大太監（上）

知縣交完功課後，終於輪到管家婆上場。佢作為公墓園之首，行政同立法都關佢事，官場內政全部佢一個人負責，唔搵佢出黎交代一下，莫非真係唔駛做咩！按照官位輪隊，管家婆自然應該係一人之下，照牌面計就連負責出糧個大掌櫃，都要問下管家婆我地有冇得加人工。今年都經已係回歸十三年，數民望最低（若果真係有的話），管家婆肯定排頭位。作為大內總管既佢早就經已被批評行政效率低下、法律改革滯後直情係歷史檔案館，就連大西洋國司法官員都要造訪小城，研究番佢地套法律以前係點樣用、現在又點至用得倒。呢套笑料直頭好睇過鄰埠笑匠最新個套大話西遊，事關呢套用左全城幾百個億去「打造」，歷時十三年都未拍攝完，結局係點就更加冇人知，仲唔係史詩式鉅著！當然，有人會話阿盲俠大導套「一袋終屍」夠拍左十年都未見影拉。不過庶民就只會柴九上身問番句「人生有幾多個十年？你仲要我等幾耐呀！？」。大概阿大內總管仍然以為特區或者佢自己仲係好年青、依然咁年少無知繼續「天與地」？其實經已講到好白「The City is Dying」，搞到小城今時今日咁既田地 呢班庸官仲想阻住個地球轉幾耐？但係睇番小城官府架構規定，除非有人夠膽學北極熊國咁改制，流一屆後再上黎選，先至會有太上皇既出現，否則知縣最多只能連任兩屆，反而一眾庸官經歷幾多屆都冇問題，十三年歷任兩屆知縣，就連以前班西洋高官今日係「天涯海角」，都仲諗緊如果有機會繼續係小城當官你話幾好呢！最好梗係做到「大太監」添啦，皇帝做死佢都仲未死！