閒話家常「京奧運」之LED

圖片來源：陳夢凡
終於，影響著數十億人的「京奧運」正式完結，乜人都講兩咀奧運賽事，由金牌數字到技術層面、由開幕式閉幕禮到奧運夠唔夠環保，成間茶餐廳都有人討論，梗係啦，唔理你有冇高清，呢半個月以來基本上都冇乜選擇，唯有參與其中，先至有群眾話題。其中議論最多者莫過於張大導主理之開幕式，部分人覺得好靚好有氣勢，有序地概括祖國數千年歷史的科技發展。有人又話張大導淨係識得恃人多，仲用幾廿年前橋吊威也，主題仍然不改四大發明五千年歷史，一啲新意都冇咁話。姑勿論大家角度如何，在開閉幕式中，最大贏家必數燈光組及我國的LED工業。開閉幕式中，祖國大型表演項目的千人操、煙火效果以至吊威也效果，大家都由細睇到大健康又愉快，數最令人眼前一亮的，當然係地面上兩台巨型的LED屏幕，配合以燈泡組合成的奧運五光環，乍看像熒幕效果後，整個發光五環徐徐地從地面升起，導演巧妙地利用視覺效果，把整個開幕禮的主體象徵向觀眾展示。當然不得不提另一個最大道具「發光卷軸」，由兩台圓柱型的LED屏幕配合地面的平面熒幕，利用預製的錄影片段加上地面、天空中的表演，立體地向觀眾闡述祖國過去的輝煌歷史及人民文化。另外多個表演例如「人造鳥巢」疊羅漢中，表演者身穿的發光衣服，發光的缶陣為大家倒數開幕式，當然還包括擊缶者手持的棒及按壓力作燈光開關的缶面，以上種種都為大家展現出LED不同的面貌，導演努力地發掘LED的多樣性，至使傳統的表現方式有著不同的效果，亦令古老的表演有了一層新的包裝。