幾時至會反省？（下）

這邊廂，城中有人發起捐出官府派出的錢以助低下階層，儘管不同人有不同的使用方式，知縣一早就明言閣下點使係閣下口既自由，冇人會阻你亦唔會有感想，所以電視台記者問咗一個十分無謂口既問題。另一邊廂，緬甸風災據報死成十萬人，緬甸華僑在小城亦為數不少，呢次官府卻又未有即時反應，民間同紅會都發起募捐行動，官府係唔係都應該有啲表示？唔使你俾廿億人哋救災，祖國講緊捐幾百萬美金，官府捐回一二百萬賭稅點都應該掛？而且官府更可以帶頭呼籲市民一齊捐出原本諗住「還富於民」口既五千蚊，一來可以平息部份內部對呢五千蚊口既爭議，又可以向國際社會表現出人道形象，封住部份有心傳媒的那句「財大氣粗」，更重要係做回個負責任口既政府，一氣扭轉過去幾年鄰近外地對小城的負面感覺，就係小城一味靠賣賭引致外地問題賭徒的不斷出現。官府可以藉著向鄰近地區的援助救災，樹立責任賭博的管理者角色，逐步改善小城的國際形象，加強對鄰近地區的協助及合作，利用今次災難作為切入點，加大與鄰近地區的福祉合作而並非單單經濟合作，只會講錢咁市儈。況且使費唔高，就算鄰近地區唔會即刻對小城改觀，至少可挽回庶民對官府唔少分數，計落都有賺。但點解咁識計數之官府今番竟然連咁簡單口既門面功夫都諗唔到呢？莫非包裝術對官府嚟講真係死穴？雖然小城都有不少國際機構都出面呼籲市民捐款脤災，但係到今時今日官府都仲係一啲表示都冇，如果錯過咗今次翻身口既機會，唔通真係要死更多人至識得主動啲表示自己口既心意咩！官府幾時至會反省下？