代表(上)

每年一度專門為打工仔而設嘅假期，叫做無事無幹咁就過去咗。每逢呢個日子，唔少人都好期待有日假，不過各行各業對呢個假期就有唔同睇法，就算同為打工仔都係咁話。一般白領就行街睇戲食飯，叫做放吓假，北上過海各有喜好。而藍領工友梗係飲茶郊遊親子樂，始終日捱夜捱都係為家人。不過最辛苦莫過於服務業工友，即係包括7/24嘅字花檔工友，佢哋除咗No play之外仲係No say。用老闆嘅講法，就係「食得鹹魚抵得渴」，想改善條件唯一辦法係轉行。但係有部分人會揀除咗放假休息之外嘅活動，就係借住呢日假去表達心聲，而遊行就係重頭戲。尤其係小城嘅「五一遊行」因為幾度登上國際頭版，對於小城打工仔嚟講，更加係特別有意義嘅日子。不過自從早幾年遊行大軍加入咗年青人之後，佢哋對官府嘅不滿就更全面更廣泛，甚至連傳媒生態都係佢哋嘅訴求之一。喺茶餐廳就有老街坊講「點解班細路咁得閒？讀多兩本書讀多兩個字仲好啦！」對於阿伯嘅意見，茶餐廳全體以噴啡噴茶作回應。扮晒「十八樓周老闆」嘅中坑就話「呢班後生仔咪就係讀得書多，所以至唔鍾意被人呃囉，人哋俾八千你你就收聲，第日俾多八千你，拆埋你祖屋山墳添呀！」好明顯呢位「疑似周老闆」對「堅定不疑發展落去、人人都破壞環境唔係得我一個」十分不滿，再加埋「桃花崗忽然私家地」等種種暴力強拆身同感受。呢班後生仔嘅最佳示範，就係你越唔出聲就唔會有人再幫你出聲。佢哋代表咗唔少「疑似周老闆」呢類不滿現狀但係唔敢、又或者係無能力表達嘅庶民，行出嚟發表意見。