繼續唔清唔楚

公車加價在一片爭議聲中正式實施，頭幾日都有扣錯錢嘅混亂情況出現，觀乎加費後車站長龍一如以往，班次唔見多咗，等車一樣咁耐，淨係知道如果唔去買卡，就會蝕底咗俾公車公司，因為會冇咗官府資助，所以臨加價前兩日賣卡地方就打晒蛇餅。公仔箱新聞訪問部分庶民對於加咗價有乜意見，大家都好老實咁講咁嘅環境仲要加價，覺得唔公平，但係冇辦法都係要搭，有受訪者仲話官府就算補貼兩億幫市民，唔搭開公車嘅都係唔會搭，就算再多補貼都冇用，因為太唔方便。當然官府提供俾庶民嘅優惠，庶民有權決定享用與否，但係小城交通之死結根本就唔係一兩個措施可以解決倒，所以今次官府對公車之補貼實質成效存疑，但係就對小城通脹就有住直接嘅影響，因為雖然官府補助咗車費，但係價就真係加咗，今天之車費對於未來兩年公車專營再檢討完成後，再定之公車票價有著指標性作用，同時亦影響新加入經營者對公車投入資本的估算。而公車經營者過去一直未有披露專營相關週邊的利潤，作為專營者於社會上必需承擔部分責任，作為享受專營保護下的條件，官府同庶民都好應該清楚其中嘅運作，問題係官府作為批給者對於專營企業之監管失職。企業運作透明度不足就係必然嘅事，但係官府作為批給者就係要進行監督，仲要設法令到公營機構運作能令庶民明白費用之加減及對未來的展望，今次議會上司長繼續被指責，除了欠缺同議會溝通之外，更重要係匆匆同兩家公車公司簽約，到大家要求討論時已覆水難收冇得救。

點解要搞地方誌？

最近小城準備搞地方誌，估計個「畢直」要使六億以上，冇講邊個比俾錢，但係就有官府高官出席剪綵，估計都係小城官府出資籌劃，又話要花成十年八年先至搞得成，今次仲搵埋京城地方誌官員作指導一齊搞，好大陣仗。
　不過想問下大家知唔知地方誌係乜？我都唔係好清楚，斷估係一本書，一本好豐富嘅書，書嘅內容係關於小城大小事、過去歷變遷等。茶客本來對於小城有人研究過往之歷史，都覺得非常開心，事關作為世遺城市的一份子，應該有番Ｄ有份量嘅學者、研究院或者係鉅著等，以證實小城都係一個文明歷史悠久嘅地方。對小城歷史有系統性咁去編修一本書，對於下一代正確認識小城過去都算係有幫助，茶客們自然唔會有太多反對聲音，不過使到成六億幾（暫時估計，隨時使大）就真係有商榷餘地。地方誌呢類學術文獻，梗係由學者同專家寫，呢類人士嘅正職都係口係高等學府及研究機關內工作，而學院本身亦會對院內之研究作出定額批款以支持研究。不過今次咁重大嘅編修工程唔知點解小城只有一所學府參與，而其他學府就冇關係？本來學術界嘅嘢我地唔係好明，佢地點搞我地都唔多清楚亦唔會多問，但係今次如果係官府用六億幾去「支持」學術界出一本書或一套書，咁係唔係要同大家交代下呢？今次究竟係學術界要研究小城歷史而出書，定係官府要留名後世拎六億幾嚟做騷？而且仲花成十年八年，若果係官府出錢，即係同下兩任政府開定一張支票使咗先。若果拎六億幾養一班人十年，即係每個月使成五百幾萬，口係今時今日咁嘅環境，官府之用心係唔係想搞下活動提高內需？因為每個月有人掟五百幾個出嚟都幾和味，咁好嘅工去邊度搵？

管家婆可以等收工（下）

管家婆面對議事堂內各人質詢時表示，接受主席之批評，議會同官府之溝通的確出現問題有改善空間，同時對於代議士們批評官府公堂之運作因為人手唔夠所以引致大量案件積壓亦有待改進，表面上叫做間接承認錯誤，但係管家婆做埋呢屆，出年仲有冇佢份做都成問題，佢今日喺呢度承認錯誤，到咗出年都未知關唔關佢事，又點樣叫庶民同議會放心呢？
　官府對於前朝公堂判官工作效率低的問題一直未有改善，加上改朝換代之下又有一堆法例要修改，工作量大係所有人都睇到，亦都會體諒大家辛苦。但係經過咗九年情況一直都冇起色，而且越搞越大鑊，積壓案件成座山咁高，法律人員人手唔夠根本就有辦法改善，學主席話齋冇人就培訓人，培訓唔切就請人，最多出高D人工請，就算解決唔晒所有案件，至少都可以減輕下，唔會越積越多。而官府內部行政問題更加係管家婆責無旁貸，自己管理嘅地方搞咗唔少嘢，但係改善唔到內部繁複嘅手續同埋執行上嘅官僚作風，同前朝官府多年習慣一樣，但係前線公僕就辛苦咗，工作壓力大咗，呢D都係管家婆過去九年管理下出現嘅公僕問題，議會內更有代表公僕之代議士，贈佢一張公僕上街遊行之報刊掛畫，要求管家婆日日對住佢，好記得公僕團隊內的問題。其實官僚架構對於庶民一向不甚清楚，如果唔係官府內政問題咁多，呢位原公僕又點會有公僕都唔做走去做代議士，代表一眾公僕為不平等政策發聲呢？所以管家婆任內之表現根本唔合格，但係就算庶民及公僕喺外面點樣嘈，代議士們在議事堂內點樣鬧，管家婆都冇理過，連主席年年都鬧一次，佢大姐依然故我，睇嚟旨意佢能夠改善行政同施法都係冇乜希望，唯有寄望下屆官府有冇機會搵到個更佳人選啦。

管家婆可以等收工（上）

知縣一年一度的來年報告出台，當大老闆頂咗垃圾會的第一堂後，議事堂內自然又輪到各級主要官員列席解畫，並接受各代議士之「插問」，打頭炮自然離不開第二把膠椅之小城管家婆。最初幾年代議士們仍對管家婆因經驗不足而放佢一馬，但係唔知點解經過成九次嘅對壘，管家婆仍然未有一次試過以點數勝出，呢幾年仲被技術性擊倒，連差唔多睇住佢大嘅主席呢幾年都直斥其非，差唔多好似喺議事堂內教女咁。無他者根本呢幾年管家婆作為小城最重要的官員之一，一路都冇乜建樹，本來喺議事堂內被人鬧就已經成為規矩，但係被代議士鬧唔等於真係要你一個人受晒，最重要係睇你有冇辦法拆得掂，同埋搵到解決問題嘅方法，咁樣庶民先至唔會覺得係你嘅錯，問題係管家婆喺呢類每年一度，俾機會各主要官員表現個人魄力及政治智慧嘅大騷上面，一如既往地毫無改善只識卸膊，自然俾人插到阿媽都唔認得。正如議會內一向被眾代議士評為搞事議員，質疑官府無視公堂效率低嘅問題上，竟然答官府要尊重判官之獨立性唔方便介入。於是連主席都頂唔順直接利用自身權力自行發言，狠批管家婆唔可以用唔方便介入呢個理由去回答，咁樣講法即係官員唔使做嘢，亦都係卸膊嘅表現，同時主席可能都係忍埋忍埋頂唔順之餘連珠砲發，表示今年係現屆官府最後一年，過去九年都冇一次可以提前三幾個月通知垃圾會幾時會有法案要垃圾會辯論通過，每次都係無端端就彈條例俾議會要佢地一兩日就批，而情況更發生過無數次，而且更追問未來幾個月內有乜法例要俾議會通過時，管家婆依然係答唔出。

灰色世界內的灰色地帶（下）

垃圾會內搞事議員，又襯知縣諗住交晒功課，可以休息番一陣嘅時候，自然唔會比你咁好過啦，如果唔係點叫搞事議員？佢用咗最有效方法之一，就係向全世界講，我都搞番一場諮詢會，誠邀知縣到場出席咨詢，廣納民意協助立法咁話。就係咁樣唔理你知縣在唔在場，當全世界都知道佢請你出席，知縣最多只可以講唔得閒，再約時間啦，不過諮詢期就有限，唔可以為咗你而改等等呢D連我都識講嘅藉口。話時話搞事議員今次起壇作法，都係為咗以後大家被車撞死都有機會有得陪，不至於你話條例係咁就係咁，不過當然要你先信判官判得公正與否至係大前提。從來小城庶民都係生不入官門死不人地獄的觀念，被人抄一張牛肉乾都想死咁滯，叫佢搞埋晒D咁危險嘅嘢梗係唔會啦，不過睇住綠燈過馬路都被人撞死就真係唔抵，怪只怪小城空氣質量真係咁差，全城都係灰色地帶，睇都睇唔清楚乜嘢係綠燈，搞到個個都唔敢過馬路，街都唔敢上，冇計啦小城之風沙仲厲害過京城，仲撞正環球風暴吹到全城人都盲晒咁滯，個個都唔知發生乜嘢事，唯有在盲目中不斷表態話俾人知，我喺呢度呀！我仲未死架救得就救我先啦咁樣囉。不過阿爺對住呢班盲毛根本就唔放在眼內，其實你點表態話俾人知你仍然健在，佢地都冇咁多時間理你，依家人地只想盡快搞掂個海嘯，降低死亡率，冇時間睇你班友仔點樣做大龍鳳。但係大家仍然咁天真地以為搞掂咗數字法就可以有番搾拿，呢個想法自然太天真太傻。須知道如果唔係小城一世二奶命，根本連出場面嘅機會都冇你份，更遑論風沙有幾大，夠唔夠灰色。所以大家仲喺呢度嘈都冇意思，幾廿年前一早就有定案，漁村永遠改變唔倒嘅漁村。

灰色世界內的灰色地帶（上）

近日天氣乾爆，走到街上車輛與天空都一片灰濛濛，入到茶室之茶客亦當然灰頭灰腦。茶客灰面自然各有前因。有人可能買錯雷曼，有人就買錯曼聯，當然更有人可能買錯移民證，走咗黎小城入籍，以為呢個地方冇乜限制，點知即刻俾條數字法你睇！不過對付數字法，買錯移民證者根本就習慣晒，仲過番幾招茶餐廳內仝人，講授一下何謂「上有政策、下有對策」。但係佢最估唔倒嘅係，你有乜政策都假，而家唔係叫你拆掂佢，係叫你表態。佢自然抓爆頭？表乜嘢態？大伙解釋俾佢知即係支唔支持咁解。點知佢更加唔明咁問，乜有得表態咩？唔支持係唔係唔立法先？支持咗係唔係條法唔會引用到我身上先？咁如果反對立法會唔會好似鄰埠咁會唔搞住先？突然間俾佢搞到成間茶餐廳靜晒！冇錯，最清楚數字法者，莫過如祖國同胞，佢地一向有一套應對方案，佢仲叫大家唔使驚，冇乜大不了，教我地識得避開幾個位就得。問題係呢幾個位唔係講一兩個例子就得，專家都未必搞得掂，咁佢就講出最後殺著教大家：你唔好搞咁多嘢咪得囉。咁實在等於冇講，呢樣又使乜佢教？從前人行路邊會有交通符號要睇？因為有咗車爭同一條路，先至要管制要有規矩，有咗規矩就有大條道理話你錯，錯喺邊？錯你唔識規矩，錯喺你唔熟讀法律，條例係叫你見到綠燈先好行，你雖然講我係見到綠燈先至行，但係你見到嘅係人地盞綠燈，應該係佢行先，呢樣就係規矩同法律啦！大家明唔明？即係話最後你俾人撞死咗，都係唔會有命陪俾你，仲係乜都冇得陪添，今後大家小心睇路，唔好亂遊亂行就得勒。

知縣的再見派對（下）

圖片來源：king macau
官府出手資助置業人士買樓，已被代議士質疑官府托市，知縣於議事堂答問會上直接回答大家，政策唔只係救地產商而更加係救地產從業員，叫大家唔好一味以為官府推出之政策係托市、係官商勾結，呢班地產從業員都係社會一員。雖然知縣係咁講，但係托市態度十分明顯，用拯救該行業從業員作解釋茶客自然唔多收貨。陰謀論者指出，呢招同早前派兩億幾俾公車公司係同一樣嘢。大家自然追問點解，佢解釋謂知縣任期明年底屆滿，自然要對個人前途作出有效安排，大家只要回想一下知縣上任之前，所出任之公司董事職務多不勝數，當中又以公車公司同銀行董事最為老街坊熟悉，當然知縣接受京城任命前就已辭去所有私人機構之職務，但係知縣之前任職之機構大部份都係家族生意，又或者係家族與其他人合資的股份有限公司，咁如果知縣任期屆滿之後想重新出任以上公司之董事職位又成唔成立呢？不過咁講番知縣做咗十年咁辛苦嘅工，相信佢本人就唔會有太大意願出任番一職半位，就算佢本人冇意願重新披甲上陣，只要依然係家族一員自然可以接受家族能力上的支持，而呢份報告又係知縣任內最後一份，會唔會有丁點回饋支持親朋戚友之心態？而大家都睇得好清楚，記者曾訪問公車公司負責人，佢竟然答而家官府補貼我，你地唔高興，咁以前我做咁多嘢又點計？咁係唔係官府同公車公司有私下協議呢次我補貼你，下次你補番我大家好做嘢。如果係咁，今次官府允許花旗字花檔暫停興建酒店城，同將約唔知有冇出入，又會唔會係今次我俾你過骨，下次你要益番下我搞蘇有特價，咁就大家歡喜？

知縣的再見派對（上）

圖片來源：新華網
知縣唔知係咪知道即將卸任，於最後一年任期內或者想留下丁點功績或口碑，面向全球經濟條件向下的未來一年，在施政報告中向庶民提供多方位的優惠措施及資助，亦明言出年繼續派錢。公仔箱喺街邊訪問庶民，梗係個個都舉腳贊成，話再派錢俾你梗係唔會有人反對卦！不過新施政報告內又提出支持首次置業人士供樓，再次提供四厘供樓補貼，又連首期都有資助，若全部申請成功買樓者最多只要俾一成首期，就可以做業主。部分茶客即刻都問：小城點解突然間有咁多人買樓？小城真係有咁多人想買樓？無他者，皆因早年字花檔生意好，唔少人人工升到九彩，梗係想買番層樓自住，或者換個層大D環境好D嘅樓。不過官府今次支持小城庶民買樓，庶民其實又未必敢入市，因為大圍環境唔好，大家都唔知幾時會冇工開，當前景有隱憂收入有可能不保嘅時候，邊個仲有心情去買樓？更加有庶民於早前仍有能力嘅時候購入私人房屋，而家都變埋銀主盤。再加上外資字花檔終於宣佈暫停現有工程，一時間小城又多幾千人要搵工做，仲係年關之前，以過去幾年小城人習慣紙醉金迷的生活下，今日突然冇工開既時候，只會擔心前路茫茫而更加唔會諗買樓，呢個施政又能夠有幾多人會受惠？雖然外資字花檔出現停工裁員的消息，其實傳聞已久，今日只不過係正式同大家宣佈咁解，學金融界術語所講，消息一早已被消化，但係點解官府依然推出買樓優惠政策？官府今次所推之政策並非針對庶民，似乎另有拯救的對象。