公然踩場與官府自信（下）

圖片來源：澳日
今次鄰埠垃圾議員大鑼大鼓，集晒馬過大海踩場，擺明車馬係試閘剃官府眼眉，不過若果官府就咁被佢哋順利入境過關，就真係被人剃到應一應，你估佢哋今次入到境就唔會唱小城官府咩？（執筆日仲未知結果如何，批准入嚟慘囉！）佢哋根本就冇諗過會入到境，仲呼籲一齊過海者買單程船票唔使損失咁大。咁講，呢班自大桂枝唔知自己乞人憎就佢哋自己嘅事，但係官府上次又的確係重手咗。事關無端端閘咗個應邀過海嚟小城，出席大學研討講座之教授返轉頭，最後搞到講座都好似話搞唔成，呢一點都係激發鄰埠班所謂飯聞垃圾議員過嚟踩場嘅原因之一。
　事實上呢次官府的過敏反應，最主要都係官府對自己冇信心，擔心今次條數字法準備通過時有所阻滯，大家淨係睇數字法嘅諮詢期只得四十日，就滾水淥腳拎去一審通過就知道。同時亦對庶民冇信心，事關今年係「傷損」同「雙慶」年，放呢班友入嚟可能又會激發小城新一輪官民矛盾，又可能破壞本來預計應有之歡樂氣氛，到時候京官到賀，出現乜嘢示威遊行就會好冇面。不過官府就真係太天真太傻，事關小城庶民雖然平時唔多出聲又或者唔係太成熟，但係亦有自己嘅主見同思維，唔係咁容易被外來人干擾自己嘅睇法，加上小城庶民主流都係習慣和諧協商去解決問題，唔同鄰埠喜好激進抗爭嘩眾取寵，只要唔係太過分，大家都樂意選用理性角度去討論，多過大鑼大鼓博出位。若然官府真正做到以民為本、公正無私，根本就無須理會鄰埠之政治團體喺度搞搞震，多做對社會有建樹、推出惠及各階層福祉的政策，配合社會變化與時並進，就唔使理外面嘅瘋瘋語語。