諮詢──意見（下）

呢次諮詢包括城規多個範疇，包括土地資源分配、人口結構、城市定位、世遺區及舊城區的規劃、交通安排及生態規劃等多個方面，以上一環扣一環的城規方案，公開諮詢期由七月二十日開始至九月二十日完結，當中包括幾場簡報會、諮詢會及巡迴展覽，又搞個「城市定位用語徵集活動」，又設立網站方便庶民取得諮詢資訊，諮詢文本則有超過一百版，仲有簡化版俾大家從網上下載，多渠道到大力宣傳一向都係官府拿手好戲，不過只要大家利用呢個網上平台，就可以發覺官府唔係有心聽大家意見，呢樣唔單單係呢個研究中心，大部份官府網站都一樣，就係連最簡單中學生都識做口既網上投票系統都唔多見到，更加唔好講統計數字啦！今次諮詢喺網上有意見卡下載，又有諮詢文本及多種資料可供下載閱讀，其實完成度都可以接受，但係作為一個公開諮詢口既網站，點解會咁簡單口既功能都唔加上去呢？莫非真係好似坊間咁講只不過係假諮詢？因為上網族好清楚網上簡單口既投票系統可以即時改寫投票數字，意見比率都會隨投票方向即時改變，呢啲咁透明口既投票同諮詢方式加入官府網內，其實可表示官府開明對待民意之外，亦可以容易掌握民情改善施政，只不過係一個非常簡單口既功能，就可以得到咁大反應，當然係非常之好口既民意諮詢渠道之一，相信當局口既資訊科技人員都提議過設立類似功能，不過何解就係搵極都唔見？莫非官府覺得呢種係唔多科學口既方法？就算呢個網站有諮詢統計，都係由人手打數字上去，並無系統對閣下之意見作一個正式口既數字統計，冇乜手感。同以往一樣唔知自己意見去咗邊，打激發表意見口既意欲，最終官府可能又係白費心機。
完全冇反應的統計？（連結）
當局網站（連結）

諮詢──意見（上）

圖片來源：可持續發展策略研究中心
又有官方機構向庶民進行大規模的諮詢，以他們綜合數年研究所得，為大家提供一個小城未來發展的規劃概念，大標題以「世界活力之城」作概括，向庶民提出多項問題以求得到庶民答覆，並向大家解釋問題的重點所在。這個由官府策動的智囊團經過幾年的運作，亦曾經多次針對小城內部整體庶民生活素質的研究，主要功能乃將其研究報告向官府反映，反而與庶民直接溝通的渠道不多，今次突然發出大規模的公眾諮詢，全民即時呆晒唔知點反應。事關官府每次向庶民作政策諮詢，大多到最後都是不了了之，執行時完全唔覺接納過庶民意見。再加上官府諮詢方式直頭同庶民好似生活喺兩個世界咁，講極你都唔會聽得明佢哋講咩。
　最經典莫過於黑沙環公園內建街市，諮詢完庶民後圍板動工，庶民先至知個街市係要將公園割出一部份來建，搞到庶民即刻上街抗議，到而家都未知搞成點。今次仲大鑊，唔係建街市咁簡單，係小城未來嘅城市規劃，影響全民未來幾廿年嘅發展方向，即使官府嘅諮詢功夫有幾咁門面，庶民都應該攞番本諮詢文本睇下，如果唔係就被官府大條道理話「就算諮詢都冇用，庶民一啲都唔關心」，以後就會唔多向大家諮詢。不過是次諮詢行動被人喻為「共同打造玫瑰園」就真係值得商榷，鄰埠嘅玫瑰園計劃已經搞到一鑊泡，我哋唔使再執呢個咁差嘅水尾掛？仲有就係小城庶民的兩極化越來越嚴重，好難預測到最後會唔會有全民共識，即係話將來就算有玫瑰園，都未必係你我認同之為玫瑰園，可能係動物園都未定。

終於出事（下）

圖片來源：飛喵喵空服網

其實小城航空手持眾多獨特的有利條件，過去多年一直未有被好好利用，管理層責無旁貸。例如對等航權就沒有被好好利用，小城開通直航日本的固定航班不到三年，但係日本早於小城機場開幕之初，已經有固定航班飛到小城，即係早了成十年已經有兩地直航，只不過後期日本經濟不景，日方才取消了固定航班，而今天開辦之固定航班，以及往後即將開辦直飛日本的其他航點，都只是管理層開始感受到三通實行之後的經營壓力，不得不開發其他航線來改善經營，這種對市場改變反應之慢，正正就是傾斜政策下只懂享受唔使用腦的代表作，當有專營權加上政策傾斜，就是當年所有國企的寫照，所以小城機場啟用成十幾年，庶民想飛去大部分熱門旅遊地方，都仍然要從鄰埠出發，直至近年機場當局引入廉價航空公司後，情況才得以改善。至於長途航線方面，小城依然一遍空白，當然係因為冇機可飛（至小係747）。今日小城航空公司全資擁有的飛機就得一部咁多，其餘十幾部都只係租回來，即係話航空公司最大口既資產「飛機」都唔多部，可想而知呢間掛住小城個名、代表小城口既公司對小城發展有多大信心，其實連師奶都識買樓好過租樓呢個道理，佢哋竟然只租唔買，即係幫飛機公司打工賺取微薄利潤，卻又暴露了管理層對發展小城的航空業信心極低，欠缺積極開拓的冒險精神。另外，在否決廉價航空的航權上，亦能體驗小城航空的官僚作風，一於以大壓細加埋面子尤關。又唔似鄰埠航空咁進取，肯降低條件爭取開辦更多的航線，以達至航點滿天下的征服心態，以適應不同時期經營環境之轉變，都係嗰句「做唔長」。

終於出事（上）

圖片來源：Chih-pin's Public Gallery

早前本欄關注小城航空公司缺乏前瞻性，一直只依靠阿爺之政策傾斜，見步行步地享受著無需競爭的經營，完全漠視三通可能帶來的影響，終於在三通不夠一星期後，就被揭發半年已勁蝕二億，要向股東們提出注資或是結束營業。而根據其駁斥不實報道的公開聲明中，卻完全否認經營困難並指客貨兩忙，年年都有增長。但係聲明又提到母公司極度關注小城子公司的業務，同時將完成對子公司的特殊支援，亦支持子公司及小城官府向阿爺爭取特殊航線，以減低三通後對小城航空業的影響。係唔係好奇怪？若如公司表示經營冇問題，又點會受母公司的高度關注？若果管理層有足夠危機感，有合理的營運效益，就唔會要母公司出面，向阿爺再次爭取政策傾斜經營特殊航線。即係話小城航空公司真係蝕唔少錢，至於係唔係五行缺水就未知，事關正常嘅公司都會有較充裕的資金，以備不時之需。不過就算否認都係咁話，經營困難就一定係經營困難口架啦，如果佢夠膽講經營上完全冇困難，咁就要連鄰埠嘅代表航空公司都應該請佢哋做顧問，睇下佢哋有乜辦法，可以喺油價咁貴嘅時候能夠獨善其身。因為今年上半年油價升幅簡直同市場脫了軌，全球大部份航空公司都蝕了成半年錢，短期內冇乜邊間航空公司可以解決到呢個咁重要嘅問題。至於搵母公司出手向阿爺求救再搞政策傾斜，結果將會同未開發三通前一樣，單單享受政策傾斜的成果，管理層的管理方式始終如一，不在營運效益上作出大幅改善，增加自身的競爭力，長此下去始終都係死路一條。