交通意見（下）

今次官府針對私人車輛增長作出之意見文本，似乎經已決定咗只會限制私人車輛而無視商用車之增長。而家大大話話每間字花檔酒店都有自己之專線車隊，分別來回各主要景點及口岸，而最大交通壓力亦係呢類車輛造成，點解官府又唔提出方案俾庶民討論呢？當然大家都知道小城交通要控制，但係唔等於要限制，文本中提出多個地區同國家分別實施車輛管制之措施供庶民參考，但係就無列出當地人對其措施的反彈。最簡單莫過於鄰埠曾經試行之電子道路收費計劃，足足經歷十幾年使咗成億都係要取消，當中最關鍵問題自然係可行性，因為道路如果收費唔等於佢會少咗流量，而只係變成有錢人至會出入，對於減少交通壓力並無改善，而對在該道路上生活的人亦唔公平。有關注人士表示小城交通問題並非源自塞車而係泊車，事實上小城主要街道都有車輛泊滿兩旁，只要有足夠之泊位供所有車輛停泊，對於違例停泊進行強力執法，就能夠大大改善道路壓力。而且今日一般家庭大都擁有一至兩部機動車甚至更多，最簡單係一部鐵馬一部市虎，原因出自現在小城輪班制工作增加，只不過大家為求自己方便而棄乘公司車。亦有唔少中學生返學選用鐵馬代步，究其原因只不過係因為人有我有，呢啲亦係造成近年車輛急增（尤其係鐵馬）的原因之一，要控制車輛增幅，只要將車輛持有人同連登記地址，合計超過一台以上就以倍數徵稅，再配合私人機構及學校等安排接送之交通公具，自然能確保公平而有效地控制車輛增幅，減少車輛只為單一個人代步之用。

交通意見（上）

新年依始官府又出手去掂小城最頭痛之交通問題，繼去年交管阿頭漏口話停車場會大幅加價之後，今次又提出一個徵集意見文本，提出公交優先、綠色出行、世遺保護、區域融合及城規結合等幾個目標，以圖規劃小城未來十年之交通政策。不過文本一出台，就被人插到飛起，因為文本中最矚目的乃限制車輛增長措施，當中包括加大養車成本去叫人減少買車以達至其目的，但係佢無講過當大家都唔用車嘅時候，官府又出動乜嘢措施可以幫助庶民出行呢？而家講緊嘅輕軌都只不過係剛剛開始招標，正一係連石仔都未見到，要等佢建好咗之後，可能小城交通經已癱瘓。現今小城交通問題，除了車輛多之外，同一時間的上班上學時間亦是造成塞車的主要原因。觀乎今次官府提出之意見文本，並無對道路使用規劃提出實際建議。公交優先政策講咗咁多年，官府都只不過淨係識俾錢巴士公司去補貼經營成本，要令庶民有動力選用巴士，至少都要架巴士有完善設備令老弱傷殘能夠順利使用，至可以令所有人都有本事上到部巴士。同時道路設計亦令好多地方根本就唔適合巴士行走，大家都有機會搭巴士穿越塔石地底而無位坐，年青力壯都未必能夠企得穩。而主要幹道亦經常一條巴士龍佔滿一條線，除咗證實巴士多人使用之外，亦證明巴士線路過於重疊，無合理之轉乘規劃。而且巴士司機亦經常有站唔埋，就咁停喺路中心等乘客上車，係因為怕埋咗站有排都出唔返嚟，結果令道路更加擠塞之餘，亦令乘客面對不必要之危險。呢種咁嘅服務就自然更加令人放棄巴士而選用鐵馬代步。官府之意見文本根本就係本末倒置。

慶回歸騎呢事件（下）

回歸翌日，新任知縣除咗霸佔晒小城所有媒體的位置之外，更在網上紅遍全球。著名短片分享網站不出半日，就有四五套剪輯知縣就任時之宣誓短片被上載分享。可能大家為怕身處海外人士未能出席觀禮，所以就將其片段上載分享盛事。不過當中有幾條片有字幕加注就夠晒騎呢，原因係知縣宣誓需要以普通話發言作實，可惜新任知縣之普通話真係認真嚇死人，結果引嚟一眾極有創意之作家們為佢配上神奇字幕，當然係笑到全場轆地，大家仲留言可憐最高領導要捱苦忍到佢講完為止。大家都好奇怪點解新知縣明知自己行將就任，都唔將呢段咁重要嘅誓言之普通話苦練好佢，佢本人普通話唔掂雖然係人都知，佢以後點樣同京官溝通，或者係帶埋翻譯。事關由無人同佢爭個位開始計，大大話話都有成三個月以上，連接機之小朋友都識，要緊記教導背誦好應有對白。但係偏偏唔明新知縣點解連呢樣咁小嘅事都唔做好佢，佢本人喺備受爭議嘅情況下當選，認受性已經被質疑，依家喺就任宣誓上仲咁唔進取，未來幾年喺佢之管治下庶民想唔擔心至奇。另外最高領導向小城贈送一對國寶，作為慶賀小城回歸十載之禮物。但係有喺官府打工之人士謂，單單為左準備小城回歸之慶賀活動，一眾前線公僕都趕工多日，早已送咗好多對熊貓眼俾小城民眾，唔單止前線公僕，年尾幾大節日集中，唔少私人機構亦趕住為佳節進行粉飾工作，所以小城真係早就有大量熊貓眼。不過民眾反而擔心小城的環境會否對國寶有所影響，事關國寶對生活環境極度敏感，稍有差池就會影響其健康，希望官府能夠用心管理好呢對大熊貓，免得大熊貓於小城受苦。

慶回歸騎呢事件（上）

回歸日，全城同慶，加上最高領導親臨小城，主禮慶祝活動及為小城新任知縣就任監誓，自然吸引唔少周邊城市及祖國自由行踩場到訪小城。不過如斯大軍壓境，小城各口岸之把關大佬自然做到唔停手，結果最後推出殺手鐧有殺錯無放過，連一向唔左唔右嘅鄰埠某報小記亦順手被拒入境。該報就梗喺鬼殺咁嘈抗議打壓新聞自由，不過睇真背後嘅資料，該名記者於早前已經喺碼頭採訪過試圖闖關之鄰埠垃圾議員，有指唔通今次係把關官員為咗報番一箭之仇順手將佢拒絕入境。但喺斷估都應該唔會，相信今次同年頭釘錯牌事件一樣，都喺因為條名單太長睇到眼花，加上最高領導到訪更加係殺咗先講。不過今次最高領導親身到訪慶賀，最騎呢者又點只口岸把關之官員咁少嘢，事關一早預告有重要人物到訪，雖然只係兩日前至通知邊個會嚟，但主要街道都一早安排交通管制，正日當天唔單止封路，連海禁都發出咗兩次，搞到同鄰埠兩地之交通延阻達數小時，好彩小城航空交通一向疏落，唔係連空禁都出埋就真係邊度都唔使去。不過既然最高領導到訪，又點會少得每年恆常贈慶之回歸大遊行，其實今年較過往幾年都多咗好多慶祝活動，等唔好咁多人得閒上街，結果今年參與人數梗係比舊年少好多，不過亦有成千人趁最高領導到訪，上街反映小城之問題。同類情況竟然亦發生喺由官府安排之家訪活動上，話晒都喺刻意安排，官府自然精挑細選家庭，但係當戶主被最高領導問到對小城生活的睇法時，身為副校長之文人戶主失驚無神直接反映小城現今物價同樓價高企令低下階層生活困難，搞到同場知縣閃都無得閃就更加騎呢。

查數部最後報告（下）

大家一直等緊查數部不時會提出之報告，去檢視一下官府內部究竟仲有幾多問題，事關根本知縣自己都未知官府內部其實有幾多問題，再加上自從制度改變咗之後，原本有問題的地方加上新的問題，更加難令外界了解部門內部之問題。過去查數部查核幾大使錢部門，唯獨欠缺教育部，今次終於萬眾期待公佈對教育部的審核報告，當然十分矚目，因為自回歸以來教育部使費逐年遞增，使錢質量之好與壞，直接影響小城下一代的未來發展。可惜嘅係今次報告出嚟，結果證實咗教育部同其他官府部門無分別，同樣發生使腳唔抹腳、奢華好大、全無計劃地處理公家發下嚟嘅資源。每次查數部所提出之報告，其對象部門的使錢方式都教人咋舌。今次教育部亦被揭發濫用緊急程序，大部分重大工程都避免了開標而作直接批給，令人十分懷疑當中有否其他唔見得光嘅事發生過。另外官府加大投入資源的同時，卻要支援十五年免費教育，更要將資源投放得更謹慎，令到小城所有學子能夠獲得最佳之教育環境。可惜係，過去教育部一直只著重優良硬件，各校逐年更換投影機、電腦系統等教學設備，亦資助各校番新校舍等裝修工程。然而對於教育人員的人力資源等安排，卻未作出更有效的改善措施，結果令早年教師都要走上街頭進行抗議。今次被查數部揭發教育部裝修大花筒，各教育分站引入高花費的舶來裝飾品。相反教育人員要應付不斷增加工作量，面對經常轉變的課程改革，而教育職程卻仍然維持情況下，勢必再次激發教學人員更大的不滿情緒。

查數部最後報告（上）

小城查數部阿頭離任在即，早就言明盡量爭取於離任前，再為小城庶民公佈一份查數報告。果然無幾耐查數阿頭向大家發表其任內最後一份報告，雖然大家都已經十分感謝查數阿頭過往所做之工作，但呢位官員仍然堅持職責，實在係小城官場內的絕種動物。回顧過去小城仍由外人當家的年代，幾百年來根本就唔會有人負責查數。每次出現賬目問題都係出咗事之後，都係已經壓到收唔到科至爆晒出嚟，結果當然係醜聞一籮籮，所謂高官換完又換。到咗小城自己人作主之後，就出現咗查數部呢個部門。過往十年，查數部往往因應當時使錢使得最勁的官府部門，等佢最後完成項目後就進行埋數整理，以一套較接近國際水平的評審標準，對其目標作出審評。而報告亦往往反映官府其他部門如何運用公家資源，同時亦建議部門主管如何改善內部制度。當然最出名就梗係運動部超支到離晒譜，有腦嘅人都唔會咁樣使錢法，不過無計，錢唔係佢自己嘅，使大咗又有正當法律理據，去幫佢哋洗脫麻煩。但係就全憑查數部向大眾公佈，部門使錢使得幾離譜，亦都俾庶民知監察官府之重要性。事關從來小城庶民都無接受過官府其實係要被監管的教育，查數部之表現正正係表現出合理社會必要之功能制衡。結果，查數部成為眾多其他同袍部門之公敵，因為有查數部，大家做嘢就無得偷懶，同埋要真係用腦去做，而唔係貪高興就搵樣嘢搞、為咗要交功課就求其做啲嘢出嚟頂數。所以今次官府換咗人做，雖然部門仍在，但係功能係點大家心中有數，搵個唔識嘅人去做指揮，等同廢佢武功。

控煙法爭議（下）

小城控煙另一個最頭痛問題，則同鄰埠一樣就係執法困難的問題，事關法案建議公共及私人實體有責任確保實施禁煙之規定，但係私人實體根本就無執法權力，要靠在場人士勸籲甚或警告去制止違例人士。不過根據鄰埠之經驗，唔少麻煩正正就由此而來。酒樓、餐廳、食肆及酒吧等地方最容易出現問題，因為以上地方一般都會提供酒精類飲品，而酒精飲品則最容易令人出現吸煙慾，當一個飲多兩杯嘅人食煙嘅時候你去禁止佢唔食，自然最容易使人借酒行兇，鄰埠過去數年就不斷出現吸煙者被勸戒時出手打人事件，而往往執法者到場前行兇者已逃離現場，令到更多酒吧食肆之負責人拒絕再舉報違規者。到後期，受害者則大多數為同場的其他非吸煙者，在忍無可忍下與對方發生口角繼而動武的情況下出事。加上小城一向地方淺窄，大部分食肆茶餐廳等面積都只有十多平方米，就算設立非吸煙區，亦不能保障區內客人不受從吸煙區過界的煙味所影響。況且官府今次推介的法案，並未有明顯提出官府有何部門去支援執法。而小城一向人治大於法治，過往推出的幾大法案，都遇上執法不力的問題。最簡單莫過如道路交通安全法，新法推出之初嚴打一輪之後，因為反壓力大、執法人員選擇性執法等問題，最後又係維持原貌，大家繼續一邊才查車邊講電話，鐵馬繼續泊上行人道甚至跑上行人道，只要你夠惡執法人員都唔敢大抄。凡此種種都係執法不嚴的後果，即使今次控煙法如期通過後有一輪緩衝期，但相信到最後嚴厲執法，應該出現唔少反彈。

控煙法爭議（上）

小城終於著手推出控煙法，建議室內公共場所包括醫院學校，以至有蓋停車場等公共室內空間都全面禁煙，違例者罰款四至六百大洋。至於娛樂場、浴室及舞廳等則需於一年內設立非吸煙區。官府今次推出控煙法，其實係參照鄰埠經驗加上自身需要而成，根本無乜新思維意念。但係今次建議之控煙範圍，雖不至於同鄰埠一樣連室外公園地帶都要設立吸煙區，但係就出現字花檔可設吸煙區，而酒吧及Ｋ場就唔俾食。話時話，業界自此等同屬娛樂事業出現大細超的情況表達不滿屬於十分正常，雖然話字花檔財雄勢大，設立非吸煙區的工作可謂無難度，但係酒吧Ｋ場等較為平民的娛樂場所則反而不可設立非吸煙區，又一次展現官府政策傾斜龍頭產業。因為大家都知道大型酒店式字花檔內一般都設有酒吧供客人消遣，此等酒吧究竟係算屬於吸煙範圍定係非吸煙區係官府有責任去解釋清楚。但係按照法案建議，字花檔係要設立非吸煙區，按照字面解釋，即係原本整個字花檔範圍都可以吸煙，只要佢劃出一個地方禁止吸煙就可以。如果閣下係字花檔你會點做？梗係將個禁煙區安排到老連咁遠，最好喺廁所位附近，然後其他地方都可以吸煙，咁就既唔會犯法又唔會影響大部分吸煙之賭客。結果十分明顯，就係造就咗字花檔內之酒吧區根本唔使理條法例，因為成間酒吧都屬於字花檔之可吸煙區內，就算禁煙都無用因為四面都被煙民包圍。至於一般地方嘅酒吧就無字花檔呢個免死金牌在手，自然會流失想一邊吸煙一邊消遣的客人，結果再次製造唔公平嘅競爭環境。

京城送禮反而出事（下）

　近年小城不斷填海造地，海岸線經常改變，搞到路過之季候鳥都蕩失路。多年前的大規模填海造地，當時已經有茶客戲曰：「遲早可以就咁行去氹仔。」到咗今次再填三百幾公頃，相信潮退之時真係可以行得過去。就咁睇新聞紙劃出嘅填海圖，以往一半跑山路一半沿海旁走的世界知名東望洋跑道，未來只剩一段與友誼橋引橋平衡的水道仍然叫做有海水，相信到最後呢條東望洋跑道都會變成同新加坡一樣，成為一條真正密封的街道賽道。越臨近回歸日，越嚟越多關於下屆政府的重大新聞出台，但係今次京城送出的新地的消息，正藉下屆知縣剛公佈查數部主管來屆無得留低無耐，令人懷疑未來知縣因為預知京官有大禮送，預早炒咗個識查嘢之人，免得日後有乜閃失，會俾自己人查番出嚟。其實自從年中估領袖遊戲揭盅開始，圍繞下屆知縣的負面消息一浪接一浪。而且未來知縣當了十年司長，竟然面對鏡頭的水平同形象依然咁差，當然一地之領袖唔係單單睇佢外表同形象，但係若然面對質問無一個好好嘅應對，係會好令人懷疑你究竟有無能力帶領全城庶民去開創明天。事關下屆知縣曾對住各大傳媒講要傳承創新，未上任未做嘢乜都唔敢講，但係淨係睇佢執出來屆嘅執政班子，唔好講創新，連傳承都未做到，更加係倒退。因為現任知縣以一招開放賣賭創造小城經濟起飛，雖然當中功過要留待日後歷史去評價，但係就比來屆知縣有膽識，至少政策出咗問題經常被人鬧都勇於面對，政治智慧都高幾班。

京城送禮反而出事（上）

京城再送三百六十幾公頃土地予小城新政府，連同一河之隔的橫琴，小城將有充足之土地資源為未來籌劃新發展，京城為小城提供之支持又一體現。但係今次所獲之土地備受社會各界關注，事關過去十年官府之土地政策都被人詬病，黑箱作業、官商勾結及利益輸送等指摘不斷，不過官府依然故我，永遠仲係依法施政去掩飾及逃避監察。因為過去發生眾多土地問題令庶民對官府失去信心，若官府再沿用過去一貫政策，庶民擔心今次京城的禮物最終仍然係落在一班既得利益者身上，庶民繼續被人強奪資源。所以當消息發出之後，立即引來代議士開腔，要求官府自掏腰包進行填海工程，以免製造機會令部分商家有機可乘侵蝕小城最重要的資源。雖然官府公開表示，新填海造地不會興建字花檔及低密度住宅，但係只要睇咗呢幾幅即將新填海地之位置，全部位於小城半島與離島之間的海域，即係話未來所得之土地即將圍住近年新建之幾大字花檔。今次官府所講唔會建字花檔同埋低密度住宅，又話會建公屋，若果將間公屋建喺間六星級字花檔隔籬，究竟係對唔住公屋住戶，定係間字花檔呢？事實上對雙方都無好處，因為唔會有人鍾意花幾千蚊，入住一間隔籬係高密度公屋、打開個窗看見對面掛滿胸圍內褲之酒店。正常家庭就更加唔希望仔女返工返學，都要經過紙醉金迷、聲色犬馬之字花檔區，直接影響子女及家庭的生活。小城從來都無做過乜嘢所謂城市規劃，而政策上亦都無諗過點樣做先至係有效利用土地，只不過係有得爭取多啲資源，就攞咗先講，到時點發展根本無一個清晰嘅概念，今次京城送禮可能反而出事。

河蟹定係河蛙？（下）

候任知縣搵個政務官頂替查數部老頂技術官員個位，最大問題自然係認受性。技術上當然唔係問題，因為技術層面基本上無話唔可以少咗邊個，但係去到指揮決策層面，就唔係一般政務官可以應付得嚟，事關專業就係專業，唔係一般官僚有能力去處理，至少喺內部就要面對一眾技術人員，都要求有非常高的智慧及管治能力，今次候任知縣的選秀實在冒唔少風險。而面對外界，更加唔係單單對住鏡頭識講嘢就得，事關候任知縣今次份名單好明顯就係唔想以後喺政策執行上，被官府內部其他部門所左右，加上大部分舊人留任，可以預期未來幾年的官府都唔會有乜嘢大作為，但係唔等於佢哋無出錯，只不過係少做少錯咁解，咁嘅環境下查數部可以講無乜作為空間，同廢咗呢個部門無乜分別，只不過係京城規定必須要有此部門，咁就不如搵個唔多識嘅人去管，就搞唔出乜嘢花樣。而候任知縣亦履行競選時的承諾，就係【承傳】，可惜嘅亦都只係得【承傳】而無咗【創新】，唔單止無咗【創新】，直頭係走番轉頭。雖然現任知縣過去十年搞咗壇嘢出嚟要候任知縣執手尾，但係候任知縣都唔可以用龜縮方法，去逃避庶民對官府政策及運作的知情權。作為有責任有承擔的知縣係唔應該有呢種心態，但係陰謀論者有指今次候任知縣唔止係延續現任知縣嘅政策，現任知縣直頭係影子話事人。呢樣都唔難理解，事關現任知縣對小城各方之影響力實在太大，有事要搵人出面擺平幾乎不作他選，若然屬實，小城未來就真係河蛙同河蟹嘅世界。

河蟹定係河蛙？（上）

查數部老頂來屆無得留低，坊間即時罵罵聲。事關剛剛至發生新任垃圾會保皇代議士，開腔指查數部於提起內部調查程序時，向外公佈對掌櫃查數後之報告有違守則，似乎預視咗查數老頂不被候任知縣信任。但係查數部過去一直十分盡責，隔一排就會對官府某部門之使費及運作進行查數，每每令到被查部門更加神經緊張，因為查數部曾經嚴厲指明某大運動會揮金如土，結果最大鑊係搞到當時之社文部極度無面，但同時亦受到廣大庶民欣賞同支持。然而當年執掌社文部之人，今天已貴為候任知縣，時移勢易到佢有權揀人之時，自然一次過埋單計數。今次換馬原本唔單止查數部老頂有變，連老廉都調任新位，不過就再升一級，真係同人唔同命，但係大家都心中有數，查數部一日唔交報告，老廉都未必會做嘢，但係查數部交足數，老廉就唔做唔得。因為今次候任知縣公佈咗來屆官府各部門掌管名單之後，已經出現咗一個好清晰的未來知縣的要求，就係比河蟹更河蟹。點解咁講？事關候任官府各級主要官員幾乎完全無變，大家雖然以前係同事，但係到今日莊閒已定的時候，真係要買單計數者又點會只係查數老頂一個咁少呢？所以只能夠講候任知縣其實十分清楚整個官府之主要官員都只不過係泛泛之輩，如果再有十分盡責而又有能力之查數部主管在位，自然就會繼續發生過去一直打擊官府威信的事件。咁嘅情況對於一個新任知縣凳都未坐穩，自然唔會搵自己笨換得就換，以減少對自己能力不足的負面影響。

十年成就與遺憾（下）

過去十年，媒體仍然堅持面對權貴不斷追問的前線記者經已所餘無幾，再者十年來小城環境發生鉅變，工資比例不斷改變的同時，各類基本生活基數越來越高，要維持固有生活條件極不容易，加上各大企業對資深人才的需求與日俱增，能夠堅持理想守住前線長達十多二十年同樣工作除了不容易之外，更雖要有一份犧牲的精神，才能風雨不斷地為大家提供新聞現場的報道。回望過去十年小城媒體的態度，從最初的一面倒唱好，到間或出現指摘，及至近年開始對部分政策及施政主動進行評論，多少反映小城言論空間增多，亦有新增的全民議事及議政的節目，俾庶民有發洩的空間。但係話分兩頭，如果社會上唔係積貯咁多怨氣，媒體就算開放更多空間，都未必吸引到庶民參與同支持。咁即係話都係因為官府過去多年之管治不得人心，政策混亂及執行率偏低，使民間怨氣日深，至會催生媒體由全面保皇慢慢走向部分監察的方向，亦係庶民對於官府管治、媒體監察角色的認識加深了不少。從呢個角度去睇，庶民關心社會的意識提高，亦會推動到媒體更加積極咁去監察官府的工作，而官府亦都需要向全世界交代，所以亦會小心諮詢各界去進行施政。
　不過以往十年，知縣自己就唔覺遺憾，我哋就覺得非常遺憾。事關從媒體上所反映唔少官府在政策上執行的漏弊，至今能矯正的政策寥寥可數。而一直被指摘之法律滯後，到今天都唔見有任何進展。反而唔係關乎重大民生的廿三條，竟然又可以火速通過，咁樣就足以證明知縣同庶民期望有幾大落差，所以佢自己根本就唔會覺得遺憾，覺得遺憾嘅就只有廣大庶民。

十年成就與遺憾（上）

知縣早前對自我過去十年的評價唔打分，亦唔覺得有遺憾，亦都向前看，依然故我的勢態良好，帶各位遊足一個大花園，呢個亦都係大家一早預咗。但係今次有新嘢，就係由知縣本人親口講點解有人可以有船隊、點解有人可以自動放棄一塊地但係官府又會主動俾番塊新地俾佢哋用。當然結果係點已經唔使再評論，但係最奇怪嘅係原來一早佢本人就準備咗官方答案，而竟然刻意預留喺傳媒座談會上面先至向外公佈。作為小城回歸第一代政治人物，當然方方面面都圓滑平穩，而媒體仍然追逐其個人發表。事關作為過渡前後的庶民代表，十多二十年來面對各大小傳媒，基本上可以講唔單止對記者熟口熟面，部分更加係老友鬼鬼，對於見慣場面之政治人物，亦唯有久經鍛煉之前線記者，先至有本事面對人物作出正面挑戰以及尖銳發問。不過如果想講高手過招，今次知縣似乎開始技窮。經過以往多年的表現，知縣的應對以及反應大家都瞭如指掌，亦都無期望及盼望。不過面對資歷深厚的小艾，作為一代知縣最後唯一指明發問之前線記者，有機會真係想訪問一下她點樣面對小城一眾庸官，獲得問題問非所答及那種不禮貌對待之餘，點解仲可以堅持咁多年不停追問？眾所周知今天城內牛鬼蛇神當道，周邊誘惑不斷，要堅守前線報道絕不容易。但係我哋更加應該向呢批堅守多年前線採訪的記者們致敬，事關記者天職就係發問，同時亦唔係你問就會有人答你，最重要嘅當然係你識唔識發問嘅智慧。觀乎兩地前線記者水平，整體發問質數下降，今日有幸仍見小城存在資深人員能夠作出尖銳發問，這些才算是小城過去十年的成就才對。