幾時至會反省？（上）

今時今日已經冇人問點樣用官府派嘅幾千銀，反而係睇外地媒體嘅反應就仲加好睇。官府公佈當天，鄰埠電子傳媒已經有主播羡慕到開晒口咁滯，仲列舉小城GDP幾高派回一些俾庶民「還富於民」咁解。當然第二日就更加厲害，鄰埠某星球報更以「仁心仁德」來形容小城知縣，話官府大老爺體諒小城高通脹下庶民生活，派錢幫助全體共渡時艱咁話。不過，呢啲都係純粹個人意見，並不代表庶民立場。但係又有雜誌以小城財大氣粗做標題，表示官府派錢惹爭議。雖然官府派錢政策真係備受爭議，但用到財大氣粗來形容官府嘅政策，相信只有係鄰埠「食唔到嘅葡萄」心態先至會有咁嘅表達方式。事實上今次官府派錢除了令小城引起爭議，又引起鄰埠人們眼紅，更有內地人士要求內地官府參考小城的派錢方式，幫助內地減低通脹壓力。唔通大家真係覺得小城作出呢啲咁出位嘅政策就係好事？係唔係好事日後自然有所分曉，不過知縣宣佈政策之後，惹來小城內外咁大嘅反響，又究竟係唔係佢預料之內呢？自己又有冇反省過呢？
　自從政策宣佈至今小城內部意見不一，部份人覺得政策有唔少副作用，擔心當政策出台後有機會引發的新問題。包括通脹不跌反升、親子爭執、供應貨幣緊張等，甚至有人預計小城有三成人於收錢後立即出埠旅行。但係唔怕同大家講，根本唔使等收到錢，過去呢半個月已經發生緊大家擔心嘅問題。阿仔已經同老豆講，你買咗部PSP俾我先啦，等政府錢一到就即刻還俾你。同一時間有人估到暑假有好多人會報團去旅行，為免到時爭唔到想報嘅團，一早已經同定旅行社講定訂團位兼請定假。咁唔使講要買名牌人士自然更加會用張卡即刻出咗貨威咗先，最多俾少少息就包保買到心頭好，反正一定有筆樣財到手，使定先咪走雞，如果到時冇錢到手咪又上街示威囉。