一張銀紙搵命搏（上）

圖片來源：新華網
自從祖國接手辦百年奧運，立即引發全民勁炒奧運概念。成功投得奧運指定的商業機構紛紛推出不同形式嘅奧運紀念品，數量同品種仲多過大會製作嘅指定紀念品。大會指定紀念品專賣店落戶小城成年，從來都未發生過有人排隊買大會生產嘅五隻公仔、金玉璽等。相反指定贊助商推出嘅紀念銀紙，即刻就引發全民排隊輪購。最早出事嘅係祖國總行，大量居民於發售前幾日就到銀行門口排隊，有老有嫩加上大量道具，搞到堂堂京城總行大門像成間難民營。跟住熱熾嘅炒風相繼由內地吹到鄰埠，順便燒著埋小城。關於今次銀行推出嘅紀念銀紙，似乎當局由籌備至推出，都冇十分詳細咁研究過庶民對呢批紀念版紙幣咁有興趣。例如京城總行出現人龍排隊後，有記者拍攝現場情況就被負責人驅趕。跟住輪到鄰埠幾間分行公佈發行新紀念鈔，吸收咗京城總行之混亂情況，又發展咗網上預訂方式，以為可以減少排隊人龍，點知冇減少到不特止，仲因為冇預計咁多人排隊下引發的混亂，加上幾日的惡劣氣候令輪候人士鼓噪，搞到警察要到場負責維持秩序，但係銀行方面就一個職員都唔到，最後要到深夜時候才公佈第二日派籌。最後當然輪到小城出事，不過小城就比較好少少，就係街道相對十分狹窄，根本容納唔到太多人喺門口排隊，只能夠慢慢輪住排先至可以。綜合數次不同時間的新鈔發行，在安排上十分混亂，亦沒有配套及應變措施。其實咁簡單嘅紀念鈔發售，當局做過唔少次，應該十分有經驗，今次出現嘅混亂反映當局根本唔諗住要有應變措施同第二手準備，應該要深刻反省下。