心地唔好

過年期間唔少鄰埠旅客鍾意嚟小城玩兩手，希望發番多少橫財博個新年頭彩，就算唔係咁，小城一向都被鄰埠人士視為自己嘅後花園咁，過嚟短假休息兩三日。不過近年小城旅客數量屢創新高，一向視過大海等同搭地鐵咁嘅鄰埠旅客，今年新春就出現咗預料唔到嘅意外，就連船公司都盡晒人事唔夠船疏導旅客，導致四百多名旅客滯留碼頭。事件當然被鄰埠媒體全面報道，有報紙大大隻寫住：即興過大海港客變「難民」。講真，呢單「意外」好明顯係人為造成，嚟小城玩即興除非你係「新哥」啦，否則無人敢擔保你有船票或者酒店房。今時今日就算小城地膽，遇上大時大節都只能預先訂位調度，方能確保有食有住。皆因單係今個春節高峰期，旅客入境就達到廿萬人咁多，邊有咁多船位同房間吖。再者今年酒店房價飆升嘅程度破晒紀錄，都係因為祖國嘅一班富二代都嚟小城玩兩手，就連鄰埠本土嘅名店都被祖國同胞所淪陷，要同佢哋喺小城爭房爭船票，鄰埠似乎人數同財力上都未夠班，而且國內同胞早就取代鄰埠旅客成為小城最大客仔，再唔係鄰埠嘅後花園很久矣。可惜鄰埠人士仍然未能調節心態，硬要將無船票賣嘅責任推俾小城。佢哋計落都係最多等咗三個幾鐘啫，都未及歐洲大風雪嘅英倫等咗三日都未返到屋企嘅二世祖咁辛苦，結果咁都要過小城一幢抽下水，心地真係唔係幾好，咁海洋公園班旅客係唔係更加似難民呢？話晒碼頭都有瓦遮頭，好過喺巴士站曬住話你知今日無票賣，明天請早。

小城開年飯

新年流流為免大吉利是客死異鄉，或者撒手人寰之時剩番一具木乃伊（被人斬到放血咁一滴都唔剩），決定留低消費支持小城經濟。當然大時大節小城周圍都搵食艱難一位難求，雖則新春期間並未幫襯，但忽然覺得小丑漢堡包十分可愛，任何日子都能提供你飽肚嘅機會，仲係廿四小時隨到隨有唔使等位。記得開年飯當晚由於家族眾多，負責訂檯親屬足足訂咗三圍至能完全容納我哋呢班蝗蟲。由於今年首次族中長老下放權力比新一代拍板，新鮮人自然唔敢怠慢辜負長老期望，搵番間外資五星級酒店中餐廳舉行家族團拜。過往由於族人秉承傳統教誨，一直都係幫襯開甚有交情之地道中菜館，而且年年如是一間大房兩三圍人一齊吵鬧，私隱極強的個體空間。但係唔知係唔係地理空間設置關係，今年所訂之星級中菜廳竟然係無房，不過都唔緊要坐大廳舒服都一樣。可惜嘅係當晚呢間星級餐廳好明顯地over booking，可以話完全唔理空間幾大一樣加檯加櫈，結果當然係插針都插唔入啦。大軍殺到時知客竟然只識煲冬瓜咁都算嘞，更離譜嘅係全晚食飯要到不多埋單時，先至有人送上一早柯打咗嘅滾水，仲要係洗碗嘅阿嬸拎出嚟，上菜順序混亂，例湯喺美點雙輝時至出現，仲要係廚師客串埋傳菜一職。外資五星級大酒店嘅中菜都搞成咁，真係唔敢想像其他小企或者一般嘅粵菜館會提供乜嘢服務水準。大家可能會話大時大節有得你食都唔好要求咁高啦，但係作為一個國際休閒旅遊城市定位嘅小城嚟講，咁嘅服務水平唔單止唔合格，直情係無資格接待旅客，間菜館竟然仲敢收十個巴仙嘅服務費。

減少廢物處理

風水部揭發有大量內地工業廢料，循正常途徑取道陸路運到小城之垃圾爐焚化，或者喺堆填區作傾倒。當中嘅工業廢料包括羊毛皮同牛皮邊角，呢次係首次發現國內有廢料會利用境外地方進行傾倒或處理。事件反映咗國內近年對環保意識加強咗唔少，令到以往一直罔顧損害環境嘅工廠不得不另覓途徑，處理工業廢料。今次嘅事件被懷疑係不法商人，睇準小城處理垃圾係分毫不收，所以不惜老遠由國內僱車，經過正式報關手續，將廢料寫成有用物料矇混過關，最後去到堆填區或者喺焚化爐燒毀，即係話就算搞好所有手續加埋跨境貨車租賃費，都仲比國內處理廢棄物嘅費用來得划算。事件證明咗小城官府各部門根本就無溝通，要佢哋合力去阻止不法行為唔使旨意。好簡單內地廢料通過合法報關途徑抵達小城海關，但係報關文件竟然可以無明確嘅收貨人，海關只係查過貨品並唔係違禁品就可以通行，明顯把關不力。另外廢料廢與唔廢根本就無人查證，就算今次風水部明確表示唔會接收呢類廢物，不法商人只要求其搵個人進行收貨，跟手轉車直接送去堆填區或者喺焚化爐處理都仲得，即係話法律同規範上有漏洞，不法廢料依然可以合法咁進入小城。要杜絕內地廢料利用小城免費處理廢物嘅漏洞，官府應從源頭處理，海關應該識得分辨何為廢料同有用物料。至於徹底啲就應該對垃圾處理進行收費，除咗可遏制非法處理之外地廢物之外，更可以減少小城自身所產生嘅廢物，令小城環境可以得到進一步嘅改善。

寶島派錢風雲

內地富豪大鑼大鼓空降寶島，高調環島巡遊，向寶島貧窮戶進行救濟，而且宣佈以規定金額派利是「紅包」方式向民眾發放，每人約可收到一萬台幣的紅包。如此高調扶貧，惹起寶島朝野唔少爭議同評論。睇番呢位富豪嘅扶貧過程，一部大旅遊巴周遊寶島派錢，路上不時遇上阿公阿婆跪拜求錢求助，富豪儼如古代巡撫出遊，兩旁不時有人跪拜申冤。但係路過之地知道有錢派，連精力充沛嘅後生仔同中壯年人都出嚟跪埋一份，全程仲被媒體拍錄播出，搞到寶島唔少人覺得好無面。又難怪嘅，講貧窮寶島又幾時窮得過國內山區嘅人呢！目前小城仲有唔少志願團體，依然定期向國內貧困地區進行人道援助，大家就質疑國內富豪點解唔先照顧咗本地嘅低下階層之需要，反而千里迢迢走到寶島派錢。耶穌教落：「行善之道，左手唔能夠被右手知道。」即係話做好事要低調不讓人知，今次呢位國內富豪事先張揚，除咗令寶島官府面目無光之外，更令一眾得把口照顧民生嘅「立委」無地置容，搞到件事原本由扶貧變成「政壇照妖鏡」，如果話唔係政治騷講都無人信。至於出嚟跪地行乞嘅青年人大家睇唔過眼，但係有著數就梗係出嚟博吓矇啦，呢樣唔理喺邊度就算鄰埠同小城，都有人一樣咁做，只不過係金額多寡嘅問題。不過唔理係唔係政治騷，扶貧行善都係一件好事，就算乜嘢人利用今次事件進行炒作，呢位富豪嘅做法，總好過寶島嘅各大富豪同埋首富乜都唔做，淨係迫到同佢打工嘅跳樓。

如何教育下一代

　同叔幽咗賭王一默，回記者一句「我邊有咁多老婆呀」認真抵死，街坊拍爛手掌。果然係齊人之福唔易享，不過點都好，最緊要係平安過渡唔好搞咁多嘢。事關小城近年經濟成就得來唔易，大家都付出咗好多，呢幾年小城除經濟起飛之外，社會亦都付出咗唔少代價，由以前因為利息太貴買唔起樓，到今日樓價太貴而買唔起，代表咗呢幾年嘅經濟發展，徹底咁改變咗小城庶民嘅價值觀，咁大嘅問題，都係上任知縣一手造成。上任知縣改變遊戲規則，是福是禍到今日仍未分曉，不過小城於世上嘅知名度確實提高咗唔少，君不見近年海外旅客數量提升唔少，而且每逢小城發生大事，外地媒體都俾面撐場，甚至金融風暴核心國嘅冰島，都不惜千里迢迢到小城作過投資，雖然破咗產，但就確認咗小城嘅國際知名度提升咗唔少。不過就算知名度有所提升，都唔代表小城有足夠嘅市場力量，容許各方專才嚟小城咁彈丸嘅地方百花齊放。就等如小城近年唔少高等院校有唔同嘅課程，由博彩娛樂到電影視覺藝術都有學位課程，就連運動都話有畢業證書。小城究竟有幾多專業運動員？大家有睇過邊部戲係全部都由小城人主演同拍攝？邊個夠膽講小城可以容納幾多電影專業人才呢？以小農經濟體系發展出嚟嘅小城，就算有幾國際化都好，都唔可以排除小城嘅微型經濟體系唔能夠改變嘅事實，就係無出路！若果仲唔改變高等教育方向，未來將會有更多人白白付出四年時間讀完學位課程之後，最終走去派牌等養老，要改變呢種心態官府必須重新定位未來教育路向，好等小城嘅下一代能夠有足夠裝備，去應付下一波世界之變化所帶來嘅影響。

爭產下的受害者

上個禮拜小城最轟動新聞，莫過於小城賭王家產分配一幕。年屆米壽之年嘅賭王，一個星期下來不停發出家產分配新聞。老實講以賭王一家四房，仔女都成十幾廿個，庶民一早都預咗賭王家庭遲早出現爭產問題，問題係搞幾耐同埋搞幾大咁解。鄰埠年中都發生唔少富豪死後家族爭產事件，其中最出名嘅梗係「小甜甜」單爭產官司到而家都未搞得掂。不過賭王呢次嘅劇目精彩到日日新鮮，除咗因為係富豪仍然在生就發生爭產事件之外，首先由家族公佈家產分配之後，跟手又話炒咗賭王嘅代表律師，不過未夠半日，律師就已經發炮指家族嘅分配唔符合賭王意願。但最重要嘅係竟然富豪本身都被人拎出嚟做道具，照貓紙讀聲明，最後仲要搞到律師要上法庭告十一個家族成員添！曾經叱咤吒風雲嘅賭王今日被迫做人肉佈景板，庶民關心嘅，梗係賭王轄下一眾企業，會唔會因為呢次產權分配而影響到公司運作同決策。好笑嘅係官府同鄰埠交易所都話未收過賭王企業股權變動嘅申報，即係話事件並唔係官方正式決定，因為如果真係咁做有規定必須向官府同埋交易所提出，否則就係犯法，因為法例上規定任何上市公司嘅股權變動，都要通知官府當局先至可以正式公佈。不過大家經過今次一役之後，知道原來咁樣做都係無王管，因為佢哋揀咗用送贈形式，就可以唔使通知官府自己話點就點，結果幾日落嚟賭王公司股價大上大落，雖然事實仍在發酵當中，但最終因為事件而損失嘅股民究竟邊個賠俾佢哋呢？官府係唔係有需要修訂法律，去規範呢種咁嘅消息發放方式？

高增長與國寶

官府最近宣佈小城舊年嘅經濟增長，肯定超過百分之二十，連祖國嘅百份之十都唔夠小城嚟。呢啲咁驚人數字係好係壞真係見仁見智，只要稍為知經濟狀況嘅庶民，都可以預期呢種咁高增長情況隨時會逆轉。無幾多年之前小城周邊至發生過群集性傳染病，搞到人心惶惶，而經濟強如鄰埠等地，都因為疫情影響搞到死城一樣，以小城咁嘅休閒娛樂為主嘅經濟體，有乜風吹草動即刻回到未開發前嘅狀態。再者，近年小城高速增長，官府好大程度上係靠出賣小城嘅資源，加上京城開放國民支援小城旅遊字花業，令到小城喺人為政策傾斜下得倒咁驚人嘅數字。可惜嘅係小城由地方知縣以至平民百姓，對突如其來嘅財富根本就完全唔識得點用。簡單如國寶館咁細嘅工程，就算工程預算點樣差法，都唔會喺建館完工前一個月，官員仲誓神劈願話無超支，結果一個月後就由預算內嘅八千萬超支到九千萬，足足多左十幾巴仙，一個月內物價應該唔會加價十幾巴仙啩！官府就解釋因應專家意見將個館移入咗，跟住至發現新地點原來地質有好多石，結果就要超支，可以睇到官府最初所作出嘅預算，根本就冇聽過專家意見，只喺自己用一般建築嘅預算嚟做，到專家抵達現場至發現地方唔多好，同細路哥砌積木無乜分別。但就算移幾入都冇用，根本專家就唔知國寶館對面即將有大型私人屋苑落成，而且喺另一面既有由垃圾堆砌建成之高球場，更有分貝甚高至高卡車場，相信國寶住落一年之後，就會享受到呢個與別不同嘅小城生活，到時如果國寶有乜頭暈身　，結果又默搵地方搬，呢種咁求祈又唔科學嘅決策，遲早好似鄰埠嘅中華鱘咁凶多吉少。

博大霧

新年無幾耐，小城風水除因為「飛灰」事件一路未解決之外，呢兩日又爆出垃圾高球場，竟然唔理「風水部」反對，偷雞喺場內自行築路，諗住製造既成事實嘅假象，博官府最後唔反對工程。可惜就喺差唔多完工之制，被官府揭發是項非法工程，「風水部」即時派員檢查工程對附近環境之破壞程度。
　各位只要唔係小學生，都應該有啲印象呢個高球場原本就係垃圾崗，喺未變成高球場之初，垃圾嘅高度高出附近路面成兩米有多，當時每次乘車前往路環，都要經過臭氣沖天嘅上址，先至可以到路環呼吸一下無咁污染嘅空氣。但唔知點解外資鬼佬唔了解歷史定扮唔識，一於唔理好醜整咗條路至算，博你官府無人無物，唔會查到呢個私人地方。結果造成條路都差唔多建成之後，官府至有人發現，呢個有條件嘅私人地方做緊犯法行為。好明顯地老外真係蝦你官府今天無人無物，民望低下，處理問題雜亂無章笠笠亂，最緊要嘅係無冇法冇規，就算犯法最多都只係罰款了事，點都唔使上身。要知道呢個垃圾高球場底部做嘅唔少設置，對垃圾進行生物解降，以對小城環保能夠進行適當保護。再者呢個垃圾區建設本身其實十分落後，好容易受破壞。外資就係睇準小城官府根本就未有能力抗衡，就算係罰都係好少事。呢樣咪就係官府嘅責任，本身官府除執法不嚴之外，最重要嘅係法規落後，唔好講環保法例，就連一般嘅民生同交通等法例，都仲係幾廿年前嘅舊例，要制裁今時今日嘅全球大鱷，根本就無還擊之力。大家要記住無法就無得執，就算有人投訴都好，執行者到達現場都唔能夠有即時嘅判斷，咁你又叫佢點執行法例呢？

蘇州屎(下)

官府另一單「蘇州屎」就係離島垃圾爐飛灰事件。單嘢除由媒體爆出後官府至跟進之外，到而家官方都未有明確表明飛灰對人體有冇害。但係盲嘅都知道班工人倒灰都著晒全套保護衣，你話飛灰對人體有無害呢！至於附近居民同學校一直要求官府解釋事件，到目前為止都未有一個肯定答案。但當居民舉行記招強烈要求官府承擔責任，為附近全體居民進行驗身時候，官府至草草搵醫院發張通知叫大家去驗身。但居民代表就質疑都底發呢張通知究竟係乜嘢部門？首先張通知係由醫院發出，但又無署名。而大家一路都投訴緊「風水部」冇把關，事關負責監察燒垃圾理應係「風水部」，如果驗身話對居民健康無影響，係唔係居民就唔可以再提起追討賠償呢？如果驗明真係對居民身體有影響的話，官府又會唔會採取補救行動？再者「風水部」阿頭被媒體問到究竟官府邊個部門對事件負責時候，佢竟然答係全個官府都會負責。我真唔明其他部門例如郵差咁點樣幫佢哋一齊揹起呢單嘢呢？況且飛灰對身體禍害唔係一朝一夕，而家驗唔到有事唔等於將來都無事，有無專家報告可以證明到飛灰有無毒，同埋吸入幾耐至會對呼吸器官等造成影響？「風水部」阿頭明顯對事件逃避責任，就算你個部門係新成立以前無做開監管工作，到今日出事唔應該由你哋負責，但事件到今日作為一個責任官員，好應該早就制定危機應變措施，同埋表現出負責任嘅態度，去協助居民解決問題，而唔係同大家講出事之後成個官府所有人一同揹呢隻鑊。

蘇州屎(上)

木屋拆遷事件結果官府洗手到尾，最後拆與被拆都各持自己理據，被拆一方收咗賠償但係依然聲言追究到底，另一邊執行拆遷之發展商就話，根據協議經已做晒佢哋嘅清拆工程交番塊地俾官府。當然大家都知道仲有三戶仲未拆遷，所以最後官府就話佢哋會按照合同執行罰則，至於罰啲乜同點罰法，官員一概扮唔知要睇番份約就耍咗去，遺下一大堆疑團叫做草草收場。但係心水清嘅代議士，自然唔會俾單嘅就咁就矇混過關啦。事關官府批塊地俾發展商成廿幾年，一直都唔發展唔進行清遷，等到今時今日官府急需用地建樓俾庶民住之時，官府又換返塊地俾發展商。但當初之原住民早就向官府完成登記，而官府就縱容發展商咁多年都唔圍板唔拆屋，結果搞到發生強拆傷人事件。要評理都唔知點評，但就肯定係一篤蘇州屎，仲開咗一個好壞嘅先例添。首先批咗廿幾年都唔發展嘅地，官府仲可以搵塊地同佢哋換都唔知乜道理。第二就係居民被多次強拆同暴力事件之後，衙差到而家都未有任何公佈事件詳情如何，而負責收地官府部門一直都只係得關注事件，從來都冇交代過點樣跟進無頭無尾。再者，最後收錢遷出嘅住戶仍然話繼續追究到底，咁點解佢哋有理據追究？官府究竟清唔清楚住戶係唔係合資格？如果唔合資格又會否執行檢控程序？而最後都冇遷出嘅三戶究竟官府點樣處理？官府聲稱嘅罰則會點進行？成單嘢根本都完全唔合邏輯同常理，無樣嘅講得通，若果就咁就算數根本就當庶民智商得三歲！

車輛貴族化(下)

官府建議大幅提高泊車費用，增加養車難度，目的係想減少車輛增長從而令到路面暢通，官府又預期到二零二零年小城就會出現行路快過坐車嘅狀態，官府話車位增長數量遠唔及車輛增長數量，所以先至有呢個計算。首先想問吓，呢次又係唔係另一單嘅高士德「黑暗四年」事件？各位要記住，導致小城道路堵塞嘅係小城街道狹窄，道路兩旁泊滿各類型車輛，若要增加路面流量，更應該取消路面車位，鼓勵用家選用停車場，而唔係大幅增加泊車費用去令車輛減少，況且其後果只會令到今日泊車位去到成八十萬一個嘅炒風更加熾熱。今日提出呢個方案佢話預咗被人鬧。老實講，用加泊車費去控制車輛增幅好明顯係將私人車輛貴族化，無錢就唔可以享受駕駛樂趣同便利。要控制車輛增幅可以有好多方法，例如好似日本咁，將歐洲車嘅入口稅增加到兩三部車嘅車價，令到有錢仔要買多部靚車去撞死人都無咁易。另外將千六CC以上嘅大馬力私人車輛除咗大幅增加入口稅之外，仲要擁有指定之私人車位同埋要擁有高級駕駛證書方可購買，駕駛者無證書等同無牌駕駛要入獄。另外可以學省城咁鐵馬禁止進入小城半島，用騰出嘅道路空間改而設立單車道，令小城能有更佳空氣環境及安全之駕駛空間。再者又可以提高同埋嚴格執行環保標準，五年之後逐年驗車，超過十五年以上嘅車輛則要三個月驗一次車，確保古董車真係有人同有錢打理，先至容許有錢佬收藏，當然架古董車都要有指定專用嘅車位先至可以保留啦！正唔正？呢種共產化嘅交通政策官府根本都唔敢諗，所以先至會大幅加泊車費，等你班窮鬼放棄部車，好等佢班老闆行車可以暢順啲咁解！

齋講唔做(上)

官府又向庶民諮詢，交咗份未來交通規劃研究報告，同庶民講大家要有心理準備，將來養車會越嚟越貴，因為佢哋將會建議官府大幅提高泊車費用，因為小城嘅養車費（講緊每日出行泊車嘅費用），相對於鄰近地區如鄰埠、省城甚至珠海都平成截，若果大幅提高相關費用，將會有效咁減少庶民買車嘅意慾，從而減少路面負荷令到交通暢順。有評論員更加大力推薦官員嘅睇法，話咁做可能會被庶民鬧，但乃有效辦法亦叫無辦法中嘅辦法，呼籲庶民支持方案。有庶民於諮詢會當面問官員，佢哋會唔會取消用官轎各自選用公交進行上落班，雖然官員當面回答庶民話佢哋嘅同事當然會選用公交進行上落班。我真係好想同呢位官員講，千祈咪齋講唔做，鄰埠負責環保工作嘅官員，早就親自下海，三十幾度高溫底下，坐無開冷氣嘅站頭小巴，感受吓佢自己推介嘅停車熄匙政策。我建議小城呢位交通官員學吓鄰埠咁樣，喺三十幾度日子裡面，下午四五點鐘去水坑尾老麥搭巴士到關閘，等佢感受吓一般上班族同學生哥，每日喺咁惡劣環境下點樣返工返學，睇吓佢要等幾多部巴士至可以上到車，同埋以佢咁嘅身型如何逼上部廿四座小巴上面，當部巴士衝落塔石隧道時佢會被幾多人嗌非禮。就算佢有錢，都未必同人爭得到部的士，所以齋講唔做嘅人都得，佢自己都識講小城交通唔係堵塞嘅問題，而係行得慢嘅問題，大幅提高泊車費用根本無助提高車輛流量，比加多間巴士公司呢條橋更加廢。

大風雪背後(下)

今次英倫大風雪，困下鄰埠數百學子，被迫滯留首都機場三幾日，鄰埠傳媒即刻大篇幅報導，將被困學子慘況公告天下，為咗荒死唔夠慘烈，仲要每日到機場派駐人員，以求捕捉機場親子重逢一刻嘅痛哭流涕景況。當中鄰埠唔少人向官府投訴點解唔派專機即刻接自己仔女返嚟，要佢哋喺外地機場瞓幾日咁辛苦。因為當中唔少外地留學學子，知道被困機場之後，第一時間向父母申訴無啖好食，又無涼沖，仲要瞓會議廳而唔係星級酒店。當中有人見老外喺當地夠大聲就搵到機位回家，膽粗粗咁學人講得大聲啲，就竟然獲派機位回家。又有人見到因為有病或者係家人出事嘅人向當局反映而獲派機位之後，竟然全體聲稱大家都死咗老竇要回家奔喪，希望能夠早日獲得機位回鄉度假。但大家只要睇到呢班人為獲得一個機位而無所不用其極，連老竇死咗都可以亂報，根本同過關打尖一樣咁唔文明。但眼見此人去到機場同父母抱頭痛哭之後，其父母竟然讚佢哋叻仔夠聰明可以早人一步返屋企度假，大家都唔知應該俾乜嘅反應至好。
　今次小城官府無派專機去接送呢班二世祖都係幾好嘅決定。事關有本事升學英倫除咗成績之外，最重要係睇你屋企有無錢，事關下年度開始要加一倍學費，屋企無番咁上下錢點可以俾佢哋出國到英美留學！當然官府幫忙安排當地住宿同膳食就更加應記一功，因為二世祖都係國民，最基本嘅保障都要做到足。但班二世祖喺機場捱兩日就話要想死，其實只能夠怪佢哋父母有錢供佢哋去海外升學，但就無幫佢哋周詳咁計劃過萬一機場有意外或者突發事件，佢哋有乜後備計劃。而本來官府就已經提供咗高等教育予庶民，若果有錢唔選擇本土教育而出外留學，官府都唔應該使公帑去幫呢班有錢有能力嘅人，因為佢哋放棄本地就更應該自己準備喺海外之風險，否則對接受本土教育嘅人十分唔公平。

大風雪背後(上)

　西歐暴雪，航空交通癱瘓，鄰埠數百學子被困英倫，小城學生亦有數十人向官府求救，希望覓得一個難求機位，好等愛兒能回鄉度假。話時話西歐嘅百年一遇大風雪，除咗考驗當地官府應變能力之外，亦係國力展現嘅場口之一，觀乎今次英倫大風雪，令當地機場癱瘓逾兩個禮拜，唔好講歐洲大陸嘅短途航線，就連大部分長途客機都要停飛，真係估佢唔倒，唔知點解號稱先進列強嘅歐洲國家，一遇大雪機場就要停航，好多人都想問：乜佢哋唔係見慣風雪嘅咩？最離譜嘅係，喺某個機場，竟然會發生因為擔心風雪過多而要關閉部分航班大樓，簡直匪夷所思。曾經有個經驗，就係小弟流落太陽國嘅時候，曾經發生過因大雪關係，其首都主要鐵路停運事件，都令我不解為何見慣風雪嘅國家，竟然會因為風雪而阻礙自己正常嘅運作，事關大家都有面對大風雪經驗，只要稍為向北方嘅同業取下經，問題應該唔大，況且，今次英倫風雪問題，又未至於去到國內早兩年南方嘅雨雪天氣，根本就未面對過一樣。喺咁唔合理嘅情況下，最終官府都話派軍隊負責清理機場積雪，但就被機場當局拒絕咗，點解會咁？其實都係死要面咁解。事關落雪幾多，都唔能夠向官府求助，除咗關乎面子問題，最重要係會被外界睇小呢間管理公司，指佢哋無能力應付咁大嘅雪災問題，從而令到佢哋股價下跌，其市場領導地位不保，呢樣先至叫做大鑊。所以就算有北歐國家機場提出，佢哋嘅技術可以幫助到英倫機場不至於要關閉，相信最後管理當局都唔會俾人幫忙，因為呢樣至係生死攸關嘅問題。

拖越大鑊(下)

青洲坊發展商出手低，居民自然唔願遷出，因為根本搵唔到其他可以住嘅地方，而官府一早就對住戶進行資格評審，遺下現在一班既唔合資格上樓，又無足夠賠償嘅邊緣戶。但係收地期限一拖再拖，官府萬九落成期就越壓越後，庶民對萬九承諾就更加不滿。官府壓力增加，自然就向番發展商施壓，要佢哋盡快收地交回官府建樓，發展商無計可施又唔想益晒班居民，結果居民生活不斷受到滋擾、半夜拆屋、偷偷拆屋、甚至強行拆屋。由於官府有規定呢類舊屋唔可以重建只可以維修，有住戶間屋無端端被車撞穿一邊、又有住戶同清拆工人發生衝突被帶上衙門，回家之後發現木屋被破壞，想進行修補時反被清拆工人報警禁止維修，搞到事態發展極度混亂。官府既為事件始作俑者，現在嘢單搞成咁，點都好應該盡快介入將事件妥善解決，如果唔係越鬧越大，對官府嘅管治打擊只會越嚟越嚴重。其實官府有心解快問題根本就唔難，事實上搞拆遷搞咗咁耐，官府對於居民資料嘅掌握應該十分充足，無就問番發展商喇，將呢班邊緣戶，按條件同收入逐戶進行細分，若果發現真有人想乘機搏懵，就可以告佢詐騙罪，而其他環境條件都唔好嘅住戶，官府社福部門自然要對其進行最低保障安排住宿，或者提供租金津貼，咁就可以解決居民無地方住嘅問題，只要官府做到公平公正咁去對待每一戶，若果居民咁都唔肯接受官府嘅條件遷出，到時候官府進行強拆普遍庶民都應該唔會怪責。官府一日唔介入，到時唔單止偷拆強拆，遲些可能連放火燒屋都有機會見到。

罪魁禍首(上)

青洲木屋屢傳迫拆偷拆，居民生活受到不同程度滋擾，更甚者生命安全亦受到威脅，庶民多次報衙門兼向官府負責單位申訴，但事件照樣發生，雖然官府口口聲聲話關注青洲坊木屋遷拆，需要合法合理。但到今日為止衙門當局都仲未有一單立案或者係偵訊。青洲木屋區呢單嘢，自從幾年前官府開始發現小城公屋需求甚殷，決定拆遷木屋區嘅時候，區內就不時發生強拆破壞等不法事件。雖然現今區內有幾多真正原居民都成疑問，但罪魁禍首點計都係發展商。
　青洲呢片木屋群，我哋細路仔嘅時候都不時發生火警，環境衛生亦十分惡劣，住喺呢度嘅居民，若果唔係無辦法，真係送比你住都唔住啦。而早喺西洋人話事年代，早就將幅地皮，批給一間發展商發展成廉價樓，好等居民有較佳嘅生活條件。但呢間發展商咁多年以嚟一直都無發展個過呢幅地，直至官府準備收番幅地建公屋，忽然間發展商就好努力咁收樓收地。但發展商對每戶賠償價格不一，導致收樓進度被拖慢，而且區內住戶經歷咁多年，樓宇同土地都唔同咗價，套用行內術語就係麵粉貴過包，不過發展商依然無償咁代官府收屋收地，點解咁著數？原來係官府應承咗發展商換過另一塊地俾佢哋發展，條件係要負責埋呢個地段嘅拆遷賠償，即係話官府將成個青洲坊外判俾發展商，而用過一塊地去同佢換番一幅地。所以先至有唔使錢免費幫官府同居民進行拆遷。但係正正因為呢個咁嘅條件，發展商開出嘅收樓條件梗係差到無人有啦，真係慳得一蚊得一蚊，但官府就成功洗手唔理，總之發展商限期之內交番幅地皮出嚟就得。難怪居民日夜投訴備案，到依家都係石沉大海無乜進展。

冇解決過問題(下)

「橙汁店」選點搞出個大龍鳳，本來就係一場鬧劇，可惜嘅係官民雙方都唔識點樣溝通，結果至會搞到咁僵。事情本身好簡單，都係一個利字掛帥。吸毒者以背景計，一般分兩大類。一種係低下階層，備受生活壓力影響，以為利用毒品可以逃避現實壓力，結果成為癮君子。另一類就係有家底但係缺乏關顧生活空虛，結交損友誤墮毒網。喺呢度好簡單兩句就解釋咗吸毒者嘅問題，但係真實嘅時間更加漫長，好彩喺一兩年戒毒成功，唔好彩者斷斷續續成世人都不斷戒完毒再吸毒，直至生命完結。可能好多人都講應該俾吸毒者知道犯錯後嘅後果，讓世人有所警惕，反正現今社會都唔會理邊個有冇問題。但係「橙汁店」本身係為咗希望戒毒者而設，即係話吸毒者希望作出改正而努力，即係話唔會有影響附近學校、社區等嘅行為出現。居民提出嘅有乜事發生邊個負責先？呢類咁嘅問題根本就係強人所難。如果過馬路被車撞親就梗係叫司機賠啦，但喺屋企食魚哽骨，唔通叫條魚負責賠咩，所以最後問題同屋企嘅小朋友，同埋附近嘅學校無關。真正嘅問題係附近居民唔想「橙汁店」出現之後，影響自己所住嘅樓價。事關呢兩年有幾個貴價樓盤落成，突然間帶動附近樓宇身價倍增，若果突然開間「橙汁店」，咁自己層樓想扮豪宅都唔成，白白唔見一大截，唔同你死過至奇啦！但係唔好唔記得點解官府要選址喺呢個地區，其實就係因為呢度係重災區，即係最有需要嘅地方，若果大家都唔理身邊附近有需要嘅人，到頭來想戒毒者冇地方戒毒，只好繼續吸毒，到時禍延下去就只有當地居民嘅下一代。當然，大家都只係希望保住自身樓價得到可觀價值，從而搬到另一社區生活就另當別論，只不過係問題根本冇解決過咁解。

「橙汁店」大龍鳳(上)

近年小城開放賣賭，搞到唔少人因優厚待遇而走咗去字花檔打工，代價就係罵不還口打不還手嘅待客態度，而呢兩年字花稅收屢創新高，工作壓力大增下，更有唔少人為紓緩壓力染上毒癮。為咗解決問題官府早幾年引入咗戒毒橙汁去協助有需要人士，可惜隻戒毒橙汁規定要喺指定人員面前飲晒杯嘢至准走，結果橙汁店選址一波三折，選邊度都被當地居民炮轟。早兩日官府選定黑沙環區設立「橙汁店」，結果惹嚟當地居民激烈反對，初則簽名、後集會，最後更演變成示威行動，擾攘咗成四粒鐘，出動人肉封路大龍鳳，迫使官員出席對話，上演一幕官民當街互插鬧劇。搞到咁大劑，原因都係官府幾次想搵地方搞「橙汁店」，可惜次次都被當地居民強烈反對，搞搞下官府人員都唔敢公開選址地點，怕班土霸反彈太大，結果靜雞雞咁搵幾個傾得埋嘅代表傾下，叫做咨詢咗，然後就完成所謂嘅咨詢，跟手就宣佈落實選址，所以班街坊有乜法子唔嘈到拆天丫。老老實實，無啦啦喺我地頭開間「橙汁店」，根本都唔知乜頭乜路，至少都要搞清楚間嘢係賣乜。但係喺未搞清楚之前，梗係要反對到底，況且「橙汁店」個名大家由細聽到大，雖然唔知真正係乜嘢，但係都唔方好嘢，因為正常人唔需要呢種服務，所以話知你係乜官都好，保護自己最緊要。但係衙差仲係用緊幾廿年前個套，叫各位搵個代表出係傾，不過大家都唔想見倒第二個趙連海，所以根本就唔會有代表呢樣嘢，最後變成幾百人對兩三位負責高官對叫嘅精彩場面。

垃圾公司垃圾局？

自從早前小城唯一自豪、技術質量冠絕亞洲、國家主席亦曾參觀考察過嘅焚化爐，被踢爆廠方玩魔術，不時將垃圾送到唔達現代標準嘅一號爐處理，而負責監管當局嘅主管被人問到口啞啞，話要問番專營公司嘅報告至可以掌握情況，即係話小城呢個最新設立嘅局，到而家仲未係好掌握到小城其中一個環保上面最大嘅問題，同時答咗大家佢哋係無監管過嘅。今時今日城市中最大嘅環保問題，都離唔開水、土、同埋空氣呢類最基本嘅嘢，而且近年綠化環保議題備受矚目，如果唔係官府都唔會將個部門升格為局，結果發現呢個局原來無一個切實嘅監管制度，同埋有權做嘢嘅威信。試問下官府要一間專營合約嘅公司，交一份報告俾你要你等一個星期，算係乜？有兩個可能性。一就喺間公司根本無諗住被人管，所以根本無預備過一份報告。另一個可能性就係有報告但係唔係俾你呢個級數嘅官員睇，所以你要等一個禮拜。兩種情況對呢個局嚟講都唔係一件好事，對於庶民就更加危險之極。若果係情況一，間公司根本唔合資格繼續經營落去，但佢仲有份合同喺手，庶民可能仲要捱到合同完為止，如果仲有命嘅話。情況二就仲大鑊，即係有人知道間公司一路都唔合規定營運緊，但就一直都唔理，結果被踢爆間公司至施施然好大耳鼻咁叫你等一個禮拜至交報告俾你，如果係咁庶民可能一直都要接受呢間唔合規格嘅公司繼續為我哋燒垃圾，燒到大家都變成垃圾嘅一份子為止，咁究竟我哋要接受呢間垃圾公司？定係個垃圾官府呢？

黑暗四年

十二月八日，全城嚴陣以待，小城交通的黑暗四年即將開始。但係其實未到八號，高士德主幹道附近的小道，早已進行大大小小的道路工程，配合主幹道下水道工程的改道措施而適當地增加交通燈號。有關當局於去年籌備更換下水道工程時，經已向主幹道周邊之商戶、相關社團、甚至公介會做過唔少工夫，官府今次似乎做足準備措施。不過主幹道周邊道路其實依然進行唔少道路工程，甚至有道路修整好之後唔夠一個月，於同一地點再次進行道路工程。原本同類事件過去一直發生，老街坊經常都話今日掘完電纜、聽日就輪到水喉、再下個禮拜就輪到電話公司，根本就司空見慣。但係今次官府大鑼大鼓咁話準備好，而且同時話俾大家聽要接受未來嘅痛苦歲月，我地估計，黑暗歲月應該係十二月至開始，忽然間咁點解由十月尾就開始？而且現在仲有行人道仲鋪緊地磚呢？自從十月底為咗準備一年一次嘅東望洋賽事，相關路段進行修補都經已係例牌菜，之不過唔知點解所有道路工程梗係年年都放晒喺賽車呢幾個月裡面做，搞到全城沙塵滾滾，現在仲撞上三十年一度嘅換大喉工程，根本個惡夢提早咗成兩個月，結果搞到駕駛者同行人提早進入黑暗歲月，更有商戶索性休息幾個禮拜，因為根本都做唔成生意。本來道路修整工程都係惠民工作，唔少街坊都做好心理準備，接受即將而來嘅良好環境。但官府有能力統籌嘅工程竟然可以各有各做，就連無謂嘅行人道修飾工程，都要接住喺其他工程之後才做，點解唔可以配合工程完成之後，就進行鋪整地磚？咁就可以減少浪費同埋更環保。

不知所謂嘅功課(下)

毒奶粉事件申訴人由被害者變被告，最後仲要被法院判牢獄兩年多，消息一出全球嘩然！明明係受害家長申訴要求賠償，但係竟然以尋釁滋事罪被拉被告最後定罪。大家到而家都仲未搵到呢位家長反黨反國或者顛覆政權嘅作為，咁都要拉要鎖，真係一國兩制大家唔了解國情，所以連律師都唔比探監庶民真係聽都未聽過，唔通想佢靜靜地係世界上消失？大家仲以為係「義海豪情」裡面講日本仔嘅橋段。但係呢條橋喺知縣嘅功課上就用得淋漓盡致。記得前年官府仲以快打慢，唔理庶民對舊兵營嘅文物研究訴求，兩日就將幢建築物移為平地，三個禮拜就填平加埋咪錶，變身露天停車場，目的係為咗回應新婚人士無樓住嘅問題。同樣地年幾之後呢個停車場突然間又話要動土關閉用嚟建公屋，咁問下係咪用喺建新婚細單位公屋時候，官府又話問過街坊，新婚人士唔多鍾意租樓，結果又將佢改為一般公屋咁起。但早兩年至聽當時知縣講只差少少技術問題，就可以建，仲話好有信心去到二Ｏ一二年可以見倒「萬九」嘅出現，仲話可能會多過呢個數。點知呢少少技術問題就係兩年至郁得，而兩年之後又可以話問過人結婚唔鍾意租樓，所以改咗個計劃。唓！咪又學隔籬腳痛知縣咁「八萬五經已唔存在！」。都係工廠妹代議士講得好，佢話除非今屆先至做代議士，佢做咗咁多年收倒今年知縣份功課根本就唔會收貨。而且唔夠兩日，當大家睇真少少知縣份功課，就被人發現裡面靜雞雞咁喺唔少位置玩偷換概念，盡量將呢幾年一路講緊嘅「萬九」dead line可以一路咁往後伸延，晨早經已話佢無本事交貨仲死要面，呢份功課直情不知所謂。

全城腦殘？(上)

　又到咗一年一度，知縣向全世界交功課嘅時候，其實本來無興趣寫知縣份功課，事關知縣份功課年年都係咁，次次都無新意，反而最值得講嘅，係今個禮拜輪到班知縣下屬出嚟解畫、班代議士係咁鬧先至好睇。不過呢份功課出場前，剛好係京城大官就任以嚟首次到訪小城，亦好可能係任內最後一次到訪，京官當然有備而戰。抵埗當晚即向知縣及以下各級官員進行訓話及指導，由於京官一向之外界形象都係咁關心庶民，自不然叫知縣及其管理團隊多關心庶民之需要。但係京官一走就要交功課，所以就算被訓示完但係知縣改都唔改下就咁就交功課，而且仲係按歷年一樣照稿讀足粒幾鐘，搞到大家睇咗五分鐘後就叫老闆轉台睇股票外幣。不過當晚公仔箱新聞就經已播出唔少庶民「媽叉」到知縣飛起片段，因為佢今年竟然「派錢打斧頭」，扣咗三十個巴仙得番「四差」。本來派錢嘅舉措一開始就被人垢病，減派本應都係件好事，但問題係過去幾年有唔少人都因為年年派錢，好多人都預咗官府派錢條數，尤其係班低下階層，一般嘅特別支出都會預呢份錢用嚟救急，所以根本無諗過佢會玩減價。再者官府公佈已稅收數字再創新高，庫房水浸嘅情況下知縣竟然仲玩「減派」，唔比人鬧死至奇。結果第二日面對代議士嘅質詢，自然又要發揮佢嘅易容特技，將塊面皮加厚十呎，幸好小城無癲狗出任代議士掟蕉，否則知縣可以扮埋阿基諾三世，用微笑去表達憤怒。因為呢幾年困擾小城嘅主要問題，知縣開晒口話俾大家聽佢唔會推出措施，去影響小城百分之七十幾嘅有樓人士，咁嘅藉口都拎得出嚟，莫非全城庶民都「腦殘」？

好大喜功(下)

有點樣嘅大學就有點樣嘅學生，剛畢業嘅小城大學生指學校課程唔夠實用性，令自己所學未能即時切合僱主嘅需要。但小城嘅高等學府則爭相競逐「造大」，有無本事「造強」就仲要慢慢睇多一排，但要好大決心就直頭講到出口。自從京官開綠燈「割讓」橫琴予小城「最高」學府，而且仲係用作擴建學園，從歷史上都曾係同一學府嘅另一院校，佢哋校長呢排就密密向外界吹風，話準備將間學校升格做大學，而且時間亦不遠咁話，唔知係唔係想喺橫琴分一杯羹？但好明顯就係好大喜功心態。
　坦白講何謂大學﹗並非學校夠大就可以叫做大學，教學何時都係講「學術水平」至為最重要。有學術大師助陣，教學水平自然提升，教學水平提升自然能提高學習風氣，就唔會出現學生指課程唔夠實用性嘅事。事關實用性學科唔使大學去做，職業中學又得，什麼商學院或者博彩學院都可以幫到大家。大學嘅角色其實係向學生提供一個自我發掘嘅空間，通過數年嘅校園生活，讓學生學會獨立思考，邏輯分析論證，同埋資料搜集等科學手法，令大學生較中學生有更佳之理論基礎同埋獨特嘅個人觀點，同時孕育領導才能。但係大家都以為學校應該教佢哋點用索羅斯條火箭方程式，而唔係點樣啟發佢哋開發一條宇宙方程式。結果小城影響力最大嘅係賭王，因為大家都只不過希望搵倒條發達方程式而無乜嘅遠大理想。所以學生同大學、甚至連家長都一樣，都只不過係好大喜功，發到達有得拎出嚟威就得，無乜人諗住研究幾廿年至退休之後擺番個物理學獎，因為快樂要趁早搵錢要趁後生。

點解讀大學？(上)

剛剛過去嘅畢業禮季節，唔少莘莘學子經已步入勞動市場，過其「大人」生活，但打工同返學係兩種完全唔同嘅生活，初為「大人」嘅畢業生們自然要慢慢適應。環顧小城嘅高等教育學園，除喺衙差學堂畢到業就有份工等緊你之外，其他學院嘅畢業生畢業之後都要努力搵番份工，嘗試正式同社會接軌。當然以今時今日小城嘅人力市場，唔好講高等院校畢業，就算中學未畢業只要手腳齊全精神正常，基本上都唔愁搵唔到嘢做。所以唔好講話大學生，就算一般打工仔，都大有條件對工作及工種作出選擇，至於小城嘅工作同工種有幾廣闊就係另一回事。可能由於畢業禮前嘅求職活動關係，早前有公仔箱採訪畢業禮中嘅同學仔，同學仔回應指市場上真係多咗好多工作可選擇，但就認為校方應該加強學科之實用性，以盡快迎合僱主需要。各位人力資源主管、老闆們請記住，以上嘅回應係一位剛剛畢業嘅大學生，究竟呢位同學仔知唔知自己當初究竟點解要讀大學呢？而點解佢讀完四年之後至覺得，大學所教學科，唔係好切合僱主需要？佢又知唔知僱主哋實際需要啲乜呢？抑或呢位同學仔最終發現原來自己應該走去讀短期派牌班就夠呢？其實呢類學生喺小城非常普遍，因為今日社會係絕大部分人唔知自己應該做乜好，但係讀書就好似有啲保障，完成中學經已係基本要求，咁唔使趕住出嚟搵食幫補家計的話，大家都唔介意讀埋大學，等第日可以搵份好工又可以升職快啲。所以佢哋最後至發覺大學無教佢哋點樣出MEMO、點樣排更表、同埋點樣管理佢將來嘅下屬。

老廉嘅「法院判詞」(下)

今次「老廉」做嘢無非都係阿頭想挽回垃圾會一役嘅民望。不過好可惜，今次嘅報告淨係俾人知道佢眼高手低，完全見唔到乜嘢有益有建設性嘅建議，而且仲係俾人覺得「老廉」只係識得從法例出發，完全唔知道個世界發生緊乜嘢事。成份報告一開始就淨係識得話人無頁碼無系統，但係又無向外界交待「有線」如何成為專營，一味指「公天」係「非法」，佢根本無理過自己都係睇呢啲非法傳播訊號長大嘅，除非佢唔認自己喺鹹蝦埠大啦！
　老實講，睇完呢篇「勸喻報告」大家都覺得似法院判詞多啲。事關「勸喻報告」裡面只係陳述「傳訊部」點樣無能解決唔到問題，同埋「指示」「傳訊部」一年之內解決「有線」同「公天」之間嘅問題，仲唔係法院判詞係乜？成份「報告」雖然列出「傳訊部」向官府作出咗幾個建議，但係都被佢一一否定，令到大家都真係以為「傳訊部」零建樹無做嘢不特止，仲差過細路仔玩泥沙。好耐都未見過咁嘅評語囉，雖然我都唔係好滿意「傳訊部」嘅作為，但係份「報告」最大問題係只不過將「電訊部」交託嘅資料進行「捉字虱」，根本就唔理解問題發生喺邊。馮官知唔知乜嘢叫做ＩＰ？知唔知乜嘢係CDMA？GSM1900同800有乜分別？銅線同光纖有乜嘢唔同？將來味覺資訊點規管？係唔係應該起番個味視聽資訊管理局呢？如果佢真係咁有心想做嘢，就請佢建議立法當局建立一條實在嘅法律出嚟，好等小城有法可依做到真正有制度。連佢都講唔出可以用乜嘢法律去處理個問題，唔好當庶民係傻口架啦！睇少一兩場英超事少，要大家交完特貴電話費再交電視費同固網費，你就真係當我哋傻口架啦！至少專營權自然死亡都叫做唔係辦法之中嘅辦法！

老廉扮判官？(上)

老廉阿頭新官上任準備有所作為，於是趁「有線」進行行政不當作投訴，俾佢搵到機會發揮一下，卒之推出咗百幾頁嘅文件，去插呢個「傳訊部」做唔到嘢。無他嘅，因為呢個部門係要處理小城其中一個最大鑊嘅死症，我哋次次都話官府根本就想個問題自然死亡，但係睇番今次老廉嘅報告，先發現小城官場嘅真正面目。
　今次老廉做嘢，對傳訊局交建議，勸喻佢哋點做果然用心良苦。佢哋知道事件可以吸引眼球，自然加多兩錢肉緊，羅列傳訊部各項「罪證」，並作出「勸喻」同埋「建議」，乜呢種工作唔係由「查數部」做嘅咩？份報告令大家忘記佢只不過係「老廉」而唔係「查數部」。大家以為「老廉」只係查利益輸送，資源傾斜等事項，大家都唔記得原來佢哋連行政申訴都仲做緊，所以呢樣係我哋嘅問題。事關不嬲「老廉」應該係接到投訴至會做嘢，就算後期准許主動出擊，都唔會投入好大資源去做。反觀今次嘅報告，就睇得出「老廉」新阿頭並無沿用過去嘅作風，反而用返佢本人之前嘅法官身分去做判官，教人點做嘢，成份報告就好似法院判詞咁，而且仲係全部圍繞住法律層面去講，所以搞到無人知佢想講乜，但係就好成功地將個波踢咗俾「傳訊部」阿頭，所有傳媒都搵佢接下波睇佢有乜反應。結果大家都做咗咁多年官，邊會唔知你想點吖！適當咁交下差打些少官腔，一定交代到。但係問題係曾為法官嘅老廉阿頭，坐喺呢個位就以為真係好容易得到民意支持，佢唔記得咗個位有民意唔等於佢有民意，佢有乜本事替代昔日司長嘅光輝呢？想做判官仲未夠資格，大家都好清楚記得佢做選委會主席嘅往績，想洗底仲要等多幾年。

官方公仔台唔使恨(下)

但係睇番今次對於災難搜救之報道，除咗寶島當地有傳媒作出二十四小時不停報道之外，鄰埠、國內甚至小城都有媒體派記者前往採訪。結果又一次證實官方反應太慢，事關官府於事發早段仍然只派一般救援隊伍前往搜救，仍然未知道有咁多旅行團都被困山區。直至後期寶島方面先後派出多輛直昇機參與行動，甚至出動特種部隊及尖端儀器進行搜索，不過大部分人都相信，出事旅行團全團人都應該凶多吉少，甚至出發到當地團友之親屬亦都一早打定輸數，聲言生要見人死要見屍。只不過可能兩個願望都要落空，因為懸崖下波濤洶湧，連參與搜救之當地漁民都估計全團有機會被沖出大海。
　今次出事之旅行團由於係珠海嘅旅行團，鄰埠媒體報道就圍繞住寶島、同埋珠海兩地，並加上京城之國台辦作報道。但能夠跟得上以上全方位嘅報道者，就只有小城一家私人電視台，反觀小城那家半官方電視台，全部都只得把各地新聞片剪輯成新聞，雖然話事件同小城無直接關係，但係同小城咁近相信都有好多人關心。相反另一家私人電視台，就連中日漁船相撞之後，亦曾派員到福建對被扣船長家人進行採訪，使其報道得更立體及更有感染力，當然呢個亦同該電視台的台資背景有莫大關係。但半官方嘅電視台就連珠海家屬咁就近嘅訪問都無做到，經已唔係資源夠唔夠問題，雖然話平面傳媒好容易請一個駐地記者開支較細，但由小城派兩個人上珠海做個採訪然後回來剪輯，同去路環採訪黑工事件分別唔大，點解咁都唔去做呢？其實係新聞觸覺有問題，大家只會見到如小城知縣外訪、國家領導同知縣一同出席國際會議等官員新聞，部分關於重大災難嘅事件報道，就算近一近都唔會派員進行採訪，所以呢個台根本就唔使恨。

災難採訪適可而止(上)

上兩個禮拜之鮎魚颱風未到經已被各大傳媒嚴重警告，又話百年一遇、史上最強等颱風，但係以龜速前進嘅鮎魚俾到大家好多時間準備，家家戶戶買齊膠布等防風物品等待颱風殺到。不過最後至發現竟然風都無一滴，雨都無落過，轉個彎去咗汕頭，果然係史上最強嘅「騙局」。雖然話天氣難測，但係對比番其他國家對呢個風向預測，則又發現很多地方的天文台今次又搞錯晒。事關日韓兩地之天文台早就推測呢條鮎魚會游去汕頭而唔係吹向小城，失望嘅除咗係打工仔期待之打風放假無著落之外，以為有超級電腦幫手預測嘅鄰埠天文台亦都估唔到會計錯數。
　不過呢條鮎魚雖然對小城過門不入，但係就對寶島造成唔少人命同財物嘅傷亡，部分旅遊景點出現山泥傾瀉，令到多個內地旅行團被困甚至發生傷亡意外。最不幸嘅就係鄰近小城珠海一團十多人全團人失蹤，出事成個禮拜都未有消息。大家估計惡劣天氣造成山泥傾瀉，將全團人連旅遊巴沖落懸崖下面嘅大海中，由於事發地點形勢險要，搜救過程十分困難，而出事之後天氣仍然唔穩定，受災地區不時有山石跌落，所以影響搜救進度。由於出事係珠海嘅旅行團，與小城份屬鄰居，唔少庶民都特別關心該團之搜救情況。鄰埠、小城以至珠海當地之電子傳媒不時報道最新情況，加上寶島傳媒之強大陣容，令到出現塌方的路段塞車情況更加嚴重，官方只好將出事路段封鎖只讓搜救車輛進出，儘管報道陣營有責任將消息通知外界，但係出到咁大陣去採訪難免阻礙當地之救援工作，就算多幾個記者或工作人員企喺鏡頭前報道作現場報道，都唔會有更新嘅消息出現，採訪都係適可而止比較好。