烚足十年（下）

點解研究西洋法律史要到小城作研究？終審法官係話小城仲用緊西洋人係石器時代所訂立的法律，根本連西洋人都唔用好耐，咁如果要研究西洋法律歷史，就梗係要到小城參觀吓呢套石器時代法律可以點運作啦，遲早可以被列入人類非物質世界文化遺產，到時旅遊局又多一個賣點可以推廣自由行去法庭參觀運作。其實幾個世紀以來，小城法院對於大部分庶民嚟講都係只可遠觀、千祈唔好入去，因為入到去大家可能連廁所都唔識搵。幾百年以嚟小城法律只係俾少數識西洋話嘅人睇，庶民要理解除咗搵翻譯之外，就係靠相關輔助人員口傳口咁得到個大概。但係換咗官府十年咁耐，要將西洋話改做白話嘅工作進展緩慢，當中又涉及小城自己立法之後，部分翻譯咗嘅法律又被廢除，因為新立之法律要有翻譯，要廢之法律都要翻譯俾大家睇點解要廢咗佢，結果即係白做不特止，仲阻礙其他仍然生效之法律翻譯進度。情況等於整水喉唔閂大水掣，點整都係漏水。點解小城法律界咁羞家？要追究當然係要問最高負責之政治任命官員「管家婆」。先前提到法律譯完之後廢咗佢嘅狀態，更加係由佢一手搞出嚟，點解？佢身兼小城行政同法務，法律運作之好與壞關乎行政當局資源的配合與否。制訂法律翻譯步驟的同時，有無考慮到條例會否被廢？而唔夠資源培育法律人才更加係責無旁貸。但係以打工仔角度睇「管家婆」，法務既然要行政資源配合，打工仔自然要睇吓邊個出糧俾你，法務部分自然要讓路俾出糧俾佢嘅行政當局。了解其中因由就可以理解小城法律體制點解可以烚烚吓烚足十年。

烚足十年（上）

一年一度小城之司法年度又開始，照例所有官府執法與司法部門都出齊見人，咁當然連知縣同一眾法律相關官員都要俾面出席，向世界表現小城都有司法制度，同埋小城都被法律所保障及限制。但係除咗殺人放火之外，人治先至係小城嘅社會根基。我哋今日喺新聞紙有得寫咁耐，其實看官都根本清楚呢個欄從來都無乜點讚過法律單位，無他者只不過自己人當家之後，小城法律運作一直都無乜表現令庶民讚賞，十年來法庭依然高據庶民頭痛指數的第一位。但係小城法庭亦曾經數次裁決令庶民覺得，除卻人治之後仍然有需要靠法庭幫手解決嘅問題。例如「公共行政總規章」違法事件及剛過去的垃圾會死票復活事件，都表現出法院於小城中立仲裁的地位，亦令在人治勢力過大的情況下庶民有原則性的保護。而今屆司法年度開幕禮上，連終審法官、律師會主席及檢察院長，都罕有地對小城法律體制烚烚吓烚足十年忍無可忍，事關作為資源分配的行政當局在分配不均的情況下，令到司法界嚴重資源不足。大家睇吓南灣舊法院停用之後，小城之法院被安排分拆到不同的商業單位內，幾個一審法院及法庭竟然喺大家返工搭同一部電梯的商廈內，情況同非洲部分法庭喺民居旁邊的木屋內開庭無乜分別，甚至連門口個「石Ｑ」都係同一間公司負責。相反公共行政大樓就好快建好同埋可以運作。但係呢啲都只不過係硬件上之差距，真正令小城法庭效率低下嘅問題，係法律改革步伐仲慢過要國家航天員登陸月球，難怪連終審法官都講將來要研究西洋法律史一定要到小城。

有無新天地？（下）

剛剛官府同六大字花檔傾掂數，未來將所有人都規限於只有廿一歲以上至入得賭場，包括在內工作之員工。過兩日，又爆出其中一間字花檔交還一幅官地新聞，綜合各方資訊，明顯字花檔於海嘯後水喉失靈，原來之計劃被迫放棄，最後只能交還官府另作用途。今次官府能順利將入場門限提高到廿一歲，一般估計都係因為金融海嘯之後字花檔收入大減，變成人手鬆動咗但係請落之人手又唔可以隨便炒咗佢，結果若果將人手年齡提高，就可以簡單咁減少操作人手，就算唔炒人，未來集團擴張都可以請少啲人，甚至調配人手就可以搞掂，結果可以話，反而係官府俾返個台階字花檔落台，救佢一命都未定。經歷數年由字花檔政策所帶動下高速增長之後的小城，人民生活與民生面貌發生巨大變化，令小城庶民、官府以至商家仝人，都終於驚覺到單靠一條「橋」係唔可以走一世嘅，所以呢幾日適逢垃圾會換屆前夕，又將臨知縣亦喺年尾換人，大家都覺得來年即將有新氣象。而現屆官府亦都趁機會與字花檔講數，希望大家能有共識。但係呢次不能否認官府揀咗十分好時間同埋理據，令到事件能夠順利進行，少有地能夠把握最佳時機去處理自己搞落嘅手尾，都叫做做番啲嘢，原本對於現屆官府最後一年都唔會有乜動作嘅情況下，算做為來屆鋪番少少路，等下屆知縣唔使啃咁大舊豬頭骨。雖然係咁，來屆無論知縣定係垃圾會，都要面對更加大的困難，就係後金融海嘯下小城另外的出路將會如何，就要睇執政者有幾大胸襟，去平衡既得利益者同廣大庶民之利益分配。

有無新天地？（上）

本屆會期終於開波，一個完全無驚喜嘅垃圾會其實大家都唔會有乜期待，事關就算所有人都換晒班，但係遊戲規則唔變，幾叻都無用。而家連京城都玩改革開放，根本連鄉公所都係一人一票選代表、同埋選領導。反而今時今日嘅小城，知縣只係靠三百人選出嚟，而呢三百人，又係由一大班社團互選之後得出嘅產物，而呢班社團卻又係靠官府每年批錢俾佢哋營運落去，只要每年交兩三個活動同埋印番三數本刊物，就可以足夠將會內重量級人物、於政治利益交換下送入官府內的委員會、諮詢會、甚至垃圾會，當然最後就有可能做埋知縣都得，呢樣就係小城內政嘅組成部分。呢家嘢全個小城都知，但係又確實真係唔少人鍾意爭逐呢種政治勢力。無他，有咗政治勢力，自然有實際利益，就算唔係直接利益，至少都可以喺政策上作出傾斜而有利自己，即係油水位。以往之政治版圖，從西洋人與京城傾掂數之後，就將部分小城資源分配俾華人代表，以圖平定內部政局不安。到今日經已到咗習以為常咁分配利益，實質政治需要已經改變為利益互換，因為當初之西洋人經已變為自己人當家，已經唔再係被人殖民，所以如果再搵唔到第二條橋去解決內部政治問題的話，根本就唔可能達到京城指示「和諧社會」之目標。事實上要有效宣洩民間不滿，按照今天之遊戲規則就只有垃圾會可以作出適度之功效，但係單憑少數代表發聲就以為可以簡單解決問題就似乎太天真，若果未來官府仍然諗住就咁靠幾個勢力不均之代議士發吓聲，就可以平息內部紛爭，跟住政策依舊的話，唔好講「河蟹」，連「河蝦」都無機會。

反對鐵馬咪錶背後（下）

今次鐵馬咪錶方案最大之反對者梗係一眾鐵馬車主，亦有售車業界代表及交通關注組成員質疑其設置效能。兩位上公仔箱與主持討論今次咪錶事件時就搬出一套理據去質疑官府今次試行之成效：首先泊位不足的狀態下加設分隔欄設置咪錶，反而減少泊位數目。另外鋼架分隔欄會阻礙鐵馬落腳架停泊，亦無後眼睇背後而來之車輛。而咪錶位如果設置鎖位，當發生火警、跳樓事件時，車輛不能搬移引發危險。還有今次咪錶設置五小時及兩小時的咪錶時間不足，唔能夠有足夠時間過關。最後更提議十年驗車期太長，應縮短十年驗車期去淘汰舊車減少小城鐵馬之數量。
　本來車輛泊位喺全世界都係由購買者先去評估自己如何安置車輛後，才決定購買與否。並唔會因為自己買咗部車之後無位泊，走去鬧政府唔俾個車位佢泊，講出嚟都被人笑。至於有無後眼睇從後而來之車輛，就算有無鋼架阻礙鐵馬都係咁泊咗咁耐，點解加上鐵架至有人投訴？而鐵馬鎖在鋼架上如遇火警或跳樓事件，無得拖走鐵馬而造成之危險就更加好笑。跳樓消防要開救生網，消防自然有大力剪開鎖拖車，就算係四輪車輛亦有方法搵拖車拖走，如遇火警就梗係車主自己走嚟開鎖駛走車輛，車主本身都唔出現大家就唯有救火啦！至於咪錶時限問題上集都已經講過唔再講。最後利用縮短驗車年期去減少鐵馬舊車之理由更搞笑，依家小城唔少人都係一部鐵馬一部四輪車，就算縮短鐵馬之驗車年期，亦會再買一部新車取而代之，反而呢個反對理據最受質疑至真。大家都只不過係想官府解決佢自己面對緊嘅問題而唔係解決全體嘅問題，邊會有進步丫。

反對鐵馬咪錶背後（上）

執筆日鐵馬咪錶尚未實行，而坊間經已鬧哄哄，支持及反對意見各有立場，唯獨反對一方之人數似乎具壓倒性。官方今次試行咪錶制，亦不失為絕橋一道。從用者自付之理念角度出發，但凡道路使用者都應該付費去安置其個人車輛。呢樣嘢只要向所有駕駛者詢問，就不難發現連死硬派反對者，都只能支吾以對不敢宣之於口話「以前不嬲都唔使錢，點解依家要俾錢？」。事關今日只要唔係行動不便者，小城所有人都有過坐鐵馬的經驗，甚至細如手抱嬰兒亦要被母親抱在手中乘坐父親駕駛之鐵馬一同出行的鏡頭日日見到。基本上早前通過咗但係又被大力反彈的「道路安全法」經已形同虛設，都唔記得幾耐無見過人執法。今次官府試驗之鐵馬咪錶設於關閘附近，公仔箱於上址附近進行街頭訪問時，十個有九個駕駛者都話我如果過關咁點返嚟入錶？咁就印證咗一樣嘢，大部分鐵馬駕駛者根本就無意識「付費去安置其個人車輛」，即係唔會理附近有一個大型停車場提供大量鐵馬泊位呢個現實。四輪車主自然有咁嘅經驗：只要泊入關閘停車場，就會發現所有車輛都會泊在最近出口的走佬位置，包括二輪及四輪，而兩層闊落的泊車空間又只會有底層之停泊位有近八成之入座率，當中混集四輪及少量二輪車，而大部分二輪車則全停在底層的行人道位置阻礙出口，四輪車即又停泊於原本設置給二輪車用之泊位上，結果該停車場的所謂停泊規則根本無人會理。當然啦，連地面官府之管理都咁差，私人公司之收費處又點敢跟足規矩罰人錢丫，只要大家交足泊車費就算，即係只要你夠惡就無人敢話你。