鬧劇（下）

新方案唔理係2+2或者係1+1，都係直間一齊加，但係就唔知點樣叫做體現民主。提案一方話咁樣會提高庶民參與度，可以俾多啲人一齊玩咁話。老老實實，大家有份參與嘅一場戲，就算無份做主角，至少個主角都要大家認同至可以擔戲。大家只要睇吓鄰埠正在上演緊套「動物失樂園」，就知道只要主角不被認同，就會上演呢類「群毆戲」個個被人打到豬頭咁。睇返小城呢檯戲，悶到抽筋之餘又唔俾大家時間去消化套戲嘅內容。場場戲都無過場時間話諮詢就諮詢，又專登隱藏伏線唔俾大家知中間發生過乜，結局自然唔合理犯駁多，就等同荷里活三流科幻片一樣得過快字，過咗海就神仙。套戲要令人受落最低限度要吸引佢哋參與其中，若果套戲都未開始就話俾大家聽，套戲嘅結果係咁樣，大家會唔會有興趣去睇呢？大家最唔明嘅係大家就算點參與去搵代表自己嘅代理人，加埋都唔夠被自己無份選嘅人數。而且呢幾日有唔少人發表間選有其代表性，當然有啦！佢代表咗全民參與嘅戲裡面，有部分人係可以唔止投一次票，而最抵死嘅係，所謂嘅專業界別裡面，根本就無投票嘅常識，只係有投票嘅共識，部分甚至係參選與否嘅共識，咁就真係大家首先要對「民主」一詞有共識至得囉。講真若果話要以增加間選議席去擴大代表範圍，首先應該要增加外勞界，同賭場酒店界。事關兩個界別佔咗小城嘅GDP差唔多有四成，佔庫房收入更加達到七成幾。所以增加間選議席根本就係一套鬧劇，比祖國村民嘅思維更加落後。