釣魚台手法（上）

早幾日太陽國首都市長，公開表示會利用首都官府嘅錢，去買下同祖國有爭議之「尖閣諸島」，即係大家嘅「釣魚台」，佢哋話如果由國家擁有之後，咁樣可以避免咗好多爭議，避免咗咁多年嚟都會同鄰近國家發生嘅冷熱問題。大家可能唔清楚，世上曾經有個國家叫做「琉球王國」，佢哋嘅版圖大概係今日好多人都會去玩嘅沖繩一帶。好多人都知道當年花旗國戰勝咗太陽國之後，「管治」嘅太陽國一段時間，到佢哋認為太陽國經已輸得心服口服之後，至將個管理權交返俾太陽國自己，而順便為咗限制祖國嘅發展，將「釣魚台」等嘅琉球王國國土，交咗俾太陽國管理，結果引發咗長達幾廿年嘅「保釣事件」。不過大家喺將矛頭指向太陽國嘅同時，都會諗點解當時國家唔盡全力取回所有流失海外嘅領土，當然包括埋寶島啦。只係當年國力弱無能力打外島戰，結果咁多年都只係口頭上叫太陽國唔好咁過份，從來都無動手動腳話攞返個島，結果今日被人「蝦」到上心口。而今年小城開始傾政制改革，官府做完一大場戲之後，到第二輪「公眾諮詢」時，官媒聯同各大社團、金權組織、利益集團等不斷唱好官府提出嘅所謂「經諮詢後得出之民意」，又派出大量打手出文發表，甚至連風水師都出埋，目的就係想將「二加二」及「一加一」製造成既定方向，好等最後硬交「垃圾會」審批，到時就可以順順利利咁過渡，唔使改變遊戲規則。官府努力製造既定事實假象，同太陽國所用嘅手法一模一樣，先有既定目的、再努力製造現象、然後達到所得之結果。