環球笑料的無冕選舉（下）

圖片來源：時新網
今次「吹水」咁驚見人（事實上除咗宣佈參選當日的記招之外，遞表當日竟然搵幾個G4圍住唔俾人埋身，連記者都一樣），除咗一直以嚟「吹水」都唔係好適應面對公眾傳媒之外，另外亦因為記招當天被混水摸魚人士偷襲成功，再加網上反對民意強烈，連同發生有人於鄰埠登報公開反對佢本人登位，面對眾多反對壓力更加嚇窒「吹水」唔識得點樣反應好，結果好明顯「吹水」根本未有足夠準備參加「估領袖」遊戲。首先咁冇準備其實應該係佢本人太天真太傻，冇諗過自己民望咁差，另外亦估唔到佢老友做完呢十年之後竟然會有咁多人開咗開竅、會努力發聲爭取權益，而佢本人之最大皇牌就只不過係制度同埋個三百位鄉親。佢亦明白反壓之大當自己未有足夠支持時，倒不如龜至當選日當天，讓既成事實大家無奈接受之後可以逃過當選前的猛烈追擊。但係避得一時唔避得一世，如果佢真係有心做好小城領導人，應早有準備面對群眾，同時應該有更清晰的管治理念讓大眾知道佢本人將如何承擔小城之管理責任。不過今天除佢一人冇人敢出嚟同佢爭，其實對佢都好大壓力，因為佢好清楚只有佢一人面對所有嘢，群眾認受性不足加上本身並非如奧巴馬般能言善辯，未來的日子根本就唔好過。同時今次連阿爺之態度亦都唔清唔楚，更加令佢覺得自己孤軍上路，始終級數所限，阿爺對於新一代之培育未完成之際，轉眼已經要搵人接手新一任期，可以預期未來幾年小城仲有排煩，雖然大家都預期佢即將「高票」當選，但係咁是否代表佢本人有民意基礎可以帶領群眾面對未來的挑戰，難怪今次的無冕選戰被笑兒戲成為環球笑料一宗。