A貨B貨（下）

照片來源「澳門旅遊局」
祖國同胞搵零團費到小城，為何每每只以世遺作到此一遊，其餘時間都用作測試個人來年運氣，體驗一國兩制之刀仔鋸大樹？道理十分簡單，小城為全國唯一合法開賭之地，又可體驗拉城之鬼佬風味，與內陸的地下活動及劣質扮老外相距何只千里。況且一唔覺意除可免費旅遊外，更可又食又拎有所斬獲。相對於鄰埠一直標榜高消費與服務品質，旅客自然一唔對路就出聲，就算以最低團費報團，導遊亦只能食榖種，所以業界千方百計搵水就不在話下，而當中的不法之徒就在內地建立一條龍服務，成功繞過所有監管機制運來一車車小肥羊，全程由屠宰至剝皮拆骨都不經人手，利潤盡歸集團所有。除著花旗賭王落戶小城引入世界級名店後，多年真空的侵權苦主亦陸續進駐。現今如要以售賣B貨搵食，就必須以集團式經營一條龍服務才可減低風險及增加利潤，情況與鄰埠相若，要杜絕旅客於離境前發現貨不對版即時向燒毀腦備案。今回鄰埠失手正好警惕小城衙門加強執法，防止剛起飛之零售業受到重挫。小城環球出名之後所增加之旅客除了祖國同胞，更包括花旗等世界各國人士，幾億隻眼望住一有衰野全世界都知，「冇秘密」除了在小城內部出現，更是當今通訊發達之環球資訊，衙門之執法力度直接關係小城庶民之生繼，再像以往有法不執將扼殺大部份正當商號所艱苦經營的小城信譽。