回鄉買“糖”（上）

圖片來源: 澳門日報近日新聞紙每天都有“回鄉買糖”人士被捕快拉回衙門消息，最誇張者為嫲嫲拖埋孫女落水做“臨記”，成功混水摸魚入境，但天網灰灰撞正為近期鄰埠回歸而進行之洗太平地行動，可憐手抱咁大之蘇蝦都要入衙門參觀下衙差叔叔點做野，等待屋企人接回家而一頭霧水。

據報嫲嫲實為每天游走兩地之全職“水客”，話明“水客”就梗係幫人帶貨，每日見關員多過見個孫，可能因體力下降唔想用車仔拖貨咁辛苦，今次搵埋孫女幫手做“老臨”無非都係為左搵多D 。據估計每日利用小城居民證經關口進行“補償貿易”人士多達數千人，早被外地遊客籲為小城八大奇景之一。兩地水司不斷改變遊戲規則打擊“補償貿易”，於三不管地帶加設欄杆嚴禁走半程，又實施專用通道指定大體積貿易品過機檢查。當然此等都係道高一尺，“水客”高幾丈。由紅白藍袋到手推車，進化至摺車而最新武器為兩大布袋，每次都以體力汗水換取數十元。但呢位嫲嫲報稱“帶糖”只收“三舊”，回報率之低實在令人費解，原因可能太多人似佢咁業餘性質搵快錢，或者根本有需要人士自己帶都得，而取貨途徑就多到好似“七仔”咁梗有一間係左近。出了事除嫲嫲本人要入大牢之外，係鄉下分分鐘要打把，而且仲要搵埋自己孫女做“老臨”就更無利可圖。嫲嫲今次實在不能以挺而走險來形容，因為都做左成年先被拉，直頭係食過翻尋味，佢會唔會以為自己幾廿歲，官府唔會咁重手判佢坐十年八載？或者係大牢可能仲好食好住有電視睇，唔駛每日日晒雨淋咁拖貨過境咁辛苦？真係唔知呢位嫲嫲諗乜！