迷魂榜（上）

一年一度，花旗國頑固保守商人代表又出排行榜，就咁計其經濟自由度鄰埠繼續蟬聯冠軍，小城則跳升一級全球排名二十，亞太區則名列第六拍住獅城、袋鼠國、樹熊國及太陽國。記得去年小城剛上榜就係同一位置，不過全球排名就今年較優，以評分計就多咗零點五分，反觀頭兩位鄰埠及獅城之評分都下跌咗，而頭廿位亦都係評分下跌多過上升。其實以我哋經常睇鄰埠新聞之人，對該基金所作之報告一點都唔陌生，事關自從鄰埠首次升到榜首之後，十幾年嚟年年都講一次，而且每次記者都要最高負責人出嚟回應一下實在悶到抽筋。記得當去年小城首次上榜之後，我哋都喺呢個欄同大家分享過，自己都名叫傳統基金，咁古老守舊又邊度有資格評核人哋之自由度？仲要評晒全個世界咁多個國家地區添。今次小城某大新聞紙再以頭版頭條向全城庶民報告，無非都係想幫手唱好小城，但係只要睇番另一小題內容，就會發覺大家可能只係玩緊自欺欺人。報道另一小題指傳統基金之評分具國際影響力，內容簡介呢個榜之評分制，而兩岸四地依次為鄰埠、小城、寶島及祖國，但係祖國係去到一百四十位，同寶島差咗成百位，即係叫做較為經濟不自由之國家，而經濟較自由之地區國家代表擁有較高之長期經濟增長速度同較繁榮。如果係咁計數何解太陽國有本事排行十九？因為太陽國之經濟衰退經已持續差不多廿年就全世界都知，去邊度搵【較高之長期經濟增長速度】呢？咁點解祖國去年成功保【八】卻又只得一百四十位？唔通又關谷歌事？但係小城上到榜就一定關花旗國事，因為小城官府容許花旗國喺小城開字花檔大賺祖國暴發人仔。