世紀「基建」

圖門來源：香港文匯報
廿多年前第一次建議，歷屆鄰埠長官都話要加緊籌劃的「港珠澳大橋」終於都拍板，計劃方案一改再改連名都改過幾次，最終阿爺都係睇住鄰埠，飛起深圳採用單Ｙ設計，直接由珠海及小城接駁主車道，然後通往鄰埠。前兩日有關基建的分數問題終於都傾掂數。大家都同意最大著數者負擔最多，即係鄰埠要負擔中標公司餘下的補貼造價超過一半，廣東省政府就負責百分之三十五，餘下就由小城官府負責。淨睇條數小城好似好划算，只需負責尾數的一成五左右就可以享用呢個世紀「基建」。不過大家唔好唔記得，大橋本身口既設計僅六線雙向行車，就算只有貨運車輛使用大橋進入小城，喺今天已經十分擠塞的路面再加入新增的外來車輛，路面幾乎可以肯定飽和。由於最終規劃仍未出台，落腳點附近等交通安排仍未清楚，但係萬一鄰埠賭仔諗住揸埋部車過嚟搏殺，輸咗可以連車都賣埋嘅時候，咁小城有冇咁多地方安置呢類型鄰埠帶來的大體積物件呢？講真，相信有啲見識嘅鄰埠人士都應該唔會諗住才查車嚟小城賭錢，不過官府一定要考慮有這個可能性，否則到時建多幾個人工島都唔夠接收三地賭仔棄車。再講，到時物流業界必定會大量使用大橋作主要運輸路徑，當大批大型貨櫃車輛進入小城後，勢必影響小城的空氣、道路的壓力，甚至本地的客貨車司機的生計。以上問題即使在今天仍然是小城的主要問題，再加上外地司機要面對小城路窄電單車多，到時的交通傷亡數字必定增多，面對及處理大橋建成後外來車輛對小城的影響，必定是下任知縣的最頭痛問題之一。