有幾多走資司長？（下）

圖片來源：新聞局走資司長又要閉門開審，但凡官府做事都係以閉門造車方式處理，坊間已大把理論推算其結局如何，比無間道更多唔同版本，網上熱賣8月1日開上盤定下盤定係A和B和。咁大件事都唔關心當然有失公民身份，但大家更關心係公僕團隊中有幾多人逃出法網呢？就算走資司長權傾天下，都不可能沒有共犯在其部門之內。不過一切都要有法律同證據才可表現小城為法治管理之地，但小城之管家婆法改乏力，法律法規仲用緊中古時代之文物，嚴重滯後於現代社會，咁又何德何能可以令庶民覺得小城衙門係公平公正公公開呢？即使終審判決大老闆有權立法，但其認受性被坊間多次質疑後，基本上唔多識法律之庶民都認定“新例”都係非法條文，犯新法都有機會“過倒骨”，就更加對執法者實行“啋你都傻”，惡性循環下，衙門管治失效民怨加劇，只會令現今混亂的小城再添隱憂。

姑勿論今次走資司長一案如何了結，現任之“手尾司長”都要實行其“執二攤”之功能，雖則期望不高，但都希望佢能做番單大野，搞好輕軌及塔石手尾之餘，搵出其餘的“走資司長”黨羽，改善衙門內的走資風氣及效率，把握重建官府聲望之時機，借用佢上台時講“做好呢份工”，呢樣都係大眾的期望，話晒官府內佢老兄都總算有聽取民意之經驗，好過剪綵司長淨係剪彩先見佢丫嘛！做得好自然就有民意依歸，好快可以結束其“7.11”生涯，有番覺好覺訓啦，況且若真係做得好有得連任，咁佢就可以實現優化方案內的承諾，跨越現屆任期實現庶民對他的期望，到時大老闆個位都有機會坐。