圖片來源：king macau官府出手資助置業人士買樓，已被代議士質疑官府托市，知縣於議事堂答問會上直接回答大家，政策唔只係救地產商而更加係救地產從業員，叫大家唔好一味以為官府推出之政策係托市、係官商勾結，呢班地產從業員都係社會一員。雖然知縣係咁講，但係托市態度十分明顯，用拯救該行業從業員作解釋茶客自然唔多收貨。陰謀論者指出，呢招同早前派兩億幾俾公車公司係同一樣嘢。大家自然追問點解，佢解釋謂知縣任期明年底屆滿，自然要對個人前途作出有效安排，大家只要回想一下知縣上任之前，所出任之公司董事職務多不勝數，當中又以公車公司同銀行董事最為老街坊熟悉，當然知縣接受京城任命前就已辭去所有私人機構之職務，但係知縣之前任職之機構大部份都係家族生意，又或者係家族與其他人合資的股份有限公司，咁如果知縣任期屆滿之後想重新出任以上公司之董事職位又成唔成立呢？不過咁講番知縣做咗十年咁辛苦嘅工，相信佢本人就唔會有太大意願出任番一職半位，就算佢本人冇意願重新披甲上陣，只要依然係家族一員自然可以接受家族能力上的支持，而呢份報告又係知縣任內最後一份，會唔會有丁點回饋支持親朋戚友之心態？而大家都睇得好清楚，記者曾訪問公車公司負責人，佢竟然答而家官府補貼我，你地唔高興，咁以前我做咁多嘢又點計？咁係唔係官府同公車公司有私下協議呢次我補貼你，下次你補番我大家好做嘢。如果係咁，今次官府允許花旗字花檔暫停興建酒店城，同將約唔知有冇出入，又會唔會係今次我俾你過骨，下次你要益番下我搞蘇有特價，咁就大家歡喜？
沒有留言:
發佈留言