執輸行頭（下）

另一種執輸行頭典範莫過如疑似傳銷商被「擠提」，接連數天日日幾百人到「出事商號」要求商號回收貨品及退款，當中絕大部分為珠三角鄉里，部分人更聲稱損失數十萬元。而商號負責人則從鄰埠趕至並刊登聲明，表示自己乃合法營運，而且與「代理商」簽約時亦聲明商品的退貨還款規則，而這些「 代理商」的貨品已過退款期所以不能退款。據報章報道該「商號」之「代理商」人數於內地達數十萬人，涉款逾七億，金額之鉅可在小城起多一條跨海大橋，但又未及「走資司長」走資口既數目。事件一日未清楚，一日都唔能夠評論，但係傳銷與否根本就十分容易明白，就係「邊有咁大隻蛤乸隨街跳」，若果真係咁唔好彩被騙，廣府話有句「有強姦、冇焗賭」，受害者可以回想一下當初，如果唔係自己驚「執輸行頭」的話，沒有好好冷靜分析，又點會咁容易信晒人講壓晒自己全部身家呢？有啲仲要搵埋屋企人同朋友落疊，仲唔係貪字得個貧？
　話說回頭今次上門追數事件，其實都係另一種「執輸行頭」的表現。據報事源內地有人得知小城將推出法例，嚴禁進行傳銷行為，不日之內將會正式取締。消息一出迅速傳遍珠三角，唔少入咗大量貨的「代理商」擔心「商號」出事，紛紛到小城「總部」要求退款，諗住執番幾多得幾多。而「商號」其實又未係真正出事，咁講落「代理商」其實都係聽人講，跟住就信以為真及採取行動，同當初簽約做「代理商」時根本無分別，而且當中十分奇怪係由於公司未到真正出事到人去樓空等，咁呢批「代理商」點解會覺得呢間「商號」會出事呢，咁係唔係連「代理商」都覺得「商號」本身有欺騙成分，但係「代理商」就諗住人呃我我呃人，只要走得快，包保冇上身？但係今次似乎事與願違了。