厚面皮（下）

官府呢次處理政改諮詢嘅手法咁差，反而激發起唔少人認真對待小城嘅未來。而今次「無辜」被選擇「方案」嘅人，唔多唔少都會問返一句：「點解有咁多個簽名下仲會有咁多人唔同意？」。官府今次拋出呢種咁樣嘅方案，目的都係想增加多幾張凳仔俾大家爭吓，以為擴大少少空間就可以平息民憤，好繼續維持政治同盟嘅合作模式而又無人可以管得到。但係做得咁核突直情將唔多理事嘅庶民一巴二巴咁拍醒晒。回歸以嚟三屆官府兩位知縣，官員一直只有調任或者係自動引退，除咗「走資司長」出事落馬、「運動部長」做完公司董事無得做返公職之外，完全無人因為唔稱職或者係做得唔好而被換，甚至連現任知縣都係由過去體制內擇選出嚟，庶民根本就從來都無得揀。庶民睇住鄰埠熱鬧嘅狼豬人選秀，至少都有話過俾大家聽佢哋嘅政綱同管治理念，雖然認同與否大家都無得揀，不過都可以喺茶餘飯後吹水評論吓。再加上鄰埠幾屆官府只要有犯錯無犯罪，都要下台謝罪。相反小城管家婆「墓地門」被鬧到七彩，依然可以繼續出嚟推「爛方案」。「扌查數部」被揭發亂開會報大數呃錢，竟然仲可以轉去其他部門做嘢。而「宣傳部」使完幾千萬做「蘇」之餘，仲想搞個監管會嚟控制消息發放、天文台連掛唔掛波都要睇「用家需要」。呢班所謂嘅官都做咗十幾年，咁多錯漏兼夾涉及以權謀私，就算唔拉佢都應該「炒魷」以謝天下，以佢哋嘅質素根本就無可能好似鄰埠咁唔做高官走去直選做代議士。結果唯有厚住面皮阻止反對聲音以保其位。