執輸行頭（上）

自從知縣宣佈派錢，已經有唔少人即刻從外地仆到返回小城辦理居民身份的確認。基本上今次突然間的阿公派錢，吸引了不少鄰埠隱性小城居民重出江湖，趕快到身份證明局重新再確認居民身份，「執輸行頭慘過敗家」是鄰埠格言，自然引出鄰埠唔少疑似原居民，老年遠走回來睇下自己仲係唔係澳門人，為的當然都係嗰五千銀，實情佢哋未必為五千銀，驚被鄰埠朋友知道有錢都唔攞咁執輸，係唔係香港人嚟口架！所以接受媒體訪問中大部分人都唔怕直認幾十年都無回來過，今次回來都係為咗官府話有錢派，仲大大聲話體驗權利。話時話呢類人士我哋唔清楚佢哋有為小城做過啲咩嘢，不過幾十年唔喺度，一回來就話要體驗權利，正所謂有權利就有義務，但是他們為小城付出過乜嘢就真係唔知囉。但係呢樣就正正係社會福利最重要口既地方。唔理你喺邊度、唔理你做過乜、只要你合資格，就一定有你份。咁樣計小城口既公民身份都係十分之求其，只要喺度住過幾年又做得，早排就只需要俾一百萬買回來又做得，數回之前最厲害口既梗係連偷渡入境者都得。難怪咁短時間小城差唔多就有成六十萬人，不過數來數去，真真正正喺小城生活了數代口既澳門人，就真係只有識得講土生葡語口既千多人另加幾百名離島原住民等，呢班先真正算係澳門人，如果咁樣計法知縣口既派錢就根本唔行通，所以官府選擇用一刀切方式將有資格領取居民身份證的就派錢，都不失為一個慳水慳力、又唔會有太多爭拗口既處理手法。唔怪得呢幾年鄰埠人士每每聽到小城有派糖行動就眼都紅埋，再加上近年小城相繼出現的鄰埠黑工，都令兩地民間的心態有微妙的變化，唔知鄰埠特首夫人同克勤呀、嘉欣等會唔會回來「體驗」下「權利」呢！不過「伊莎貝拉」就一定唔會回來囉。