「聖火」同「有火」（上）

今年為咗祖國百年大事「奧運」，小城所有單位都嚴陣以待，官方單位自然重裝戒備，動用二千多警力保護「聖火」的運送。而民間團體都為咗支持祖國，或者係唔多想得罪全世界幾十億人，都紛紛舉辦支持奧運嘅活動，或者係取消部份唔多老嚟嘅示威遊行以表心意。但係點解今年無端端變咗做「聖火」而唔係大家一直叫開嘅「火炬」？不過冇乜所謂啦，都係中國人自己鍾意改變叫法，點叫都唔會改變呢枝火棒嘅意義，等同有人硬把奧運增加其他唔同嘅意思一樣。不過當聖火未到小城前，庶民就首先點起把火。理得你要唔要和諧迎奧運，庶民以個人名義申請遊行表達意願，全程和平進行，亦唔似鄰埠咁有心引起衝突的團體，硬要喺大部分人慶祝嘅時間增加收視率搶鏡，連茶餐廳都估唔到竟然都有成千人上街支持。一直以來茶餐廳庶民都話緊，過埋Ｏ八同埋Ｏ九年熱戀期後，小城嘅熱熾經濟將會成為過去，無乜嘢再支持小城嘅經濟，不會好似今天咁周圍都唔夠人用。咁呢班人點解仲要上街？咪就係個市咁旺呢班人都唔能夠享受到經濟發展成果，再加上經濟暢旺下的高通脹當然係全城都受害。就算任何唔同級數嘅盛事，都阻唔到佢哋表達個人訴求嘅意願。大家都十分感動呢次庶民嘅「個人遊」可以有成千人去支持同埋表達心聲，表現到漁村庶民能夠有安定同成熟嘅人文意識，令各地嘅傳媒都唔能夠唔同意，小城庶民真正成熟起來，比其他只求爭取收視、不求後果嘅團體對小城有用得多，至少可以喺大家歡慶嘅時候給大家一刻冷靜分析嘅機會。

松山景觀看官府（下）

今次官府提出的世遺視覺走廊作出規範所制訂的行政法規，其實就等如我哋庶民看官府政策一樣，只不過得幾條門縫可作窺視，要一窺全貌根本冇乜可能。近日官府不斷派錢，可能以防又到「五一」再次有幾千人上街，打擊官府威信。不過若果真係根本就冇人有現任官府口既符，咁點解官府要做呢啲門面功夫呢？事實上，小城最高權力機關並唔係小城而係京城，每年知縣都有幾次面對京城最高領導面授機宜，而京城領導亦對小城事物掌握得十分透徹，但係礙於要向國際展示小城口既一國兩制，所以不宜對小城官府指指點點，但係如果當小城搞到滿城風雨口既時候京官自然唔出聲唔得。難怪近年京城官員民望一日比一日高，但係官府民望就每創新低，呢啲咁唔同口既待遇並唔係小城庶民大細超，而係官府管理混亂，遇到出事就搵京官幫手，這些所有舉措小城庶民當然一一看在眼裡，知道邊個做得好邊個做得唔好。我哋當然十分高興被人管咗幾百年，今天終於可以由自己人當家作主自己管自己，但係經歷呢幾年咁多風風雨雨，搞到自己人口既官府民望插水，都係他們自己一手造成，而且更重要口既係，當未出事時庶民發現有問題，卻又無從向官府進言，而官府又覺得自己一定啱，唔當庶民係一回事，到最後出事時就怪責庶民唔理解官府口既決定。不過到今日官府似乎仲未有所覺悟，除依舊閉門造車黑箱作業外，仲依舊使出過去幾年被人垢弊的派糖、派止痛餅，今次再變本加厲，竟然唔用腦到直接派錢，究竟我哋可以點樣對呢個官府仲有所期待呢？

松山景觀看官府（上）

官府終於以行政手段決定東望洋山的輪廓線，以確保世遺景觀不受城市發展之影響。市民經過一段時間的申訴、抗爭、以至最後去信聯合國，成功令世界關注小城保護世遺的進度，國家文化局直接把聯合國表示關注的信件轉發予小城知縣，以警告官府必須清楚問題的重要性，此乃京官首次放棄對小城採用「閉門教仔」的管治手法，可想而知其嚴重性不能以國內問題去處理，是一個真正的世界文化的問題。小城官府一直以來都係保留住漁村打工仔心態──小做小錯唔做唔錯，根本就冇諗過要做什麼管理，以為只要申請成功，就一世唔憂，冇諗過原來想掛個名竟然係要做餐死，之後仲要有排泵水去維繫、要保育、要管理、要有政策去維持申請成功後文物的可持續發展，唔係你想點就點，係要遵守國際公認的保護守則，才能被世界認同此地真正擁有值得世界人民珍惜的文化遺產。但係既然保留小城民風，就更應該保護維繫小城民風的集體回憶，除了世遺之外小城根本要保護的事物可謂不少，因為小城傳統的價值觀正是支撐官府到今時今日的力量，當今官員一直認為只有考上高職而又懂得官場智慧，受到上司的賞識就是自己成為出色官員的能力，完全無視對市民的應有態度，亦把官府與庶民的關係完全反轉。但隻難怪佢哋有咁嘅心態，因為請佢哋打工嘅係官府，而官府最大嗰位知縣又授權佢哋去請人，而知縣只不過係由三百人選出嚟再由京官任命，可以講同庶民甚至「垃圾會」完全冇直接關係，咁唔怪得某局長被問及有冇法子處理部份冇作為之官員時，竟然答係由知縣請佢哋，佢哋要交代嘅老闆只有一個，結果就連垃圾會主席都被佢吹到啤一聲，即係話根本就冇人有佢哋符。

冇啖好食（下）

由食米危機演變成全球糧食危機，當中大部份人都歸究全球氣候變化令農產品失收，引致食品供應不足。但係糧食價格口既升幅則唔單止係供應不足咁簡單，當中包含個人囤積及集體囤積等操控價格手段，再加上新科技的改變使食品作為能源，更加推高農民改種高增值的農作物而形成傾斜的食物供應。但係世界咁多種人，大家都有唔同口既飲食習慣，食品產地亦有不同。單以中國為例，南方人主食為大米，北方則以小麥為主，原本相安無事。但當一方出現短缺口既時候，自然就會改食其他可代替的糧食。結果大米、小麥、玉米、大豆等相關主要糧食齊齊出現唔夠貨口既現象，形成全球食品價格趨升之勢。由於人類的食物鍊一環扣一環，任何一環出現問題都會影響其他的食物供給。今天記者們在總理出訪時追問總理確保自家的糧食供應，但又有冇諗過當祖國承諾確保供應的同時，國內有幾多同胞受著食品價格高升的壓力？雞豬牛供應緊張的時期，庶民都抗議供應商操控價值，但係大家有冇諗過農民根本唔願意賣貨到小城？因為內部供應價格都比小城代理商出手高，你叫佢哋點樣賣俾小城？但係當小城收貨時竟然貨價仲比鄰埠貴，咁中間代理商究竟有幾多利潤大家可想而知。外圍的大環境小城自然冇能力去改變，但係只要官府打破國內食品供應的壟斷局面，設定標準的進口規格，讓所有人都能依法按規定到不同地區甚至海外進口食品，以市場的力量平衡食品價格，增加食品的多樣性，方能保障主要食品價格不會被無良商人所操控而引致社會動盪，搞到全體庶民冇啖好食。

冇啖好食（上）

早前日日都講豬牛雞供應不足，搞到官府要日日同京官開會，增加供應，近日就講緊大米供應短缺講足成個月，到咗今時今日，講緊嘅已經係全球糧食危機。搞到總理去外訪時都被鄰埠傳媒追問米貴有乜辦法，溫總理答應保障港澳食米供應。但係鄰埠一向都唔多食祖國大米，入口米九成幾都來自泰國，貪佢較軟較香。咁班老記逼總理表態保障食米供應又為乜呢？事實上，世界最大食米生產國就係祖國，不過對外供應就唔係咁多，因為全國有成十三億人要食，自己供應都係啱啱好，但係以鄰埠及小城咁細嘅地方，每月都食唔到幾多噸米，俾多幾噸又有乜影響呢。其實泰國真係失收，但係因為泰國係出口大米最多嘅國家，所以直接影響到國際大米價格，若祖國都增加大米出口就可以減低食米價格嘅波動，不過今時今日兩個特區食米的人均消耗量其實正不斷下降，只不過傳媒話泰國失收，即刻引起全體庶民搶購大米，至搞到小城今日米貴到嚇死你，但係若果以一般家庭兩房一廳嘅空間，究竟可以藏到幾多大米呢？就算俾你可以收埋三百斤，你估又要食幾耐先食得晒呢？我又唔信家家戶戶都有米倉咁好環境保護大米，結果形成第一包都未食完，其餘兩包都已經生滿米蟲要即時報廢。結果造成巨大浪費都係因為人嘅心理因素，呢啲惡性循環令原本有足夠糧食嘅世界變成缺糧危機。本來祖國食品產量豐富，鄰埠及小城一向都可以享有價廉物美嘅祖國食品，不過自從國內多次發生糧食產品安全超標、甚至造假的問題，結果部分無良商人的惡行，要大部份生產商要減少產量增加檢測來提高安全率，變相推高糧油副產品的價格，最終受苦嘅咪又係貧苦大眾。

火上加火（下）

本來帶住把火走勻全世界，真係幾好口既宣傳方式，亦令到好多世界上其他國家口既人對奧運都有一定關注，不過呢把火變咗去到全世界點火頭。原本二千年能夠舉辦奧運就係最好。第一對於國人嚟講「龍」年梗係有代表性啦，第二當年祖國未有咁多外國工業移轉到內地，相對貿易順差未有咁明顯，中國威脅論仲未有咁多人理，搞「大蘇」自然未有咁多反對力量。但係今日祖國經歷多年的高速經濟增長，國內出現一個個不同而又令世界驚嘆的奧運建築，又完成直達西藏的世界最高鐵路，更加唔好講世界上有幾多人用緊祖國生產口既產品。就係呢樣嘢，令到世界先進大國的既得利益者擔心祖國坐大，在國際上的影響力越來越大，改變了原本的遊戲規則，令其地位及利益受到損害。今次引發大規模的示威衝突，都是各利益國發動的輿論打壓，為的就是壓低中國在國際舞台上的地位，迫中國永遠做他們的廉價工廠，永遠為他們提供價廉物美的服務。雖則世界上並非所有人都與他們一樣以狹隘之心看待中國的崛起，但係發達國家始終手執國際傳媒話語權，要以佢哋相同或近似的價值觀同處事方式嚟批判你就真係話都冇咁易，相反你做多樣的措施或政策去迎合或取悅他們，都不能彌補點點價值觀上的差異，倒不如正正經經地做好自己，懶理外人的指指點點，切實做好一個Show，學習必須接受總有人對你說這說那。亦希望當局能早日重開騷動過後的地區，向世界各地重新展示事發地區，好讓滋事者再沒借口操控國際輿論不斷抹黑國家以至國人形象。

火上加火（上）

京奧運聖火傳送過程多次被人破壞或干擾，令主辦國的我們一直覺得煩擾，亦為京城及鄰埠舉辦的奧運項目擔心被干擾，更甚者可能有恐怖分子破壞京奧運之順利進行，而小城與鄰埠的衙門今天亦十分「頭痕」，因為兩地將為境外傳遞最後兩站把關，而外地傳聞滿天飛，更加加大衙差掌握情報的難度。
　從來人們都喜歡把所有事件在個人的領域內混合一起，以自己認為來代替外間變化。就等如海外支持藏獨人士一直以為，應該讓這個冰封凍土世界像南極一樣，所有國家都可以在當地設置科學觀察站，得閒就去觀察吓發生乜嘢事，跟住留低大堆垃圾就走人。無他，有事發生時可以插入扮大佬，搞唔掂可以拍拍手走人，唔使負責。除非絕大多數人民喜歡繼續從前的奴農政權，唔使好似現在咁所有人都有生活方式的自由。今次終於被藏獨者搵到國人死穴，就係死要面呢個死位口既攻擊，等你辦「大蘇」咁開心丫嗱！京城對於西藏管理的一時疏忽，造就了「公仔箱」上瞬間跑出大量雪山獅子旗，但係持旗者個個都紅鬚綠眼，大家仲以為西洋鬼幾時又拆多幾個國家出嚟，皆因媒介所提供的畫面，大部分甚至全部支持藏獨人士都係洋人，庶民想在畫面上發現何為藏民都唔容易，若果以海外傳媒所言祖國壓迫藏民而生活艱苦的話，咁點解呢班搞事者咁有組織，沿途都有能力破壞聖火傳送，仲要上山下海出埋飛機同人肉死士爬上金門橋搞大佢，為的都係要整熄中國呢把火，搞單咁口既嘢最重要係幫到法國風流總統轉移國民對自己醜聞的視線，借意打擊中國在國際上的地位，令國內民眾對中國反感而減少購買其商品，以為可以減低自己國家的問題而無視自己的政策無能，呢啲就係中國威脅論。

同一時間的諮詢（下）

大家都知道所謂諮詢本收集意見，要有一定的數量先至成立，尤其在民主社會就更加是少數服從多數的遊戲規則。但當官府要推行一啲受到爭議之法律法規的時候，唔多唔少到預料有一定的反抗，亦都會令官府所預計的實行進度有所推遲。所以有理由相信，官府在新一年推出的諮詢狂潮中，唔多唔少都有偷雞成分。尤其當中夾雜了選舉法修訂、刑事責任年齡制度等影響深遠的法律制度諮詢文本，一併推出當然受到廣大庶民關注。不過其他不同法例的修改諮詢就大有機會被社會所忽略，搞得唔好可能連一個意見都收唔到，就算收到都未必有經過十分周詳的考慮，這又算唔算真的向公眾諮詢呢？例如新馬路整治方案為例，就連公仔箱風火節目的專業主持，都未能有效準確、清楚的掌握整個官府的計劃，連諮詢文本都唔清唔楚，但又冇其他附助文件供大家參閱，咁樣點叫做諮詢呢？不過要批評一定容易，庶民都應該主動向政府提出要求清晰資料，不管是選舉法修改等重大問題，定是私立學校教學人員制度框架建議書等。庶民都係要負起監察官府施政的責任，唔好諗住官府每樣施政都會切合自己或市民大眾的需要，尤其在一些深層次的關係，就不是咁簡單在諮詢文本上面發現到當中的影響，市民大眾在發表意見的時候，一定要仔細思量各種關係，用全盤角度去分析，方能向官府提供有用同精確的建議，改善到民意的水平，從而推進官府改善施政達致提升小城的整體和諧及公民水平，不容易受到外來的影響及鼓動。

同一時間的諮詢（上）

早兩日突然收到校師團體寄來的電郵，向大家收集《私立學校教學人員制度框架建議書》的意見，個人感覺連條法例聽都未聽過，何解已經到了諮詢截止日期呢？立即上網搜索一下，即時發現剛過去的三月份，全城庶民都突如其來得到官府的青睞，多項的官府計劃及法律修改、推出的政策都有諮詢文本供全民參與，發表意見。繼有房地產中介業務法律制度、登記公證法律制度改革、刑事責任年齡制度、選舉法修訂、私立學校教學人員制度框架建議書等等，多到記都記唔晒。全城各大關係社團一放完春節假就即刻忙到死，各種唔同種類的諮詢文本涉及不同範疇，連資料搜集都未做得及，更何況我哋平日唔多清楚其他專業口既庶民，想發表意見都唔係咁容易。近年官府經常受到施政透明度不足、黑箱作業等指責，令一眾官員在執政時綁手綁腳，但係不時又要面對政策有問題、改革太慢甚至法律滯後的投訴，結果導致新年過後，各大官府部門齊齊推出修改、修正，或者係新增的法律法規，而諮詢期都係得一至兩個月，最後就係一次過五六個諮詢方案文本俾大家去諗。話時話，一次過向大家問五六個唔同範疇口既問題，件件都涉及巨大的社會、專業、民生等問題，唔好話一般庶民，就連專業社團都無厘頭求其俾些少意見，就已經到咗交貨期，咁你哋話呢啲咁口既諮詢究竟有冇作用呢？講深啲官府究竟係咪有心向大眾諮詢意見呢？當然社會上一定有相關口既團體發表部份有深度口既意見，但係官府到發表諮詢結果口既時候，就會同大家講原來全城都支持同意最初的建議，咁算唔算係偷雞呢？