊被老廉揭發隊內國援做駁腳，招攬外援球員一齊進行打假波。原因由於地下賭波利益實在太龐大，賭波集團為咗得到最大利益，透過收買球員操控賽果，收買球證作出傾斜執法，最後執法單位發現原來最大幕後黑手竟然係全國足協副主席，當然連外國球壇都唔例外，只不過係程度上嘅分別。足球呢項運動原本係表現團隊精神同埋運動智慧，但係今日已經去到一個唔健康嘅發展，變成咗被一部分人操控嘅平檯，邊一隊落注重嘅就會有相應嘅表現俾大家睇，根本就唔係乜嘢比賽。大家參與買波嘅時候，亦都係扼殺緊呢項體育項目，如果話要提高運動項目水準，搞職業賽事至可以令運動員有動力提昇水平，成功辦好商業贊助其實已經足夠。但係球員球證若果單單為咗利益而去比賽，除咗唔能夠提昇水平之外，觀眾亦唔會睇到有水準之比賽，更加會令到整個體育項目走向滅亡之路，因為大家都知道賽果操控喺幾個人手上，自然無人會有興趣睇落去。

世界賭波（上）

又到了一年年一度世界波時間，全球各國球迷又一次進入不眠不休狀態，雖然今次舉辦地點首次去到非洲，不過開波時差唔大，反而對小城及鄰近地區而言，正好係下班休息時間，每日三場比賽中除咗晨早場之外早晚場任揀，打工仔同老闆都使咁驚影響日常工作及生活咁多，只係差在買定唔買過晒啲影視器材咁解。不過世盃迷之狂熱，鄰埠同小城加埋祖國都有合法賭波的渠道，相信又係賭波公司每四年一度其中一個最大收入之一。但係除咗眼前見到嘅商機，不法商人自然亦都想盡辦法分番一杯啦，所以近日亦都係執法單位大舉掃蕩地下賭波公司的忙碌日子。尤其係鄰埠執法單位，除咗不時與鄰近地區交換情報隨時拉人之外，更派人到大小娛樂場如卡場、酒吧等地方，宣傳沉迷賭波之禍害，藉以遏止賭波風氣，打擊不法分子從地下賭波利益中獲利，只可惜既然有合法賭波公司一日，呢種宣傳其實都係自欺欺人，相反小城打正旗號開放賣賭嘅政策，執法單位唔單止唔會宣傳賭波禍害，堂堂正正咁打擊地下賭波，反為會維護合法賭波公司之應有利益同埋官府稅收。鄰埠之合法賭波政策相對小城五花八門的字花業，除咗喺監管上起唔到乜嘢作用之外，其實亦都同當初批准賭波有直接關係，事關自從外地有賭波公司通過互聯網收波檻之後，精明嘅生意人就叫鄰埠官府開放賣波，仲大條道理咁講與其每屆都花大量人力物力去打擊外圍波欖，不如合法化之後易於監管兼有稅收補貼都無咁傷，結果造成鄰埠執法單位現時宣傳賭禍時尷尷尬尬。