三聚氰胺與雷曼兄弟（下）

花旗國最大私人投資銀行雷曼兄弟投資銀行宣佈申請破產保護令，正式結束一百五十年的歷史、一個賣牛兒子兄弟所創的銀行界神話。按照官方解釋雷曼兄弟資本不足繼續營運，又冇人肯作擔保買盤所以申請破產。以上都係官方公佈，根本信唔過。因為問題並唔單止發生喺雷曼兄弟身上，而在花旗國上下、以至全球金融界都相信花旗神話唔會破滅。結果花旗自己出事之後就拖垮世界其他國家嘅金融機構甚至國家經濟，同三聚氰胺嘅影響一樣咁大。點解咁講？兩個都係國家級企業，代表著全國的領導地位，一舉一動經常都備受關注，即係話，此等企業一般都與政府及相關監管機構有著密切往來，而且都在股票市場佔有絕對指標性作用，有著牽一髮動全身的存在性。既然受到嚴密監察的機構都發生重大事故或問題，咁監管當局究竟喺度做緊乜呢？
　簡單分析，根本雷曼兄弟同三鹿奶粉事件一樣，存在的問題早就有人發現，例如加料奶粉零五年就有管理層知道，而管理層冇理到任由中間商人繼續加料，其他生產商之原材料提供者發現咁都冇問題，自然有樣學樣所有品牌都有被加入三聚氰胺這種化學品，發展下去自然越加越多，根本就唔會理有乜影響同影響幾大，直到最後出現大問題，各階層不斷推卸責任，結果就出現信心危機同骨牌效應，使全民信心盡失。投資銀行一樣以商業利益為依歸，把原本應該只負責協助客戶投資的規條放在一邊，單單追求自身企業增長的目標，盲目追求利潤，把客戶的資金當作自己的錢一般投資股票債市，加上花旗推薦的過度消費，環環相扣之下令到全球金融界都被拖入一個萬劫不復之地。

三聚青胺與雷曼兄弟（上）

「神七」即將升空，可惜我國的下一代就無可避免地要落地獄，因為大家都食錯奶粉信錯品牌，搞到連嬰兒都生腎結石。繼大頭嬰兒奶粉事件之後，國內揭發不法商人於奶粉中加入三聚青胺以蒙混蛋白質檢測。事件唔止未能平息而且仲越鬧越大，質監局初步調查之後，全國有二十六個品牌都發現含有不同程度嘅三聚青胺，範圍仲唔單止係奶粉，連雪條、牛奶甚至咖啡等奶類製品都出事，信心根本唔能夠喺短期之內挽回，而影響範圍已經由內地以至小城及鄰埠，最後連非洲中東等地都發現有國內產品出事。而過程中有大大小小嘅專家出面表示會影響健康、致癌等致命危機，不過最觸目驚心的是鄰埠官方報告中，國內各款奶類產品都有加入三聚青胺，簡單講句細路仔食了相關產品都有機會出事，而庶民則在事件未明朗之前所有國內甚至外地輸入的奶類製品都暫停購買。最傷心莫過於國內全體之父母親，由於首先發現出問題的生產商乃全國最大企業，又有國家免檢標籤，基本上有齊國家級保證，咁都會出事，證明就算幾有保障都好易出事，之後國家都保你唔到，令到全國消費者都對國內產品之信心即時崩潰。京城都有母親甚至在鏡頭前表示，為了支持國貨及國企才飲用祖國產品，貪錢的商人竟然以小孩的生命作為利潤來源而痛哭，雖知道國內的一孩政策令大部份家庭都把大部分資源投入到下一代上，而國家亦重點培育下一代的成長，而無良商人就正正掌握這兩個特點，不斷從中榨取利潤，直接令無辜的下一代成為代罪羔羊，等同雷曼兄弟要全世界代它付出代價一樣。