當龍頭不是龍頭之後（上）

到今天為止，首兩屆小城官府行將完成歷史任務，大老闆留下的宏觀願景即將由新人接手，究竟當初老闆的宏觀願景是什麼就只有當事人至知，不過庶民卻關心當頭龍產業已經不是龍頭的時候，庶民究竟有何出路？按照老闆當日的安排，乃龍頭帶動周邊，點名支持會議展覽業，亦主力引入以會展發跡的「疑似意大利佬」及「花旗賭王」作其中一位新賭牌持有人。而「花旗賭王」亦不負眾望，就咁將花旗國旗艦酒店複製一個在小城，搞到庶民嘩嘩聲，部份人嘩自己未去過沙漠睇大衛高柏菲，乜都變到出嚟。另一部份人嘩佢根本冇用過腦，直接複製都可以俾佢入到圍。不過「疑似意大利佬」就展現以色列人點樣識做生意，之前已經在本欄介紹過佢點樣以火箭速度回本的驚人財技。口係今時今日龍頭產業都出事口既情況下，好多人都問，小城會展業係唔係可以取代賭業成為新龍頭。當厲害的「疑似意大利佬」成功引發鄰埠會展業的危機感，紛紛到小城插旗以保飯碗，以為真係就咁俾小城攻陷會展業務之後，迫到鄰埠即刻口係機場旁邊建個亞洲博覽館作抗衡，不過地點就真係太隔涉人影都唔多隻，只能作疏導式的輔助性質，主力都仲係位處中心地帶的會展中心。雖然以色列人於小城建立之多功能會展場地同樣位處小城的荒漠地帶，但係就勝在小城真係夠細，就算出入市中心都唔使一粒鐘，大部份商家都覺可以接受。而按當初官府計算，參展商及觀展人都會在小城作一定的花費，可帶動周邊的行業發展。不過官府似乎太過一廂情願，完全忽略了會展業最重要的一個元素——買賣關係，官府一直以為，提供一個有得食有得玩嘅地方，加上價錢又比鄰埠便宜就有競爭力，可以改變東方賭城以會展業作為龍頭產業。