舊墳事件（上）

執笠法務上星期終於主動提出，收起「公職法援」草案中第四條內，公職人員因「名譽」受損而提起訴訟，而執笠法務於記會前依然強調，法案本身只容許公職人員因職務關係才可提訟，而私人關係等不受保障。但係就算係咁樣，都唔能消除庶民對法案之疑慮，若果法案通過咗，官府到時候可以隨時因應喜惡，唔理訴訟成功與否總之要告人，令到被告增加壓力及成本，事關官府大把成本，同時錢都唔係自己搵返嚟嘅，根本就無壓力，從而製造官府壓力，令一般庶民唔敢隨便得罪官府人員。但係執笠法務主動提出修法之後，隨即被爆疑似以權謀私，回歸後無耐有人一次過批出十個舊西洋墳永久墓地，其中一名受益者就係幫執笠法務手多年嘅高級顧問，當執笠法務被記者追問期間，掉低一句唔知道，又解釋當時係其轄下部門可以自我批核就可以，唔需要由佢批，又相信唔涉及俾面關係，但係問題係阿管家婆做嘅所有嘢都係令大眾有唔少疑慮。而兩日後事件越鬧越大，加上老廉經已表咗態會插手事件，即係話佢哋會調查事件，管家婆即刻漏夜向傳媒發聲明，指其父於回歸前去世，而其母亦於回歸前申請舊西洋墳之墓地，所以並唔喺呢十幅墓地嘅其中一幅咁話。庶民一直都唔知而傳媒亦未有報道，原來佢令壽堂真係葬喺舊西洋墳，咁樣想唔令人懷疑都幾難。
　因為舊墳早於回歸後兩三年，就立咗例要由知縣批准至可以擁有永久權，依家單嘢就係喺回歸後同立例之前發生，正一趁無王管嘅時候有人混水摸魚。所以老廉先有咁大反應，好快咁表態話要介入調查，睇吓係唔係有人以權謀私。