美猴王只要打好呢份工

自從「打好呢份工」之意識形態成功打入鄰埠各大媒體之後，主管小城打工仔衙門的「美猴王」老孫立即當為金科玉律，近日於公仔箱以「我都係打份工咋！」之態度，對媒體發表以平常心看待五一遊行，你有遊行自由而我也有理唔理你之自由也！擺明係只想打好份工，叫我諗計唔好搞我。亦難怪，自從美猴王執掌打工衙門之後，呢幾年被人插到連祖宗幾代都受牽連，但奇怪每當垃圾會內之「插問大會」美猴王都唔駛出席，任由老闆們發表偉論，大家完全唔理佢大哥係如何掌管打工衙門，皆因眾代議士都了解美猴王只不過係執行者，要干擾政策當然要同大佬拆掂。可惜一眾勞工庶民不時到美猴王的水簾洞請願，要美猴王親身接信之餘仲要為老闆之政策解畫。有乜辦法呢幾年佢老哥之太極功夫唔更上一層樓丫！雖然公仔箱片段就此打住，但有口痕友問今次五一連公務員都上街，佢本人會唔會出席支持下，或者會唔會學下土生議員咁幫同袍出下聲，大家應為佢會點答呢？當然今天一身好武功的美猴王自有標準答案：“公務員之制度並非其管轄範圍，無態可表也！”，可惜有留意公仔箱報導者十分清楚，佢老哥的身形之增長與髮線程相反方向，可能因為佢每日要變身都要拔毛幾次。今時今日要求衙門中人仍抱有父母官的心態似乎已不切實際，以簡單一句平常心看待實在係非常坦白的表述，因為以現今市場之求才若渴， 美猴王隨時可以轉去執掌任何一間影帝酒店人事部，專門針對勞工法律及人力資源，或助花旗賭王再來一次大規模炒人。好過日日被各派代議士或工會代表咀咒祖宗幾代，但又實情與佢無關者也。