選舉抹黑埋單

全城興奮過度之後，終於都到左賽後報告時間，選贏選輸乃屆屆都有，唔會有乜野特別。況且今屆結果最冇癮之處，係竟然各固有勢力真係唔係玩玩下，只要一出手應有之鐵票自自然過落去新上台之代表，足夠送人入局有餘，至於後選人當初政綱如何究竟有冇人睇過，都已經唔係問題，等於某候選人曾於論壇中，清楚表明小城係選人唔係選政綱。不過呢樣已經唔係新聞，全體庶民都清楚。最抵死既係未開跑就俾人估中晒十一席既賽果，即係大部分人都估倒，新勢力根本唔駛諗同呢班友爭。不過最後埋單計數，今次其中一個固有勢力出現損失一席，似乎新自由派好似有所增長，但係只要細閱背後數字上的變化，可以睇得出小城整體各勢力版圖出現左微妙變化。另外今次「大蘇」最矚目的仍然係新登場之強力抹黑行動，記得最精彩的是竟然有人用最原始同埋耗費人力之白抄抹黑事件，而對象又竟然係冇人相信之關大姐，除左係全城笑料之外，更有陰謀論者話白抄事件係內鬼造勢之手段之一。不過呢樣唔洗理，因為咁唔相信庶民之雪亮眼睛之舉措根本唔會起倒作用。當然，另外網絡討論區上大批打手出動洗版策略去抹黑自己認為之對手，更加冇可能動搖倒實力派團體，而打手們除左玩抹黑之外，自然同時要負責埋唱好自己友之工作。只要係咁，有經驗之網民自然一眼識穿邊個係打手、邊個係有見地之網友。但係最離奇及最不幸者，乃小城之文字傳媒亦都參與其中，充作部分參選隊伍之打手一職，不分晝夜地去抹黑其立場不同之參選者，最後搞倒要收選委會轉交之投訴信，唔好講央央大報，直情有辱傳媒之中立性，根本就唔配講新聞自由呢個口號。

「大蘇」擾民

小城做完「大蘇」，輪到京城做「大蘇」，唔知乜嘢概念國人會覺得「甲子」係好重要嘅一回事。如果係對人，大家自然會明白一般人之壽命週歲，去到一個「甲子」就等於進入人生下半場，而以過去「甲子」之標準，已經係由人生最高峰開始退下火線之代表，所以大家都會大肆慶祝開始準備唔使做。但係今次嘅對象係國家，一個有能力、為國為民之政權根本都唔應該點慶祝，因為所有資源都係來自庶民所出，有責任之官府應該將資源投放於有需要的階層，而唔係為咗大部分人開心而浪費公帑。今次京城封城閱兵、戒備慶祝，除咗京城庶民要受生活的不便之外，一般遊客更加係一肚火。因為大家都估唔到京城會喺國家生日上面，會出動「戒備」呢一招，去確保電視畫面上有個體面嘅閱兵儀式。結果大部分一般上京之遊客除咗喺京城搵唔到酒店住之外，仲要連食都冇啖好食，因為閱兵廣場周邊所有店舖關門。好彩京城商戶人品好，甘願配合當局的安檢安排，肯關門唔做生意以保過程順利。若果事件發生於鄰埠，結果就會完全唔同。至於喺小城，祖國生日除咗多咗兩日假之外，亦都多咗好多因為放假而逃到小城度假之黃金自由行。到咗我哋呢啲同市場反應冇直接關係之人士，自然覺得今次咁大肆鋪張去慶祝，除咗勞民傷財之外，都唔會有乜嘢正面嘅評語，要睇閱兵打開公仔箱就可以。至於什麼花火匯演，對於我哋每年有十次八次煙花睇嘅地方，更加唔係乜嘢新鮮事物，所以吾等心中暗忖，玩還玩，千祈唔好搞到勞民傷財變成擾民就好。

「屈」夾「賴」精品（下）

今次呢鋪搞到咁大，除咗對搏奕雙方同埋參與之庶民唔公平之外，最被不公平對待者其實係當晚全體之點票工作人員。因為今次連投注額嘅數字都唔能夠即日公佈，最後連賽果都要兩日之後先可以公佈，簡直係前無古人。本來今次選用高科技投注，大部份投注站都唔使點排隊，吸個印就搞掂簡單快捷，好快就能夠完成投注，公平啲講句今屆安排得幾好，而且在場工作人員各方面配合亦都非常貼合投注者，老老嫩嫩照顧周到，令到在場人士都十分舒適。但係當大家舒舒服服咁投完注後，大家都估唔到要等兩日至可以知道個派彩。因為到咗差唔多投注完畢兩個鐘頭，所有工作人員都身水身汗咁交報告後，「鬍鬚官」發覺唔啱數埋唔到尾，所以連總投注額都唔肯交代，只係講電腦統計數字而唔係總投注額。當晚各大媒體自然追住唔放問點解咁耐都冇最終投注額？「鬍鬚官」就同大家講今次投票用咗電腦，而在場嘅工作人員唔記得按「Enter」掣，所以條數唔夾，要再等所有錢返晒嚟至知有幾多投注額。大家就想問點解所有人投注都要入卡，仲要個工作人員按掣至算數咁落後？試想下如果大家係當值之工作人員，聽完「鬍鬚官」咁講法仲有乜心機做落去呢？大家由朝做到深夜啦！到深夜公佈總投注額之後，又輪到投注作廢個案太多，結果又唔能夠對外公佈法定數字，最後竟然要玩無限復活去掩飾制度上之過失。「鬍鬚官」又話各投注站嘅投注標準唔統一，所以要全部投注番晒嚟總部至可以向外公佈派彩。一班喺投注站瞓身搞成晚嘅同事被人屈完再屈，你認為會發生乜嘢事？唔通大家都唔識廣東話？定係大家都唔聽你講自把自為？咁無承擔學乜人做官！

「屈」夾「賴」精品（上）

一入餐室，即刻聽聞茶客大聲議論：「四年至一次全城賭鋪勁嘅，但係個莊到揭盅時發現唔對路，竟然發難渣話唔算，同細路哥輸咗猜大王之後改口話其實係三盤兩勝制一樣，就算個結果冇變，都只不過係個細路連續輸晒兩鋪，所以至係咁，若果結果改變俾個細路贏番兩鋪，你估下次仲有冇人肯入嚟玩呢？真係離晒譜XYZ@%#……（下刪數百包含不雅用語及三級字句）」。事實上今次嘅莊荷「鬍鬚官」本來係處理整鋪大細嘅時候都十分稱職壓到個場，點知到最後竟然爆出單唔啱數事件。唔啱數都算啦咪衰衰地認自己做得唔好囉，點知又因為唔肯認衰，驚被人質疑佢嘅公正性，竟然喺佢認為合理嘅條件下面改變有份定落嘅遊戲規則，執住一句「清晰顯示其意願」，大玩無限復活功能，搞到全世界媽媽聲影響市容。本來買大細莊閒係各有所好，派牌開盅者只不過係打份工，冇理由要介入呢淌混水，今次咁搞法同賭場唔俾人識記牌一樣只有佢玩晒，所以話佢其實唔係乜嘢法官，直頭係判官冇人可以提出異議。今次有人遞信表示會法律追究，茶客亦覺得無可厚非，事關就算冇改變個結果，可以咁隨便地改變個遊戲規則，直頭係唔尊重博弈雙方同埋有份參與嘅全體庶民。其實每屆之投注方式都有少少唔同，而亦都出現唔大唔細嘅問題，亦都係咁過咗咁多屆，「鬍鬚官」亦都做咗咁多屆，大家都應該好有經驗，點解今次出現咁多投注無效嘅情況，其實係應該喺賽後報告度向大家講解，而唔係為咗個賽制唔妥就要即刻改變個遊戲規則，去做俾人睇個賽制冇問題，結果證實最差嘅係成個委員會。