邊個跳最後？

今個禮拜最大嘅新聞梗係工人跳樓。呢幾日大家都估緊最新跳樓數字，即係全球最大電子代工廠發生的員工跳樓事件。由於事件接連不斷發生，集團之最高統帥急忙由寶島直飛事發廠房拆彈。事先張揚開放部分園區招待傳媒參觀，亦由最高統帥親自講解園區內之員工生活及即場解答現場記者的提問。同時又宣佈張開防護網防再跳、又請高僧搞法事幫手超度亡魂，建立精神醫療隊協助員工解決壓力，以為可以壓止事件再次發生。可惜事與願違，統帥走咗都唔夠三個鐘，晚上又跳多件落嚟，搞到集團主腦差唔多未夠半日，即刻要旋風式再返工廠園區了解事件。傳媒早已議論紛紛，不停邀請學者專家發表意見，但係都未能協助解決事件，反而令人更加擔心助長呢種風氣。事實上呢間全球最大電子代工廠接咗幾間環球巨企之訂單，生產風靡全球的多種電子產品，雖然之前曾有人質疑事件廠方乃血汗工廠，另外亦有人質疑該廠的管理模式有問題，至會發生呢類事件。但一般認為工廠本身其實待遇同環境都唔差，否則唔會有咁多年輕一代爭相到該廠房應徵，而且亦發展到有包保入職成功的收費勞務公司，可以想像到該廠上班本身其實係唔少國內年青人心儀的工作。可惜嘅係當呢啲後生仔入到間廠度返工之際，至發現廠內紀律嚴明，工作刻板、人際關係疏離，結果中學畢業無耐嘅小朋友，因為頂唔順咁軍事化嘅管理方式，同埋城鄉生活上嘅差距壓力，結果造成心理同精神上之唔平衡，外間一般估計，就係以上幾種原因，造成該廠員工多人跳樓的主要原因。但係如果事件再繼續落去，相信最後一跳可能係集團統帥都未定。

邊個係元凶？

廠方管理模式導致廠內員工多人跳樓輕生，外間都以為係廠方要員工辛勞工作，刻扣工資等無良僱主所為。但係呢間係一間國際級廠房，海外大客戶唔會容許呢類事件發生喺為自己生產嘅工廠上面，咁究竟係乜嘢原因引致大好青年會選擇跳樓輕生？有學者指呢班後生仔之抗壓能力唔及上一代，承受唔到工廠軍訓式之管理模式，但係又唔想再返鄉下生活，喺無退路之下選擇咗輕生當作唯一出路。亦有評論指該廠員工人際關係疏離，員工同事之間甚少有溝通，而管理人員亦要求工人不時轉換部門，令到同事間剛建立之友誼又被分開，管理層根本就唔喜歡員工之間有強大之聯繫。喺一日刻板工作完成之後同事之間又無好好嘅溝通關係，久而久之員工產生精神健康問題係遲早嘅事。亦有報道指員工入職要簽約三年，若果中途解約要向廠方賠償一萬元，相當於人工的三四倍，呢啲都係造成員工嘅種種壓力之一。但係我哋發現咗一個大家都忽略咗嘅問題，管理層為廠內建立之種種規條與限制，無非都係為咗搏得跨國巨企的一張大訂單而已。而跨國企業之訂單往往第一份出現嘅內容，就係叫做保密協議。由佢哋從表示有興趣搵你哋生產一刻開始，就會要你簽咗份保密協議先，而且仲係差唔多要你永久保密咁滯，泄密賠償條款亦十分苛刻，結果管理層為咗要履行協議，自不然要令到廠房內之員工大家唔識大家，又要將工序分開幾十個唔同部門負責，將產品化整為零就唔會咁容易被人將機密泄漏出去。其中一個跳樓個案據講就係因為被懷疑偷走未面世的一個貨版所引起，保密協議至係令到咁多人輕生嘅主要原因。

法庭的理據（下）

終院裁定知縣唔接受遲交標書唔合理，所以裁定澳巴上訴得值。理據係如果裁定澳巴敗訴，即係肯定咗被接納標書的兩間公司，必然會獲得未來巴士專營之合約，事關只有三間公司入標去競投兩個專營合約，咁唔使講梗係剩淨番俾佢哋啦。當然終院仲有其他理據解釋點解會判澳巴上訴得直，但係法庭呢兩單嘅判決都宣示咗一個好重要嘅訊息，就係行政官府當局同埋執法當局，都首先要認清楚小城之法律究竟係點寫，同埋點樣去解讀。連同法庭係取消「被告」身分一案，雖然都令到庶民覺得今次法庭唔係玩嘢，將大眾都認為係合理嘅嘢全部推翻。但係呢啲正正就係法治精神裡面最重要嘅一環，唔理外界報道如何、庶民睇法如何，法庭只管官方搜證過程有無出錯，資料足夠與否，同埋是否鐵證如山，至會將被告進行裁決。就算可能被大眾認為法庭今次係同官府作對或者係有偏幫之嫌，但係法庭係唔會咁笨將自己擺上檯，最重要喺庭上律師搵到執法人員或者係行政當局嘅錯漏，先至會令法庭有咁樣嘅裁決。即係話官府或者係執法機關，係未有足夠充分啱理據同合理步驟下，對一件事進行咗判斷，呢啲就係人治底下做嘢方式，然後被法庭發現唔啱手續或者係理據不足，推翻原判，呢樣就係法治咁解啦，呢次官府接連受挫可以從中汲取教訓，以後部署要更精密要過到法庭的關口，至好進行執法同施政。

法庭的理據（上）

最近兩宗法庭判決都令公眾嘩然。其中備受爭議的小土城公交公司投標過程，終於喺終審法院作出最後裁決，就係否決咗知縣唔接納遲交標書嘅決定，即係話官府無足夠理據唔接受澳巴之投標，最後官府要暫停巴士服務判給工作。結果，大家都相信今年十月開放巴士市場嘅時間表會有所影響。但係由於遲交標書事件仍然有其他官司待審，所以雖然被終審判官府敗訴，亦唔能夠講澳巴就一定會擺到巴士經營權。
　另一單就係走資司長案中，其中一個最重要的被告身分，被中級法院裁定被告身分無效。同樣地法院唔承認最主要之嫌犯嘅身分，但係就唔一定話佢就係無罪，只不過係身分唔係被告。呢兩單判決唔單止打亂官府施政同刑法管理的威信，更重要係讓外界感到官府原來喺執法之時，對於小城法律的認識原來唔係我到想嘅咁多，同時亦打擊咗官府之管治威信。就講走資司長一案為例，首先走資司長事件一發生後，走資司長就已經被人關押咗，但係最主要嘅呢名犯人就一直失蹤，就算廉記傳召亦都無人收傳票，而當事人就算喺西洋國自首，亦都無親身簽收過法庭將佢列為被告之傳票，再加上法庭質疑當時老廉搜「走資司長官邸」是否合法，對當事人的部分未有經正常程序做嘢所以判佢「被告」嘅身份無效。當然中院判決未必係最終裁決，但係就起哋好關鍵性嘅作用，因為初院法官表示中院之判決影響深遠，將會成為未來同類案件之參考案例，要詳細研究才可作出決定。即係話連法官自己都對上頭之判決感到擔心，佢哋都要慢慢研究至可以知道點做至係最好。

問題出喺邊？（下）

今日大家都清楚原來小城係唔夠託兒所學位，其實呢次官府真係責無旁貸。事關當年自從上任提出要開放賣賭之後，根本就無理過喺賭業開放咗之後，會引發咁多唔同類型嘅問題。例如大家估唔到今時今日會無位泊鐵馬，又估唔到小城新樓要賣成幾百萬，連幾千萬嘅樓都有，唔知幾時會出現億元豪宅呢？不過最估唔到嘅係小城最大群嘅新貴竟然都買唔起樓，最後可能要去輪隊買經屋。呢啲全部都係當年官府決定開放賣賭之時，從來都唔諗過會發生嘅嘢，亦都係全城庶民都估唔到嘅嘢。當年係知縣一心只諗住開放賣賭之後，可以刺激小城經濟發展同埋改善庶民生活，可惜嘅係小城經濟就真係發展咗，但係改善庶民生活呢一部分就發生唔到效用。其實當年賣賭都係經濟人認同可行嘅方法之一，但係就真係過份草率。難怪今時今日咁多問題官府都解決唔到。好似今時今日青少年濫藥問題，如果唔係小城賣賭出現一大群輪班族，家長們又點會話唔夠時間睇住班青少年，令到佢哋有機會被不法分子引誘拍丸濫藥？如果唔係小城增加一大班輪班族，又邊會多咗咁多人要買車上班，而令到小城交通壓力大增，塞車之餘連車位都唔夠泊？所以小城唔夠託兒學位一啲都唔出奇，因為大人連自己會無位泊車都估唔到，又點會估到自己有朝一日會生個仔出嚟，生咗出嚟又會無時間湊佢，要搵託兒所幫手，結果連託兒所都唔夠位。所以到咗今時今日，就算新任知縣上台執政，佢嘅首要任務其實唔係幫庶民解決問題，而係首先要解決上任留落嚟嘅問題。例如萬九經屋、黑市勞工、同埋其他數之不盡嘅問題。所以大家只能祈望新知縣能在一年半載OK晒所有問題，至有可能見到佢嘅施政方針。不過都係唔使旨意，新知縣唔係超人！

問題出喺邊？（上）

自從小城經濟起飛之後，官府有足夠盈餘搞福利政策。首先係減免稅項，當中包括對庶民影響最大嘅入息稅、房屋稅等，呢啲喺好幾年前已經開始。同一時間官府又推行十五年免費教育，好使小城未來棟樑至少都有高中畢業程度，呢樣都係官府由開放賣賭政策開始，收到首期回報之後發放俾庶民的福利政策之一。本來呢啲德政好應該表揚一下，不過可惜嘅係經過種種福利政策後，引發今日新家長要四圍撲託兒所學位，仲要排足四日四夜去輪四十個學額。自從官府開放賣賭之後，城中唔少適齡人口轉戰賭業職場，令到唔少原本日出而作，日入而息嘅上班一族，都變咗做輪班族。呢班新進輪班族到咗今日，成為小城最有經濟能力，而又剛好適婚的一大族群。今時今日官府推出咁多福利政策，喺小城養仔根本就唔係難事，而經濟上又唔會有太大問題，所以有仔唔趁嫩生就假，況且連鄰埠知縣都支持生三個細路，另外小城知縣（過去式）又話要將小城打造成百萬人口嘅城市，最後製造咗小城新一輪嘅嬰兒潮。但係問題係當大家完成人生使命之一，將小寶寶生咗出嚟之後，竟然發現未到入學階段，就已經要為託兒問題四出頻撲，原來，大家都無預計到小城會發生呢啲問題，因為大家都無諗過小城會有唔夠學位呢樣嘢，無諗過會有咁多人一齊生仔、一齊返工同埋一齊要搵人睇仔。最後未夠條件請唔起工人幫手湊仔嘅家庭，就只好強忍辛苦排四日四夜都要搵間託兒所，幫手睇住個細路成長至入學。

再爆大鑊（下）

　至於擾攘多日嘅澳洲籍男子被毆事件，一個明顯係由雙方誤會而造成嘅事件，結果可以發酵到咁多日的報道，除了一方不斷以陰謀論懷疑對方身分之外，大家都感受到有人根本就唔肯亦唔想認錯。但係事件發生嘅過程差唔多全被攝錄鏡頭拍下，一般觀眾其實都識得判斷誰是誰非，雖然鏡頭並沒有直接拍下外籍人士被工人領袖毆打的一幕，但就拍到外籍男子被工人領袖阻止離開現場的一刻，而同一時間已經見到外籍男被其他人拳打腳踢，而工人領袖並沒有出手阻止，當佢宣稱只係拖住外籍男隻手帶佢離開現場嘅時候，大家都好明顯知道同大家眼見嘅有出入。若果以一個人之行為去判斷群眾行為似乎太武斷，但係今次若果講衝突係由警方挑釁在先，同樣亦都唔太成立。因為無視警方安排之遊行路線，強行改變原定路線就已經係首先發起挑釁。而遊行隊伍中發現的小偷事件，無論如何都只能將事件交由警方處理而唔應該當街執行私刑。終於衝突過後滿地石頭、水樽、竹枝、藤椅甚至國旗，全部都係示威者曾經使用之「武器」之一，反觀有評論員收到庶民送上防暴警察所持盾牌的部分殘骸，使大家可以清楚知道示威者當時使用之力量何其大，而且更多的畫面顯示示威者不單使用長竹架起的國旗拍打防暴警、更加以標槍形式將長竹國旗擲向警方，而警方除了用水炮及胡椒噴霧驅散示威者外，亦未有使用更大武力。只可惜警方除了用水炮誤射記者之外，又用安全理由阻擋記者進行合法採訪，更加無視示威者要求受傷人士的處理，結果於庶民心中雙方都變成輸家不值得同情。

再爆大鑊（上）

　今年終於繼零七之後再爆一次大鑊，「五一」大家上街宣示訴求的遊行最終又演變成警民衝突，造成四十多人受傷，當中大部分受傷者竟然係警察，其餘除了部分係示威者之外，亦有外籍記者同外籍人士受傷。而出事位置又係示威黑點沙梨頭水上街市附近一段馬路，除了發生警民衝突之外，又發生了途經之外籍人士無辜被遊行人士圍毆，結果媒體一面倒報導警民衝突、外籍人士被毆以至遊行領袖被落案起訴等事件，而當天同樣曾進行遊行的家團及八十後的訴求都只作部分報道，對於媒體的報道多樣性等實在係非常不好嘅表現。對於今次唔少人認為警方同示威人士都共同輸掉小城形象，其實亦有唔少贊成遊行表達訴求人士，對於今年「五一」遊行出現的大批青年參與遊行表示讚賞。事關小城年青人過去一直被大人標籤成不負責任、享受著前人成果而不懂回饋社會，而且還帶給小城唔少問題。但今次有數百青年出席遊行表達訴求，而且訴求仲唔單止係民生咁簡單，仲將小城無聊之河蟹文化、蟻蝸族、更加對官府多年未能興建居屋表達不滿。今次八十後九十後參與遊行表達訴求，展現了小城青年關心社會、熱愛小城的美好一面，亦向世人展示小城亦有安靜守法、有素養有理想、和平表達訴求年青族群。同時亦令小城大人安慰的是，小城有呢班咁有質素的年青人，未來仍然充滿希望。事實上近年小城年青人問題不斷，濫藥問題嚴重、價值觀扭曲唯利是圖、無心向學只顧搵快錢等等，都令社會各界擔心小城未來會變成如何，幸好今次小城青年的自發遊行，終於讓大家感到未來仍然有希望，亦俾大家睇到小城年青人的真正活力。

好心做壞事（下）

話時話今次官府設計咗用出入境記錄去分開邊啲係常住人口，真係一個十分離譜嘅邏輯，十幾年唔出境嘅自然唔在講啦，咁如果係要經常出外公幹嘅人又點計呢？而家就話補鑊叫長居內地之長者唔駛擔心，本人唔出現都可以搵人幫佢哋搞番手續，但係若果長年獨居內地之長者，試問又點樣可以唔出現就搞掂官府所需之手續呢？再講點都係要辦理手續，長者都係人而且仲係唔多想麻煩人，事關大部分長者都已經覺得自己年紀大成日麻煩到人，而家官府咁都要長者搞多一次手續，係唔係迫佢哋自己山長水遠咁走嚟辦手續呢？其實官府喺推出呢類社福政策之前，一早就應該好好掌握小城之人口情況，先至可以設訂好個推行計劃，減少甚至免除今次咁樣所出現嘅失誤。再者，官府今次推出個臨時名單，其實都喺對自己所掌握之人口數據無乜信心，拎個表出嚟試吓自己做得有無錯漏，結果係錯到無人有。其實今次官府搞咁多嘢，都係想公帑用番喺真正為小城出力的本地庶民身上，唔想再好似上任知縣咁係人都派，搞到連幾廿年無返過小城的鄰埠隱身庶民又走番嚟分番份錢。而且今次嘅儲蓄唔係少嘢，成萬蚊自然要更加小心核對身分，但係可惜計算錯誤令到本身應該享有福利的庶民都被排除於名單之外，咁搞法唔單止舒緩唔到庶民嘅怨氣，反而被庶民睇到而家管治緊呢個城市嘅官員，係點樣做嘢同埋點樣諗嘢，本來官府的所謂諮詢都係一個「騷」，但係見今次搞到一鑊粥咁，都係奉勸知縣諮詢吓幫官府內部搵出問題，先至開出政策會安全啲。

好心做壞事（上）

知縣上任前，都已經開始關心小城民生問題，原因除咗同佢負責開呢「範」有關之外，亦同佢本身所學習嘅專業有關。結果上任後因為庫房水浸，喺櫈都未坐暖嘅時候唔方便推出一啲長遠政策，最後諗咗條橋就係幫全民開個儲蓄戶口，等第時官府開始手緊嘅時候，庶民都有機會享受官府從前積落嘅財富，又唔怕第日官府唔派錢時被人鬧點解無錢派。原本計劃唔止一推兩得，仲可以教到而家新一代儲蓄有乜好添！不過人算不如天算，負責執行的官僚竟然唔理三七廿一，將去年無出過境之小城居民，一律當做唔合條件，喺臨時名單上無佢哋份。結果搞到公公婆婆連續幾日奔波勞累，而前線公僕又唔知點樣解答佢哋，卒之負責嘅官僚開咗小城官僚第一個嘅先河，就係終於肯認錯，對各位受影響人士講番句對唔住！原本社保如何保護社會，根本就係無人知，事關本來官府有幾多錢淨都係假，只要佢哋話用嚟預留做未來之發展計劃，就可以一毫子都唔分俾大家，今次開戶口俾大家，都係想日後好做少少，唔使次次派錢都要搵班公僕加班同銀行幫手。只係大家都估唔到負責社福之官僚竟然唔係用個腦去諗嘢，求其用出入境記錄做依據，玩到班公公婆婆死咁滯，結果好心做壞事不特止，仲要自己出嚟見記者解畫，同埋向公眾道歉，令到新知縣原本的一道政策，結果搞到被人鬧到暈，官府上下相信都始料不及。

英雄的背後

自從阿福走後，唔少當地同工及曾受惠的孤兒，都悲慟不已，家人親友更不在話下。基於政治需要，最後阿福亦要從兩地官府介入下返回鄰埠安息。原本一個向來低調，不計名利的義工，最後都被利用作政治工具，作為局外人只替他可惜。何解？因為「阿福之死」已經被鄰埠熱炒到比摩西出紅海更厲害，好似青海無咗阿福，會死成幾十萬人一樣咁。我哋當然好敬佩黃福榮捨己救人的高尚情操，亦為佢之英勇犧牲而落淚。但係佢嘅事蹟被鄰埠傳媒發現係一個好材料之後，就不斷被升溫加熱，例如「香港驕傲」、「香港的光輝榜樣」、就連「香港之子」都出埋。唉！唔好將陳水扁同佢拉埋一齊啦好唔好！影衰晒佢添呀！黃福榮之英勇俾人係度咁樣抽水真係睇到眼火爆，睇報道竟然連李連杰都有份。雖然唔知係唔係被「屈」，但係鄰埠官府就真係被屈到正。當鄰埠官府仲未諗住有反應之時，媒體就一手策劃「鄰埠英雄」行動，目的當然係為咗收視率同埋銷售量啦。再者「桂枝人」呢幾年形象直插谷底，要挽救其「施捨」形象，莫過於製造一個全國英雄，事關鄰埠向來只會向阿爺搵著數，但係又唔肯認低威，難得俾佢哋搵到次機會向人大大聲咁講佢哋都為人民犧牲過。結果鄰埠官府仲未知點應對之時，經已被人放咗上神檯，焗住要以高規格追頒什麼「英勇勳章」，之前仲要話鋪「國旗」添！好彩黃福榮家人都貫徹「低調英雄」的意願，婉拒其他形式上的規格榮耀，只求黃福榮能與家人同葬一地，無須額外風光。真英雄至此，鄰埠一眾想撈油水之界別包括傳媒、官府，都應該自我反省吓點樣至可以真正得民心。

向阿福致敬

祖國西北發生的大地震，至執筆日為止死亡人數達一千七百多人，受傷數字不詳，救災部隊再度出勤，兩岸四地亦同時密鑼緊鼓籌辦賑災募捐活動，各類物資包括曾被利用作政治工具的組合屋，亦一一準備付運，問題係今次出事地點的青海省位處高原，同前年川震地點形勢大不同，唔少外省救援隊從未接受高原訓練，就算體能高於常人，但亦未必能應付高山反應帶來之後果，結果唔少救援人員敵不過海拔三千多公呎之高原地帶，紛紛要到當地醫療隊接受治療。而是次災難當中，鄰埠的一名英勇義工亦於災難發生時，為了救助仍然被困之當地孤兒及同僚，不惜以身犯險，從災場救出四人之後再進災場，結果偏偏自己未能全身而退，最後客死異鄉，其莫大愛心非一般人能做得到。
　要做到視錢財如無物，重視生命多於一切的情懷，真正體現出人類作為地球上高等生物的本質，黃福榮作為鄰埠一分子，同好多我哋所認識同認為之「桂枝」唔同。我哋接觸到嘅「桂枝」人，除大部分財大氣粗之外，俾祖國暴發更多一份末代貴族的驕傲（記住驕傲係貶意詞），即係乞人憎咁解。而黃福榮卻正正代表一眾鄰埠勞動階層，辛勤努力、愛護弱勢的優秀一面，用一己之力去展現人性光輝。慣於辛勤勞動的貨車司機，本身亦患有長期糖尿病的病人，偏偏無懼自身安全，於川震期間為唔少災民運送物資，亦曾替中華骨髓庫籌款而由鄰埠徒步上京，讓一眾鄰埠賤精自慚形穢，我哋雖然仲記得一班鄰埠黑工於鏡頭前點樣侮辱我哋班記者，但係今日亦有機會見到好似黃福榮呢種唔計較，唔怕蝕底捨己救人的工人階級，好讓鄰埠人識得乜嘢係「施」同埋「捨」而唔係施捨，亦都無人需要被施捨。

官府拆屋

　官府打擊僭建屋政策一直只聞樓梯響，近日終於採取行動，對已發清拆令之違法僭建物進行清拆，而且仲係一連幾日由長官親自領軍，約埋傳媒一齊開工，目的係話俾大家聽取締違法僭建物，官府唔係齋講唔做嘢，而家就做俾大家睇，就算規管法案仲未出台，現有法例亦足夠執法清除違法建築，只不過係手續較繁複咁解。官府宣稱手頭上仲有廿幾個個案未完成，佢哋呼籲業主自覺清拆違法僭建物，若果唔係除咗要俾番錢官府幫你拆之外，仲要交罰金，若果唔理繼續建，仲會被告違令罪。雖然今次官府係大鑼大鼓咁做俾大家睇，但係就總好過唔做，因為近年小城樓價飆升，部分無良業主非法擴建頂層單位以圖買個更好價錢增加利潤，諗趁住法例未出台，加緊趕工以為可以偷到雞，扮到既成事實咁樣，官府就無佢哋符。其實佢哋唔單止罔顧他人安全，違法僭建物仲會令原有物業價值下跌，可謂偷雞唔到蝕渣米。點解咁講？原因係而家官府表明會強硬執法，建咗就要拆，就算無人投訴而家唔使拆，將來亦難保無人投訴最終都係要拆，而且轉手時有僭建物買家都唔會同你計呢個空間嘅價值，仲要減錢，因為就算將來新法例無釘契罰則，到時新業主要負責拆卸費用人哋都唔會睬你，而且就算以後都唔使拆，最終僭建物都會危害樓宇結構安全，到時亦都要再使錢搵人維修整幢建築物，結果都係搵嚟搞。所以奉勸各位業主諗住建僭建物時，要權衡各利害關係，以免因小失大並負刑責就得不償失，仲要累人累物。

代議士叫全民賣賭

議會早前有代議士稱，官府與其年年派錢，不如預支一舊錢，再發多一個字花牌，然後按庶民比例攤分股份營運，咁樣就可以唔使官府要年年計吓有幾多錢剩，點都應該每年有錢派咁話。呢位代議士唔知係唔係見鄰埠官府代民炒股有錢贏，就有樣學樣建議官府照抄舊橋，不過換咗做字花檔咁解。竟然諗啲咁嘅方法去叫全民做字花檔股東，切合晒鄰埠傳媒對小城之評語就係全民皆賭。你可能會話大家都係做股東，又唔係叫你去賭。不過若果用番代議士之邏輯，鄰埠唔少細股東都喜歡幫襯番自己有持股之銀行或企業，咁如果全民皆字花股東，去幫襯番自己公司買番兩口係唔係好應該先？問題就係呢間新字花檔就必然會令其他字花檔被歧視，至少有咗幾十萬人為保自己利益而減少甚或唔去幫襯其他字花檔。同時亦都變相鼓勵全城庶民賭番鋪，誘發更多社會問題。另一方面坊間唔少庶民都唔想見到小城過份依賴字花業，而官府亦都表明會控制字花業之發展，而家代議士咁講係唔係唔多用腦呢？再者唔喜歡字花業之人士，明明只係望官府控制成本有道而獲取應得之回報，但係就要改為睇住間字花檔殺唔殺到客，同埋多唔多人去賭，先至知自己有無錢分，直頭係擺佢哋上檯。事關呢類人士本身都已經唔希望小城有字花檔，不過礙於歷史原因所以無計，依家仲叫佢做埋股東一份佢肯過你至奇。見到小城咁有質素嘅代議士，幸好佢係經選舉出嚟，如果係官委，官府仲唔被人插到暈？好彩呢個只不過係建議，官府斷估都唔會亦唔應該理佢。

司長做小城神偷（下）

唔明點解司長會提出咁嘅施政方針嚟解決庶民住屋問題，事關我哋點計工廈活化都唔能夠建成合理而又較人性化的居住單位，只會白白浪費小城已經缺乏的土地資源。但係同一時間司長又講未來將會嚴格執行土地批給合同，收回閒置土地興建公屋，以解決中低下庶民住屋需求。　即係話官府今次只不過係做咗「神偷」，將工廈偷天換日改為協助官府無力解決提供足夠公屋承諾的手段。原本舊知縣承諾的建屋數量，司長只不過係護主心切，反而今日新知縣只會舊調重彈，數字一樣形式一樣，即係話俾大家聽唔係我應承嘅，我最多做番佢應承咁多俾你哋，你哋唔好屈我！相反若果方針係將工廈活化成支援中小企或創意產業的基地，反而配合到新知縣提出之產業多元化及支持創意產業的一大方針。例如將空置工廈改造成藝術工作坊，讓本地藝術工作者能有更多創作空間、發表平台，甚至教室向下一代推廣創意產業，都不失為推動多元化產業，活化社區的方式之一。事實上工廈最大特點，就係能提供價廉而又相對更廣闊的空間，能夠善於利用，可以提升商號寸金尺土的商舖利用率。例如零售業一向最缺乏倉儲空間，向業界提供較廉之倉儲，商號自然會發展物流系統以提升商舖的利用率，增加貨品提升競爭力。另外亦可鼓勵小城新一代發展電子銷售，將空間拆細供小型用戶作為商品交收點，可為電子銷售系統打造一個方便的交易平台而又能將產業多元化。不過今次司長其實係一直唔想同不動產業有衝突，至會推出呢條咁嘅橋去轉移大家視線，最終係大家都只能繼續等官府搞掂條數至會有屋住。◇

司長做小城神偷（上）

早排司長於新一屆官府的施政方針中，提出類似鄰埠的做法活化小城工廈，以回應小城發展及居民生活需要。本來小城經濟轉型下工業式微，傳統工廈根本大部分都變為貨倉、社團會址等，更有甚者，整幢廠廈變為廢料回收場，對附近住戶的環境衛生造成極大影響。作為官府利用行政手段，將空置廠廈重新注入生命本身不存在爭議，只不過問題係官府推動活化工業大廈，係使工廈轉型為細住宅單位，去回應庶民住屋難的問題。大家都知工業大廈至少都二三千呎一個單位，而住宅細單位就三四百呎都有，今次司長只不過係頭痛醫頭，根本解決唔到問題。首先工廈要改成細單位供低下階層購買，我就唔知司長可以點樣改建。我哋唔係工程師，唔明點樣可以唔拆晒而可以建成一個合理單位，希望司長能夠指正一下。若果好似保護文物咁拆剩個殼再建過內部，大家都知價錢會貴幾倍，如果淨係將單位間格更改以達目的，咁就點計都會有單位係只有一個窗甚至無窗，即係話呢類所謂活化而成的改建工廈單位，其實就係與鄰埠的籠屋差不多，只不過唔係板間而係有磚牆做間隔咁解，再加上原本工廈原有之消防設施同住宅要求完全唔同，其環境根本就唔適合一般庶民居住，硬要改成住宅大家都知道後果如何。如果真係咁大家認為發展商有無興趣建呢種根本無人會買嘅樓呢？有些少腦嘅發展商又點會將自己錢白白咁掉落海呢？如果有人肯做嗰啲唔係叫做發展商，而係裝修工程公司，而官府就係最差嘅地產佬要向庶民推銷無人要嘅單位，製造全城最大舊嘅垃圾。