當龍頭不是龍頭之後（下）

官府從來都冇諗過其實鄰埠的會展業唔單止係十幾二十年口既努力，更重要係鄰埠成功地轉型為世界商務金融服務中心之一，而以世界工廠自居的國內廠家則對於鄰埠的商務金融服務求之若渴，雙方明顯的供求關係而形成的會展業可謂牢不可破，形成參展或參觀的商戶只會以小城會展場地作為分流地區之一，與小城官府所期待的目標有成段距離。
　雖然「疑似意大利佬」不斷為客戶帶來世界巨星同亞洲巨星作現場獻唱，又或者搵埋花旗之寶NBA同引入英倫國腳做代表撐場。但只要閣下作為一個商業買手，遠赴外地代表公司利益採購，公司唔會俾成幾萬蚊你又去賭番兩手，或者容許你帶埋成家大細玩番三五七日度假順便公幹。因為兩樣嘢都直接影響你工作口既表現，根本就唔係一個好口既觀展地點。同樣地，參展商更加清楚兩地口既分別，不管你口既賭場或者酒店、食宿等，首要條件就係要成交、可以賣到口既做成生意。相對於鄰埠，小城不管場地與食宿都較為便宜，但係最重要係客源同輔助配套設備，鄰埠都比小城豐富及完善，加上參展商大部分都由鄰埠的商行組成，取代了過往由廠家直接搵客的方式，佢哋更加會選擇參與在本地舉辦的展覽，至少各樣展品都唔需要出口到其他會場，直接提高鄰埠會展業界的競爭力，況且作為商業推廣，當然係搵商業發達的地區，才能吸引到更多不同的客戶，反觀以旅遊消費作主導的城市，商業機遇根本不能與鄰埠相比，要以會議展覽業作為小城的龍頭產業，在配套上必須首先增加行業多樣化，才能增加小城的商業機遇，提高小城會展業的吸引力，這樣又似乎與官府規劃的會展業有著根本性的不同，而且以官府目標的高階客戶，更加因為國際航班的不足，就算有心的客戶都要以鄰埠作為中轉站，才能抵達小城參觀或參展，咁樣小城又如何能以會展作為小城的龍頭產業呢？