曲解新聞自由（下）

羅生門事件由於牽涉高層涉嫌以「新聞自由」打壓低層之前線記者，唔少人都質疑高層係唔係公報私仇。仲係官方聲明口口聲聲話無意對記者仔進行打壓，咁大家又不妨對聲明裡面記者仔之所謂兩宗罪進行分析。首先記者仔被指未經授權同意擅自將對話錄音剪輯後播出而遭投訴。呢條所謂罪根本就唔成立，事關連被指作出投訴嘅受害者，被其他行家追問時都對住鏡頭大大聲聲講「無投訴過任何人，根本都唔知佢老闆係邊個」。即係呢個係好明顯嘅借口，就算係「受害者」自己反口，內部紀律處分都唔應該成立。所以原本諗住消失嘅都無人會理嘅記者仔，喺理據上經已贏晒，就算官方夾硬用「保護消息來源」去解釋，乜「保護消息來源」唔係用嚟保護記者免受呢類高層打壓嘅咩？事實上所有證據都經已暴露喺公眾面前，唔到你話點做就點做。公仔台今次以為只要靜雞雞令記者仔消失，外面根本唔會理嘅話就係大錯特錯。呢類咁敏感嘅事，公仔台新聞阿頭無理由唔知危機喺邊度。
　另一宗罪就係指當事人偷錄同高層之間嘅對話並存放公司內之伺服器，嚴重侵犯同事之間嘅誠信，仲破壞小城嘅和諧社會。對於一個一開始就被屈嘅人嚟講，任何可以保護到自己嘅行動都會採取，如果呢段對話高層唔係身有屎，又點會即刻採取行動要將記者仔「防範性停職」，就係免得記者仔可以再接觸倒伺服器，攞番上載咗嘅錄音嚟保護自己。再者若果當相互誠信經已唔存在時候，自我保護又有何不妥？如果咁樣就破壞到小城嘅「河蟹」社會，咁高層呢篇曲解「新聞自由」嘅聲明是否更加破壞小城嘅「河蟹」呢？

明砌（上）

小城公仔台發生記者仔同高層之間嘅羅生門事件，似乎越演越烈，就算雙目失明（即係盲嘅），同精神障礙（亦叫腦殘），都明白乜嘢叫做高層要做嘢。直接啲講就係明砌，根本就唔需要乜嘢理據講乜嘢公義。早幾日公仔台公開發表「官方聲明」指記者仔被人投訴成立（引用未經授權採訪並剪輯播放），再徵詢法律意見後認為有機會觸犯法律，所以要提起「內部紀律程序」，到後來高層「被告知」記者仔偷錄咗同另一高層就事件之間嘅討論對話，係法律顧問「建議」高層對記者仔採取「防範性停職」。同時表明高層經已向衙門備案，跟住就搬出一堆新聞保密操守同保護資料來源嚟確立呢份官方聲明。
　本來老闆唔鍾意一個下屬想佢消失有好多方法，不過作為一個部門嘅阿頭，要一個自己部下消失，除非佢好多人用，唔係邊個幫佢做嘢？之不過呢個部門過去一直都係只會有人自動請辭。再者今次好衰唔衰要消失嘅係新聞部嘅人，新聞部阿頭利用所謂傳媒守則嚟要人消失真係前所未見。以大家睇咁耐新聞所知，除非有記者虛構新聞同埋錯誤引述導致法律責任，先至應該受到內部調查甚至終止合約。但係今次事件如果無原告之下個官就同你講要判你死刑，比你都唔順要上訴啦，但問題係呢度根本無上訴機制，記者仔只能利用其他行家嘅平台，開記者會隔空向公眾交代投訴，讓全體庶民去評理，而且雙方都出衙門做王牌武器、又出法律顧問同埋備案，件事經已上升到法律層面，撞啱新法律年度開鑼，大家又睇吓小城法官今次有無能力幫到記者仔擺番個公道。

越問越擔心（下）

衙差偷駕公車事件發生後翌日，適逢係衙門每週一次之例行新聞發佈會，媒體自然唔會放過呢個咁好嘅機會，搏命追問衙門新聞發言人事件有乜進展，發言人就好輕描淡寫咁答事件經已交俾檢察院，同時準備起身鬆人，但係佢唔知道惡夢而家先至係開始。記者隨即問嗰句衙差咁樣需唔需要停職，答案竟係：要等內部調查先至有結果。跟住記者又問點解位衙差可以自己扌查鎖匙、一般情況下衙差係唔係可以咁做、當時衙差有無向上級申請過等問題，一個著住制服嘅軍裝發言人，竟然全部都只係答要睇番個調查報告，至可以清楚了解事件答到記者。如果我係個記者，肯定越問越擔心。當然嫌疑人有無問上司攞車用，發言人可能真係要問番個上司至可以有答案，但係被人問到一般情況下衙差可否擅自取車使用、點解衙差可以自己扌查鎖匙等，發言人都唔能夠直接回答問題，聽到呢類答案嘅庶民都應該會心都寒埋。事關公車可否自己持有車匙都要等調查報告至可以回答呢個問題，只有兩個可能性：一、新聞發言人自己都唔知有無規範車匙可唔可以自己扌查住。二、原來位發言人終於知道條車匙可以自己袋住都無問題，但係礙於呢個不成文嘅規定唔係咁好，一時唔知點答所以要等大Sir出報告至答呢個問題都未定。所以睇住呢段新聞片呢庶民，真係一邊睇住班記者發問，一邊替發言人同全城庶民擔心。因為大家都發現原來衙差同官府嘅規矩同法律，竟然只係用嚟規範一般庶民，但係並唔代表執法嘅衙門同衙差、甚至係官府都會受規管，事關連當事人都未必答得出，所以點叫我哋去信服警令呢！

保安也瘋狂（上）

落更衙差半夜返衙門，偷偷駛走官轎接載女友散心，點知唔記得自己飲咗唔少，又因同行有美相伴之下，不知不覺下將官轎越開越快，最後將街喉炒爆變噴泉，仲要三百六十度轉體兩周半反肚落海，人就無事車就報銷，可鄰呢輛官轎落地唔夠半年，炒成咁正一醫番都嘥藥費，出事衙差最後梗係要落大簿候查啦！
　事件引發茶餐廳阿叔熱烈討論，唔少人覺得衙門同無掩雞籠一樣，官轎隨時邊個話駛走就駛走，無人監管無人理。至於呢位衙差入職幾年就晉升至便衣，照計應該幾有前途，但係就整單咁嘅嘢出嚟，令人質疑衙門對衙差嘅紀律、培訓、人員質素評估、同埋監督嘅機制究竟有無效。過去幾年小城由於一直處於人手短缺嘅狀態，而外資巨企又不斷向衙門資深人員招手，以應付字花檔獨有之保安問題。大家都唔排除衙門為咗應付資深人員嘅流失，同埋要確保一定人員數量上的遞增，曾經聘用部分唔太合資格嘅人當衙差，所以造成今日衙差質素水平參差，部份素質同賓警差唔多，只係未去到用手扮 槍，事關佢地唔知道咁都得。亦有指過去由西洋人掌權時嘅衙差，都經已唔係好信得過，如果唔係都唔會有句「好仔唔當差」。事實上過去嘅差人一直都係一班讀書唔係太叻嘅人，所以小城庶民對差人一直都無乜好感。況且媒體喺事件發生後翌日，即時羅列晒最近過去所發生幾單衙差涉嫌醉駕事件，指責配槍衙差多次涉嫌醉駕，經已令庶民對衙門內部的管理及其執法能力產生極大疑問，有必要對現役衙差進行重新評估及人員再培訓，以挽救庶民對執法人員所失去之信心。

最後一個月（下）

公仔台「羅生門」事件中所謂勢力人士表態無做過任何嘢，仲大聲面對媒體表示希望大家幫佢伸冤之後，「真相」就越嚟越撲朔迷離。原本事件引咗唔少人批評公仔台作為本地首家電子媒體，竟然帶頭自我審查限制新聞自由。但係根本無人投訴底下記者仔被祭旗，大家估都估到單嘢唔係咁簡單。無幾耐記者仔終於發功反擊高層，表明若果從來無人向公仔台作出投訴，內部調查根本唔成立，亦對公仔台作出內部禁制調查舉措保留法律追究權利，去到咁事實同真相其實經已唔重要。
　事關公仔台嘅管治混亂早就全民皆知，差唔多卅年前開台至今，咁多年嚟年年蝕本，每年仲蝕足差唔多成億，若果唔係呢幾年小城經濟起飛，根本睇唔到呢個管理層有乜能力管治呢間機構。再者呢個歷史遺留落嚟問題根本已經遺留得太耐，呢間公私合營嘅公司，連一向有橋有實力嘅小城賭王，沾手過其股份後都發現間嘢唔係人咁品，吸（股東嘅）水力特強仲隨時係無底深潭，結果無幾耐都要退股。回歸初期更發展到要由官府庫房以每月接濟形式吊命，因為其他股東眼見蝕本多年，已經拒絕再為公仔台填氹。到最後官府唯有買埋其他股東嘅股份變相收歸國有，但係就一直都無對公仔台行使應有之管治權。就算將公仔台定性為公共廣播機構，但係佢哋又唔屬於官府機關之一，就連官府其他部門需要宣傳，都要真金白銀以市價買時段，但係同其他商業機構又可以用薯仔換菜心。試問一間四不象嘅公司又有乜可能管理做得好呢！而且管理層真係好似唔使同股東交代咁，咁多年都無變過，你做老闆炒唔炒佢？結果知縣定咗睇完報告後一個月內定公仔台命運。

「事實」與「真相」（上）

小城嘅記者仔為咗大家嘅知情權，不惜以身犯險走去踩地雷，準備將真相向大家通報，但係亦同時作出平衡報道，將發生爭拗事件兩方都照顧周到，但係最後都係被內部老闆拎去照肺之後，仲要當律師面收信慌死佢唔死，最後被停薪留職，搞到全城Ｒ晒頭，搞乜呀！有代議士直接用口頭質詢，追問官府全資支援嘅電視台係咪為咗封嘴而殺人滅口，夾硬將記者仔停薪留職。
　從古至今，「事實」係好殘酷嘅嘢，而「真相」就係好多人所追求嘅嘢。不過原來事實同真相根本就係兩回事，如果唔係咁又點會有兩個唔同嘅中文字出現呢。記得細路仔嘅時候老師話林彪同孔子都係令人腐敗嘅代表，細路仔雖然唔知人可以點樣腐敗，但係都覺得唔慌好嘢，所以準備聽老師教導學秦始皇將屋企嘅教科書燒晒。當然係教科書啦，唔通係床下底珍藏嘅漫畫咩！但係無幾耐就話乜嘢文革係浩劫，今時今日仲要搞番孔子學院，原來真相就係我哋班口靚仔被人搞到個童年亂晒龍，事實係估唔到我準備將老師教嗰本「批林批孔」漫畫收埋時候，老竇將本漫畫燒咗，仲記得本漫畫封面係橙色書仔，結果梗係無人理個口靚仔有幾混亂啦，但係就可以教到人事實同真相係唔同，同埋騙局可以做到有幾精密。正當大家以為記者仔係因為踩中咗城中勢力死穴，導致死咗都唔知發生乜嘢事嘅時候，劇情急轉直下。「疑兇」被其他行家圍攻之下，直接面對鏡頭講完全無同佢上頭聯絡過，亦都無對佢進行過投訴，所以根本唔知發生咗乜嘢事，咁即係最新版小城「羅生門」事件又一次發生。

官府建立五層夢（下）

房屋規劃成功嘅例子喺世界上當然存在，代表作就係獅城。獅城嘅祖屋概念到今時今日都為各地官府所津津樂道，事關各大官府都搞唔掂呢個所謂資本主義國家，點樣可以解決全民嘅住屋問題，因為地球上只有吉卜賽人、蒙古人同愛斯基摩人無住屋嘅問題。答案就係獅城參考咗朝鮮嘅管理模式，當然獅城係青出於藍更為先進，佢哋將極權統治作出適當修改，令到鬼佬唔覺得呢個國家等同「邪惡軸心國」，事關佢哋選用同一語系令西方主流意見較容易明白，第二佢哋用咗分隔政策令人以為有適當空間炒樓（呢個係另一層夢），再者獅城從一開始就師承我國偉大領袖，為咗建立美好家園，犧牲咗唔少當地庶民，先至有今時今日嘅安定環境，況且當城市發展去到一個成熟嘅地步，窮些少都唔可以繼續生存落去，一個只有有錢佬生活嘅國家，又邊會有住屋問題呢！而新一代領導人根本就唔敢越雷半步，結果佢哋造出咗世界上另一個「母體」，令到唔少人自願Plug番上去，包括各地欣賞佢哋做法嘅官府。所以今次負責官員提出「流十招」去應對狂飆嘅樓價，除咗係頭痛醫頭腳痛醫腳之外，根本就搵唔到其他詞彙可以形容。睇番「流十招」最令人覺得有問題嘅，莫過於加物業轉移稅增加炒樓成本、限制樓宇按遏成數、同埋公佈每月成交量，呢三招由官府講似乎好似幫到低下層置業，但係事實上就更加鼓勵其他人參與炒樓活動。首先增加物業轉移稅只能打擊一般低下階層，但係有能力買嘅，都唔會差嗰幾個巴仙，而限制按遏成數只減兩成，根本炒樓同銀行供款無關。最後仲公佈每月成交量，即係幫埋炒樓者減低炒樓成本，因為連資料都唔使花錢花時間去搵，每月有人定期送上，你俾我都即刻辭職，轉行去炒樓好過啦！

官府建立五層夢（上）

最近官府又對小城樓宇進行政策研究，推出六大方向概念，以圖穩定小城物業市場。由於與會者包括十四個團體代表出席，代表基層人士批評官府遲遲未有措施出台壓抑房價炒風，質疑官府有無能力調控樓市。事實上從來官府對物業市場作出干預，招數都唔多，幾個影響物業市場最出名之地區包括花旗國、獅城及鄰埠官府，我哋可以回顧下呢班官府人員點樣制訂房屋政策，結果佢哋嘅庶民又面對乜嘢問題。
　花旗國最出名，佢哋竟然製造一個人人有樓才查手嘅夢境，向全國發放，令佢哋嘅國民覺得生活喺自己嘅國家猶如天堂一樣，當大家知道連道友同流浪漢都有可以買到樓嘅時候，全世界至發現大家正為呢班人買緊單，原來一個騙局係有可能走遍全世界，仲有咁多傻佬上咗嗰兩兄弟嘅當。另一個更典型嘅例子當然係嚟自鄰埠，鄰埠自從父母知縣上場以嚟，發揮父母官愛民如子慈悲為懷之心，眼見鄰埠唔少庶民居住條作根本就同被捕野獸無分別，大家都住喺一個叫做籠嘅物體裡面，所以為咗拯救低下庶民，推出咗一個叫「八舊半」計劃，旨在將水深火熱嘅庶民打救脫離野獸生活做番個人，結果大家都好清楚最後佢要宣佈腳痛至可以埋尾。以上兩個故事都係証明咗，如果領導者胡亂輕率咁推出不切實際嘅政策同夢想，去誤導大眾以為唔使辛勞努力就可得到安逸嘅生活，最終只會變成惡夢令大家跌入憤怒同埋怨當中，因為所有人都中咗一種毒，就係叫做「只要有夢想，夢境可成真。」呢個擺到明搵所有人笨嘅廣告術語，擺明係俾個第五層夢你跌落去找死。

買菜方程式（下）

按照輕重緩急方式辦事，照理「執笠法務」唔應該喺呢個時期提出「公職法援」草案， 因為由佢領導之「法律改革」革咗成十年都未搞掂，一時又賴唔夠人，一時又賴唔夠資源，但喺從來都無反省過自己領導無方唔識管理。無他者「執笠法務」本身係工商管理出身，以往一直喺掌櫃部做嘢，負責同人傾合約講條件交換，只不過喺回歸咗之後先至轉行做行政法務。但係呢位習慣咗同人「雕」嘅「執笠法務」，喺佢呢十年嘅立法工作上面，依然沿用佢以往同鬼佬傾配額嘅買菜方程式，就係首先獅子開大口殺價，然後等對方還價，廿次來回之後達成協議。 即係每天喺義字街上演緊嘅婆仔講價減兩毫買棵菜。如果唔係點樣解釋佢將自己砌好咗嘅草案拎上垃圾會初審之後，被強大反彈壓力下，仍然刪完兩隻字之後再成條刪咗去呢種行為呢？庶民要求其實好簡單，有無講價都係睇吓邊樣嘢，呢種鼓勵官告民嘅所謂法律草案，根本就唔應該存在，既然「執笠法務」咁意氣風發講公職人員待遇好過一般庶民，咁點解仲要加強公職人員同庶民之間嘅鴻溝呢？庶民又邊個俾法律保障佢哋呢？「執笠法務」強推呢個「公職法援」唔單止無助保障公職人員，更加挑起庶民對官府同公職人員嘅不滿，增加社會對立破壞和諧環境。若果講呢個只不過係對公職人員多加一重保障，即係話呢樣只不過係員工福利，公職人員本身都有唔少福利會，只要稍加資助亦可解決問題，再加上今時今日官府嘅員工福利咁多，根本亦都唔需要進行立法專登再開一個法律福利俾佢哋。

幾時成熟過？(上）

「執笠法務」早兩日話，經過廣泛聽取各界意見後，理解社會對有關條文之憂慮，決定刪除「公職法援」法案內嘅第四條條文。同時又表示今次法案引起廣泛關注同討論，對官府嚟講係件好事，呢次決定修改法案顯示立法嘅工作漸趨成熟咁話。就呢件事所見，成熟咗係只不過「執笠法務」本人嘅面皮，至於立法嘅工作有無成熟到？對唔住搵唔到證據支持呢個論點囉。
　首先，任何心智成熟嘅人嘅處事方向都識得乜嘢叫輕重緩急，即係識搵時機做適當嘅嘢。例如「公職法援」過去所推出嘅「公共地方總規章」，結果上到法庭就被法官裁定規章唔合法，呢種就叫做有勇無謀貽笑大方。而另一個案「廿三條」則關乎國家主權同社會穩定，社會爭議唔大嘅情況下通過，咁就叫識搵時機做嘢，不過呢次識搵時機嘅，大家都知道並唔係「執笠法務」本人。
　睇番今次佢推嘅呢條「公職法援」草案，公職人員內部並無強烈訴求，就算今次決定刪除條文，亦都好快有兩個公職協會表態贊成刪除，就算有部分法律界贊同法案，但係今次立法並無迫切性，即謂唔合時機做呢樣嘢。反之法案推出諮詢之後，就面對社會輿論各方強烈反彈，此為唔用腦做嘢。因為「執笠法務」既然係為官府向立法機關提出法律待批，早就應該顧及提出之草案會唔會搞到立法機關好大鑊甚至係被打回頭。所以今次法案喺初審之後，在強大之輿論壓力下被迫兩次出口術刪除兩個字之後又刪除成段，原因都係想小修小補，唔想提出之草案最後要撤回咁大鑊，但係如果一份工做咗十幾年之後都仲係咁嘅表現，邊個夠膽講佢有成熟過！

查封「民宿」(下）

一間甚有風味嘅舊建築，一個數百年歷史嘅古舊街區，向外地遊客提供經濟實惠嘅住宿，除咗法律無提供一個生存空間俾佢哋之外，根本諗唔到有乜嘢影響附近居民、危害旅客安全嘅問題。唔少人都奇怪小城作為一個旅遊城市，點解喺周邊地區咁流行嘅「民宿」概念，到今日小城官府都接受唔到。原因好簡單，自從小城開放賣賭之後，帶動唔少外企向小城投入龐大資金，建造巨型字花檔、華麗超星酒店金碧輝煌，共同打造紙醉金迷不夜城嘅「東方拉城」。呢班外企投資小城，到而家都未夠十年，幾百億嘅資金有排都未回本，佢哋嘅房價下下千千聲，若果官府批准呢類平價民宿喺小城發展同佢哋爭飯食，外資分分鐘會以撤資要脅官府，防止投資嘅利益受損。況且自從開放賣賭之後，小城發生唔少外地不法份子，租用字花檔周邊嘅民居，進行例如吸毒販毒、賣淫等不法行為，甚至有大耳窿租用單位禁錮債仔，對周邊環境及居民生活造成嚴重影響，變成影響治安嘅犯罪溫床。今次官府以《禁止非法提供住宿》法律執行查封，出發點及成效廣獲庶民認同，但係對於剛被查封之獨立建築「民宿」，無辜被一眾無良非法旅館所牽連，唔少意見都認為官府應該有效規管及向外推廣合法住宿，最重要係接受「民宿」理念，對於有良好管理嘅好旅館，有系統地進行規範同監管，為民宿及非法旅館訂立明確分野。好彩負責官員翌日亦對媒介表示，未來將會研究創設條件，為小城「民宿」作出定義，推動小城旅業發展。咁至係符合小城未來發展需要，亦可順道回應庶民活化舊區嘅意見。

查封「民宿」(上）

早兩日官府執行《禁止非法提供住宿》，首度查封一座三層高獨立建築物，現場帶走一對情侶住客及清潔工。呢幢三層高建築物雖然位於舊區，但亦做足維修保養經過翻新，根據報道除通道狹小外，裡面房間光猛四正，基本設備齊全，觀其「官方」網上相簿，房間闊落舒適雅致，環境乾淨，每房更有獨立向街大露台，若單單論其房間環境，住宿條件較唔少庶民之睡房更佳，至少戶戶向街空氣好，獨立衛浴間，甚至連好多酒店都未有嘅無線網絡服務都有提供，最抵死嘅係竟然有一房間設有獨立陽台，比唔少賓館、公寓同別墅更加適合旅客入住。據報上址房價合理，每晚房價約三百多元，吸引唔少外地自由行旅客網上預訂，尤其係寶島同內地背包旅客。齋睇網頁瀏覽量更加超過七萬人次，比唔少本地三四星級酒店更加受歡迎，而只要利用搜尋引擎上網搵吓，不難發現有唔少曾光顧過嘅旅客，落力推介呢間甚有懷舊味道「非法」旅館，大家都不約而同地大讚戶主熱情及地方就腳，而且房間舒適。由於該出租屋位於舊城區，毗鄰世遺而且附近街道保留住小城過去之生活模式，甚至吸引到寶島公仔箱製作人於上址取景拍攝劇集，於寶島、祖國同鄰埠公仔箱熱播。基於以上各種條件配合，無可否認該「非法提供住宿」地方，係小城最有名嘅「民宿」之一，該住宿除咗係無牌經營之外，根本就唔覺有乜唔妥。而官府卻偏偏取締咗呢間咁受外地背包遊客喜愛嘅旅館，只因為官府根本就無「民宿」呢個概念，就算經營得幾好，幾咁幫助到小城推廣旅遊業，都係要拉人封舖。

爭寶島

今次知縣師爺出訪寶島，官府高調向外界通報，而寶島方面之傳媒，就形容師爺低調到訪，兩種截然不同嘅表述，點解會咁唔同？原因係寶島方面唔想太高調引來反對者從中作梗，影響正在改善之兩岸關係，至於小城官方高調宣揚，大家可能唔記得咗師爺同社文部老頂去寶島兩趟之間，加插咗鄰埠財爺旋風式訪問，目的都係一樣，同寶島傾準備開設辦事處事宜，亦即係想加深兩地關係。不過鄰埠財爺出訪之際竟然被人質佢聽叫佢老闆去死嘅歌。回顧鄰埠同寶島嘅關係，於回歸後都只不過喺經濟、人文交往近年十分少，而當中更加有唔少鄰埠大寶島小嘅心態。相反小城早年前往寶島升學人數唔少，而學成歸來進入官場打滾者亦不計其數，早就建立唔少人脈關係，加上兩岸未三通之前，台商要進入祖國必須經第三地，當年小城早就因應情勢，專登整個「國際」機場喺中間抽水，所以唔少寶島同胞對小城尚算清楚，況且小城與寶島一樣，城市化未去到鄰埠咁激烈，相對上未有分邊個大細。不過自從三通實施後，寶島與小城之交往頻繁度從數字上就一落千丈，好在每年小城仍有唔少學子經常往返兩地，早年亦曾有唔少庶民外出到寶島搵食，加上近年字花檔投資之旅遊設施相繼落成，令小城之吸引力大增，寶島旅客亦有可觀增長，官府今次首派要員前往寶島，除咗係想設辦事處幫助當地小城學子之外，亦都係想爭取兩地交往能夠回復昔日水平，希望能借助寶島發展文化產業之經驗，能帶動小城發展走向多元，出發點自然同鄰埠有好大出入。

全能師爺

知縣師爺代表小城出訪寶島探路，目的係為咗社文部老頂之訪問行程進行鋪路，亦為咗知縣籌備喺寶島設立小城之官式辦事處，進行實地考察。大家覺唔覺得有問題？係呀，第一個代表小城去寶島作官式訪問並唔係任何官員，係知縣嘅師爺。點解咁奇怪？無他嘅，講明係去探路，首先梗係唔會搵高級官員直接出面與寶島聯絡，因為萬一傾唔埋欄，小城官府會十分無面，派個唔係官嘅官去探路，梗係正路得多。但係最奇怪者，呢位師爺其實佢嘅地位，比好多所謂司級官員都重要。事關早兩日有人問到一人身兼八職做得辛唔辛苦。因為呢位師爺嘅職位銜頭真係多到數唔晒咁滯，例如：行政長官辦公室主任、中醫藥科技產業園籌備辦公室主任、特區政府新聞發言人、《粵澳合作框架協議》起草工作小組澳方組長、寶島事務等等堪稱全能師爺，不過成績係點大家有眼睇。有坊間聲音質疑小城是否缺人才缺成咁，搞到要佢一人做幾份工。但係其他甚麼委員會就成幾廿人一齊，大家都唔知佢哋喺度做緊乜。不過好肯定一句，知縣搞咁多個壇出嚟，搵個信得過幫手睇住，而又同佢溝通到，唯一就係呢位師爺。事關現任知縣喺回歸前準備出掌社文部老頂一職時，經已出手喺西洋政務司手中，搶咗呢位師爺返嚟幫佢手，貪佢有位西洋老婆指點迷津，話俾佢聽西洋人點樣做官。而呢位師爺本身同樣喺前朝政務官留學寶島，對寶島事務自然較為熟悉。亦曾獲公費赴西洋留學及轉戰多個部門，對於官府內部行政運作瞭如指掌，當初由社文老頂當選知縣嘅時候，就曾經有傳師爺會接掌社文老頂個位。知縣今次搵一個跟隨自己十多年嘅得力助手去睇住檔嘢，一啲都唔出奇丫。

外遊三分險（下）

猶記得多年前，太陽國仍未被鄰埠及小城之一眾哈日族攻陷前，邪教組織於兩個地鐵站內施放沙林毒氣導致多人傷亡事件亦曾經多日成為國際頭條，事件發生於被認為亞洲最安全的國家之一。另外我們偉大祖國中，被譽為最安全管理最嚴格之京城，亦曾發生外國遊客被兇徒刺殺的慘劇。雖然以上都被歸類為個別事件，亦有部分意見認為，遊客外遊遇上不幸事件，十之八九係意外，既然係意外就不能避免。但係若果今時今日連出外旅遊散吓心都唔敢去，似乎又太過斬腳趾避沙蟲。不過大家出門前，對前往之目的地加深了解，唔多唔少遇上問題發生時，多少都有點幫助，至少都應該知道當地邊部分地區較危險唔應該去，同埋去人多嘅地方應該小心注意唔好樂極忘形。猶其係當大家去到人多嘅平價購物區，不時買到一袋二袋，銀包手袋完全唔顧，被偷荷包或者打劫都唔好，時刻保持警覺去邊度都需要。另外喺今次慘劇中，當地之中國大使館、外交部、旅遊危機處理辦等，都有唔錯嘅支援。若要前往外地旅遊，以上各部門之緊急電話都應該隨身準備。當然，最重要係通訊設備更加唔可以忽視，就算電話打唔通，新款電話都有唔少其他可以通訊嘅方式例如無線上網、衛星定位系統亦可顯示自己的位置，可以讓人追查到自己嘅位置。甚至部分電話更提供衛星電話之服務，雖然收費不菲，但係若果危難當前梗係用咗先算，反正唔會即時問你收錢。當然至少都要話俾自己嘅親友知你幾時會出國幾時會返嚟，同埋去邊幾個地方及住喺邊，以上都係可以幫助大家出外旅遊時減少麻煩。最後面對危機，需要冷靜應對切記衝動。

外遊三分險（上）

鄰埠旅行團於颱風國無辜被脅持導致傷亡事件，反映外遊散心與個人安全的矛盾。是次出事旅行團之團友基本上經已採取最安全的外遊選擇，就係參加規模最大及最有信譽之旅行社，基本上除咗超級富豪可以包飛機包遊艇帶齊私人保鑣之外，平民百姓若要出遊到自己不熟悉的外地，參加有信譽之旅行社隨團旅遊恐怕是唯一選擇，試想吓這事件除咗當地導遊及旅遊巴司機成功逃脫之外，就連隨團出發之領隊亦不幸受害，意味著就算參加有經驗有信譽之旅行社，亦不能百分百確保旅客之安全，所以旅遊保險就點都要買。
　猶記得數年前太陽旗國之首都、一個世界聞名的電子產品集散地，就曾經發生過有狂徒駕駛重型貨車撞死數人後，更落車揮刀刺殺途人，造成多人傷亡。事發地點乃鄰埠及小城遊客的熱點，每年吸引數以百萬計外地遊客慕名前往，搜購時尚電子產品。而當時行兇者供稱根本就沒有鎖定特定人物，或者某個特定理由而行兇，只係想被人制服之前能夠殺幾多人就殺幾多人。事件幸或不幸地只有當地人受害，未有外國旅客被禍及。但經已令一眾經常前往該地入貨之發燒友震驚不已，事關該國一直被其他周邊地區的旅客，公認為最安全及最誠實的國家，認為只要唔出入部分燈紅酒綠之奇怪地帶，根本想出事都幾難。但係一個狂徒的瘋狂行動，足以令舉世震驚，情況就類似今次颱風國事件一樣，相反今次颱風國的魔警反而早有企圖及目的，只不過係當地官方處理拙劣，迫令十優警官成魔濫殺，至令無辜者不幸受害。